Miquéa 7:18 - Tupanaarü Ore

¹⁸ Rü nataxuma i to ya Tupana i curüxü̃ ixĩxü̃, erü cuma rü nüxü̃́ nüxü̃ curüngü̃ma i ngẽma norü chixexü̃gü, rü tama nagu curüxĩnüecha i ngẽma chixexü̃gü i cupe̱xewa naxügüxü̃ i ngẽma noxre i curü duü̃xü̃ i íyaxügüxü̃. Cuma rü toxü̃ cunawe̱x i curü ngechaü̃, rü tama guxü̃guma tomaxã cunuecha.

Miquéa 7:18 Referans Kwoze

Ichaía 43:25

Natürü i choma nax perü Tupana chixĩxü̃ rü tá íchanapigü rü nüxü̃ ichayarüngü̃ma i guxü̃ma i perü pecadugü rü chixexü̃gü i chope̱xewa pexüxü̃.

Ichaía 44:22

Rü choma nixĩ i pexü̃́ ichayanaxoxẽẽxü̃ i perü guxchaxü̃gü rü perü chixexü̃gü ñoma caixanexü̃ iyarüxoxgurüxü̃. ¡Rü ẽcü cha̱u̱xca̱x pewoegu! Erü choma nixĩ i pexü̃ íchanguxü̃xẽẽxü̃ nawa i perü chixexü̃” —ñanagürü.

Yeremía 50:20

Rü choma ya Cori ya Tupana rü ñachagürü: “Ngẽxguma ngẽma Iraéanecüã̱xgü rü Yudáanecüã̱xgü woeguxgu, rü yema duü̃xü̃gü ga maxẽãcü yéma íyaxügüxü̃ rü choma rü tá nüxü̃́ nüxü̃ charüngüma i norü chixexü̃gü. Rü ngẽmaãcü i nümagü rü tá nawa ínanguxü̃ i norü chixexü̃gü rü norü pecadugü ga naxügüxü̃”, ñachagürü.

Yeremía 32:41

Rü choma rü tá chataãẽãcüma nüxü̃ charüngü̃xẽxẽxü̃. Rü aixcümaxü̃chi guxü̃ma i chorü ngúchaü̃maxã tá ñaa naanewa chanangexmagüxẽxẽ” —ñanagürü.

Yeremía 3:12

¡Rü nórtewa naxũ, rü ngéma nüxü̃ yarüxu i ñaa ore!: “Cori ya Tupana rü ñanagürü pexü̃, ‘¡Cha̱u̱xca̱x pewoegu, Pa Iraéanecüã̱xgü i Tama Ixĩnüechaü̃xü̃! Rü taxũtáma nuãcü pexü̃ chayaxu, rü taxũtáma guxü̃gu pemaxã chanuecha, erü choma rü ngechaü̃wa̱xecü chixĩ. Rü ngẽma nixĩ i chorü ore i choma ya Cori ya Tupana.

Ínachoxü̃xü̃chiga 15:11

Pa Chorü Cori ya Tupanax, rü ngẽma duü̃xü̃gü namaxã tupanaã́xü̃tanüwa rü nataxuma i ta̱xacü i cumaxã wüxiguxü̃. Rü nataxuma i ta̱xacü i cuxrüxü̃ üünexü̃ rü nüxü̃ cua̱xüchixü̃. Rü cuma cunaxü i ngẽma mexü̃gü i duü̃xü̃gü poraãcü namaxã baixãchiexü̃.

Wiyaegü 89:8

Pa Cori Pa Tupana ya Guxãétüwa Ngẽxmacüx, rü guxü̃ma i pora rü guxü̃ma i ore i aixcüma ixĩxü̃ rü cuwa ne naxũ. Rü nataxuma i ta̱xacü i cumaxã wüxiguxü̃.

