Miquéa 4:7 - Tupanaarü Ore

⁷ Rü ngẽma Iraétanüxü̃gü i to i nachixü̃anewa woeguxü̃ rü ngẽma Yerucharéü̃wa yaxǘgüxü̃maxã tá wena ichanachixẽxẽ i wüxi i nachixü̃ane i poraxü̃. Rü choma ya Tupana rü yima ma̱xpǘne ya Chióü̃wa guxü̃gutáma namaxã ichacua̱x i ngẽma chorü duü̃xü̃gü.

Miquéa 4:7 Referans Kwoze

Ore i mexü̃ ga Luca ümatüxü̃ 1:33

Rü nüma rü guxü̃gutáma Acóbutanüxü̃arü ãẽ̱xgacü nixĩ. Rü tagutáma ínanguxuchi nax norü ãẽ̱xgacü yixĩxü̃ —ñanagürü.

Miquéa 7:18

Rü nataxuma i to ya Tupana i curüxü̃ ixĩxü̃, erü cuma rü nüxü̃́ nüxü̃ curüngü̃ma i ngẽma norü chixexü̃gü, rü tama nagu curüxĩnüecha i ngẽma chixexü̃gü i cupe̱xewa naxügüxü̃ i ngẽma noxre i curü duü̃xü̃ i íyaxügüxü̃. Cuma rü toxü̃ cunawe̱x i curü ngechaü̃, rü tama guxü̃guma tomaxã cunuecha.

Miquéa 2:12

Rü nüma ya Cori ya Tupana rü ñanagürü: —Choma rü tá chanangutaque̱xexẽxẽ i guxü̃ma i Acóbutanüxü̃. Rü ñoma carnérugü i wüxiwa ingexmagüxẽẽxü̃rüxü̃ rü tá chanade i ngẽma íyaxügüxü̃ i Iraétanüxü̃ i aixcüma chauga ĩnüexü̃. Rü woo taxũtáma namu natürü ñoma namuxü̃rüxü̃ tá tagaãcüma naxãũgatanü.

Danié 7:14

Rü nüma ga guma Ãẽ̱xgacü rü namaxã nataãxẽ rü pora nüxna naxã nax ñoma i naanemaxã inacuáxü̃ca̱x. Rü guxü̃ma i ñoma i naanecüã̱x i duü̃xü̃gü i to i nagawa idexagüchigüxü̃ rü tá nüxü̃ nicua̱xü̃gü. Rü nüma rü guxü̃guma Ãẽ̱xgacü nixĩ rü tagutáma inayacua̱x nax Ãẽ̱xgacü yixĩxü̃.

Ichaía 24:23

Rü ngẽxguma nüma ya Cori ya Tupana ya Guxãétüwa Ngẽxmacü ãẽ̱xgacü yixĩxgu i ma̱xpǘne ya Chióü̃wa i Yerucharéü̃wa, rü yimá tauemacü rü tá nadauemamare rü yimá üa̱xcü rü tá naxeemamare. Rü yima ĩanearü ãẽ̱xgacügü rü tá nüxü̃ nadaugü ya Cori ya Tupanaarü üüne.

Yema Cuáü̃ nüxü̃ dauxü̃ i yixcüra tá ngupetüxü̃chiga 11:15

Rü yema norü 7 ga Tupanaarü orearü ngeruxü̃, rü nayacue ga norü cornéta. Rü nayexma ga nagagü ga tagaxü̃ ga daxũguxü̃ ga naanewa inaxũgüxü̃ ga ñagüxü̃: “Ñu̱xma rü tórü Cori ya Tupana rü Nane ya Cristu nixĩ i namaxã icua̱xgücü i guxü̃ma i ñoma i naane. Rü nümagü rü guxü̃gutáma namaxã inacua̱xgü”, ñagüxü̃.

Miquéa 5:3

Rü ñu̱xma ya Cori ya Tupana rü norü duü̃xü̃güna nixũgachi nax norü uanügü namaxã icuáxü̃ca̱x ñu̱xmatáta naxíxraxacü i ngẽma nge i wüxi ya ngĩne tá ngĩxü̃́ ngẽxmacü. Rü ngẽxguma tá nixĩ i ngẽma Iraétanüxü̃ i to i nachixü̃anegügu woonexü̃ rü tá nachixü̃aneca̱x nawoeguxü̃ nax wüxiwa nangẽxmagüxü̃ca̱x namaxã i natanüxü̃ ga nachixü̃anewatama yaxǘgüxü̃.

