Ore i mexü̃ ga Matéu ümatüxü̃ 11:5 - Tupanaarü Ore

⁵ ¡Rü Cuáü̃maxã nüxü̃ pixu rü ngẽma ngexetügüxü̃ rü marü nidauchigü, rü ngẽma ichixeparaxü̃ rü marü inachigü, rü ngẽma chaxüneã̱xgüxü̃ rü marü naxca̱x nitaanegü, rü ngẽma ngauchi̱xẽgüxü̃ rü marü ningo̱xnamachixẽgü, rü ngẽma yuexü̃ rü wenaxarü namaxẽ, rü ngẽma ngearü diẽruã̱xgüxü̃ rü marü namaxã nüxü̃ tixu i Tupanaarü ore i mexü̃!

Ore i mexü̃ ga Matéu ümatüxü̃ 11:5 Referans Kwoze

Ore i mexü̃ ga Luca ümatüxü̃ 4:18

“Cori ya Tupanaãxẽ rü chowa nangẽxma. Rü nüma rü choxü̃ naxuneta nax nüxü̃ chixuxü̃ca̱x i ore i mexü̃ namaxã i ngẽma duü̃xü̃gü i ngearü diẽruã̱xgüxü̃. Rü choxü̃ namu nax yema duü̃xü̃gü ga norü uanügü to ga nachixü̃anewa gagüxü̃maxã nüxü̃ chixuxü̃ca̱x rü tá nax ínanguxü̃xü̃. Rü choxü̃ namu nax ngẽma ingexetügüxü̃ chidauuchixẽẽxü̃ca̱x rü nax íchananguxü̃xẽẽxü̃ca̱x i ngẽma duü̃xü̃gü i togüme̱xẽwa ngẽxmagüxü̃.

Ichaía 29:18

Rü ngẽma ngunexü̃gu i ngẽma ngauchi̱xẽgüxü̃ rü tá nüxü̃ naxĩnüe ega ngẽxguma texé poperaxü̃ naxca̱x daumatügu, rü ngẽma ingexetüxü̃ rü tá nidaxuchitanü, rü taxũtáma waanexü̃wa nangẽxmagü.

Popera ga Chantiágu ümatüxü̃ 2:5

Pa Chauenexẽgü ya Pexü̃ Changechaü̃güxe, ¡Iperüxĩnüe i ñaa ore! Tupana tüxü̃ nade ya yíxema ñoma i naanewa ngearü diẽruã̱xgüxe, erü nanaxwa̱xe nax nüxü̃́ tayaxõgüxü̃ rü tanayauxgüxü̃ i ngẽma maxü̃ i taguma gúxü̃ i tümamaxã inaxunetaxü̃ ya yíxema nüxü̃ ngechaü̃güxe.

Ore i mexü̃ ga Matéu ümatüxü̃ 21:14

Rü yéma Tupanapata ga taxü̃newa Ngechuchuca̱x naxĩ ga ñuxre ga ingexetügüxü̃ rü ichixeparagüxü̃. Rü Ngechuchu nanameexẽxẽ.

Ore i mexü̃ ga Cuáü̃ ümatüxü̃ 10:38

Natürü ngẽxguma chanaxüxgu i ngẽma Chaunatü üxü̃, rü woo tama choxü̃́ peyaxõgügu, rü chanaxwa̱xe i nüxü̃́ peyaxõgü i ngẽma mexü̃gü i Chaunatüarü poramaxã chaxüxü̃. Erü ngẽmawa tá nüxü̃ pecua̱x nax Chaunatü rü chowa nangẽxmaxü̃ rü choma i nawa changexmaxü̃ —ñanagürü.

Ore i mexü̃ ga Cuáü̃ ümatüxü̃ 10:25

Rü Ngechuchu nanangãxü̃, rü ñanagürü nüxü̃: —Marü pemaxã nüxü̃ chixu, natürü i pema rü tama choxü̃́ peyaxõgü. Guxü̃ma i ngẽma chaxüxü̃ rü Chaunatüarü poramaxã nixĩ i chanaxüxü̃, rü ngẽmawa meama pexü̃ nüxü̃ chadauxẽxẽ nax choma rü Cristu nax chixĩxü̃.

Ore i mexü̃ ga Cuáü̃ ümatüxü̃ 5:36

Natürü nangẽxma i ta̱xacü i Cuáü̃arü orearü yexera chauétüwa íchogüxü̃. Rü ngẽma nixĩ ga yema cua̱xruü̃gü ga Chaunatü choxü̃ muxü̃ nax norü poramaxã chanaxüxü̃ca̱x. Rü yemawa pexü̃ nüxü̃ chadauxẽxẽ nax aixcüma Chaunatü ya Tupana yixĩxü̃ ga núma choxü̃ mucü.

