Miquéa 4:6 - Tupanaarü Ore

⁶ Rü nüma ya Cori ya Tupana rü ñanagürü: —Yixcüra rü tá nachixü̃aneca̱x chanawoeguxẽxẽ i ngẽma chorü duü̃xü̃gü i Iraétanüxü̃gü. Rü wüxiwa tá chanangexmagüxẽxẽ i ngẽma noxri to ga nachixü̃anegu woonexü̃ rü turaexü̃ rü ipaexü̃.

Miquéa 4:6 Referans Kwoze

Chofonía 3:19

Ngẽma ngunexü̃gu rü tá chanadai i guxü̃ma i ngẽma chixri pemaxã icua̱xgüxü̃. Rü tá pexü̃ charüngü̃xẽxẽxü̃ i pema nax pengearü poxü̃ruü̃ã́xü̃, ñoma wüxi i carnéru ibüyeparaxü̃ i ngearü poxü̃ã́xü̃rüxü̃. Rü pema nax pewoonexü̃ rü tá wena pexü̃ chanutaque̱xe. Rü ngẽma naanegü i ngextá duü̃xü̃gü pexü̃ ixoexü̃wa rü tá pexü̃ chatachigaxẽxẽ.

Ore i mexü̃ ga Cuáü̃ ümatüxü̃ 10:16

Rü choxü̃́ nangẽxmagü ta i togü i carnérugü i tama ñaa naxpüü̃wa ngẽxmagüxü̃. Rü ngẽmagü rü tá ta nua chanagagü, rü tá chauga naxĩnüe. Rü wüxitücumü tátama nixĩ rü choma tátama nixĩ i norü dauruxü̃ chixĩxü̃.

Ichaía 56:8

Rü choma rü tá nachixü̃aneca̱x chanawoeguxẽxẽ i ngẽma Iraétanüxü̃ i taxũta nachixü̃aneca̱x woeguxü̃. Rü tá chananutaque̱xe wüxigu namaxã i togü i nachixü̃anecüã̱x i duü̃xü̃gü. Rü choma ya Tupana nixĩ i nüxü̃ chixuxü̃ i ngẽma —ñanagürü.

Wiyaegü 147:2

Rü nüma ya Cori ya Tupana rü wena ínanadaxẽxẽ ya Yerucharéü̃ rü nananutaque̱xe i ngẽma Iraétanüxü̃ i to i nachixü̃anegügu woonexü̃.

Ore i mexü̃ ga Luca ümatüxü̃ 19:10

Rü Tupana Nane ya duü̃xü̃xü̃ ixĩcü, rü ñoma i naanewa naxũ nax naxca̱x yadauxü̃ca̱x i ngẽma duü̃xü̃gü i iyarütauxexü̃ nax namaxẽxẽẽãxü̃ca̱x —ñanagürü.

Miquéa 2:12

Rü nüma ya Cori ya Tupana rü ñanagürü: —Choma rü tá chanangutaque̱xexẽxẽ i guxü̃ma i Acóbutanüxü̃. Rü ñoma carnérugü i wüxiwa ingexmagüxẽẽxü̃rüxü̃ rü tá chanade i ngẽma íyaxügüxü̃ i Iraétanüxü̃ i aixcüma chauga ĩnüexü̃. Rü woo taxũtáma namu natürü ñoma namuxü̃rüxü̃ tá tagaãcüma naxãũgatanü.

Echequié 36:24

Rü choma, Pa Iraétanüxü̃x, rü tá pexü̃ íchagaxü̃ nawa i guxü̃ma i ngẽma nachixü̃anegü i nawa pengẽxmagüxü̃. Rü wüxiwa tá pexü̃ chagagü, rü ñu̱xũchi perü naaneca̱x tá pexü̃ chawoeguxẽxẽ.

Yeremía 31:8

Rü tá pexü̃ chawoeguxẽxẽ nüxna i ngẽma nachixü̃ane i nórtewa ngẽxmaxü̃ rü nüxna i ngẽma togü i nachixü̃anegü i guxü̃ i naanewa ngẽxmagüxü̃. Rü ngẽma woeguxü̃tanügu tá naxãgü i ngẽma ngexetüxü̃, rü ngẽma ichixeparaxü̃, rü ngẽma ngexü̃gü i tapütüwegüxü̃, rü ngẽma ngexü̃gü i marü ixíraxacügüxü̃. Rü ngẽmaãcü tá muxü̃tama i duü̃xü̃gü nawoegu naxca̱x i norü naane.

Yeremía 3:18

Rü ngẽxguma tá nawa nanguxgu i ngẽma ngunexü̃, rü Yudáanecüã̱xgü rü Iraéanecüã̱xgü rü nügümaxã wüxiwa tá nangẽxmagügu. Rü wüxigu tá nüxna nawoegu i ngẽma nachixü̃ane i nórtewa ngẽxmaxü̃. Rü ngẽma naane ga nũxcümaü̃güxü̃ ga perü o̱xigüna chaxãxü̃wa tá naxĩ.

Wiyaegü 38:17

Rü aixcüma nixĩ nax chaturaxü̃. Rü ngẽma nax choxü̃́ nangúxü̃ rü taguma choxü̃ narüna.