Wiyaegü 86:15

Natürü i cumax, Pa Corix, rü Tupana ya mecümacü rü ngechaü̃wa̱xecü quixĩ. Rü cuma rü yáxna tomaxã cuxĩnü, rü poraãcü toxü̃ cungechaü̃, rü guxü̃guma tomaxã quixaixcüma.

Wiyaegü 65:3

Rü ngẽma torü chixexü̃gü rü tomaxã inacua̱x, natürü cuma rü toxü̃́ nüxü̃ icuyarüngüma i ngẽma torü pecadugü.

Wiyaegü 89:6

Rü nataxuma i ta̱xacü i woo i daxũguxü̃ i naanewa i cumaxã wüxiguxü̃, Pa Cori Pa Tupanax.

Ore i mexü̃ ga Luca ümatüxü̃ 24:47

Rü yematama ore i ümatüxü̃wa nüxü̃ nixu rü yimá Cristuégagu tá nixĩ i nüxü̃ yaxugüxü̃ i ore i mexü̃. Rü Yerucharéü̃wa tá inaxügü i ngẽma ñu̱xmatáta guxü̃ i naanewa nangu nax ngẽmaãcü duü̃xü̃gü nüxü̃ rüxoexü̃ca̱x i nacüma i chixexü̃ nax Tupana nüxü̃́ nüxü̃ rüngü̃maxü̃ca̱x i norü pecadugü.

Miquéa 4:7

Rü ngẽma Iraétanüxü̃gü i to i nachixü̃anewa woeguxü̃ rü ngẽma Yerucharéü̃wa yaxǘgüxü̃maxã tá wena ichanachixẽxẽ i wüxi i nachixü̃ane i poraxü̃. Rü choma ya Tupana rü yima ma̱xpǘne ya Chióü̃wa guxü̃gutáma namaxã ichacua̱x i ngẽma chorü duü̃xü̃gü.

Miquéa 2:12

Rü nüma ya Cori ya Tupana rü ñanagürü: —Choma rü tá chanangutaque̱xexẽxẽ i guxü̃ma i Acóbutanüxü̃. Rü ñoma carnérugü i wüxiwa ingexmagüxẽẽxü̃rüxü̃ rü tá chanade i ngẽma íyaxügüxü̃ i Iraétanüxü̃ i aixcüma chauga ĩnüexü̃. Rü woo taxũtáma namu natürü ñoma namuxü̃rüxü̃ tá tagaãcüma naxãũgatanü.

Echequié 33:11

Natürü choma ya Cori ya Tupana rü chauégagu nüxü̃ chixu nax tama chanaxwa̱xexü̃ nax texe tümaarü pecadugu yuxü̃. Natürü ngẽma chanaxwa̱xexü̃ nixĩ nax nüxü̃ tarüxoxü̃ i tümacüma i chixexü̃ nax ngẽmaãcü tüxü̃́ nangẽxmaxü̃ca̱x i maxü̃. Pa Iraétanüxü̃x, ¡nüxna pixĩgachitanü i ngẽma chixexü̃ i nacüma i nagu pemaxẽxü̃! ¿Rü ta̱xacüca̱x yuwa pegü pexĩxẽxẽ?

Nüxíraxü̃xü̃ ga popera ga ãẽ̱xgacügüchiga 8:23

Rü ñanagürü: —Pa Cori ya Iraétanüxü̃arü Tupanax, rü dauxü̃guxü̃ i naanewa rü woo ñoma i naanewa rü nataxuma i ta̱xacü i cuxrüxü̃ Tupana ixĩxü̃. Erü cumax rü cuyanguxẽxẽ i curü uneta rü tüxü̃ cungechaü̃ ya guxãma ya yíxema aixcüma cuga ĩnüexe.

Wenaxarü naxümatü ga Tupanaarü mugü 33:26

Rü yema namaxã yagúexẽẽãxü̃ ga norü dexa ga Moiché rü ñanagürü: —Pa Iraétanüxü̃x, rü nataxuma i to i perü Tupanamaxã wüxiguxü̃. Rü nüma rü norü poramaxã dauxü̃guxü̃ i caixanexü̃gu nixũ nax perü ngü̃xẽẽwa naxũxü̃ca̱x.

