Miquéa 4:13 - Tupanaarü Ore

¹³ ¡Inachi rü nadai, Pa Ĩane ya Chióü̃x! Erü choma ya Cori ya Tupana rü ñachagürü: —Choma rü tá cuxna chanaxã i pora nax ñoma wüxi i woca i yatüxü̃ i fierumaxã ãxchata̱xcurexü̃ rü bróũchemaxã ixãpatüxü̃rüxü̃ cunada̱i̱xü̃ca̱x i muxü̃ma i duü̃xü̃gü. Cuma rü tá nüxna cunapuxü̃ i ngẽma norü ngẽmaxü̃gü i chixexü̃wa nayauxgüxü̃, rü ñu̱xũchi tá choxna cunana i choma nax guxü̃ i naanemaxã ichacuáxü̃ —ñachagürü i choma ya Cori ya Tupana.

Miquéa 4:13 Referans Kwoze

Danié 2:44

Rü ngẽma ãẽ̱xgacügü rü ñoma i naanemaxã icua̱xgüguyane rü nüma ya Tupana ya daxũwa ngẽxmacü rü tá nayamucuchi i wüxi i ãẽ̱xgacü i tagutáma texé iyanaxoxẽẽcü rü tagutáma to i nachixü̃ane nüxü̃ rüyexeracü. Rü nüma rü tá inayanaxoxẽxẽ i guxü̃táma i ngẽma togü i ãẽ̱xgacügüarü ĩnü rü ngẽmaãcü i nüma rü guxü̃gutáma ãẽ̱xgacü nixĩ.

Ichaía 23:18

Natürü ngẽma norü ngẽmaxü̃gümaxã nax nataxegüxü̃tanüwa ngĩxü̃ nayauxgücü i diẽru rü Cori ya Tupanaca̱x tá ngĩxü̃ ínaxüxüchigü. Rü taxũtáma marü nügüaxü̃́rica ngĩmaxã nanguxü̃gü rü ngĩxü̃ nanutaque̱xegü, natürü tá duü̃xü̃gü i Cori ya Tupanaca̱x puracüexü̃na ngĩxü̃ naxãgü i ngẽma diẽru nax ngẽmaãcü muxü̃ma i õnaca̱x rü naxchiru i mexẽchixü̃ca̱x ngĩmaxã nataxegüxü̃ca̱x.

Ichaía 18:7

Rü ngẽma ngunexü̃gügu rü Cori ya Tupana ya Guxãétüwa ngẽxmacüxü̃tawa tá nanana i norü ãmaregü i ngẽma duü̃xü̃gü i máxchanexü̃ rü ingoracha̱xmüxü̃güxü̃ rü iporaxüchixü̃ rü nügü írütagüxü̃ rü guxãma ya to i nachixü̃anecüã̱xgü nüxü̃ muü̃xexü̃ i naane i natügü nawa muxũchixü̃gu ãpatagüxü̃. Rü ngẽma duü̃xü̃gü rü yima ma̱xpǘne ya Chióü̃ i Cori ya Guxãétüwa Ngẽxmacüxü̃ iyacua̱xüü̃guxü̃wa tá nanana i norü ãmaregü.

1 Corintios 16:2

Rü ngẽma diẽru i perü puracüwa ngĩxü̃ peyaxucüwa rü guxcü i yüxüarü ngunexü̃gu rü tá ngĩxü̃ pexã i ngẽma diẽru i Tupanaarü ixĩcü. Rü ngĩmaxã tá penguxü̃ nax tama ngẽxguma ngéma changuxguama ngĩxü̃ nax pedexü̃ca̱x.

Chacaría 6:5

Rü yexguma nüma ga yema Tupanaarü orearü ngeruxü̃ i daxũcüã̱x rü choxü̃ nangãxü̃ rü ñanagürü: —Yima carugü rü nachiga nixĩ ya yimá ãgümücü ya buanecügü ya Cori ya Tupana ya guxü̃ma i ñoma i naanearü yorape̱xewa ixĩãchicü.

Chacaría 4:14

Rü nüma ga yema daxũcüã̱x rü choxü̃ nangãxü̃ rü ñanagürü: —Ngẽma taxre ya oribune rü nachiga nixĩ i ngẽma taxre i duü̃xü̃gü i marü chíxü̃maxã íbaeruxü̃ nax nümagü rü nüxü̃́ napuracüexü̃ca̱x ya Tupana ya ñoma i naanearü yora ixĩcü —ñanagürü.

Yeremía 51:33

Erü nüma ya Cori ya Guxãétüwa Ngẽxmacü ya Iraétanüxü̃güarü Tupana ixĩcü rü ñanagürü: “Yima Babirónia ga noxri mexẽchine rü ñu̱xma rü tá ñoma tríguarü pu̱xgüchicarüxü̃ tá nixĩ. Rü ñu̱xma rü marü naxca̱x ínangu nax yabuxgüãxü̃ i norü trigu” —ñanagürü.

Wiyaegü 68:29

Rü yima cupata ya ma̱xpǘnewa ngẽxmane i Yerucharéü̃wa rü ngẽma togü i nachixü̃anegüarü ãẽ̱xgacügü rü cuxca̱x ngéma nanana i ãmaregü.

