Ore i mexü̃ ga Matéu ümatüxü̃ 1:6 - Tupanaarü Ore

⁶ Rü Ichaxí rü ãẽ̱xgacü ga Dabínatü nixĩ. Rü ãẽ̱xgacü ga Dabí rü Charomóü̃natü nixĩ. Rü Bechabé ga Uría nama̱xchire̱x ixĩcü iyixĩ ga naé ga Charomóü̃.

Ore i mexü̃ ga Matéu ümatüxü̃ 1:6 Referans Kwoze

Nüxíraxü̃xü̃ ga popera ga ãẽ̱xgacügüchiga 15:5

Rü nüma ga Dabí rü mea Tupanape̱xewa namaxü̃ rü guxü̃guma naga naxĩnü rü nayanguxẽxẽ ga yema norü mu. Rü yema chixexü̃ ga Dabí üxü̃, rü Itítanüxü̃ ga Uríaxü̃ nax yamáxü̃xicatama nixĩ.

1 Chamué 17:12

Rü nayexma ga wüxi ga yatü ga Beréü̃cüã̱x ixĩcü rü Ichaxí nixĩ ga naéga. Rü nüma rü marü naya ga yexguma Chaú ãẽ̱xgacü ixĩxgu. Rü nüma ga Ichaxí rü nüxü̃́ nayexma ga 8 ga nanegü, rü wüxi ga nane rü Dabí nixĩ.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 14:4

Rü yema nanegü ga Yerucharéü̃gu buexü̃ nixĩ ga Chamúa, rü Chobáx, rü Natáü̃, rü Charomóü̃, rü Ibá, rü Erichúa, rü Eriférex, rü Nóga, rü Néfex, rü Yapía, rü Erichamá, rü Eriadá, rü Eriférex.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 3:5

Rü ĩane ga Yerucharéü̃gu nabue ga ãgümücü ga nanegü. Rü daagü nixĩ: Chimá, rü Chobáx, rü Natáü̃ rü Charomóü̃. Rü guxcüma ga yema ãgümücü ga nanegü rü Bechabé ngĩnegü nixĩgü. Rü ngĩma rü Amiéacü iyixĩ.

2 Chamué 23:1

Ñaa nixĩ ga nawa iyacuáxü̃ ga Dabíarü dexa. Rü nüma ya Dabí ya Ichaxí nane nixĩ ga gumá yatü ga Tupana natachigaxẽẽcü. Rü nüma nixĩ ga Acóbuarü Tupana nüxü̃ unetaxü̃ nax Iraéanearü ãẽ̱xgacü yixĩxü̃ca̱x. Rü nüma ya Dabí nixĩ ya Iraétanüwa meama wiyaexü̃ nacuáxü̃. Rü nüma rü ñanagürü:

1 Chamué 16:1

Rü yemawena ga Tupana rü Chamuéxü̃ ñanagürü: —Marütama nax Chaúca̱x nax cungechaü̃echaxü̃, erü marü tama chanaxwa̱xe nax Iraéanecüã̱xgüarü ãẽ̱xgacü nax yixĩxü̃. ¡Rü wüxi i carnéruchatacu̱xre nayaxu rü oribuarü chíxü̃maxã naxüãcu! ¡Rü Beréü̃wa naxũ rü ngẽxma naxca̱x yadau ya wüxi ya yatü ya Ichaxígu ãégacü! Erü wüxi ya nanexü̃ chayaxu nax Iraéanecüã̱xgüarü ãẽ̱xgacü yixĩxü̃ca̱x —ñanagürü.

Romanos 8:3

Rü yemaacü Tupana nanaxü ga yema taxucürüwa naxüxü̃ ga yema mugü ga Moiché ümatüxü̃. Erü taxúema namaxã tapora i tümaarü ngúchaü̃ nax chixexü̃ taxüxü̃. Rü yemaca̱x ga Tupana rü ñoma ga naanewa nanamu ga Nane, rü duü̃xü̃ i pecaduã́xü̃rüxü̃ nixĩ ga naxü̃ne nax yemaacü pecadugagu nayuxü̃ca̱x nax tama tamaxã naporaxü̃ca̱x i ngẽma pecadu.