Popera ga Chantiágu ümatüxü̃ 2:13

Erü guxãma ya yíxema tama tümamücügü tüxü̃́ ngechaü̃tümüü̃güxe, rü Tupana rü taxũtáma nüxü̃́ tangechaü̃tümüü̃güãcüma tüxna naca i tümaarü maxü̃chiga. Natürü yíxema tümamücügü tüxü̃́ ngechaü̃tümüü̃güxe, rü taxũtáma tamuü̃e i ngẽxguma Tupana tüxna caxgux, erü nüxü̃́ tangechaü̃tümüü̃güãcüma tá tüxna naca.

Chofonía 3:17

Erü nüma ya Cori ya perü Tupana ixĩcü, rü petanüwa nangẽxma, rü nüma rü poracü nixĩ, rü pexü̃ tá namaxẽxẽxẽ. Rü nüma ya Cori ya Tupana rü tá pemaxã nataãxẽ. Rü ngẽma pexü̃ nax nangechaxü̃xü̃gagu rü ngexwaca̱xü̃xü̃ i maxü̃ tá pexna naxã. Rü ngẽma nax pemaxã nataãẽxü̃ rü nüma ya Tupana rü norü taãẽmaxã tá nawiyae ñoma petachigaarü ngunexü̃gurüxü̃ —ñanagürügü tá. Rü nüma ya Cori ya Tupana rü ñanagürü: —Choma rü tá pexü̃ íchanguxü̃xẽxẽ nawa i ngẽma chixexü̃ i pexü̃ ãxũnexü̃. Rü nawa tá pexü̃ íchanguxü̃xẽxẽ i ngẽma ãne i peétüwa ngẽxmaxü̃.

Miquéa 7:14

¡Pa Cori ya Tupanax, curü naixmena̱xãmaxã nüxna nadau i ngẽma curü duü̃xü̃gü i curü carnérugü ixĩgüxü̃! Ñu̱xma rü nüxicatama naixnecüwa nangẽxmagü i naane i mexü̃wa. ¡Ẽcü ü̃parüxü̃ Bacháü̃anewa rü Garaáxanewa nagagü i ngextá õna íngẽxmaxü̃wa!

Yoná 4:2

Rü yemaca̱x ñaãcü nayumüxẽ: —Dücax, Pa Cori Pa Tupanax, rü ngẽma ñu̱xma Nínibewa ngupetüxü̃ nixĩ ga yema nüxü̃ chixuxü̃ ga yexguma chauchixü̃anewatama chayexmagu. Rü yemaca̱x nixĩ ga cuxcha̱xwa chixũxü̃táa̱x nax Tárchixwa chaxũxü̃ca̱x, yerü nüxü̃ chacua̱x rü cuma rü wüxi ya Tupana ya mecümacü rü ngechaü̃wa̱xecü quixĩ rü tama paxa cunu. Rü ngẽma curü ngechaü̃ rü nataxüchi. Rü ngẽmaca̱x woo texémaxã poxcu cuxuegu̱xgu rü paxãma nagu curüxĩnü, rü tama tüxü̃ cupoxcu ega nüxü̃ tarüxoegu i tümacüma i chixexü̃.

Joel 2:32

Natürü guxãma ya texé ya aixcüma Tupanaga ĩnüxe rü taxũtáma tapoxcue. Erü yima ma̱xpǘne ya Chióü̃ ya Yerucharéü̃wa ngẽxmanewa tá nango̱x ya yimá Maxẽxẽxẽruxü̃ yema Cori ya Tupana pemaxã inaxunetaxü̃rüxü̃. Rü yíxema nüma tüxü̃ nidexechixe rü taxũtáma tapoxcue.