Yochué 6:19

Natürü ngẽma úiru rü diẽrumü rü guxü̃ma i ngẽmaxü̃gü i bróũchenaxca̱x rü fierunaxca̱x, rü Cori ya Tupanaarü tá nixĩ rü norü ngẽmaxü̃gütanügu tá penanu —ñanagürü ga Yochué.

Ichaía 5:28

Rü yima naxnegü rü meama nixãmagu, rü guxü̃nema ya norü würagü rü meama nipe̱xe̱xcunü. Rü norü cowaruarü nga̱xcueruü̃gü rü nutarüxü̃ nataixichi. Rü naga i nachicu i norü carugü rü ñoma wüxi ya buanecü ya taxüchicürüxü̃ nixĩgü.

Wiyaegü 72:10

Rü ngẽma Tárchixanearü ãẽ̱xgacü, rü Capaxũgüarü ãẽ̱xgacü, rü Chabáanearü ãẽ̱xgacü, rü Chebáanearü ãẽ̱xgacü, rü name nixĩ i guxü̃ma i ngẽma ãẽ̱xgacügü rü torü ãẽ̱xgacüxü̃tawa nanana i norü ãmaregü.

Wenaxarü naxümatü ga Tupanaarü mugü 33:25

Rü perü ĩanegüarü poxeguxü̃arü chotaruxü̃gü rü fierunaxca̱x rü bróũchenaxca̱x tá nixĩgü. Rü ngẽma perü pora i pexü̃́ ngẽxmaxü̃ rü tá natai i guxü̃ma i ngẽma ngunexü̃gü i nagu pemaxẽxü̃gu —ñanagürü.

Ichaía 21:10

Pa Chorü Duü̃xü̃güx, pema rü ngúxü̃ pingegü ñoma tríguarü o i nagu napugüenerüxü̃. Rü choma rü marü pemaxã nüxü̃ chixu ga yema Iraéarü Cori ya Tupana ya Guxãétüwa Ngẽxmacü chomaxã nüxü̃ ixuxü̃.

Yeremía 51:20

Cumax, Pa Babiróniax, rü chorü martíyu rü chauxne quixĩ. Rü cuxü̃ chayanaxoxẽxẽ i nachixü̃anegü rü cuxü̃ chanadaixẽxẽ i norü ãẽ̱xgacügü.

Ochéa 10:11

Ngẽma Iraéanecüã̱xgü rü ñoma wüxi i woca i puracüruxü̃ i ngexwaca yáxü̃rüxü̃ nixĩ nax tauxchaxü̃ i puracü i tríguarü puwa napuracüxü̃. Natürü i ñu̱xma rü tá guxchaxü̃wa chanangexmagüxẽxẽ i ngẽma Iraéanecüã̱xgü. Rü ngẽma Yudáanecüã̱xgü rü ta rü taxũtáma na̱xcha̱xwa nibuxmü i ngẽma guxchaxü̃gü.

Abacú 3:12

Rü curü numaxã rü guxü̃ma i ñoma i naanegu ícuyaxüegu. Rü curü numaxã nixĩ i nagu cupúgüexü̃ i ngẽma nachixü̃anegü.

Wiyaegü 24:1

Cori ya Tupanaarü nixĩ i guxü̃ma i ñaa naane rü guxü̃ma i nawa ngẽxmagüxü̃ rü guxü̃ma i nawa maxẽxü̃.

Miquéa 5:7

Rü ngẽxguma i ngẽma Iraétanüxü̃ i íyaxügüxü̃ i ñu̱xma togü i nachixü̃anegütanüwa ngẽxmagüxü̃, rü Tupana rü tá namaxã inacua̱x ñoma cherenamaxã rü pucü i maxẽétügu puxü̃maxã inacuáxü̃rüxü̃. Rü taxũtáma nanaxwa̱xegü nax duü̃xü̃güarü ngü̃xẽẽca̱x nadaugüxü̃ erü Tupana tá nixĩ i nüxü̃ rüngü̃xẽẽcü.

Chacaría 12:3

Rü ngẽma ngunexü̃gu rü Yerucharéü̃ rü wüxi ya nuta ya yaxüchicüxü̃ tá chayanguxuchixẽxẽ na̱xcha̱xwa i ngẽma togü i nachixü̃anegü. Rü tü̱xchiama tá tayapi̱x ya texé ya nangenagüchaü̃xe. Rü guxü̃ma i ngẽma nachixü̃anegü rü tá nügü nanutaque̱xegü nax Yerucharéü̃maxã nügü nada̱i̱xü̃ca̱x.

Chacaría 12:6

Rü ngẽma ngunexü̃gu rü Yudátanüxü̃arü ãẽ̱xgacügü rü ñoma wüxi i üxü i ya̱u̱xraxü̃rüxü̃ tá nixĩgü. Rü ñoma üxü i triguchapa̱xawa iyaa̱u̱xraxü̃rüxü̃ tá nixĩgü. Rü tá nanadai i guxü̃ma i ngẽma nachixü̃anegü i norü tügünecüwawa nüxna ngaixcamagüxü̃ rü ngẽma to̱xwecüwawa ngaixcamagüxü̃. Natürü ngẽma Yerucharéü̃cüã̱xgü rü wena tá norü ĩaneca̱x nawoegu rü nawa tá namaxẽ.