Ore i mexü̃ ga Cuáü̃ ümatüxü̃ 3:2

Rü gumá Nicodému rü Ngechuchuxü̃tagu nanaxũane ga chütacü. Rü ñanagürü nüxü̃: —Pa Ngúexẽxẽruxü̃, toma nüxü̃ tacua̱x nax aixcüma Tupana núma cuxü̃ muxü̃ nax toxü̃ cungúexẽẽxü̃ca̱x. Erü taxucürüwa texé cuxrüxü̃ tanaxü i ngẽma taxü̃ i mexü̃gü i Tupanaarü poramaxã üxü̃, ega tama Tupana tümaxü̃tawa ngẽxmagu —ñanagürü.

Ore i mexü̃ ga Cuáü̃ ümatüxü̃ 2:23

Rü yexguma Ngechuchu Üpetüchigaarü petaca̱x Yerucharéü̃wa yexmagu, rü muxü̃ma ga duü̃xü̃gü rü nüxü̃́ nayaxõgü, yerü nüxü̃ nadaugü ga yema taxü̃ ga mexü̃gü ga Tupanaarü poramaxã naxüxü̃.

Ore i mexü̃ ga Márcu ümatüxü̃ 9:25

Rü yexguma Ngechuchu nüxü̃ da̱u̱xgu nax muxü̃ma ga duü̃xü̃gü marü yexma ngutaque̱xexü̃, rü nananga ga yema ngo̱xo. Rü ñanagürü nüxü̃: —Pa Ngo̱xo i Ngegaxẽxẽruxü̃ rü Ngauchi̱xẽxẽẽruxü̃, ¡choma cuxü̃ chamu nax nawa ícuxũxũxü̃ ya daa bucü, rü tagutáma wena nagu cuyaxücuxü̃! —ñanagürü.

Ore i mexü̃ ga Márcu ümatüxü̃ 7:37

Rü poraãcü naba̱i̱xãchiãẽgü ga duü̃xü̃gü, rü ñanagürügü: —Guxü̃ma i ngẽma naxüxü̃ rü namexẽchi. Rü woo ngauxchi̱xẽgüxü̃ rü nayango̱xnamachi̱xẽxẽẽgü, rü ngea̱xgüxü̃ rü nayadexagüxẽxẽ —ñanagürügü.

Ore i mexü̃ ga Matéu ümatüxü̃ 10:8

¡Rü penameexẽxẽ i ngẽma ida̱xaweexü̃! ¡Rü wena penamaxẽxẽẽ̱x i ngẽma marü yuexü̃! ¡Rü penameexẽxẽ i ngẽma chaxünemaxã ida̱xaweexü̃! Rü ngẽma ngo̱xoã̱xgüxü̃ ¡rü nawa ípenawoxü̃! Rü tama name i penaxãtanü ega texéxü̃ perümexẽẽgu, erü ngẽma pora i pexü̃́ ngẽxmaxü̃ rü pexü̃́ nangetanümare.

Ore i mexü̃ ga Matéu ümatüxü̃ 9:30

Rü naxca̱x nitaanegü. Rü Ngechuchu rü poraãcü nayaxucu̱xẽgü nax taxúemaama nüxü̃ nax yaxugüxü̃ca̱x ga yema nüxü̃ ngupetüxü̃.

Ichaía 66:2

¡Rü choma nixĩ i chanaxüxü̃ i guxü̃ma i ñoma i naanewa nüxü̃ idauxü̃ rü yemaacü nixĩ ga nangóexü̃! Rü choma ya Cori nixĩ i ngẽma ñachaxü̃. Rü choma rü tüxü̃ chadawenü ya yíxema ngearü diẽruã̱xgüxe rü yíxema naxĩ̱xãchiãẽgüxe ya naga ĩnüexe i chorü ore.

Ichaía 43:8

¡Rü nua penamugü i chorü duü̃xü̃gü i ãxetüchiréxü̃, natürü ñoma nangexetüxü̃rüxü̃ ixĩgüxü̃, rü ngẽma ãxmachi̱xẽchiréxü̃, natürü ñoma nangauchixẽxü̃rüxü̃ ixĩgüxü̃!

Wiyaegü 146:8

Rü yíxema ingexetüxe rü tüxü̃ nidauuchigüxẽxẽ. Rü yíxema ya iyayitanüxe rü tüxü̃ ínarüdagüxẽxẽ. Rü nüma ya Cori rü nüxü̃ nangechaü̃ i ngẽma duü̃xü̃gü i mexü̃ ügüxü̃.

Wiyaegü 22:26

Rü pema i ngearü diẽruã̱xgüxex ¡nua pexĩ rü meama pechibüe rü ñu̱xmata mea pexü̃́ yangu! Rü pema i Tupanaca̱x daugüxe ¡rü nüxü̃ picua̱xüü̃gü rü guxü̃gutáma petaãẽgü!

Norü taxre ga popera ga ãẽ̱xgacügüchiga 5:14

Rü yexguma ga nüma ga Naamáü̃ rü nawa naxũ ga yema natü ga Yudáü̃. Rü 7 e̱xpü̱xcüna nawa naxüe rü nügü nayaxune yema orearü uruxü̃ namaxã nüxü̃ ixuxü̃rüxü̃. Rü yexguma ga naxcha̱xmüxü̃ rü narüme rü wüxi ga buxecha̱xmüxü̃rüxü̃ nixĩ.