Ichaía 11:1

Rü ñoma wüxi i naixchime irüxüxü̃rüxü̃ tá nixĩ nax Dabínatü ga Ichaxíwa nangóxü̃ i wüxi i nataxa i guxãarü ãẽ̱xgacü tá ixĩxü̃.

Wiyaegü 72:20

Rü nuxã nixĩ i yaguxü̃ i norü yumüxẽgü ya Dabí ya Ichaxí nane.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 28:5

Rü ñu̱xma rü namu i chaunegü ya Tupana choxna mugüxü̃, rü ngẽma chaunegütanüwa rü Tupana nüxü̃ naxuneta ya chaune ya Charomóü̃ nax nüma chauchicüxü ãẽ̱xgacü yixĩxü̃ca̱x i Iraéanewa.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 11:41

rü Uría ga Itítanüxü̃; rü Chabáx ga Araí nane;

2 Chamué 23:39

Uría ga Itítanüxü̃. Rü guxü̃wama rü 37 nixĩgü.

2 Chamué 11:3

Rü yema nge rü ngĩgü imexẽxẽ, yerü yexwacax ngĩxca̱x nitaane ga ngĩrü da̱xawexü̃newa. Rü nüma ga Dabí rü norü duü̃xü̃xü̃ namu nax ínaca̱xü̃ca̱x nax texe yixĩxü̃ ga yema nge. Rü namaxã nüxü̃ nixugüe ga Bechabé ga Eriáü̃xacü ga Uría ga Itítanüxü̃ naxma̱x nax yixĩxü̃. Rü yexguma ga Dabí rü ñuxre ga norü duü̃xü̃güxü̃ namu nax ngĩxca̱x yacagüxü̃ca̱x nax naxü̃tawa naxũxü̃ca̱x. Rü yexguma yéma naxü̃tawa nanguxgu, rü nüma rü ngĩmaxã namaxü̃. Rü yemawena ga ngĩma rü ngĩpataca̱x itaegu.

1 Chamué 22:8

Rü ñu̱xma nüxü̃ chacua̱x i ta̱xacüca̱x guxãma i pema rü chomaxã penuexü̃. Rü taxúema chomaxã nüxü̃ tixu rü ngẽma chaune i Yonatáü̃ rü Ichaxí nane i Dabímaxã inaxügaxü̃. Rü taxúema i pema rü cha̱u̱xca̱x pixoegaãxẽ. Rü taxúema chomaxã nüxü̃ tixu nax chaune rü chomaxã naxuanüxü̃, rü nüxü̃ nangü̃xẽẽxü̃ i Dabí nax choxü̃ íyacu̱xeü̃xü̃ca̱x nax ngẽmaãcü choxü̃ yamáxü̃ca̱x. Rü ngẽma nixĩ i ñu̱xma chomaxã naxüxü̃ —ñanagürü.

1 Chamué 17:58

Rü nüma ga Chaú rü nüxna naca rü ñanagürü: —Pa Ngextü̱xücüx ¡chomaxã nüxü̃ ixu rü texé nane quixĩxü̃! —ñanagürü. Rü nüma ga Dabí nanangãxü̃ rü ñanagürü: —Choma rü yimá curü duü̃ ya Ichaxí ya Beréü̃cüã̱x nane chixĩ —ñanagürü.

Ore i mexü̃ ga Matéu ümatüxü̃ 1:5

Rü Charmóü̃ rü Boónatü nixĩ. Rü Raá iyixĩ ga naé. Rü Boó rü Obéxnatü nixĩ, rü naé rü Rux iyixĩ. Rü Obéx rü Ichaxínatü nixĩ.