Ore i mexü̃ ga Márcu ümatüxü̃ 11:25 - Tupanaarü Ore

²⁵ Rü ngẽxguma peyumüxẽgügu, natürü nangẽxmagu i ta̱xacürü guxchaxü̃ i toguemaxã pexü̃́ ngẽxmaxü̃, rü name i tüxü̃́ nüxü̃ perüngü̃ma i ngẽma nax Penatü ya daxũgucü rü ta pexü̃́ nüxü̃ iyanangümaxü̃ca̱x i perü pecadugü.

Ore i mexü̃ ga Márcu ümatüxü̃ 11:25 Referans Kwoze

Colosenses 3:13

Rü name nixĩ i wüxichigü i pema pegümaxã yáxna pexĩnüe. Rü ngẽxguma chi pegümaxã penuegu, rü name nixĩ i pegüxü̃́ nüxü̃ perüngü̃ma. Rü yexgumarüxü̃ ga tórü Cori pexü̃́ nüxü̃ iyanangümaxü̃ i perü chixexü̃gü, rü ngẽxgumarüxü̃ ta i pema rü name nixĩ i tüxü̃́ nüxü̃ iperüngüma i tümaarü guxchaxü̃gü.

Efesios 4:32

Rü name nixĩ i pegü perüngü̃xẽẽgü rü pegümaxã pemecümagü, rü pegüxü̃́ pengechaü̃tümüxü̃gü i wüxichigü. Rü ngẽxguma petanüwa texé ta̱xacürü chixexü̃ pexca̱x ü̱xgu, rü name i tüxü̃́ nüxü̃ perüngü̃ma ya wüxíechigü, yema Cristugagu Tupana pexü̃́ nüxü̃ rüngü̃maxü̃rüxü̃ ga perü pecadugü.

Ore i mexü̃ ga Luca ümatüxü̃ 6:37

¡Rü taxṹ i togüxü̃ pixuxü̃! Rü ngẽxguma ya Tupana rü taxũtáma pexü̃ nixu. ¡Rü taxṹ i Tupanaarü poxcu namaxã pexueguxü̃ i togü! Rü ngẽxguma ya Tupana rü taxũtáma poxcu pemaxã naxuegu. ¡Rü nüxü̃́ nüxü̃ perüngümae i norü chixexü̃ i togü! Rü ngẽxguma ya Tupana rü tá pexü̃́ nüxü̃ narüngüma i perü chixexü̃.

Ore i mexü̃ ga Matéu ümatüxü̃ 6:12

¡Rü toxü̃́ nüxü̃ irüngüma i ngẽma torü chixexü̃ i taxüxü̃ ngẽxgumarüxü̃ i toma rü tüxü̃́ nüxü̃ tarüngü̃maexü̃rüxü̃ ya yíxema chixexü̃ tomaxã ügüxe!

Ore i mexü̃ ga Matéu ümatüxü̃ 5:23

Rü ngẽxguma Tupanapatawa cunangexgu i curü diẽru, rü ngéma nüxna cucua̱xãchigu nax ta̱xacüca̱x cumaxã nanuxü̃ i cuenexẽ, ¡rü ngẽxma Tupanapatagutama naxǘ i ngẽma curü ãmare i Tupanana cuxãxchaü̃xü̃! ¡Rü cuenexẽxü̃tawa naxũ, rü namaxã yamexẽẽxíra i ngẽma cuxchi nax naxaixü̃! Rü ngẽmawena rü marü name i Tupanapataca̱x cutaegu nax Tupanana cuyaxãxü̃ca̱x i curü diẽru.

Popera ga Chantiágu ümatüxü̃ 2:13

Erü guxãma ya yíxema tama tümamücügü tüxü̃́ ngechaü̃tümüü̃güxe, rü Tupana rü taxũtáma nüxü̃́ tangechaü̃tümüü̃güãcüma tüxna naca i tümaarü maxü̃chiga. Natürü yíxema tümamücügü tüxü̃́ ngechaü̃tümüü̃güxe, rü taxũtáma tamuü̃e i ngẽxguma Tupana tüxna caxgux, erü nüxü̃́ tangechaü̃tümüü̃güãcüma tá tüxna naca.

Ore i mexü̃ ga Matéu ümatüxü̃ 6:5

Rü ngẽxguma peyumüxẽgügu, rü tama name i ngẽma nügü írümegünetaxü̃rüxü̃ pixĩgü. Erü nümagü rü ngẽxguma nayumüxẽgügu, rü norü me nixĩ nax chiãcü nayumüxẽgüxü̃ i ngutaque̱xepataü̃güwa rü ĩanegüarü namagüwa nax duü̃xü̃gü nüxü̃ daugüxü̃ca̱x. Rü aixcüma pemaxã nüxü̃ chixu rü ngẽma nax duü̃xü̃gü nüxü̃ daugüxü̃xicatama nixĩ i norü ãmare.

Ore i mexü̃ ga Luca ümatüxü̃ 18:11

Rü yema Parichéu rü yexma nachi, rü ñaaãcü nayumüxẽ: “Pa Tupanax, moxẽ cuxna chaxã erü tama togürüxü̃ chixexü̃ chaxü, rü tama ngẽmagürüxü̃ changĩ́ta̱a̱x, rü tama chixri chamaxü̃, rü tama nai i ngexü̃maxã ichape. Rü bai i ñaa yatü i Rómaarü ãẽ̱xgacüca̱x diẽru ngĩxü̃ dexü̃rüxü̃ chixĩ.

Chacaría 3:1

Rü yexguma chango̱xetügu rü nüma ga Cori ya Tupana rü choxü̃ nanawe̱x ga Yochué ga chacherdótegüarü ãẽ̱xgacü. Rü nüma ga Yochué rü Cori ya Tupanaarü duü̃xü̃ ga daxũcüã̱xpe̱xegu nachi. Rü Yochuéarü tügünecüwawa nayexma ga Chataná ga nüxü̃ ixugüchaü̃xü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 11:4

Rü ngẽma taxre i orearü uruü̃gü nixĩ i norü cua̱xruxü̃ i ngẽma taxre i nanetü i oribugü rü ngẽma taxre i omüarü üruü̃gü i tórü Cori ya ñoma i naanearü yora ixĩcüpe̱xewa ngẽxmagüxü̃.

Ore i mexü̃ ga Luca ümatüxü̃ 18:13

Natürü ga gumá yatü ga Rómaarü ãẽ̱xgacüca̱x diẽru ngĩxü̃ decü, rü yáxü̃gu narüxã̱ũ̱x. Rü namuü̃ ga daxũ nax nadawenüxü̃, rü yema norü ngechaü̃maxã nügü napaxremü, rü ñanagürü: “Pa Tupanax, ¡Cuxü̃́ changechaü̃tümüxü̃! Erü wüxi i pecaduã́xü̃ chixĩ”, ñanagürü ga gumá yatü.