Ichaía 57:16

Pa Chorü Duü̃xü̃güx, marü taxũtáma pexü̃ chixuecha rü taxũtáma guxü̃guma pemaxã chanu. Erü ngẽxguma chi chanuechagu rü guxü̃ma i ngẽma duü̃xü̃gü i changóexẽẽxü̃ rü chi choxü̃ narüxoe.

Wiyaegü 86:5

Erü cumax, Pa Corix, rü cumecüma rü nüxü̃ icurüngüma i torü chixexü̃gü. Rü aixcüma tüxü̃ cungechaü̃ ya yíxema curü ngü̃xẽẽca̱x cuxna caxe.

Danié 9:9

Natürü i cumax, Pa Torü Tupanax, rü woetama cucüma nixĩ nax cumecümaxü̃ rü toxü̃́ nüxü̃ curüngü̃maxü̃ i torü chixexü̃. Rü ngẽmaca̱x cupe̱xewa tangugü erü toma rü poraãcü chixexü̃ taxü.

Ichaía 65:19

Rü choma rü tá ta namaxã chataãxẽ ya yima ĩane ya Yerucharéü̃ rü tá namaxã chataãxẽ i ngẽma chorü duü̃xü̃gü i nawa maxẽxü̃. Rü yima ĩanewa rü marü taxũtáma nüxü̃ taxĩnü i axu rü taxúetama ngúxü̃ tinge rü ngẽmagagu aita taxü.

Ichaía 55:7

Rü ngẽma duü̃xü̃ i chixecümaxü̃, rü name nixĩ i nüxü̃ narüxo i ngẽma nacüma i chixexü̃. Rü ngẽma duü̃xü̃ i chixexü̃gu rüxĩnüxü̃, rü name nixĩ i nüxü̃ narüxo i ngẽma chixexü̃ i nagu naxĩnüxü̃. ¡Rü Cori ya Tupanaca̱x pewoegu! Rü tá nüxü̃́ pengechaü̃tümüxü̃gü. ¡Rü naxca̱x pewoegu ya tórü Tupana! Erü nüma rü ínamemare nax pexü̃́ nüxü̃ nangümaxü̃ i perü chixexü̃gü.

Ichaía 1:18

¡Ẽcü nua pexĩ rü ngĩxã perü chixexü̃chiga tidexagü! Rü ngẽxguma chi perü maxü̃ rü woo nadauxuchigu namaxã i perü chixexü̃, natürü i choma rü ñoma gáuxü̃chara i cómüxü̃chixü̃rüxü̃ tá chayaxĩxẽxẽ. Rü ngẽxguma chi woo wüxi i naxchiru i waxüchixü̃rüxü̃ yixĩxgu i perü pecadugü, natürü i choma rü ñoma wüxi i carnéruta̱xa i cómüxü̃chixü̃rüxü̃ tá chanacómüxẽxẽ.

Wiyaegü 130:4

Natürü i cumax rü toxü̃́ nüxü̃ icurüngüma i ngẽma torü chixexü̃gü i cupe̱xewa taxüxü̃ nax ngẽmaãcü cuxü̃ ticua̱xüü̃güxü̃ca̱x.

Wiyaegü 71:19

Pa Tupanax, ngẽma curü porachiga rü curü mecümachiga rü guxü̃wama nangu ñu̱xmata daxũguxü̃ i naanewa. Rü cuma rü cunaxü i taxü̃gü i mexü̃gü. Rü tataxuma ya texé ya cumaxã wüxiguxe.

