Miquéa 6:6 - Tupanaarü Ore

⁶ ¿Rü ta̱xacümaxã tá nüxü̃ chayarücua̱xüxü̃ ya yimá Cori ya Tupana ya daxũcüã̱x? ¿Ẽ̱xna wocaxacügü i wüxi ya taunecü nüxü̃́ ngẽxmagüxü̃ tá naxca̱x íchaguxü̃ nax ngẽmamaxã nüxü̃ chicua̱xüü̃xü̃ca̱x?

Miquéa 6:6 Referans Kwoze

Ngechuchuarü ngúexü̃gü ga yamugüxü̃arü puracüchiga 2:37

Rü yexguma yemaxü̃ naxĩnüegu ga yema duü̃xü̃gü ga yéma yexmagüxü̃, rü poraãcü nanaxĩ̱xãchiãẽgü. Rü Pedruna nacagüe, rü yema togü ga Pedrumücügüna rü ta nacagüe, rü ñanagürügü: —Pa Toenexẽgüx, ¿ta̱xacü tá taxüexü̃ i ñu̱xmax? —ñanagürügü.

Ore i mexü̃ ga Márcu ümatüxü̃ 5:7

Rü aita naxüãcüma ñanagürü nüxü̃: —¿Tü̱xcüü̃ nua choxü̃ cuyachixewe, Pa Ngechuchux ya Tupana ya Guxãétüwa Ngẽxmacü Nanex? Rü Tupanaégagu cuxü̃ chaca̱a̱xü̃ nax tama ngúxü̃ choxü̃ quingexẽẽxü̃ —ñanagürü.

Ore i mexü̃ ga Matéu ümatüxü̃ 19:16

Rü wüxi ga ngextü̱xücü rü Ngechuchuxü̃tawa nangu, rü nüxna naca, rü ñanagürü: —Pa Ngúexẽẽruxü̃ ya Mecüx, ¿ta̱xacürü mexü̃ tá chaxüxü̃ nax chanayaxuxü̃ca̱x i maxü̃ i taguma gúxü̃? —ñanagürü.

Danié 3:26

Rü yema ñaxguwena rü nüma ga Nabucudonochó rü yema poxcuchicaxü̃ ga íya̱u̱xraxü̃ca̱x nixũ rü yéma tagaãcü ñanagürü: —Pa Chadrá, rü Mechá, rü Abex-negó ya Tupana ya Guxãétüwa Ücüarü Duü̃xü̃gü Ixĩgüxü̃x, rü ¡ípechoxü̃ rü nua pexĩ! —ñanagürü. Rü yema tomaepü̱x rü ínachoxü̃ nawa ga guma üxü.

Ngechuchuarü ngúexü̃gü ga yamugüxü̃arü puracüchiga 16:30

Rü yexguma ĩã̱xtüwa Pauruxü̃ rü Chíraxü̃ nagagü, rü ñanagürü nüxü̃: —Pa Corigüx, ¿Ta̱xacü tá chaxüxü̃ i choma nax choxü̃́ nangẽxmaxü̃ca̱x i maxü̃ i taguma gúxü̃? —ñanagürü.

Ngechuchuarü ngúexü̃gü ga yamugüxü̃arü puracüchiga 16:17

Rü ngĩma towe ingẽ ga toma rü Pauru, rü tagaãcü ngĩgürügü: —Ñaa yatügü rü Tupana ya Guxãétüwa Ngẽxmacüarü duü̃xü̃gü nixĩgü, rü pemaxã nüxü̃ nixu i maxü̃ i taguma gúxü̃chiga —ngĩgürügü.

Ore i mexü̃ ga Cuáü̃ ümatüxü̃ 6:26

Rü Ngechuchu nanangãxü̃, rü ñanagürü nüxü̃: —Aixcüma pemaxã nüxü̃ chixu rü cha̱u̱xca̱x pedaugü yerü meama pechibüe nawa ga yema õna ga pexna chaxãxü̃. Rü tama yema cua̱xruxü̃gü ga nüxü̃ pedauxü̃ ga Tupanaarü poramaxã chaxüxü̃xü̃ca̱x nixĩ i cha̱u̱xca̱x pedaugüxü̃.

