Miquéa 7:2 - Tupanaarü Ore

² Rü ñoma i naanewa rü marü nataxuma i duü̃xü̃gü i mexü̃gu rüxĩnüexü̃ rü Tupanamaxã ixaixcümagüxü̃. Rü wüxichigü rü naxca̱x nadau nax ñuxãcü guxchaxü̃ togueca̱x naxüxü̃. Rü ngẽxguma guxchaxü̃ ngẽxmagu, rü guxü̃ma rü ínamemare nax nügü nada̱i̱xü̃.

Miquéa 7:2 Referans Kwoze

Wiyaegü 12:1

Pa Cori Pa Tupanax ¡paxa toxü̃ rüngü̃xẽxẽ! Erü marü nataxuma i aixcüma cuxü̃́ yaxõgüxü̃. Rü ñoma i naanewa marü inarüxo i ngẽma duü̃xü̃gü i aixcüma mexü̃gu rüxĩnüexü̃.

Ichaía 57:1

Rü ngẽxguma nayu̱xgu i wüxi i duü̃xü̃ i mecümaxü̃ rü duü̃xü̃güaxü̃́ nanataxuraü̃mare. Rü ngẽxguma nayuegu i duü̃xü̃gü i mecümaxü̃ rü taxúema nüxü̃ tacua̱xéga nax nawa ínanguxü̃xü̃ i ñoma i naanearü chixexü̃.

Yeremía 5:26

Erü chorü duü̃xü̃gütanüwa rü nangẽxma i yatügü i chixexü̃ ügüxü̃. Rü ngẽma yatügü rü ñoma werigüca̱x yüta ixüxü̃rüxü̃ norü doramaxã chixexü̃gu nanayixẽxẽ i ngẽma togü i duü̃xü̃gü.

Ichaía 59:7

Rü pepaxaãẽgü nax pemáetagüxü̃ rü tüxü̃ pima̱x ya yíxema taxuxü̃ma i chixexü̃ üxe. Rü máetaguxicatama perüxĩnüe rü ngẽmaca̱x penadai i duü̃xü̃gü rü ngẽma ípechopetüxü̃wa rü guxü̃ma nachixe.

Ucu̱xẽgüchiga 1:11

Erü ñanagürügü tá cuxü̃: —¡Nua naxũ rü totanügu naxã! ¡Rü ngĩxã ítayacu̱xeü̃gü nax yamáxü̃ca̱x rü nüxü̃́ ingĩ́exü̃ca̱x i ngẽma duü̃xü̃ i tama ũãẽxü̃ i nua üpetüxü̃!

Yeremía 16:16

Natürü i ñu̱xma rü petanüwa tá chanamugü i muxü̃ma i perü uanügü nax ngẽmaãcü pexü̃ ínayauxü̃xü̃ca̱x ñoma choxni ínayauxü̃xü̃rüxü̃. Rü ngẽmawena rü petanüwa tá chanamugü i togü i perü uanügü i ñoma cueneetanüxü̃rüxü̃ pexca̱x daugüxü̃ i guxü̃nema ya ma̱xpǘnegügu rü ngüchitaeruxü̃gügu rü woo nutagüarü ãxmaxü̃gügu nax pexü̃ nada̱i̱xü̃ca̱x.

1 Chamué 24:11

¡Rü dücax, mea nuxã nadawenü, Pa Ãẽ̱xgacüx, i ñaa cho̱xme̱xwa ngẽxmaxü̃! ¿Tama ẽ̱xna curü gáuxü̃chirutüchi yixĩxü̃ i ñaa? Rü ngẽmawa nüxü̃ cucua̱x nax marü chi cuxü̃ nax chimáxü̃. Rü ngẽmawa nüxü̃ cucua̱x, Pa Ãẽ̱xgacüx, nax taxuxü̃ma i chixexü̃ cumaxã chaxüxchaü̃xü̃, rü tama chanaxwa̱xexü̃ nax chacuechitaexü̃ rü bai i ñuxgu ta̱xacürü chixexü̃ cumaxã chaxüxü̃. Natürü i cumax, Pa Ãẽ̱xgacüx, rü chowe quingechigü nax choxü̃ quimáxü̃ca̱x.

Miquéa 3:10

Rü Yerucharéü̃wa rü Chióü̃wa penadai i duü̃xü̃gü rü nüxna penapu i norü naane nax nagu penaxüxü̃ca̱x ya pepatagü ya itaxü̃ne.

Auxexü̃chiga 4:18

Rü torü uanügü rü toxca̱x nadauxü̃taegü, rü yemaca̱x taxucürüwa ĩanearü namagüwa taxĩ. Rü marü ningaica nax tayuexü̃ rü marü nawa nangu i ora nax toxü̃ nada̱i̱xü̃.