Neemía 9:17

Rü tama cuga naxĩnüechaü̃, rü bai ga nüxna nax nacua̱xãchiexü̃ ga yema taxü̃ ga mexü̃gü ga nape̱xewa cuxüxü̃. Rü poraãcü ínayataitüarü maxü̃neã̱xgü rü cumaxã nanue, rü yemaca̱x nagu narüxĩnüe nax norü ãẽ̱xgacüxü̃ naxunetagüxü̃ nax yemamaxã Equítuaneca̱x nawoeguxü̃ca̱x rü wenaxarü Equítutanüxü̃me̱xẽwa nayexmagüxü̃ca̱x. Natürü i cuma rü Tupana ya ngechaü̃wa̱xecü quixĩ, rü mecümacü quixĩ, rü ngüxmüwa̱xecü quixĩ rü yáxna ĩnücü quixĩ, rü tama paxa cunu rü yemaca̱x nixĩ ga tama yéma cunawogümarexü̃.

Ínachoxü̃xü̃chiga 34:9

Rü ñanagürü: —¡Pa Corix, Pa Corix, rü ngẽxguma aixcüma yixĩxgu nax chomaxã cutaãẽxü̃ rü ẽcü toxü̃ íixümücü! Rü aixcüma nixĩ i tama inaxĩnüechaxü̃xü̃ i ñaa duü̃xü̃gü. ¡Natürü toxü̃́ nüxü̃ irüngüma i torü pecadugü rü chixexü̃gü, rü toxü̃ nade nax curü duü̃xü̃gü tixĩgüxü̃ca̱x! —ñanagürü.

Romanos 11:4

Natürü Tupana nanangãxü̃, rü ñanagürü: “Dücax, choma rü marü choxü̃́ nangẽxma i 7,000 i yatügü i chaugüxü̃́ chidexechixü̃. Rü nümagü rü taguma nüxü̃ nicua̱xüü̃gü i ngẽma tupananetachicüna̱xã i Baá”, ñanagürü.

Ore i mexü̃ ga Luca ümatüxü̃ 15:32

Natürü ñu̱xma rü name nixĩ nax ipetaãxẽgüxü̃ rü itaãẽgüxü̃ erü cuenexẽ ga gumá cha̱u̱xca̱x rü marü yucü, rü maxü̃cü taxca̱x ínangu. Rü woo tüxna inayarütaxu, rü wenaxarü taxca̱x nango̱x” —ñatarügü.

Miquéa 5:3

Rü ñu̱xma ya Cori ya Tupana rü norü duü̃xü̃güna nixũgachi nax norü uanügü namaxã icuáxü̃ca̱x ñu̱xmatáta naxíxraxacü i ngẽma nge i wüxi ya ngĩne tá ngĩxü̃́ ngẽxmacü. Rü ngẽxguma tá nixĩ i ngẽma Iraétanüxü̃ i to i nachixü̃anegügu woonexü̃ rü tá nachixü̃aneca̱x nawoeguxü̃ nax wüxiwa nangẽxmagüxü̃ca̱x namaxã i natanüxü̃ ga nachixü̃anewatama yaxǘgüxü̃.

Amúx 7:8

Rü yexguma ga nüma rü choxna naca rü ñanagürü: —¿Ta̱xacü nixĩ i nüxü̃ cudauxü̃, Pa Amúx? —ñanagürü choxü̃. Rü yexguma ga choma rü ñachagürü nüxü̃: —Wüxi i ĩxtapü̱xarü ngugüruxü̃ i nawa nüxü̃ icuáxü̃ nax mea ínatoxü̃ —ñachagürü. Rü yexguma ga nüma rü choxü̃ ñanagürü: —Rü ñaa ĩxtapü̱xarü ngugüruxü̃maxã tá nixĩ i nüxü̃ chacuáxü̃ rü aixcüma nawe̱xguxü̃ i nacüma i ngẽma chorü duü̃xü̃gü i Iraétanüxü̃. Rü taxũtáma nüxü̃́ nüxü̃ charüngüma ega chixexü̃gu namaxẽgu.

