Ore i mexü̃ ga Márcu ümatüxü̃ 1:21 - Tupanaarü Ore

²¹ Rü ĩane ga Capernáü̃wa nangugü. Rü yexguma ngü̃xchigaarü ngunexü̃wa nanguxgu, rü Ngechuchu rü ngutaque̱xepataü̃wa naxũ rü inanaxügü ga nax nangúexẽẽtaexü̃.

Ore i mexü̃ ga Márcu ümatüxü̃ 1:21 Referans Kwoze

Ore i mexü̃ ga Márcu ümatüxü̃ 6:2

Rü yexguma ngü̃xchigaarü ngunexü̃wa nanguxgu rü inanaxügü nax nangúexẽẽtaexü̃ ga ngutaque̱xepataü̃wa. Rü yema muxü̃ma ga duü̃xü̃gü ga yéma irüxĩnüexü̃, rü naba̱i̱xãchiãẽgü. Rü nügüna nacagüe rü ñanagürügü: —¿Ngextá naxca̱x nangu̱x i guxü̃ma i ngẽma ngu̱xẽẽtae? ¿Rü ngextá nanayaxu i ngẽma cua̱x? ¿Rü ñuxãcü nanaxü i ngẽma mexü̃gü i taxü̃gü i naxüxü̃?

Ore i mexü̃ ga Márcu ümatüxü̃ 1:39

Rü yemaacü ga Ngechuchu rü guxü̃ma ga Gariréaanegu nixũãgüchigü. Rü wüxichigü ga ĩanearü ngutaque̱xepataü̃wa rü nüxü̃ nixuchigü ga ore ga mexü̃, rü ínayawoxü̃ẽtanü ga ngo̱xogü.

Ore i mexü̃ ga Matéu ümatüxü̃ 4:23

Rü guxü̃ ga Gariréaanegu nixũgüchigü ga Ngechuchu. Rü wüxichigü ga ĩanewa, rü duü̃xü̃güarü ngutaque̱xepataü̃wa ningu̱xẽẽtaechigü. Rü duü̃xü̃gümaxã nüxü̃ nixuchigü ga ore ga mexü̃ nax ãẽ̱xgacü yixĩxü̃ ya Tupana. Rü yema duü̃xü̃gü ga ida̱xaweexü̃ rü nanameexẽxẽ nawa ga guxü̃ma ga norü da̱xawegü rü norü ngu̱xunegü.

Ngechuchuarü ngúexü̃gü ga yamugüxü̃arü puracüchiga 17:2

Rü guma ngutaque̱xepataü̃wa naxũũxü̃ ga Pauru, yerü woetama yema nixĩ ga nacüma. Rü tomaepü̱x ga ngü̃xchigaarü ngunexü̃gu rü Tupanaarü ore ga ümatüxü̃chiga yema Yudíugümaxã yéma nidexa.

Ngechuchuarü ngúexü̃gü ga yamugüxü̃arü puracüchiga 18:4

Rü guxü̃ ga ngü̃xchigaarü ngunexü̃gu rü Yudíugüarü ngutaque̱xepataü̃wa naxũũxü̃ ga Pauru, rü duü̃xü̃gümaxã nidexaxü̃, rü nayaxucu̱xẽgüxü̃. Rü yexgumarüxü̃ ta nayaxucu̱xẽgüxü̃ ga yema duü̃xü̃gü ga tama Yudíugü ixĩgüxü̃.

Ore i mexü̃ ga Matéu ümatüxü̃ 4:13

Natürü tama ĩane ga Nacharétugu narüxã̱ũ̱x. Rü ĩane ga Capernáü̃wa naxũ nax yexma yaxãchiü̃xü̃ca̱x. Rü guma ĩane rü naxtaxa ga Gariréacutüwa nayexma ga Chaburóü̃anewa rü Netaríanewa.

Ore i mexü̃ ga Luca ümatüxü̃ 13:10

Rü wüxi ga ngü̃xchigaarü ngunexü̃gu rü Ngechuchu nangu̱xẽẽtae ga wüxi ga ngutaque̱xepataü̃wa.

