Miquéa 2:12 - Tupanaarü Ore

¹² Rü nüma ya Cori ya Tupana rü ñanagürü: —Choma rü tá chanangutaque̱xexẽxẽ i guxü̃ma i Acóbutanüxü̃. Rü ñoma carnérugü i wüxiwa ingexmagüxẽẽxü̃rüxü̃ rü tá chanade i ngẽma íyaxügüxü̃ i Iraétanüxü̃ i aixcüma chauga ĩnüexü̃. Rü woo taxũtáma namu natürü ñoma namuxü̃rüxü̃ tá tagaãcüma naxãũgatanü.

Miquéa 2:12 Referans Kwoze

Echequié 36:37

Rü choma ya Cori ya Tupana rü ñachagürü: —Choma rü yexeraãcü tá nüxü̃ charüngü̃xẽxẽchigüama i ngẽma Iraétanüxü̃. Rü ngẽxguma ta̱xacüca̱x choxna nacagügu rü tá nüxna chanaxã. Rü tá chayamuxẽxẽ i norü duü̃xü̃gü ñoma carnérugü imuxü̃rüxü̃.

Miquéa 7:18

Rü nataxuma i to ya Tupana i curüxü̃ ixĩxü̃, erü cuma rü nüxü̃́ nüxü̃ curüngü̃ma i ngẽma norü chixexü̃gü, rü tama nagu curüxĩnüecha i ngẽma chixexü̃gü i cupe̱xewa naxügüxü̃ i ngẽma noxre i curü duü̃xü̃ i íyaxügüxü̃. Cuma rü toxü̃ cunawe̱x i curü ngechaü̃, rü tama guxü̃guma tomaxã cunuecha.

Miquéa 7:14

¡Pa Cori ya Tupanax, curü naixmena̱xãmaxã nüxna nadau i ngẽma curü duü̃xü̃gü i curü carnérugü ixĩgüxü̃! Ñu̱xma rü nüxicatama naixnecüwa nangẽxmagü i naane i mexü̃wa. ¡Ẽcü ü̃parüxü̃ Bacháü̃anewa rü Garaáxanewa nagagü i ngextá õna íngẽxmaxü̃wa!

Miquéa 5:7

Rü ngẽxguma i ngẽma Iraétanüxü̃ i íyaxügüxü̃ i ñu̱xma togü i nachixü̃anegütanüwa ngẽxmagüxü̃, rü Tupana rü tá namaxã inacua̱x ñoma cherenamaxã rü pucü i maxẽétügu puxü̃maxã inacuáxü̃rüxü̃. Rü taxũtáma nanaxwa̱xegü nax duü̃xü̃güarü ngü̃xẽẽca̱x nadaugüxü̃ erü Tupana tá nixĩ i nüxü̃ rüngü̃xẽẽcü.

Amúx 1:12

Rü ngẽmaca̱x tá üxümaxã chayagu i Temáü̃ane. Rü ngẽma üxüema tá nixĩ ya yima Bochráarü ãẽ̱xgacüpatagü iguxü̃ne —ñanagürü ga Cori ya Tupana.

Ochéa 1:11

Rü ngẽma ngunexü̃gu rü ngẽma Yudáanecüã̱xgü rü Iraéanecüã̱xgü rü wüxitama i nachixü̃ane tá nixĩ, rü wüxi tátama nixĩ i norü ãẽ̱xgacü. Rü yíxema to i nachixü̃anewa tüxü̃ nagagüxe rü tá wena Yerucharéü̃ca̱x tawoegu. Rü ngẽma Yereéarü ngunexü̃gu rü taxü̃ i taãxẽ tá nangẽxma.

Echequié 37:21

Rü ngẽmawena rü duü̃xü̃gümaxã nüxü̃ ixu i chorü ore i ñaxü̃: ‘Choma rü tá íchanagaxü̃ i ngẽma Iraétanüxü̃ nawa i ngẽma nachixü̃anegü ga nawa nagagüãxü̃. Rü wüxiwa tá chanagagü i ngẽma Iraétanüxü̃ i ñu̱xma guxü̃ma i nachixü̃anegu woonemarexü̃. Rü choma rü tá norü naanewa chanagagü.

Echequié 34:31

Rü pematama nixĩ i chorü carnérugü pixĩgüxü̃ rü chorü naanewa pengẽxmagüxü̃. Rü choma nixĩ i perü Tupana chixĩxü̃. Rü choma ya Cori ya Tupana nixĩ i pemaxã nüxü̃ chixuxü̃ i ngẽma —ñanagürü.

Echequié 34:22

Natürü choma rü tá nüxna chadau i chorü carnérugü. Rü tá ngẽma ngĩ́ta̱xagüxü̃na íchanapoxü̃ nax tama naxca̱x nangĩ̱xgüechaxü̃ca̱x. Rü tá chanapoxcu i ngẽma carnérugü i namücümaxã chixecümagüxü̃”.

Echequié 34:11

Rü choma ya Cori ya Tupana rü ñachagürü: —Chomatátama nüxna chadau i ngẽma chorü carnérugü.

Yeremía 23:3

Rü chomatátama chayagagü i ngẽma chorü duü̃xü̃gü ga togü ga nachixü̃anegügu chawoonexü̃. Rü tá chanaxĩtaque̱xexẽxẽ nax wena nachixü̃aneca̱x nawoeguxü̃ca̱x, rü ngẽmaãcü ngéma yamuxü̃ca̱x.