Yeremía 31:34

Rü ngẽxguma rü tá marü taxuca̱xtama texé toguxexü̃ tangu̱xẽxẽ nax choxü̃ tacuáxü̃ca̱x, rü bai i tümamücü, rü bai i tümatanüxü̃. Erü ngẽxguma rü tá guxãma ya yáxe rü woo buxe rü tá choxü̃ tacua̱xgü. Rü choma rü tá tüxü̃́ nüxü̃ icharüngüma i tümaarü chixexü̃ rü marü tagutáma nüxna chacua̱xãchi i tümaarü pecadugü. Rü chomatama ya Cori ya Tupana nixĩ i nüxü̃ chixuxü̃ i ngẽma —ñanagürü.

Ichaía 57:10

Rü yáxü̃wa naxca̱x pexĩ nax nüxü̃ picua̱xüü̃güxü̃ca̱x i ngẽma togü i tupananetagü, rü taguma pipae, erü perü ngúchaü̃tama pexü. Natürü guxü̃ma i ngẽma rü natüca̱xmamare nixĩ.

Ichaía 40:25

Rü yimá Tupana ya Üünecü rü ínaca rü ñanagürü: —¿Ta̱xacügu tá i choxü̃ penguxü̃ i pemax? ¿Rü texé tixĩ ya chomaxã wüxiguxe? —ñanagürü.

Ichaía 40:18

¿Rü ta̱xacügu tá penangu ya Tupana? ¿Rü ñuxãcü tá penaxüxchicüna̱xã?

Wiyaegü 103:13

Rü nüma ya Cori rü tüxü̃ nangechaü̃ ya yíxema naga ĩnüexe ñoma wüxi i papa naxacügüxü̃ ngechaü̃xü̃rüxü̃.

Wiyaegü 35:10

Rü guxü̃ma i chorü maxü̃maxã rü ñacharügü tá: —¿Texé cumaxã tawüxigu, Pa Cori Pa Tupanax? Erü yíxema ngearü diẽruã̱xgüxe rü taxuxü̃ma tüxü̃́ ngẽxmagüxe, rü cuma rü tüxü̃ ícupoxü̃ nüxna i ngẽma tüxü̃ rüporamaegüxü̃ rü ngẽma chixri tümaarü puracü ütanügüxü̃ —ñachagürü tá.

Iraétanüxü̃arü muxchiga 23:21

Rü nüma ya Tupana rü tama nagu narüxĩnü i norü chixexü̃ i ngẽma duü̃xü̃gü i Iraétanüxü̃ i Acóbuarü duü̃xü̃gü ixĩgüxü̃. Rü nüma ya Cori ya norü Tupana rü natanüwa nangẽxma, rü tama chixexü̃ namaxã naxüxchaü̃. Rü nümagü rü norü ãẽ̱xgacüãcü nüxü̃ nacua̱xgü.

Ichaía 62:5

Rü ñoma wüxi ya ngextü̱xücü i wüxi i pacü nügümaxã ngĩxü̃ üarü yoraã̱xcürüxü̃ rü Tupana rü tá nügümaxã nanaxüarü yoraã̱x ya Yerucharéü̃. Rü Tupana rü tá nanamexẽxẽ ya yima ĩane rü namaxã tá nataãxẽ, ñoma wüxi ya yatü ya naxma̱xmaxã taãẽcürüxü̃.

Naanearü ügüchiga 4:7

Rü ngẽxguma chi aixcüma mexü̃ cuxü̱xgu rü chi cutaãẽchametü. Natürü ngẽma nax tama mexü̃ cuxüxü̃, rü ngẽma chixexü̃ rü ínamemare nax cuxü̃ naporamaexü̃. Natürü ega cuma rü tama naga cuxĩnügu rü tá nüxü̃ curüyexera i ngẽma chixexü̃ —ñanagürü.

Norü taxre ga to ga popera ga ãẽ̱xgacügüchiga ümatüxü̃ 6:21

¡Rü nüxü̃ naxĩnü i ngẽma naxca̱x íchacaxaxü̃, rü nüxü̃ naxĩnü i curü duü̃xü̃gü i Iraétanüxü̃arü yumüxẽ ega ngẽxguma ñaa nachicagu tarüdaunüãcüma tayumüxẽgügu! ¡Rü nüxü̃ naxĩnü i daxũguxü̃ i naanewa i ngextá ícumaxü̃xü̃wa rü toxü̃́ nüxü̃ rüngüma i torü chixexü̃gü!

