Ore i mexü̃ ga Matéu ümatüxü̃ 21:5 - Tupanaarü Ore

⁵ “¡Chióü̃cüã̱xgümaxã nüxü̃ pixu rü ñapegü! ‘¡Dücax ya perü ãẽ̱xgacü ya nua pexü̃tawa ũcü! Rü nüma rü tama nügü yacua̱xüü̃ãcü ínangu, rü wüxi i búruxacüétügumare naxaunagüãcü ínangu’ ”, ñanagürü ga yema ore.

Ore i mexü̃ ga Matéu ümatüxü̃ 21:5 Referans Kwoze

Ichaía 62:11

Rü Tupana rü guxü̃ma i duü̃xü̃gü i ñoma i naanewa maxẽxü̃maxã nüxü̃ nixu rü ñanagürü: —¡Ĩane ya Chióü̃cüã̱xgümaxã nüxü̃ pixu rü marü ínangu i norü nguxü̃xẽxẽruxü̃! ¡Rü namaxã nüxü̃ pixu rü Tupana rü marü ínananguxü̃xẽxẽ rü nanawoeguxẽxẽ i norü duü̃xü̃gü ga norü uanügü gagüxü̃! —ñanagürü.

Ichaía 12:6

¡Rü perü taãẽmaxã tagaãcü wáita pixüe, Pa Chióü̃cüã̱xgü! Erü Iraétanüxü̃arü Tupana rü nata rü naxüüne, rü petanüwa nangẽxma guxü̃ma i norü poramaxã —ñaperügügü tá.

Naanearü ügüchiga 49:10

Rü nüma ya Yudá rü taxúetama nüxna tanayaxu i ngẽma norü pora. Rü yimá naixmena̱xã ya norü poraarü cua̱xruxü̃ ya naxme̱xwa ngẽxmane rü taxúetama nüxna tanayaxu ñu̱xmatáta ínangu ya yimá naixmena̱xãarü yora ya guxü̃arü ãẽ̱xgacü ixĩcü. Rü yimága tá nixĩ i naxĩnüexü̃ i guxü̃ma i duü̃xü̃gü.

Ochéa 1:7

Natürü ngẽma Yudáanecüã̱xgü rü tá choxü̃́ nangechaü̃tümüxü̃gü. Rü chomatama i norü Tupana nax chixĩxü̃ rü tá norü uanügüna íchanapoxü̃. Natürü taxũtáma ta̱xacürü churaragümaxã rüe̱xna naxnegümaxã rüe̱xna ngẽma churaragü i cowaruã́xü̃maxã tá norü uanügüna íchanapoxü̃ —ñanagürü ga Tupana.

Ichaía 40:9

Rü ngẽma naga rü ñanagürü: —¡Pa Chióü̃x, wüxi ya ma̱xpǘnechitaerugu naxĩnagü rü tagaãcü naxunagü i ñaa ore i mexü̃! ¡Rü cuma, Pa Yerucharéü̃x, rü tama cumuü̃ãcüma rü tagaãcüma Yudáanearü ĩanegücüã̱xmaxã nüxü̃ ixu i ñaa ore i ñaxü̃: “Nanuxma ya yimá perü Cori ya Tupana”, ñaxü̃! —ñanagürü.

Echequié 37:24

Rü yimá chorü duü̃ ya Dabítaxa tá nixĩ ya chorü duü̃xü̃güarü ãẽ̱xgacü ixĩcü. Rü nüxica tátama nixĩ i norü dauruxü̃ yixĩxü̃. Rü nümagü rü tá chauga naxĩnüe rü tá nagu namaxẽ i chorü mugü rü ucu̱xẽgü.

Echequié 34:24

Rü choma rü chorü carnérugüarü Tupana tá chixĩ rü yima chorü duü̃ ya Dabí tá nixĩ i namaxã icuácü. Rü choma ya Cori ya Tupana nixĩ i nüxü̃ chixuxü̃ i ngẽma.

Ore i mexü̃ ga Matéu ümatüxü̃ 11:29

¡Rü ñu̱xũchi penayaxu i chorü ucu̱xẽgü rü naxca̱x pedauxü̃taegü i chaucüma! Erü choma rü yáxna pemaxã chaxĩnü rü tama chaugü chicua̱xüxü̃. Rü ngẽmaãcü tá nüxna iperüngügü i perü guxchaxü̃gü.

Ore i mexü̃ ga Matéu ümatüxü̃ 2:6

Rü nüma rü ñanagürü: “Cumax, Pa Ĩane Pa Beréü̃ ya Yudáanewa Ngẽxmanex, rü cuma rü tama wüxi ya ngexnerüxünemare ya ĩane quixĩ natanüwa ya yima ĩanegü ya itaxü̃ne ya Yudáanewa ngẽxmagüne. Erü cugu tá nabu ya wüxi ya ãẽ̱xgacü i tá chorü duü̃xü̃gü i Iraétanüxü̃maxã icuácü”, —ñanagürü.

Ore i mexü̃ ga Matéu ümatüxü̃ 2:2

Rü duü̃xü̃güna nacagüe, rü ñanagürügü: —¿Ngextá nixĩ i nangẽxmaxü̃ ya yimá Yudíugüarü ãẽ̱xgacü ya ngexwaca bucü? Toma rü yéama éstewa nüxü̃ tadau nax nangóxü̃ ya norü woramacuri rü ngẽmaca̱x núma taxĩ nax nüxü̃ tayarücua̱xüü̃güxü̃ca̱x —ñanagürügü.