Ore i mexü̃ ga Luca ümatüxü̃ 10:25

Rü yexguma inachi ga wüxi ga ngúexẽẽruxü̃ ga Moichéarü mugüwa ngu̱xẽẽtaexü̃, rü Ngechuchuxü̃tawa naxũ nax namaxã yanadexaxü̃ca̱x. Rü Ngechuchuxü̃ naxüxchaü̃, rü yemaca̱x nüxna naca rü ñanagürü: —Pa Ngúexẽẽruxü̃ ya Ngechuchux, ¿Ta̱xacü nixĩ i mexü̃ nax chanaxüxü̃ nax choxü̃́ nangẽxmaxü̃ca̱x i maxü̃ i taguma gúxü̃? —ñanagürü.

Danié 5:21

Rü duü̃xü̃güna nixũgachi rü yema norü ĩnü rü naxü̃nagüarü ĩnürüxü̃ nixĩ. Rü naixnecücüã̱x ga búrugütanüwa namaxü̃. Rü wocagürüxü̃ maxẽ nanangõ̱x rü cherenamaxã niwaixine. Rü yemaacü nüxü̃ nangupetü ñu̱xmata düxwa nüxna nacua̱xãchi nax yimá Tupana ya Guxãétüwa Ngẽxmacü nax nüxü̃́ ngẽxmaxü̃ i pora nax namaxã inacuáxü̃ i guxü̃ma i ãẽ̱xgacügü i ñoma i naanewa ngẽxmagüxü̃. Rü nüma ya Tupana rü ãẽ̱xgacüxü̃ tüxü̃ nixĩxẽxẽ ya yíxema nüma norü me ixĩxẽ nax ãẽ̱xgacü tixĩxü̃ca̱x.

Danié 5:18

Rü nüma ya Tupana ya Guxãétüwa Ngẽxmacü, rü cunatü ga Nabucudonochóna nanaxã nax nüma ãẽ̱xgacü ga poracü rü cua̱x nüxü̃́ yexmacü nax yixĩxü̃ca̱x.

Danié 4:9

“Pa Betachá i Guxü̃ i Chorü Ucu̱xẽruü̃güerux, rü choma nüxü̃ chacua̱x rü yimá Tupana ya Üünecüãxẽ cumaxã inacua̱x rü ngẽmaca̱x nüxü̃ cucua̱x i guxü̃ma i ẽxü̃guxü̃. Rü chanaxwa̱xe i ícurüxĩnü i ngẽma cumaxã tá nüxü̃ chixuxü̃ i chaunegüwa nüxü̃ chadauxü̃ rü ñu̱xũchi chanaxwa̱xe i chomaxã nüxü̃ quixu nax ta̱xacüchiga yixĩxü̃.

Wiyaegü 95:6

¡Rü nua pexĩ rü ngĩxã nape̱xegu tacaxã́pü̱xügü rü nüxü̃ ticua̱xüxü̃gü ya Cori ya Tupana ya tüxü̃ ücü!

Wiyaegü 22:29

Rü guxãma i pema ya diẽruã̱xgüxe rü Cori ya Tupanape̱xegu tá pecaxã́pü̱xügü nax nüxü̃ picua̱xüü̃güxü̃ca̱x. Rü guxãma i pema i ñoma i naanewa maxẽxe rü wena tá waixü̃müxü̃ pixĩgü, erü pewa rü nataxuma i maxü̃.

2 Chamué 21:3

Dabí rü yema Gabaóü̃cüã̱xgüna naca rü ñanagürü: —¿Ta̱xacü penaxwa̱xe nax pexca̱x chanaxüxü̃? ¿Ñuxãcü tá chanamexẽxẽxü̃ ga yema chixexü̃ ga Chaú pemaxã üxü̃ nax ngẽmaãcü i pema rü mexü̃ tomaxã pexueguxü̃ca̱x i toma i Cori ya Tupanaarü duü̃xü̃gü? —ñanagürü.

