Ore i mexü̃ ga Luca ümatüxü̃ 7:16 - Tupanaarü Ore

¹⁶ Rü yexguma yemaxü̃ nadaugügu ga duü̃xü̃gü, rü guxü̃ma namuü̃e. Rü inanaxügüe ga Tupanaxü̃ nax yacua̱xüü̃güxü̃. Rü ñanagürügü: —Wüxi i Tupanaarü orearü uruxü̃ i poraxü̃ tatanüwa nango̱x —ñanagürügü. Rü ñanagürügü ta: —Tupana nua naxũ nax norü duü̃xü̃güxü̃ yanangü̃xẽẽxü̃ca̱x —ñanagürügü.

Ore i mexü̃ ga Luca ümatüxü̃ 7:16 Referans Kwoze

Ore i mexü̃ ga Luca ümatüxü̃ 7:39

Rü yexguma yemaxü̃ nada̱u̱xgu ga yema Parichéu ga Ngechuchuna uxü̃, rü naãxẽwa nagu narüxĩnü rü nügümaxãtama ñanagürü: —Ngẽxguma chi ñaa Ngechuchu rü aixcüma wüxi i Tupanaarü orearü uruxü̃ yixĩxgu, rü chi nüxü̃ nacua̱x nax ta̱xacü yixĩxü̃ i ñaa ngexü̃ i nüxü̃ ingõgüxü̃ rü chi nüxü̃ nacua̱x nax wüxi i ngexü̃ i chixexü̃gu maxü̃xü̃ yixĩxü̃ —ñanagürü ga naãxẽwa.

Ore i mexü̃ ga Matéu ümatüxü̃ 9:8

Rü yexguma yemaxü̃ nadaugügu ga duü̃xü̃gü, rü poraãcü namuü̃e. Rü Tupanaxü̃ nicua̱xüü̃gü, rü ñanagürügü: —Moxẽ, Pa Tupanax, erü cunaporaxẽxẽ i ñaa yatü nax ngẽmaãcü mexü̃ toxca̱x naxüxü̃ca̱x —ñanagürügü.

Ore i mexü̃ ga Luca ümatüxü̃ 1:68

Rü ñanagürü: “Namecümaxüchi ya tórü Cori ga tórü o̱xi ga Iraéarü Tupana. Erü núma tatanüwa nangu nax tüxü̃ nangü̃xẽẽxü̃ca̱x i yixema i norü duü̃xü̃gü nax ixĩgüxü̃.

Yeremía 33:9

Rü Yerucharéü̃ rü tá choxü̃ nataãxẽxẽxẽ rü tá choxü̃ natachigaxẽxẽ rü tá choxü̃ nicua̱xüxü̃ nape̱xewa i guxü̃ma i ngẽma togü i nachixü̃anegü i ñoma i naanewa ngẽxmagüxü̃. Rü ngẽxguma ngẽma nachixü̃anegü nüxü̃ cuáchigagügu i guxü̃ma i ngẽma ngü̃xẽẽgü i Yerucharéü̃arü duü̃xü̃güca̱x íchanguxẽẽxü̃ rü ngẽma mexü̃gü i nüxna chaxãxü̃, rü ngẽma nachixü̃anegü rü norü muü̃maxã tá nidu̱xruxe’ ” —ñanagürü.

Ore i mexü̃ ga Luca ümatüxü̃ 5:26

Rü guxü̃ma ga duü̃xü̃gü rü naba̱i̱xãchiãẽgü. Rü Tupanaxü̃ nicua̱xüü̃gü. Rü poraãcü namuü̃eãcüma ñanagürügü: —Ñu̱xma rü aixcüma nüxü̃ tadaugü i mexẽchixü̃gü i Tupanaarü poramaxã naxügüxü̃ —ñanagürügü.

Ore i mexü̃ ga Luca ümatüxü̃ 2:20

Rü nawoegu ga yema carnérugüarü dauruü̃gü. Rü taãẽãcüma Tupanaxü̃ nicua̱xüü̃gü naxca̱x ga guxü̃ma ga yema nüxü̃ naxĩnüexü̃ rü nüxü̃ nadaugüxü̃, yerü guxü̃ma ga yema orearü ngeruü̃gü ga daxũcüã̱x namaxã nüxü̃ ixuxü̃ãcüma nüxü̃ nadaugü.

Ore i mexü̃ ga Luca ümatüxü̃ 1:65

Rü yemaca̱x guxü̃ma ga yema duü̃xü̃gü ga norü ngaicamagu ãpatagüxü̃ rü poraãcü naba̱i̱xãchiãẽgü. Rü guxü̃wama ga yema Yudéaanearü máxpu̱xanexü̃wa rü duü̃xü̃gü nüxü̃ nixuchigagü ga yema ngupetüxü̃.