Joel 3:17

Rü nüma ya Cori ya Tupana rü ñanagürü: —Pemax rü tá nüxü̃ picua̱xãchitanü nax choma i perü Cori ya Tupana rü yima chorü ma̱xpǘne ya Üünene ya Chióü̃wa chamaxü̃xü̃. Rü yima ĩane ya Yerucharéü̃ rü wüxi ya ĩane ya üünene tá nixĩ. Rü tagutáma wena to i nachixü̃anecüã̱xgü nagu nachocu.

Ochéa 1:10

Natürü wüxi i ngunexü̃gu i ngẽma Iraétanüxü̃ rü tá namuxũchi ñoma naxnecü i márpechinüwa ngẽxmacürüxü̃. Rü ngẽmaca̱x taxucürüwa texé tayaxugü nax ñuxre yixĩxü̃. Rü woo noxri pemaxã nüxü̃ chixu nax tama chorü duü̃xü̃gü pixĩgüxü̃, natürü wüxi i ngunexü̃ rü choma ya Tupana ya Maxü̃cü tá pemaxã nüxü̃ chixu nax chorü duü̃xü̃gü pixĩgüxü̃.

Danié 7:27

Rü nüma ya Tupana ya Guxãétüwa Ngẽxmacü rü tá norü duü̃xü̃güna nanaxã i pora nax guxü̃ma i ñoma i naanemaxã inacua̱xgüxü̃ca̱x. Rü ñoma i naanecüã̱x i duü̃xü̃gü rü norü ãẽ̱xgacügü rü tá nüxü̃ nicua̱xüü̃gü. Rü guxü̃ma i duü̃xü̃gü i ñoma i naanewa maxẽxü̃ rü guxü̃gutáma Tupanaarü duü̃xü̃güme̱xẽwa tá nangẽxmagü rü tá naga naxĩnüxẽ”, ñanagürü.

Ichaía 66:8

¿Texé nüxü̃ taxĩnü i ore i nangexgumaraü̃xü̃? ¿Rü texé nüxü̃ tadau i ta̱xacü i nangexgumaraü̃xü̃? ¿Rü ñuxãcü wüxitama i ngunexü̃gu nango̱x i wüxi i nachixü̃ane? ¿Rü ñuxãcü wüxi ya ĩane rü ngürüãchimare nango̱x? Natürü yima ĩane ya Chióü̃ rü yexguma guxchaxü̃wa nayexmagu rü wüxitama i ngunexü̃gu ngürüãchi nawoegu ga norü duü̃xü̃gü.

Ichaía 60:22

Rü ngẽma duü̃xü̃gü i ñu̱xma noxremarexü̃ rü tá nimu rü wüxi i nachixü̃ane i poraxü̃ tá nixĩgü. Rü chaxicatama nixĩ ya Tupana chixĩxü̃. Rü ngẽxguma nawa nanguxgu i ngẽma ngunexü̃ rü paxa tá chanaxü i guxü̃ma i ngẽma —ñanagürü ya Tupana.

Ichaía 6:13

Rü woo chi 100 tanüwa rü 10 i duü̃xü̃gü íyaxüxgu nawa ya yima ĩane rü ngẽma rü tá ta nadai ñoma wüxi i nai i daxüchixü̃rüxü̃. Natürü ñoma wüxi i naixchimewa ngexwaca̱xü̃xü̃ i nane rüxüamaxü̃rüxü̃ tá nixĩ i ngẽma Iraétanüxü̃. Erü noxretama tá ínayaxü, rü ngẽmatanüwa tá ne naxĩ i duü̃xü̃gü i aixcüma chauga ĩnüexü̃ —ñanagürü ga Tupana.

Wiyaegü 2:6

—Choma rü marü nüxü̃ chaxuneta ya yimá ãẽ̱xgacü ya choma chanaxwa̱xecü nax yima ma̱xpǘne ya üünene ya Chióü̃wa ãẽ̱xgacü yixĩxü̃ca̱x —ñanagürü.

Ichaía 16:5

Rü wüxi i Dabí nataxa rü tá ãẽ̱xgacü nixĩ i Iraéanewa. Rü nüma ya yimá ãẽ̱xgacü rü tá mea norü duü̃xü̃gümaxã inacua̱x rü taxũtáma nanawomüxẽxẽ. Rü ãẽ̱xgacü i ixaixcümacü tá nixĩ rü guxãmaxã tá namecüma. Rü paxa tá nanamexẽxẽ i duü̃xü̃güarü guxchaxü̃gü.