Yeremía 5:16

Rü guxü̃ma i nümagü rü daitanüxü̃ i tama muü̃exü̃ nixĩgü. Rü ngẽxguma norü würa tüxü̃ namaxü̃gu rü tama naguxchinü rü wüxicana tüxü̃ nima̱x.

Ucu̱xẽgüchiga 12:6

Rü ngẽma norü ore i ngẽma duü̃xü̃ i chixexü̃gu maxü̃xü̃ rü yuwa nanaga, natürü ngẽma norü ore ya yimá yatü ya mexü̃gu rüxĩnücü rü maxü̃wa nanaga.

Wiyaegü 57:6

Ngẽma chomaxã rüxuanüã̱xgüxü̃ rü cha̱u̱xca̱x nanaxügü i wüxi i yauxruxü̃ nax ngẽmagu changuxü̃ca̱x. Rü chomaxü̃wa nanaxügü i ãxmaxü̃, natürü nümatama nagu nayi.

1 Chamué 26:20

Rü tama chanaxwa̱xe i Tupanaarü duü̃xü̃güarü naanearü yáxü̃gu chayu i ngextá togü i tupanaxü̃ íyacua̱xüü̃güxü̃wa. Natürü i cumax, Pa Ãẽ̱xgacüx, rü ñoma wüxi i naixchinaweca̱x idauxü̃rüxü̃ cha̱u̱xca̱x cudau rü ñoma wüxi i ngugaca̱x idauxü̃rüxü̃ chowe quingechigü i daa ma̱xpǘnegüwa —ñanagürü.

Wiyaegü 10:9

Rü ñoma leóü̃ i naxmaxü̃wa naeü̃ca̱x idawenüxü̃rüxü̃ nügü nixĩxẽxẽ i ngẽma yatü i chixexü̃. Rü ngéma iyacúxü̃wa tüxü̃ nananguxẽxẽ ya yíxema turaxe nax ngẽmaãcü tüxü̃ yayaxuxü̃ca̱x. Rü ngẽxguma tüxü̃ yayaxu̱xgu rü marü taxucürüwama nüxna tiña.

Ichaía 9:19

Rü yimá Cori ya Tupana ya Guxãétüwa Ngẽxmacüarü nugagu nixĩ i yaxãxü̃ i Iraétanüxü̃arü naane, rü ngẽma üxüema nixĩ i yaguxü̃ ya ĩane. Rü duü̃xü̃gü rü taxũtáma nügüenexẽmaxã nügü nangechaü̃gü. Rü taiyamaxã tá nanaxĩ̱xãchiãẽgü. Rü yíxema norü tügünecüwagu ãchixü̃xẽ rü tá tümawemüca̱x nangĩ̱x rü noxtacüma nayaga, natürü tá nataiyaama. Rü ngẽma to rü tá yíxema norü to̱xwecüwagu ãchiü̃xẽ rü tá tüxna nanapu i tümaarü õna, natürü taxũtáma nüxü̃́ ningu. Rü duü̃xü̃gü rü düxwa tá naxacügümaxã nixãwemü.

Yeremía 8:6

Rü pegaca̱x meama icharüxĩnü, natürü taxúexü̃ma chaxĩnü nax texé chomaxã nüxü̃ ixuxü̃ nax nüxü̃ tarüxoxü̃ i tümaarü chixexü̃. ¡Rü chomaxã nüxü̃ tixu nax ta̱xacürü guxchaxü̃ yixĩxü̃ i pemaxã chaxüxü̃! Rü guxü̃ma rü napaxaãxẽ nax chixexü̃ naxüxü̃, ñoma cowaru i paxãma daiwa ñaxü̃rüxü̃.

Echequié 22:12

Rü curü duü̃xü̃gütanüwa nangẽxma i duü̃xü̃gü i diẽruca̱x máetagüxü̃. Rü cuwa nangẽxma i duü̃xü̃gü i taxü̃ i üétüca̱x tüxna cagüxü̃ ya yíxema diẽruca̱x nüxna cagüxe. Rü ngẽmaãcü taxü̃ i chixexü̃ naxügü erü tüxü̃́ nangĩ̱x ya yíxema namücügü rü ngẽmagagu choxü̃ inarüngüma. Rü choma ya Cori ya Tupana nixĩ i nüxü̃ chixuxü̃ i ngẽma” —ñanagürü.