Ore i mexü̃ ga Luca ümatüxü̃ 10:15

Rü pemax, Pa Capernáü̃cüã̱xgü i Duü̃xü̃güx ¿ẽ̱xna pema nagu perüxĩnüegu rü daxũguxü̃ i naanewa tá pexĩxü̃? Pemaxã nüxü̃ chixu rü poxcuchicaxü̃ i naanetüü̃wa tá nixĩ i pewogüxü̃ —ñanagürü.

Ore i mexü̃ ga Luca ümatüxü̃ 4:16

Rü Nacharétuwa naxũ ga Ngechuchu. Rü gumá nixĩ ga ĩane ga nanatü rü naé nawa nayaxẽẽgüne. Rü ngü̃xchigaarü ngunexü̃gu rü ngutaque̱xepataü̃gu naxücu, yerü yema nixĩ ga nacüma ga guxü̃ ga ngü̃xchigaarü ngunexü̃gu. Rü yéma inachi rü duü̃xü̃güca̱x nüxü̃ nadaumatü ga Tupanaarü ore ga ümatüxü̃.

Ore i mexü̃ ga Márcu ümatüxü̃ 10:1

Rü Ngechuchu rü Capernáü̃arü ĩanewa inaxũãchi. Rü Yudéaanewa naxũ rü nawa nangu ga yema naane ga natü ga Yudáü̃arü tocutüwa yexmaxü̃. Rü wenaxarü naxca̱x nangutaque̱xegü ga duü̃xü̃gü. Rü nüma rü inanaxügü nax guxü̃gurüxü̃ nangúexẽẽãxü̃.

Ore i mexü̃ ga Márcu ümatüxü̃ 2:1

Rü yixcama ga ñuxre ga ngunexü̃wena rü wenaxarü Capernáü̃gu naxücu ga Ngechuchu. Rü yexguma duü̃xü̃gü nüxü̃ cuáchigagügu nax marü gumá ĩpata ga nawa nayexmanewa nayexmaxü̃, rü yexma nangutaque̱xegü ga muxü̃ma ga duü̃xü̃gü. Rü düxwa duü̃xü̃gümaxã nanapá ga naa̱xtü ga gumá ĩpata. Rü nüma ga Ngechuchu rü namaxã nüxü̃ nixu ga ore i mexü̃.

Ore i mexü̃ ga Márcu ümatüxü̃ 1:20

Rü Ngechuchu rü naxca̱x naca. Rü nümagü rü yéma nguewa tüxü̃ nata̱xgü ga nanatü ga Chebedéu namaxã ga tümaarü puracütanüxü̃, rü Ngechuchuwe narüxĩ.

Ore i mexü̃ ga Márcu ümatüxü̃ 1:29

Rü yexguma ngutaque̱xepataü̃wa ínaxũxũxgu ga Ngechuchu, rü Chantiágumaxã rü Cuáü̃maxã Chimóü̃ rü Andrépatawa naxũ.

Ore i mexü̃ ga Márcu ümatüxü̃ 1:33

Rü guxü̃ma ga yema ĩanecüã̱x rü yexma gumá ĩpataarü ĩã̱xgu naxca̱x nangutaque̱xegü.

Ore i mexü̃ ga Márcu ümatüxü̃ 3:1

Rü wenaxarü ngutaque̱xepataü̃gu naxücu ga Ngechuchu. Rü yéma nayexma ga wüxi ga yatü ga norü wüxichacüüwa yumécü.

Ore i mexü̃ ga Luca ümatüxü̃ 4:23

Rü Ngechuchu rü ñanagürü nüxü̃: —Choma nüxü̃ chacua̱x rü tá chomaxã penaxuxuchi i ngẽma ore i ñaxü̃: “Pa Dutúrux ¡Cugütama rümexẽxẽ!” ñaxü̃. Rüe̱xna tá choxü̃ ñaperügügü: “Yema mexü̃ ga taxü̃ ga nüxü̃ taxĩnüexü̃ ga Tupanaarü poramaxã cuxüxü̃ ga Capernáü̃wa, rü tanaxwa̱xe i nua curü ĩanewa rü ta nax cunaxüxü̃”, ñaperügügü tá —ñanagürü.