Danié 2:44

Rü ngẽma ãẽ̱xgacügü rü ñoma i naanemaxã icua̱xgüguyane rü nüma ya Tupana ya daxũwa ngẽxmacü rü tá nayamucuchi i wüxi i ãẽ̱xgacü i tagutáma texé iyanaxoxẽẽcü rü tagutáma to i nachixü̃ane nüxü̃ rüyexeracü. Rü nüma rü tá inayanaxoxẽxẽ i guxü̃táma i ngẽma togü i ãẽ̱xgacügüarü ĩnü rü ngẽmaãcü i nüma rü guxü̃gutáma ãẽ̱xgacü nixĩ.

Danié 4:34

—Rü yexguma marü yanguxgu ga gumá 7 ga taunecü nax Tupana choxü̃ poxcuxü̃, rü choma ga Nabucudonochó rü dauxü̃gu chadawenü rü nüxü̃ chicua̱xãchi nax cha̱u̱xca̱x mea yataanexü̃ nawa ga nax chaxãũãẽxü̃. Rü ñu̱xũchi mexü̃ nachigaxü̃ chixu ya yimá Tupana ya Guxãétüwa Ngẽxmacü ya guxü̃guma maxü̃cü. Rü ñaa dexamaxã nüxü̃ chicua̱xüxü̃ rü ñachagürü: “Pa Tupanax, curü pora rü taguma inayacua̱x rü cuma rü guxü̃gutáma ãẽ̱xgacü quixĩ.

Joel 2:32

Natürü guxãma ya texé ya aixcüma Tupanaga ĩnüxe rü taxũtáma tapoxcue. Erü yima ma̱xpǘne ya Chióü̃ ya Yerucharéü̃wa ngẽxmanewa tá nango̱x ya yimá Maxẽxẽxẽruxü̃ yema Cori ya Tupana pemaxã inaxunetaxü̃rüxü̃. Rü yíxema nüma tüxü̃ nidexechixe rü taxũtáma tapoxcue.

Chofonía 3:13

Rü ngẽma Iraétanüxü̃ i Yerucharéü̃wa yaxǘgüxü̃ rü taxũtáma chixri natanüxü̃maxã inacua̱x, rü taxũtáma doraxü̃ nixugüe rü tagutáma texéxü̃ nawomüxẽẽgü. Rü mea tá ínachibüe, rü tama namuü̃eãcüma tá inarüngü̃gü” —ñanagürü.

Echequié 43:7

Rü choxü̃ ñanagürü: —Ñaa nixĩ i cha̱u̱xma̱xwe̱xechica, rü nachica i nagu chacuaixcutüxü̃. Rü ñaa nachicawa tá nixĩ i guxü̃gutáma Iraégütanügüwa chamaxü̃xü̃. Rü woo Iraétanüxü̃, rü woo norü ãẽ̱xgacügü rü taxũtáma wena norü tupananetagüca̱x nanaxãũãchixẽxẽ i chauéga i üünexü̃. Rü taxũtáma norü ãẽ̱xgacügü i yuexü̃chique̱xewa naxĩ nax nüxü̃ yacua̱xüü̃güxü̃ca̱x.

Abdía 1:21

Rü ngẽma Iraétanüxü̃ ga norü uanügüxü̃ rüporamaegüxü̃ rü tá naxca̱x nawoegu ya yima ma̱xpǘne ya Chióü̃ nax ngéma namaxã inacua̱xgüxü̃ca̱x i ngẽma máxpü̱xanexü̃ i Echaútanüxü̃arü ixĩxü̃. Rü nüma ya Cori ya Tupana tá nixĩ i guxü̃arü ãẽ̱xgacü yixĩxü̃.

Miquéa 2:13

Rü chomatama ya Cori ya Tupana ya Iraétanüxü̃arü Ãẽ̱xgacü rü nape̱xegu tá chixũ, rü tá naxca̱x chayaxümachigü nax nüxü̃́ natauxchaxü̃ca̱x nax norü uanügüarü ĩanearü ĩã̱xwa ínachoxü̃xü̃ —ñanagürü ya Cori ya Tupana.

Chofonía 3:20

Rü ngẽma ngunexü̃gügu rü pechixü̃anegu tá pexü̃ changutaque̱xexẽxẽ. Rü ngẽma perü naanewa rü tá pexü̃ charüngü̃xẽxẽxü̃ nax wena mea pexü̃ nangupetüxü̃ca̱x. Rü ngẽmaãcü tá petachiga nape̱xewa i guxü̃ma i duü̃xü̃gü i ñoma i naanewa ngẽxmagüxü̃. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.