Norü taxre ga to ga popera ga ãẽ̱xgacügüchiga ümatüxü̃ 30:9

Rü ngẽxguma Cori ya Tupanaca̱x pewoeguxgu i pema, rü ngẽma perü uanügü i ñu̱xma peenexẽgüxü̃ rü penegüxü̃ poxcuexü̃ rü tümamaxã tá nixauxãchigü rü ñaa nachixü̃aneca̱x tá tüxü̃ nawoeguxẽxẽ. Erü nüma ya Cori ya perü Tupana rü tamaxã ixauxãchiwa̱xecü nixĩ rü nüxü̃́ tangechaü̃tümüü̃gü, rü taũtáma pexü̃ naxo ega ngẽxguma naxca̱x pewoeguxgu —ñaxü̃.

Ichaía 33:24

Rü ngẽma ngunexü̃gügu rü taxúxetáma ya Yerucharéü̃cüã̱x rü ñatagürü: —Chidaxawe —ñatagürü. Rü ngẽma Chióü̃cüã̱xarü pecadugü rü nüma ya Cori ya Tupana rü tá nüxü̃́ nüxü̃ narüngüma.

Ichaía 64:9

Pa Corix Pa Tupanax ¡taxṹ i poraãcü tomaxã cunuxü̃! ¡Rü taxṹ i nüxna cucua̱xãchixü̃ ga yema chixexü̃ ga taxüxü̃! ¡Rü dücax, nagu rüxĩnü nax curü duü̃xü̃gü tixĩgüxü̃!

Yeremía 9:24

Natürü ngẽxguma texé tügü icua̱xüxü̃chaü̃gu rü name i tügü ticua̱xüxü̃ naxca̱x nax choxü̃ tacuáxü̃. Rü ẽcü tügü ticua̱xüxü̃ naxca̱x nax nüxü̃ tacuáxü̃ nax choma nax tümaarü Cori ya Tupana chixĩxü̃ rü ñoma i naanewa nüxü̃ changechaü̃xü̃ i duü̃xü̃gü rü mea namaxã nax ichacuáxü̃ rü aixcüma nawe̱xguxü̃ i chorü ĩnü. Rü ngẽma nixĩ i namaxã chataãẽxü̃. Rü chomatama ya Cori ya Tupana nixĩ i nüxü̃ chixuxü̃ i ngẽma —ñanagürü.

Yeremía 31:20

Rü Cori ya Tupana rü ñanagürü: —Ngẽma Efraíü̃tanüxü̃gü̃ rü chaunegü i nüxü̃ changechaü̃güxü̃ nixĩgü. Rü ngẽma nixĩ i chaunegü i yexera nüxü̃ changechaü̃güxü̃. Rü woo yexguma chanapoxcuegu, rü taguma nüxü̃ charüchau nax nüxna chacua̱xãchixü̃. Rü chorü maxü̃newa rü naxca̱x changechaü̃ rü poraãcü choxü̃́ nangechaü̃tümüxü̃gü. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.

Yeremía 33:8

Rü guxü̃ma ga norü chixexü̃gü ga chope̱xewa naxügüxü̃ rü tá nüxü̃́ íchayanaxoxẽxẽ. Rü tá nüxü̃́ nüxü̃ ichayarüngüma ga yema chixexü̃ ga naxügüxü̃ ga yexguma tama chauga naxĩnüegu rü chomaxã nanuegu.