Miquéa 5:2

Rü cumax, Pa Beréü̃ i Efráta, rü woo wüxi ya ĩane ya íxrane quixĩ natanüwa ya guxü̃nema ya Yudáanecüã̱x ya ĩanegü, natürü cugu tá nixĩ i nabuxü̃ ya yimá Iraéanecüã̱xgüarü ãẽ̱xgacü ya woetama marü ngẽxmaechacü.

2 Corintios 10:1

Rü ñu̱xma rü Cristuarü mecümagagu rü norü ngechaü̃gagu, rü choma i Pauru rü pexü̃ chaca̱a̱xü̃ nax choxü̃ íperüxĩnüexü̃ca̱x. Erü nangẽxma i duü̃xü̃gü i nüxü̃ ixugüxü̃ nax pexü̃ chamuü̃xü̃ ega pexü̃tawa changexmagu natürü ngẽxguma pexna chayáxü̃gu rü chaugü ícharüpora.

Wiyaegü 9:14

Rü ngẽxguma choxü̃ ícunguxuchixẽẽgu rü choma rü tá Yerucharéü̃arü ĩã̱xgüwa cuxü̃ chixuchiga rü cuxü̃ chicua̱xüxü̃ nape̱xewa i guxü̃ma i duü̃xü̃gü. Rü namaxã tá nüxü̃ chixu nax chataãẽxü̃ erü ngẽma yuwa choxü̃ ícunguxuchixẽxẽ.

Nüxíraxü̃xü̃ ga popera ga ãẽ̱xgacügüchiga 10:26

Charomóü̃ rü nananutaque̱xe ga carugü rü duü̃xü̃gü ga cowarugümaxã icua̱xgüxü̃. Rü nüxü̃́ nayexma ga 1,400 ga carugü ga churaraweü̃gü rü 12,000 ga duü̃xü̃gü ga cowarugümaxã icua̱xgüxü̃. Rü guma carugü ga dairuxü̃ rü churaragüpatagu namaxã nanguxü̃. Rü guma naigü rü ãẽ̱xgacüpatana nadaugü ga Yerucharéü̃wa.

2 Chamué 16:2

Rü yexguma nüma ga ãẽ̱xgacü ga Dabí rü Chibána naca rü ñanagürü: —¿Tü̱xcüü̃ nua cunana i guxü̃ma i ñaa? —ñanagürü. Rü nüma ga Chibá rü nanangãxü̃ rü ñanagürü: —Ñaa búrugü rü cuxacügü nagu itoü̃xü̃ca̱x nixĩ. Rü ñaa paũgü rü ñaa ori̱xgü rü curü churaragüca̱x nixĩ. Rü daa bínu rü ñaa nachica i taxúema nagu ãpataxü̃gu ipaexü̃ca̱x nixĩ —ñanagürü.

Ãẽ̱xgacügü ga guxchaxü̃güarü mexẽxẽruü̃gü 12:14

Rü 8 ga taunecü nixĩ ga namaxã inacuáxü̃. Rü nüma ga Axdóü̃ rü 40 ga nane rü 30 ga nataagü nüxü̃́ nayexma. Rü wüxichigü ga yema rü norü búrutagu narüxĩĩxü̃.

Ãẽ̱xgacügü ga guxchaxü̃güarü mexẽxẽruü̃gü 5:10

Pema i cómüxü̃ i búrugügu ĩxẽ rü mexü̃ i naxma̱xwe̱xe i ngomüxü̃wa rütogüxe rü pema ya pecutügumare ixĩxẽ, rü name i nagu perüxĩnüe i ngẽma Tupana taxca̱x üxü̃.

Wenaxarü naxümatü ga Tupanaarü mugü 17:16

Rü ngẽma ãẽ̱xgacü i nüxü̃ pexunetaxü̃ rü tama name nax nüma naxca̱x nataxexü̃ i muxũchixü̃ i cowarugü rü bai Equítuanewa nax namugüãxü̃ i duü̃xü̃gü nax to i cowarugüca̱x yataxegüxü̃ca̱x. Erü nüma ya Cori ya Tupana rü tüxna nanachu̱xu nax naxca̱x iwoeguxü̃ i ngẽma nachixü̃ane.

Iraétanüxü̃arü muxchiga 24:19

Rü Acóbutanüxü̃wa tá nango̱x i wüxi i ãẽ̱xgacü i guxãxü̃tama rüporamaexü̃. Rü tá nanadai i norü uanügü i ĩanewa yaxǘgüxü̃ —ñanagürü.

Ore i mexü̃ ga Cuáü̃ ümatüxü̃ 1:49

Rü Natanaé nanangãxü̃ rü ñanagürü nüxü̃: —Pa Ngúexẽxẽruxü̃, cuma rü Tupana Nane quixĩ. Rü cuma nixĩ i guxü̃ma i Iraétanüxü̃arü Ãẽ̱xgacü quixĩxü̃ —ñanagürü.

Ore i mexü̃ ga Matéu ümatüxü̃ 21:6

Rü yexguma ga yema taxre ga norü ngúexü̃gü rü yéma naxĩ, rü nanaxügü ga yema Ngechuchu namaxã nüxü̃ ixuxü̃.

Ore i mexü̃ ga Luca ümatüxü̃ 24:27

Rü yexguma inanaxügü ga namaxã nax nango̱xẽẽãxü̃ ga guxü̃ma ga Tupanaarü ore ga nachiga ümatüxü̃. Rü yema Tupanaarü ore ga Moiché ümatüxü̃maxã inanaxügü. Rü ñu̱xũchi namaxã nüxü̃ nixu ga guxü̃ma ga yema Tupanaarü ore ga nũxcümaü̃güxü̃ ga Tupanaarü orearü uruü̃gü ümatügüxü̃.