Ichaía 34:6

Rü ngẽma Cori ya Tupanaarü tara rü nagümaxã tá nadutachinü rü chíxü̃maxã tá niyi̱xatachinücüxü. Rü ñoma ngẽxguma ãmareruxü̃ carnéruxacügü rü chíbuxacügü idaixgurüxü̃ tá nixĩ. Rü nüma ya Cori ya Tupana rü ĩane ya Bochráwa wüxi i ãmare tá nigu, rü Edóü̃anewa rü muxü̃tama i duü̃xü̃güxü̃ tá nadai.

Ichaía 27:12

Rü ngẽma ngunexü̃ i Cori ya Tupana nagu yadexechixü̃ i Iraétanüxü̃, rü natü i Eufrátewa tá inanaxügü ñu̱xmatata Equítuarü natügu yacuáx nax nanutaque̱xeãxü̃ i Iraétanüxü̃ ñoma trigu wüxipü̱xüchigü naxchirena inuxü̃xü̃rüxü̃.

Ichaía 11:11

Rü ngẽxguma yimá Dabítaxa ingucuchigu nax ãẽ̱xgacü yixĩxü̃ca̱x rü nüma ya Cori ya Tupana rü tá wena inanawe̱x i norü pora. Rü wena tá nanangutaque̱xexẽxẽ i norü duü̃xü̃gü i Achíriaanewa, rü Equítuanewa, rü Patróxanewa, rü Etiopíaanewa, rü Eráü̃anewa, rü Chináxanewa, rü Amáanewa rü nachixü̃anegü i márcutüwa ngẽxmagüxü̃wa. Rü tá wena Iraéaneca̱x nanawoeguxẽxẽ.

Yeremía 3:18

Rü ngẽxguma tá nawa nanguxgu i ngẽma ngunexü̃, rü Yudáanecüã̱xgü rü Iraéanecüã̱xgü rü nügümaxã wüxiwa tá nangẽxmagügu. Rü wüxigu tá nüxna nawoegu i ngẽma nachixü̃ane i nórtewa ngẽxmaxü̃. Rü ngẽma naane ga nũxcümaü̃güxü̃ ga perü o̱xigüna chaxãxü̃wa tá naxĩ.

Naanearü ügüchiga 36:33

Rü yexguma Béra yu̱xgu rü nachicüxü ãẽ̱xgacüxü̃ ningucuchi ga Chéra nane ga Yobáx ga ĩane ga Bochrácüã̱x.

Ichaía 5:17

Rü yima ĩanegü rü tá inanguxuchigü rü nachicawa tá maxẽ narüxügü, rü ngéma tá nachibüe i carnérugü rü chíbugü.

Miquéa 2:13

Rü chomatama ya Cori ya Tupana ya Iraétanüxü̃arü Ãẽ̱xgacü rü nape̱xegu tá chixũ, rü tá naxca̱x chayaxümachigü nax nüxü̃́ natauxchaxü̃ca̱x nax norü uanügüarü ĩanearü ĩã̱xwa ínachoxü̃xü̃ —ñanagürü ya Cori ya Tupana.

Miquéa 4:8

Rü cumax, Pa Yerucharéü̃ i Iraétanüxü̃arü Poxü̃chicaxü̃ Ixĩxẽ i Ma̱xpǘne ya Chióü̃wa, rü wena táxarü guxü̃ i togü i Iraéanearü ĩanegüétüwa cungexma. Rü cuwa tá nixĩ i nangẽxmaxü̃ i ñaa nachixü̃anearü ãẽ̱xgacü —ñanagürü ya Tupana.

Miquéa 5:8

Rü ngẽxguma i ngẽma Iraéanecüã̱xgü i íyaxügüxü̃ i ñu̱xma togü i nachixü̃anegütanüwa ngẽxmagüxü̃, rü tá ngẽma togü i nachixü̃anegüxü̃ narüporamae ñoma leóü̃ rü togü i naeü̃güxü̃ rüporamaexü̃rüxü̃. Rü ñoma leóü̃acü i carnérutanüwa ngẽxmaxü̃ rü carnérugüxü̃ íyauxü̃xü̃ rü taxúema tüxü̃ iñaxẽẽxü̃rüxü̃ tá nixĩgü i ngẽma Iraétanüxü̃.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 1:44

Rü yexguma Béra yu̱xgu rü nachicüxü ãẽ̱xgacüxü̃ ningucuchi ga Chéra nane ga Yobáx. Rü nüma ga Yobáx rü ĩane ga Bochrácüã̱x nixĩ.

Echequié 34:13

Rü ngẽma togü i nachixü̃anegü i nagu nawoonexü̃wa rü tá íchanagaxü̃, rü wüxigu tá chanangutaque̱xexẽxẽ. Rü norü naanewa tátama chanagagü. Rü ngẽma Iraéanearü ma̱xpǘnegüwa tá chanamugü nax ngéma nachibüexü̃ca̱x rü natügüwa naxaxegüxü̃ca̱x. Rü ngẽmaãcü i ngẽma duü̃xü̃gü i yaxǘgüxü̃ i ngẽma naanewa íngẽxmagüxü̃wa tá nangẽxmagü i ngẽma chorü carnérugü.

Chofonía 3:20

Rü ngẽma ngunexü̃gügu rü pechixü̃anegu tá pexü̃ changutaque̱xexẽxẽ. Rü ngẽma perü naanewa rü tá pexü̃ charüngü̃xẽxẽxü̃ nax wena mea pexü̃ nangupetüxü̃ca̱x. Rü ngẽmaãcü tá petachiga nape̱xewa i guxü̃ma i duü̃xü̃gü i ñoma i naanewa ngẽxmagüxü̃. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.