Ore i mexü̃ ga Márcu ümatüxü̃ 9:12 - Tupanaarü Ore

¹² Rü Ngechuchu nanangãxü̃, rü ñanagürü nüxü̃: —Aixcüma nixĩ i Ería tá nüxíra núma naxũxü̃ nax chauxü̃pa namexẽxẽãxü̃ca̱x i guxü̃ma. ¿Natürü tü̱xcüü̃ i ore i ümatüxü̃wa i ñaxü̃: “Tupana Nane ya duü̃xü̃xü̃ ixĩcü rü tá ngúxü̃ ninge, rü duü̃xü̃gü rü tá nüxü̃ naxoe”, ñaxü̃?

Ore i mexü̃ ga Márcu ümatüxü̃ 9:12 Referans Kwoze

Ichaía 50:6

Rü chauca̱xwe̱x nüxna chaxã nax choxü̃ nacua̱i̱xgüxü̃ca̱x. Rü yexguma choxü̃ natuxchinagugügu rü tama nüxna chayanuxü̃. Rü tama chidaugachi ga yexguma chauchametüwa nacua̱i̱xgügu rü chixexü̃ chomaxã yaxugügügu.

Ichaía 52:14

Natürü muxü̃ma i duü̃xü̃gü rü tá namaxã naba̱i̱xãchie i ngẽxguma nüxü̃ nadaugügu i nachiwe i poraãcü napíxü̃ rü ãũxü̃ rü ngẽmagagu marü tama nanaduü̃xẽchametüraxü̃.

Ore i mexü̃ ga Luca ümatüxü̃ 23:11

Rü yexguma ga Eróde rü norü churaragü rü poraãcü chixri Ngechuchumaxã nachopetü, rü nagu nidauxcüraxü̃gü. Rü wüxi ga naxchiru ga mexẽchixü̃gu nayacu̱xẽẽgü nax nüxü̃ nacugüexü̃ca̱x. Rü yemawena ga Eróde rü wenaxarü Pirátuxü̃ta Ngechuchuxü̃ namu.

Ichaía 49:7

Rü nüma ya Iraétanüxü̃arü Tupana ya Üünecü ya nüxü̃ rüngü̃xẽẽcü rü ñanagürü ta: —Pa Iraétanüxü̃x, ñu̱xma rü ngẽma togü i nachixü̃anecüã̱xgü rü poraãcü pexü̃ nacugüe, rü pexchi naxaie rü nügüme̱xẽwa penangexmagüxẽxẽ rü norü ãẽ̱xgacügüarü puracütanüxü̃ pixĩgü. Natürü wüxi i ngunexü̃ rü wenatáxarü peporae rü ngẽxguma pexü̃ nadaugügu i ngẽma togü i nachixü̃anegüarü ãẽ̱xgacügü rü pepe̱xegu tá nacaxã́pü̱xügü erü choma ya perü Tupana ya üünecü nax chixĩxü̃ rü pexü̃ chaxuneta nax chorü duü̃xü̃gü pixĩgüxü̃ca̱x. Rü choma rü guxü̃guma chayanguxẽxẽ i ngẽma nüxü̃ chixuxü̃ —ñanagürü.

Chacaría 13:7

Rü Cori ya Tupana ya Guxãxétüwa Ngẽxmacü rü ñanagürü: —¡Pa Tara i Taxrewa Ãmaguxü̃x, rü naxca̱x ixũ i chorü carnéruarü dauruxü̃ rü ngẽma chorü ngü̃xẽẽruxü̃! ¡Rü yama̱x ya yima carnéruarü dauruxü̃ nax nawoonexü̃ca̱x i carnérugü! Rü choma rü tá chanadai i ngẽma carnéruxacügü.

Ore i mexü̃ ga Luca ümatüxü̃ 1:76

Rü ñanagürü ta: “Cumax, Pa Chaunex, rü Tupana ya guxü̃étüwa ngẽxmacüarü orearü uruxü̃maxã tá cuxü̃ naxugü. Erü cuma rü tá nape̱xe quixũ ya Cori nax yoxni duü̃xü̃gümaxã nüxü̃ quixuxü̃ca̱x i nachiga naxü̃pa nax ínanguxü̃.

Maraquía 4:6

Rü nüma ya Ería rü duü̃xü̃gümaxã tá nüxü̃ nixu i chorü ore nax papagü rü nanegümaxã nangüxmüexü̃ca̱x, rü nüma i nanegü rü nanatügümaxã nangüxmüexü̃ca̱x. Erü ngẽxguma tama nügümaxã nangümüegu rü chixexü̃ naxüeamagu rü choma rü tá ngéma chaxũ rü noxtacüma tá chanapoxcue i ngẽma duü̃xü̃gü, rü noxtacüma tá chayanaxoxẽxẽ i ngẽma nachixü̃ane —ñanagürü ya Cori ya Tupana.