Ínachoxü̃xü̃chiga 12:5

Natürü ngẽma naxü̃na rü chanaxwa̱xe nax nayatüxü̃ rü wüxi ya taunecü nüxü̃́ ngẽxmaxü̃ rü taxuwama nachixexü̃. Rü name nax wüxi i carnéruxacü rüe̱xna wüxi i chíbuxacü nax yixĩxü̃.

Efesios 3:14

Rü ngẽmaca̱x, ngẽxguma nagu charüxĩnügu i ngẽma Tanatü ya Tupana taxca̱x mexẽẽxü̃, rü nape̱xegu chacaxã́pü̱xü nax nüxü̃ chicua̱xüxü̃xü̃ca̱x.

Ore i mexü̃ ga Márcu ümatüxü̃ 12:33

Rü ngẽma Tupanaxü̃ nax ingechaü̃xü̃ guxü̃ne ya tórü maxü̃nemaxã, rü guxü̃ i nagu rüxĩnüxü̃maxã, rü guxü̃ i tórü poramaxã, rü nüxü̃ nax ingechaü̃xü̃ i tamücü i yigü nax ingechaü̃xü̃rüxü̃, rü ngẽma rü guxü̃ma i carnérugü i Tupanaca̱x ida̱i̱xü̃ rü íguxü̃arü yexera narümemae —ñanagürü.

Popera ga Yudíugü ga yaxõgüxü̃ca̱x ümatüxü̃ 10:11

Rü guxü̃ma i ngẽma chacherdótegü rü wüxichigü i ngunexü̃gu Tupanana nanaxã i naxü̃nagü i naxca̱x nada̱i̱xü̃. Rü guxü̃guma ngẽmaãcü nanaxügüxü̃, natürü ngẽma rü taguma inayanaxoxẽxẽ i duü̃xü̃güarü pecadugü.

Iraétanüxü̃arü muxchiga 7:51

Rü inanamu ta ga wüxi ga wocaxacü ga yatüxü̃, rü wüxi ga carnéru ga yatüxü̃, rü wüxi ga carnéruxacü ga yatüxü̃ ga wüxi ga taunecü nüxü̃́ yexmaxü̃ nax Tupanaarü ãmarexü̃ ínaguãxü̃ca̱x.

1 Chamué 15:22

Rü nüma ga Chamué rü ínaca rü ñanagürü: —¿Ta̱xacü nixĩ i ngẽma rümemaexü̃ cuxca̱x? ¿Rü cuxca̱x rü ngẽma naxü̃nagü Tupanaca̱x iguxü̃ rüe̱xna Tupanaga nax ixĩnüexü̃? Rü dücax rü ngẽma Tupana yexera namaxã taãẽxü̃ nixĩ nax naga ixĩnüexü̃, rü tama carnérugüarü chíxü̃ naxca̱x nax iguxü̃.

Wiyaegü 95:2

¡Rü ngĩxã naxca̱x taxĩ rü moxẽ nüxna taxã rü wiyaegümaxã nüxü̃ ticua̱xüxü̃gü!

Ichaía 40:16

Rü guxü̃ma i Líbanuanewa ngẽxmagüxü̃ i naeü̃gü rü tama ningu nax wüxi i ãmare Tupanaca̱x iguxü̃. Rü ngẽma Líbanuwa ngẽxmagüxü̃ i naigü rü tama ningu nax norü ãmarearü guruxü̃arü üxü yixĩxü̃ca̱x.