Norü taxre ga popera ga ãẽ̱xgacügüchiga 5:7

Rü yexguma yema poperaxü̃ nadaumatügu ga guma Iraéanecüã̱xgüarü ãẽ̱xgacü, rü nügü narügáutechiru rü ñanagürü: —¿Ẽ̱xna nüma nüxü̃ nacua̱xgu rü choma chixĩ ya Tupana i maxü̃ nüxna chaxãxü̃ rü nüxna chanayaxuxü̃, rü ngẽmaca̱x nua cha̱u̱xca̱x namuaxü̃ i ñaa yatü nax naxca̱x chayataanexẽxẽxü̃ca̱x i norü chaxünewa? Rü ñu̱xma i nüma rü ngẽmagu nügü nicu̱xmare nax ñuxãcü wena tá taxca̱x íyaxüãchixü̃ —ñanagürü.

Ore i mexü̃ ga Matéu ümatüxü̃ 5:3

“Tataãẽgü ya yíxema nüxü̃ icua̱xãchitanüxe i tümaarü pecadu rü Tupanawe rüxĩxe, erü tümaca̱x nixĩ i daxũguxü̃ i naane ya Tupana ãẽ̱xgacü ixĩxü̃wa.

Ngechuchuarü ngúexü̃gü ga yamugüxü̃arü puracüchiga 2:22

Rü ñanagürü ta ga Pedru: —Pa Duü̃xü̃gü Pa Iraétanüxü̃x, ¡iperüxĩnüe i ñaa ore! Rü pema rü meama nüxü̃ pecua̱x rü Ngechuchu ga Nacharétucüã̱x rü gumá nixĩ ga Tupana pepe̱xewa pora nüxna ãcü. Rü nüma ga Tupana rü nüxü̃ nanaxüxẽxẽ ga muxü̃ma ga mexü̃gü ga cua̱xruü̃gü. Rü pema rü meama nüxü̃ pecua̱x i ngẽma.

Chacaría 11:7

Rü ngẽxguma i choma i Chacaría rü nüxna chadau i ngẽma carnérugü i norü daixchicawa nagagüchaü̃xü̃. Rü yexera nüxna chadau i ngẽma carnérugü i rüturamaegüxü̃. Rü taxre i naixmenaxãca̱x chadau. Rü wüxi rü Ngü̃xẽẽgu chanaxüéga, rü ngẽma to rü Wüxiwa Íngexmagüxü̃gu chanaxüéga. Rü ñu̱xũchi nüxna chadau i ngẽma carnérugü.

Ínachoxü̃xü̃chiga 4:11

Natürü ga nüma ga Cori ya Tupana rü nanangãxü̃ rü ñanagürü: —¿Texé tixĩ ya yíxema naxǘxe ya naã̱x ya yatü? ¿Rü texé tixĩ ya nangegaxeẽ́xẽ rüe̱xna nangauxchixẽxẽẽ́xẽ, rüe̱xna nangexetüxẽẽ́xẽ rüe̱xna naxǘxetüxe? ¿Tama ẽ̱xna choma yixĩxü̃?

Ichaía 29:19

Rü ngẽma iraxü̃ nüxü̃́ ngẽxmagüxü̃ rü Cori ya Tupanamaxã tá nataãẽgü. Rü woo i ngẽma ngearü diẽruã̱xgüxü̃ rü tá Iraétanüxü̃arü Tupana ya üünecümaxã nataãẽgü.

Ore i mexü̃ ga Matéu ümatüxü̃ 11:4

Rü Ngechuchu nanangãxü̃ rü ñanagürü nüxü̃ ga yema duü̃xü̃gü: —¡Pewoegu rü Cuáü̃maxã nüxü̃ peyarüxu i ngẽma pematama nua nüxü̃ pedaugüxü̃ rü nüxü̃ pexĩnüexü̃!

Ore i mexü̃ ga Matéu ümatüxü̃ 12:13

Rü ñu̱xũchi ga Ngechuchu rü ñanagürü nüxü̃ ga gumá yatü ga yumécü: —¡Iyarüwe̱xãchime̱xẽ! —ñanagürü. Rü gumá yatü rü inayarüwe̱xãchime̱xẽ, rü yexgumatama narümeme̱x, rü nai ga naxme̱x ga mexü̃nerüxü̃ nixĩ.

Ore i mexü̃ ga Cuáü̃ ümatüxü̃ 9:7

Rü yexguma gumá ngexetücüxü̃ ñanagürü: —¡Chiloéarü puchuwa naxũ rü ngéma dexámaxã cugü yayauxetü! —ñanagürü. (Rü ngẽma naéga i Chiloé rü “Tüxü̃ muxü̃”, ñaxü̃chiga nixĩ.) Rü yéma naxũ ga gumá ngexetücü rü dexámaxã nügü naya̱u̱xetü. Rü yexguma nataeguxgu rü marü nidauuchixetü.