Ore i mexü̃ ga Matéu ümatüxü̃ 1:16 - Tupanaarü Ore

¹⁶ Rü Acóbu rü Yúchenatü nixĩ. Rü Yúche rü María ngĩte nixĩ. Rü ngĩma ga María rü naé iyixĩ ga Ngechuchu ya Cristu.

Ore i mexü̃ ga Matéu ümatüxü̃ 1:16 Referans Kwoze

Ore i mexü̃ ga Matéu ümatüxü̃ 27:17

Rü yexguma yéma nangutaque̱xegügu ga duü̃xü̃gü, rü Pirátu nüxna naca, rü ñanagürü: —¿Rü ngexü̃rüüxü̃ i penaxwa̱xexü̃ nax íchananguxuchixẽxẽxü̃? ¿Penaxwa̱xexü̃ nax Barabáxü̃ íchananguxuchixẽxẽxü̃ rüe̱xna Ngechuchu ya Cristumaxã naxugüxü̃xü̃ íchananguxuchixẽxẽxü̃? —ñanagürü.

Ore i mexü̃ ga Cuáü̃ ümatüxü̃ 4:25

Rü yema ngecü inangãxü̃ rü ngĩgürügü: —Choma nüxü̃ chacua̱x rü tá ñoma i naanewa nangu ya yimá Cristu ya Tupana nüxü̃ unetacü. Rü ngẽxguma yimá núma ũxgu rü tá tamaxã nanango̱xẽxẽ i guxü̃ma i Tupanachiga —ngĩgürügü.

Ore i mexü̃ ga Luca ümatüxü̃ 3:23

Ngechuchu rü 30 ga taunecü nüxü̃́ nayexma ga yexguma inaxügüãgu nax duü̃xü̃gümaxã nüxü̃ yaxuxü̃ ga norü ore. Rü duü̃xü̃gü nagu narüxĩnüe nax Yúche nane yixĩxü̃ ga Ngechuchu. Rü Yúche rü Erí nane nixĩ.

Ore i mexü̃ ga Matéu ümatüxü̃ 27:22

Rü yexguma ga ãẽ̱xgacü ga Pirátu rü yema duü̃xü̃güna naca, rü ñanagürü: —¿Ta̱xacü tá chaxüxü̃ namaxã i ngẽma Ngechuchu i Cristugu ãégaxü̃? —ñanagürü. Rü guxü̃ma ga duü̃xü̃gü rü nanangãxü̃gü, rü ñanagürügü: —¡Curuchawa yapota! —ñanagürügü.

Ore i mexü̃ ga Luca ümatüxü̃ 4:22

Rü guxü̃ma ga duü̃xü̃gü rü mea Ngechuchuchiga nidexagü. Rü naba̱i̱xãchiãẽgü namaxã ga yema ore ga mexü̃ ga namaxã nüxü̃ yaxuxü̃. Rü nügüna nacagü rü ñanagürügü: “¿Taux ẽ̱xna daa yixĩxü̃ ya Yúche nane?” ñanagürügü.

Ore i mexü̃ ga Luca ümatüxü̃ 2:48

Rü yexguma nanatü rü naé nüxü̃ daugügu rü taba̱i̱xãchiãẽgü. Rü naé rü ñatarügü nüxü̃: —Pa Chaunex, ¿tü̱xcüü̃ tomaxã ngexü̃ cuwagü? Cunatü rü choma rü poraãcü cuxca̱x taxoegaãẽãcüma cuxca̱x tadaugüecha —ñatarügü.

Ore i mexü̃ ga Luca ümatüxü̃ 2:7

Rü yexma nabu ga nüxíraü̃cü ga ngĩne. Rü naxchápenüxü̃maxã inanuque. Rü wüxi ga wocaarü chibüchicagu inacanagüxẽxẽ, yerü guma ĩanearü pegüpataü̃ rü naxããcu.

Ore i mexü̃ ga Luca ümatüxü̃ 1:27

Rü Gábi rü ngĩxü̃tawa naxũ ga wüxi ga pacü ga taguma yatü ngĩmaxã maxü̃cü. Rü María nixĩ ga ngĩéga. Rü ngĩma rü ixãtechaü̃ namaxã ga wüxi ga yatü ga Yúchegu ãégacü. Rü nüma ga Yúche rü nũxcümaü̃cü ga ãẽ̱xgacü ga Dabítanüxü̃ nixĩ.

Ore i mexü̃ ga Márcu ümatüxü̃ 6:3

¿Taux ẽ̱xna ñaa yixĩxü̃ i corapina i Ngechuchu i María ngĩne, i Chantiágu rü Yúche rü Chimóü̃ rü Yúdaenexẽ ixĩxü̃? ¿Rü taux ẽ̱xna i naeya̱xgü i nuxma tatanügu naxãchiü̃güxü̃? —ñanagürügü. Rü yemaca̱x ga yema duü̃xü̃gü rü tama nüxü̃́ nayaxõgü.

Ore i mexü̃ ga Matéu ümatüxü̃ 2:13

Rü yexguma marü íyaxĩxguwena ga yema yatügü, rü wüxi ga daxũcüã̱x ga Tupanaarü orearü ngeruxü̃, rü nanegüwa Yúcheca̱x nango̱x, rü ñanagürü nüxü̃: —¡Naba̱i̱xãchi rü írüda! ¡Rü ínaxũxũ namaxã ya yimá bucü rü naé rü Equítuanewa naxũ! ¡Rü ngéma pengẽxmagü ñu̱xmatáta choma cumaxã nüxü̃ chixu nax ñuxgu tá cutaeguxü̃! Erü ãẽ̱xgacü i Eróde rü yimá bucüca̱x tá nadau nax yamáãxü̃ca̱x —ñanagürü nüxü̃.

Ore i mexü̃ ga Matéu ümatüxü̃ 1:15

Rü Eriúx rü Ereachánatü nixĩ. Rü Ereachá rü Matáü̃natü nixĩ. Rü Matáü̃ rü Acóbunatü nixĩ.

Ore i mexü̃ ga Matéu ümatüxü̃ 16:16

Rü Chimóü̃ ga Pedru nanangãxü̃, rü ñanagürü nüxü̃: —Cuma nixĩ i Cristu ya Tupana ya Maxü̃cü Nane quixĩxü̃ —ñanagürü.

Ore i mexü̃ ga Matéu ümatüxü̃ 16:20

Rü yexguma ga Ngechuchu rü norü ngúexü̃gümaxã nüxü̃ nixu, rü ñanagürü: —¡Taxúemaxã tá nüxü̃ pixu nax choma rü Cristu chixĩxü̃! —ñanagürü.