Echequié 18:23

Rü pema rü bexmana nagu perüxĩnüegu nax choma rü chataãẽxü̃ i ngẽxguma nayu̱xgu i wüxi i duü̃xü̃ i chixexü̃gu maxü̃xü̃. Pemaxã nüxü̃ chixu rü tama chataãxẽ. Rü ngẽma choma chanaxwa̱xexü̃ nixĩ nax nüxü̃ naxoxü̃ i ngẽma nacüma i chixexü̃ nax nüxü̃́ nangẽxmaxü̃ca̱x i maxü̃.

Ochéa 14:2

Rü name nax ñaãcü peyumüxẽgüxü̃ rü ñaperügügü: —¡Pa Torü Cori ya Tupanax, rü toxü̃́ nüxü̃ irüngüma i guxü̃ma i torü chixexü̃gü! ¡Rü mea toxü̃́ nayaxu i ñaa torü cua̱xüxü̃ i cuxna taxãxü̃!

Amúx 1:11

Rü Cori ya Tupana rü ñanagürü ta: —Yema Edóü̃cüã̱xgü rü poraãcü chixexü̃ naxügü rü ngẽmaca̱x taxũtáma íchayachaxãchi nax chanapoxcuexü̃. Yerü yema natanüxü̃ ga Iraétanüxü̃we nangegü taramaxã rü tama nüxü̃́ nangechaxü̃tümüxü̃güãcüma nanadaiama. Yerü poraãcü namaxã nanue rü tama namaxã narüngüxmügü.

Ãẽ̱xgacügü ga guxchaxü̃güarü mexẽxẽruü̃gü 10:16

Rü nüma ga Iraétanüxü̃ rü nüxna nixĩgachi ga yema togü ga nachixü̃anegüarü tupananetagü rü wenaxarü Cori ga Tupanaxü̃ nicua̱xüü̃gü. Rü nüma ga Cori ya Tupana rü marü tama yáxna namaxã naxĩnü nax poraãcü ngúxü̃ yangegüxü̃ ga Iraétanüxü̃, rü wenaxarü nüxü̃ narüngü̃xẽxẽ.

Wiyaegü 65:4

Rü nataãxẽ i ngẽma duü̃xü̃ i cuma cuyaxuxü̃ nax yima cupata ya Chióü̃wa ngẽxmanewa cumaxẽẽxü̃ca̱x. Rü wüxi i taãxẽ tá nixĩ nax natanüwa tangexmagüxü̃ i ngẽma mexü̃gü i cupata ya üünenewa ngẽxmagüxü̃.

Ichaía 38:17

Rü dücax, yema ngúxü̃ ga chingexü̃ rü ñu̱xma rü taãẽxü̃ choxü̃́ nayanguxuchi. Rü cuma nixĩ ga yema ãxmaxü̃ ga ãũcümaxü̃wa nüxna cudauxü̃ ga chorü maxü̃, yerü choxü̃́ nüxü̃ curüngü̃ma ga guxü̃ma ga yema chorü chixexü̃gü.

Echequié 33:16

Rü choma rü taxũtáma nüxü̃́ nüxna chacua̱xãchi i bai i wüxi i ngẽma pecadu ga ü̃paacü naxüxü̃. Rü nüma rü tá namaxü̃ erü mexü̃ naxü rü nayanguxẽxẽ ga yema mexü̃ ga nüxü̃ yaxuxü̃”.

Ochéa 14:5

Rü ñu̱xma i choma rü tá nüxü̃ charüngü̃xẽxẽxü̃ i ngẽma Iraéanecüã̱xgü ñoma cherena ya nanetügüxü̃ iwaixẽẽcürüxü̃. Rü ngẽma Iraéanecüã̱xgü rü tá nataãẽgü ñoma putüra i líriu meama ixãchacuxü̃rüxü̃. Rü yima ma̱xpǘne ya Líbanuarü ocayiwagü ya guxü̃guma ngẽxmaechanerüxü̃ tá nixĩ i ngẽma Iraéanecüã̱xgü nax guxü̃gutáma nachixü̃anewa nangẽxmagüxü̃.