Ore i mexü̃ ga Matéu ümatüxü̃ 21:11

Rü yema Ngechuchuwe rüxĩxü̃ ga duü̃xü̃gü rü nanangãxü̃gü rü ñanagürügü: —Daa nixĩ ya Tupanaarü orearü uruxü̃ ya Ngechuchu ya Gariréaanewa ngẽxmane ya ĩane ya Nacharétucüã̱x ixĩcü —ñanagürügü.

Ore i mexü̃ ga Matéu ümatüxü̃ 15:31

Rü nüma ga duü̃xü̃gü rü poraãcü nabaixãchiãẽgü ga yexguma nüxü̃ nadaugügu ga yema noxri tama idexagüxü̃ rü marü nax yadexagüxü̃, rü yema noxri chixechacüügüxü̃ rü marü naxca̱x nax yataanegüxü̃, rü yema noxri chixeparagüxü̃ rü marü nax yaxĩxü̃, rü yema noxri ngexetügüxü̃ rü marü nax yadauchigüxü̃. Rü yemaca̱x ga yema duü̃xü̃gü rü inanaxügüe nax Iraétanüxü̃arü Tupanaxü̃ yacua̱xüü̃güxü̃.

Wiyaegü 65:9

Rü cuma nixĩ i ñoma i naanena cudauxü̃ rü nagu cupuxẽẽxü̃ nax naxügüxü̃ca̱x i nanetügü. Rü cuma rü natüxacügümaxã cuyawaimüanexẽxẽ nax naxügüxü̃ca̱x i trigugü. Rü ngẽmaãcü nixĩ i cunangomüanexẽẽxü̃ i waixü̃mü.

Ínachoxü̃xü̃chiga 4:31

Rü nüma ga duü̃xü̃gü rü aixcüma nayaxõgü. Rü yexguma nüxü̃ yacua̱xãchitanügu nax Cori ya Tupana rü nüxü̃́ nüxü̃ naxĩnüxü̃ ga norü yumüxẽ rü nüxü̃ nax nadauxü̃ ga ñuxãcü ngúxü̃ nax yangegüxü̃, rü yemaca̱x nüma ga duü̃xü̃gü rü nataãẽgü. Rü ñaxtüanegu nanangücuchitanü, rü Tupanaxü̃ nicua̱xüü̃gü.

Gálatas 1:24

Rü yexguma ga yema duü̃xü̃gü rü Tupanaxü̃ nicua̱xüü̃gü nagagu ga yema Tupana chomaxã üxü̃.

Ngechuchuarü ngúexü̃gü ga yamugüxü̃arü puracüchiga 5:5

Rü yexguma yema orexü̃ naxĩnügu ga Ananía, rü yu̱xcüma inayangu. Rü poraãcüxüchima namuü̃e ga guxü̃ma ga yema duü̃xü̃gü ga yexguma yemaxü̃ nacuáchigagügu.

Ore i mexü̃ ga Cuáü̃ ümatüxü̃ 9:17

Rü wena nüxna nacagüe ga gumá yatü ga ngexetüchire̱xcü, rü ñanagürügü: —¿Natürü cuma rü ñuxũ ñacuxü̃ nachiga i ngẽma yatü ga cuxü̃ rümexẽẽxü̃? —ñanagürügü. Rü nüma nanangãxü̃, rü ñanagürü: —Cha̱u̱xca̱x rü wüxi i Tupanaarü orearü uruxü̃ nixĩ —ñanagürü.

Ore i mexü̃ ga Cuáü̃ ümatüxü̃ 6:14

Rü yexguma yema duü̃xü̃gü nüxü̃ daugügu ga yema cua̱xruxü̃ ga Tupanaarü poramaxã naxüxü̃ ga Ngechuchu, rü ñanagürügü: —Aixcümaxü̃chi daa nixĩ ya Tupanaarü orearü uruxü̃ ga gumá ínanguxẽẽcü —ñanagürügü.

Ore i mexü̃ ga Cuáü̃ ümatüxü̃ 4:19

Rü yexguma yemaxü̃ naxĩnügu ga yema ngecü, rü ngĩgürügü: —Pa Corix, nüxü̃ chicua̱xãchi rü cuma rü wüxi i Tupanaarü orearü uruxü̃ quixĩ.

Ore i mexü̃ ga Cuáü̃ ümatüxü̃ 1:21

Rü wenaxarü nüxna nacagü rü ñanagürügü: —¿Texé ẽ̱xna quixĩ? ¿Ẽ̱xna cuma ga nũxcümaü̃cü ga Tupanaarü orearü uruxü̃ ga Ería quixĩxü̃? —ñanagürügü. Rü Cuáü̃ nanangãxü̃ rü ñanagürü: —Tama Ería chixĩ —ñanagürü. Rü nümagü rü wenaxarü nüxna nacagüe rü ñanagürügü: —¿Ẽ̱xna cuma quixĩxü̃ ya yimá orearü uruxü̃ ga Moiché nüxü̃ ixucü ga ínguxchaü̃cü? —ñanagürügü. Rü Cuáü̃ nanangãxü̃ rü ñanagürü: —Tama yimá chixĩ —ñanagürü.