Ore i mexü̃ ga Luca ümatüxü̃ 23:39

Rü wüxi ga yema máẽtaxü̃ ga naxrüxü̃ curuchawa ipotaxü̃ rü Ngechuchumaxã naguxchiga, rü ñanagürü: —Ega aixcüma Cristu quixĩxgu, ¡rü cugütama rüngü̃xẽxẽ nax ícunguxuchixü̃ca̱x, rü toxü̃ rü ta rüngü̃xẽxẽ nax ítanguxü̃xü̃ca̱x! —ñanagürü.

Ore i mexü̃ ga Matéu ümatüxü̃ 26:24

Rü Tupana Nane ya duü̃xü̃xü̃ ixĩcü rü tá nayu ngẽxgumarüxü̃ i Tupanaarü ore i ümatüxü̃ nüxü̃ ixuxü̃rüxü̃. Natürü wüxi i ngechaü̃xü̃chi nixĩ naxca̱x i ngẽma yatü i ínaxuaxü̃xü̃. Rü narümemae chi nixĩ ga noxtacüma taxũchima nax nabuxü̃ —ñanagürü.

Ore i mexü̃ ga Matéu ümatüxü̃ 16:21

Rü yemawena inanaxügü nax norü ngúexü̃gümaxã nüxü̃ yaxuxü̃ ga yema tá nüxü̃ üpetüxü̃. Rü ñanagürü: —Choma rü Yerucharéü̃wa tá chaxũ. Rü ngéma poraãcü ngúxü̃ tá choxü̃ ningexẽẽgü i Yudíugüarü ãẽ̱xgacügü rü chacherdótegüarü ãẽ̱xgacügü rü ngẽma ngúexẽẽruü̃gü i mugüwa ngu̱xẽẽtaegüxü̃, rü tá choxü̃ nima̱xgü. Natürü ngẽma tomaepü̱x i ngunexü̃gu rü wena táxarü ícharüda —ñanagürü.

Chacaría 11:13

Rü nüma ga Cori ya Tupana rü choxü̃ ñanagürü: —¡Ngĩxü̃ nayaxu i ngẽma diẽru i naxca̱x mecü nax choxü̃́ ngĩmaxã naxütanügücü, rü ngẽma üwechixü̃ i chopata ya taxü̃newa ngẽxmaxü̃pe̱xegu ngĩxü̃ yawotanü! —ñanagürü. Rü yexguma ga choma rü ngĩxü̃ chayaxu ga yema diẽru rü Tupanapatawa yexmaxü̃ ga üwechixü̃pe̱xegu ngĩxü̃ chayawotanü.

Wiyaegü 74:22

¡Inachi, Pa Tupanax, rü ínapoxü̃ i ngẽma cuxca̱x mexü̃! ¡Rü nüxna nacua̱xãchi nax torü uanügü i naechitamare maxẽxü̃ rü guxü̃guma chixexü̃ cumaxã nixugüe!

Ore i mexü̃ ga Márcu ümatüxü̃ 9:13

Natürü i choma rü pemaxã nüxü̃ chixu, rü Ería rü marü núma naxũ. Natürü ga duü̃xü̃gü rü nümagü nanaxwa̱xegüxü̃ãcüma poraãcü chixri namaxã nachopetü, yexgumarüxü̃ ga ore ga ümatüxü̃wa nüxü̃ yaxuxü̃rüxü̃ —ñanagürü.

Ore i mexü̃ ga Márcu ümatüxü̃ 10:33

Rü ñanagürü nüxü̃: —Pema nüxü̃ pecua̱x nax marü ingaicaxü̃ nax Yerucharéü̃wa ingugüxü̃. Rü ngéma rü Tupana Nane ya duü̃xü̃xü̃ ixĩcü rü tá chacherdótegüarü ãẽ̱xgacügüna rü mugüwa ngúexẽẽtaegüxü̃na nanamugü. Rü nümagü rü tá yu namaxã naxuegugü, rü ñu̱xũchi tá ngẽma Rómacüã̱xgüna nanamugü.

Ngechuchuarü ngúexü̃gü ga yamugüxü̃arü puracüchiga 1:6

Rü yema duü̃xü̃gü ga Ngechuchuxü̃tagu ngutaque̱xegüxü̃ rü nüxna naca rü ñanagürügü nüxü̃: —Pa Corix, ¿ẽ̱xna ñu̱xma tá nixĩ i marü ícunawoxü̃xü̃ i nua tochixü̃anewa i torü uanügüarü churaragü nax wenaxarü tomatama namaxã itacuáxü̃ca̱x i ñaa Iraéane? —ñanagürügü.

Ngechuchuarü ngúexü̃gü ga yamugüxü̃arü puracüchiga 4:11

Rü gumátama Ngechuchu nixĩ ga pema nüxü̃ pexoecü. Natürü ga Tupana rü nayamucuchi nax guxü̃arü ãẽ̱xgacü yixĩxü̃ca̱x.