Ore i mexü̃ ga Márcu ümatüxü̃ 1:5 - Tupanaarü Ore

⁵ Rü guxü̃ma ga duü̃xü̃gü ga Yudéaanecüã̱x rü Yerucharéü̃cüã̱x rü yéma Cuáü̃xü̃tawa naxĩĩxü̃ nax iyanaxĩnüẽxü̃ca̱x. Rü nüxü̃ nixugüe ga norü pecadugü, rü nüma ga Cuáü̃ rü natü ga Yudáü̃wa ínanabaiü̃xẽxẽ.

Ore i mexü̃ ga Márcu ümatüxü̃ 1:5 Referans Kwoze

Ngechuchuarü ngúexü̃gü ga yamugüxü̃arü puracüchiga 19:18

Rü muxü̃ma ga yema yaxõgüxü̃ rü yéma ningugüetanü, rü guxü̃ ga duü̃xü̃güpe̱xewa nüxü̃ nixugüe ga guxü̃ma ga norü chixexü̃ ga ü̃pa naxügüxü̃.

Ngechuchuarü ngúexü̃gü ga yamugüxü̃arü puracüchiga 2:38

Rü Pedru nanangãxü̃, rü ñanagürü: —¡Nüxü̃ perüxoe i pecüma i chixexü̃ rü Tupanaca̱x pedaugüe rü Ngechuchuégagu ípebaiü̃ nax pexü̃́ nüxü̃ nangü̃maxü̃ca̱x i perü pecadugü ya Tupana! Rü Tupana tá pexna nanamu i Naãxẽ ya Üünecü.

Ore i mexü̃ ga Cuáü̃ ümatüxü̃ 3:23

Rü Cuáü̃ ga baiü̃ẽẽruxü̃ rü Enóü̃arü ĩanewa ga Charíü̃arü ngaicamana rü ínanabaiü̃ẽxẽ ta ga duü̃xü̃gü, yerü yéma nayexma ga taxü̃ ga dexá. Rü yema yéma íngugüetanüxü̃ ga duü̃xü̃gü, rü Cuáü̃ ínayabaiü̃xẽẽtanü.

Ore i mexü̃ ga Cuáü̃ ümatüxü̃ 1:28

Rü yema nachica ga Betániagu ãégaxü̃wa nixĩ ga Cuáü̃ ga nüxü̃ yaxuxü̃ ga yema ore. Rü yema Betánia rü natü ga Yudáü̃arü tocutüwa nayexma. Rü yéma nixĩ ga Cuáü̃ ga duü̃xü̃güxü̃ ínabaiü̃xẽẽxü̃.

Ore i mexü̃ ga Matéu ümatüxü̃ 4:25

Rü Ngechuchuwe narüxĩ ga muxü̃ma ga duü̃xü̃gü ga Gariréaanecüã̱x, rü Decaporíchiuanecüã̱x rü Yerucharéü̃cüã̱x, rü Yudéaanecüã̱x, rü Yudáü̃arü tocutücüã̱x.

Ucu̱xẽgüchiga 28:13

Ngẽma duü̃xü̃ i norü pecadu icúxü̃ rü taxũtáma mexü̃ nüxü̃ naxüpetü. Natürü ngẽma duü̃xü̃ i nüxü̃ ixuxü̃ i norü pecadu rü nüxü̃ rüxoxü̃, rü Tupana rü tá nüxü̃́ nüxü̃ inayarüngüma.

Wiyaegü 32:5

Rü yexguma nagu charüxĩnügu ga chorü maxü̃ nax naturaxü̃ rü cumaxã nüxü̃ chixu ga guxü̃ma ga chorü pecadugü rü taxuxü̃ma chicu̱x. Rü chaugümaxã ñacharügü: —Cori ya Tupanamaxã tá nüxü̃ chixu i chorü chixexü̃gü —ñachagürü. Rü cumax, Pa Corix, rü choxü̃́ nüxü̃ icurüngüma ga guxü̃ma.

Yochué 7:19

Rü yexguma ga Yochué rü Acáü̃xü̃ ñanagürü: —Pa Chaunex, name nixĩ i cunataxẽxẽ rü nüxü̃ quicua̱xüxü̃ ya Cori ya Iraétanüxü̃arü Tupana. ¡Rü chomaxã nüxü̃ ixu i ta̱xacü nax cuxüxü̃! ¡Rü taxṹ icuyacúxü̃! —ñanagürü.

Ore i mexü̃ ga Márcu ümatüxü̃ 1:4

Rü Cuáü̃ rü chianexü̃wa ga taxúema íxãpataxü̃wa nango̱x rü yéma ínanabaiü̃xẽxẽ ga duü̃xü̃gü. Rü namaxã nüxü̃ nixu nax Tupanaca̱x nawoeguxü̃ rü ínabaiü̃xü̃ nax Tupana nüxü̃́ nüxü̃ narüngü̃maxü̃ca̱x ga norü pecadugü.

Ore i mexü̃ ga Márcu ümatüxü̃ 1:6

Rü naxchiru ga Cuáü̃ rü caméyuta̱xanaxca̱x nixĩ, rü norü goyexü̃ rü naxcha̱xmüü̃naxca̱x nixĩ. Rü beruremaxã rü munümaxã naxãwemü.

Ore i mexü̃ ga Cuáü̃ ümatüxü̃ 5:35

Cuáü̃ rü wüxi ga omü ga iya̱u̱xracüüxü̃ rü pexü̃ báxixü̃rüxü̃ nixĩ. Rü pema rü paxaãchi namaxã petaãẽgü.

Popera ga Chantiágu ümatüxü̃ 5:16

Rü ngẽmaca̱x name nixĩ i pegümaxã nüxü̃ pixu i perü pecadugü rü pegüca̱x peyumüxẽgü nax pexca̱x yataanegüxü̃ca̱x. Rü yimá mecü ya yatüarü yumüxẽ rü aixcüma napora rü taxü̃ i mexü̃ nawa ínanguxuchi.