Ore i mexü̃ ga Luca ümatüxü̃ 24:19

Rü yexguma ga nüma ga Ngechuchu rü nüxna naca rü ñanagürü: —¿Ta̱xacü nangupetü ga Yerucharéü̃wa? —ñanagürü. Rü nanangãxü̃gü ga yema ngúexü̃gü, rü ñanagürügü: —Poraãcü chixexü̃ nüxü̃ naxüpetü ga Ngechuchu ga Nacharétucüã̱x. Nüma ga Ngechuchu rü Tupanaarü orearü uruxü̃ ga poracü nixĩ. Rü Tupanape̱xewa rü duü̃xü̃güpe̱xewa nanaxü ga taxü̃ ga cua̱xruü̃gü rü mea duü̃xü̃güxü̃ nangúexẽxẽ.

Ore i mexü̃ ga Luca ümatüxü̃ 9:19

Rü norü ngúexü̃gü nanangãxü̃gü rü ñanagürügü: —Nangexma i duü̃xü̃gü rü: “Cuáü̃ ya báiü̃xẽẽruxü̃ quixĩ”, ñagüxü̃, rü togü rü: “Ería quixĩ”, ñagüxü̃, rü togü rü: “Wüxi ga nũxcümaü̃cü ga Tupanaarü orearü uruxü̃ i wena maxü̃cü quixĩ”, ñagüxü̃ —ñanagürügü.

Ore i mexü̃ ga Luca ümatüxü̃ 8:37

Rü yexguma yemaxü̃ naxĩnüegu, rü guxü̃ma ga yema Gadáraanecüã̱x ga duü̃xü̃gü, rü Ngechuchuxü̃ naca̱a̱xü̃gü nax ínaxũxũxü̃ca̱x ga yema naanewa, yerü poraãcü namuü̃e. Rü yemaca̱x ga Ngechuchu rü nguegu nixüe, rü inaxũãchi.

Ore i mexü̃ ga Luca ümatüxü̃ 5:8

Rü yexguma yemaxü̃ nada̱u̱xgu ga Chimóü̃ ga Pedru, rü Ngechuchupe̱xegu nayacaxã́pü̱xü, rü ñanagürü nüxü̃: —¡Choxna ixũgachi! Pa Corix. Erü choma rü wüxi i duü̃xü̃ i pecaduã́xü̃ chixĩ —ñanagürü.

Ore i mexü̃ ga Matéu ümatüxü̃ 28:8

Rü yexguma ga yema ngecügü rü paxãma nüxna íiyaxĩ ga yema naxmaxü̃. Rü imuü̃ẽ, natürü itaãẽgü ta. Rü poraãcü ixü̃ãchi nax Ngechuchuarü ngúexü̃gümaxã nüxü̃ nax yanaxugüexü̃ca̱x ga yema ore ga daxũcüã̱x ngĩmaxã nüxü̃ ixuxü̃.

Ngechuchuarü ngúexü̃gü ga yamugüxü̃arü puracüchiga 7:37

Rü nümatama ga Moiché nixĩ ga tatanüxü̃ ga Iraétanüxü̃maxã ñaxü̃: “Tupana rü yixcüra tá petanüwa nüxü̃ naxuneta i wüxi i norü orearü uruxü̃ i chaurüxü̃ ixĩxü̃”, ñanagürü.

Ore i mexü̃ ga Luca ümatüxü̃ 19:44

Rü tá nagu napogüe ya perü ĩane, rü tá pexü̃ nadai. Rü taxucütama ya nuta ngextá nügüxétü nanugüxüra i perü ĩanearü poxeguxü̃tápü̱x. Rü ngẽmaãcü tá pexü̃ naxüpetü, yerü tama nüxü̃ pecua̱xgüchaü̃ ga yexguma Tupana pexü̃ íyada̱u̱xgu —ñanagürü.

Wenaxarü naxümatü ga Tupanaarü mugü 18:15

Rü nüma ya Cori ya perü Tupana rü tá petanüwa nanango̱xẽxẽ ya wüxi ya chauxrüxü̃ orearü uruxü̃. Rü pema rü name nixĩ i naga pexĩnüe.

Ore i mexü̃ ga Luca ümatüxü̃ 7:15

Rü yexguma ga gumá yuchire̱xcü rü ínarüto, rü inanaxügü nax yadexaxü̃. Rü Ngechuchu rü naéxü̃tawa nanamu.