Yeremía 6:20

¿Ta̱xacüca̱x i pema rü Chabáwa cha̱u̱xca̱x ne penana i pumaragü iyixichixü̃, rü ñu̱xũchi nanetügü i yixichixü̃ i yáxü̃guxü̃ i nachixü̃anegüwa ne penaxü̃? Choma rü tama chorü me nixĩ i ngẽma perü ãmaregü i cha̱u̱xca̱x ípeguxü̃, rü woo ngẽma togümare i perü ãmaregü i choxna pexãgüxü̃ —ñanagürü.

Echequié 46:9

Rü ngẽxguma ngẽma petachigagügu duü̃xü̃gü Tupanapataa̱xtügu chocugu nax Cori ya Tupanaxü̃ yacua̱xüü̃güxü̃ca̱x, rü ngẽma duü̃xü̃gü i ĩã̱x i nórtewa ngẽxmaxü̃wa ichocuxü̃ rü ngẽxguma ínachoxü̃gu rü ĩã̱x i súrwa ngẽxmaxü̃wa tá ínachoxü̃. Rü ngẽma duü̃xü̃gü i ĩã̱x i súrwa ngẽxmaxü̃wa ichocuxü̃ rü ngẽma ĩã̱x i nórtewa ngẽxmaxü̃wa tá ínachoxü̃. Rü taxũtáma ngẽma ĩã̱x i nawa yachocuxü̃wa ínachoxü̃. Rü ngẽma ĩã̱x i yachocuxü̃pe̱xewa ngẽxmaxü̃ i ĩã̱xwa tá nixĩ i ínachoxü̃xü̃.

Ochéa 5:6

Natürü wüxi i ngunexü̃gu rü tá Cori ya Tupanaca̱x nadaugü rü naxca̱x tá nanadai rü nayagu i ãmaregü i wocagü rü carnérugü. Natürü taxũtáma nüxü̃ inayangaugü erü nüma ya Tupana rü marü nüxna nixũgachi.

Amúx 5:22

Rü tama chanaxwa̱xe i naxü̃nagü cha̱u̱xca̱x nax ípeguxü̃. Rü woo i ngẽma perü ãmare i trigu rü tama chanaxwa̱xe. Rü taxũtáma chanayaxu i ngẽma wocaxacügü i ngüexü̃ i cha̱u̱xca̱x pedaixü̃ nax ngẽmamaxã choxü̃ perüngüxmüexẽẽxü̃ca̱x.

Ínachoxü̃xü̃chiga 23:15

¡Naxüchiga i Üpetüchigaarü peta i nagu paũ i ngearü pu̱xẽẽruxü̃ã́xü̃ pengõ̱xgüxü̃! Rü ngẽma cumaxã nüxü̃ chixuxü̃ãcü tá nixĩ i cunaxüxü̃. Rü ngẽxguma cunaxüchigagu rü 7 i ngunexü̃ tá nixĩ i paũ i ngearü pu̱xẽẽruxü̃ã́xü̃ pengṍxü̃. Rü ngẽma ngunexü̃ i nagu tá cunaxüxü̃ i ngẽma peta rü meatáma tauemacü ya Abígu tá nixĩ, yerü guma tauemacügu nixĩ ga ípenguxü̃xü̃ ga Equítuanewa. Rü ngẽma ngunexü̃gu rü taxúetama ngeãcume̱xẽx nua choxü̃ tayarücua̱xüxü̃.

Wiyaegü 116:12

¿Ñuxãcü tá Cori ya Tupanaaxü̃́ chanaxütanü naxca̱x i guxü̃ma i ngẽma mexü̃ i cha̱u̱xca̱x naxüxü̃?

Ucu̱xẽgüchiga 15:8

Nüma ya Cori ya Tupana tama nanayaxu i norü ãmaregü i ngẽma chixexü̃gu maxẽxü̃. Natürü taãẽãcü nanayaxu i tümaarü yumüxẽgü ya yíxema aixcüma mea maxẽxe.

Ucu̱xẽgüchiga 21:3

¡Nagu namaxü̃ i ngẽma nacümagü i mexü̃, rü ngẽma nixĩ i guxü̃ma i ãmaregüarü yexera Tupanaca̱x rümemaexü̃!