Echequié 24:6

Rü nüma ya Cori ya Tupana rü ñanagürü: —¡Wüxi i taxü̃ i ngechaü̃ nixĩ i cuxca̱x, Pa Máetatanüxü̃arü Ĩanex ya Yerucharéü̃x! Erü ngẽma curü chixexü̃ rü ñoma wüxi ya panera ya ãü̃cürüxü̃ nixĩ rü tama inayi i ngẽma curü ãũãchixü̃. ¡Rü ñu̱xmax i cumax, Pa Echequiéx, rü ínacuixü̃ i wüxichigü i ngẽma namachi ñu̱xmata nangeãcu ya yima panera!

Ochéa 5:1

Rü Cori ya Tupana rü ñanagürü ta: —¡Choxǘ iperüxĩnüe, Pa Chacherdótegüx! ¡Rü choxü̃́ iperüxĩnüe, Pa Iraéanecüã̱xgüx! ¡Rü choxü̃́ iperüxĩnüe Pa Ãẽ̱xgacügütanüxü̃ i Iraéanemaxã Icua̱xgüxü̃! Choma rü tá pexü̃ chapoxcue erü peyawomüxẽẽgü i chorü duü̃xü̃gü, rü yexeraãcü chixexü̃gu penayixẽxẽ i ngẽma Iraéanecüã̱xgü. Rü pemax, rü penamu nax yima ngutaque̱xepataü̃gü ya Mispáwa rü Tabóxwa ngẽxmagünewa tupananetagüxü̃ yacua̱xüü̃güxü̃.

Miquéa 2:8

Rü pemax, Pa Ãẽ̱xgacügüx, rü Tupana rü ñanagürü pexü̃: —Pema rü namaxã perüxuanü i ngẽma chorü duü̃xü̃gü. Rü yixema churaragü i daiwa ne ĩxẽ rü tataãẽgü erü nagu tarüxĩnüe rü tümapatawa rü marü taxuxü̃táma ta̱xacürü guxchaxü̃ tüxü̃ nangupetü. Natürü ngẽxguma ítangugügu rü pema rü tüxna penapu i tümachiru i mexü̃.

Miquéa 3:2

Pema rü naxchi pexai i ngẽma mexü̃ rü perü me nixĩ i ngẽma chixexü̃. Rü pema rü ñoma woca imáxü̃rüxü̃ pixĩgü namaxã i chorü duü̃xü̃gü. Rü pema rü ñoma woca icauxcha̱xmüxü̃rüü̃ãcü namaxã ipecua̱x. Rü peyacua̱i̱xgü rü ñoma namachi i íxraxü̃gu chexexü̃ nax imuxraxü̃rüxü̃ namaxã pechopetü i ngẽma chorü duü̃xü̃gü.

Chacaría 11:6

Rü ngẽxgumarüxü̃ ta i ngẽma duü̃xü̃gü i ñaa nachixü̃anewa maxẽxü̃ rü taxũtáma choxü̃́ nangechaü̃tümüxü̃gü. Rü to i nachixü̃aneme̱xẽgu rü ngẽmaarü ãẽ̱xgacüme̱xẽgu tá chanayixẽxẽ. Rü ngẽma ãẽ̱xgacü rü tá nanachixexẽxẽ i ñaa nachixü̃ane. Rü ngẽxguma i choma rü taxúexü̃táma naxme̱xwa íchapoxü̃. Rü choma i Cori ya Tupana nixĩ i nüxü̃ chixuxü̃ i ngẽma —ñanagürü.

Wiyaegü 12:2

Rü nügütanüwa i duü̃xü̃gü rü nügü nawomüxẽẽgü. Rü mea nidexagüneta rü tama aixcümaxü̃ nixugü.

Ichaía 3:5

Rü perü ĩanewa rü tá taxü̃ i guxchaxü̃ ínangu, rü duü̃xü̃gü rü tá nügü nadai, rü woo nügümücügümaxã rü tá ta nügü nadai. Rü ngẽma ingextü̱xüxü̃ rü tá yaxguã̱xgüxü̃ tachoxü̃gagü, rü ngẽma duü̃xü̃gü i taxúema nüxü̃ cuáxchaxü̃xü̃ rü tá naxchi naxaie i ngẽma duü̃xü̃gü i tachigaxü̃.

Ochéa 6:9

Rü ngẽma chacherdótegü rü ngĩ́ta̱xagüxü̃ nixĩgü erü Chiquéü̃wa daxü̃ i namagu tüxü̃ nana̱i̱xgü rü tüxü̃ nima̱xgü ya yíxema duü̃xẽ ya ngéma üpetüxe.

Ngechuchuarü ngúexü̃gü ga yamugüxü̃arü puracüchiga 24:9

Rü yema Yudíugü ga yéma yexmagüxü̃ rü ta rü: —Aixcüma nixĩ i ngẽma ore —ñanagürügü.