Ore i mexü̃ ga Luca ümatüxü̃ 6:20 - Tupanaarü Ore

²⁰ Rü yexguma Ngechuchu rü norü ngúexü̃güxü̃ nadawenü, rü ñanagürü nüxü̃: —¡Petaãxẽgü i pemax ya ingearü diẽruã̱xgüxe! Erü Tupana ãẽ̱xgacü ixĩxü̃wa rü pexü̃́ nangẽxma i pechica.

Ore i mexü̃ ga Luca ümatüxü̃ 6:20 Referans Kwoze

Popera ga Chantiágu ümatüxü̃ 2:5

Pa Chauenexẽgü ya Pexü̃ Changechaü̃güxe, ¡Iperüxĩnüe i ñaa ore! Tupana tüxü̃ nade ya yíxema ñoma i naanewa ngearü diẽruã̱xgüxe, erü nanaxwa̱xe nax nüxü̃́ tayaxõgüxü̃ rü tanayauxgüxü̃ i ngẽma maxü̃ i taguma gúxü̃ i tümamaxã inaxunetaxü̃ ya yíxema nüxü̃ ngechaü̃güxe.

2 Corintios 8:9

Erü pema rü marü nüxü̃ pecua̱x nax ñuxãcü tamaxã namecümaxü̃ ga tórü Cori ya Ngechuchu ya Cristu. Rü woo nüxü̃́ nayexma ga guxü̃ma, natürü ñoma wüxi ga ngearü diẽruã́xü̃rüxü̃ pexca̱x nügü nixĩxẽxẽ nax ngẽmaãcü pexü̃́ nangẽxmaxü̃ca̱x i taxü̃ i Tupanaarü ngü̃xẽxẽ.

Ore i mexü̃ ga Luca ümatüxü̃ 12:32

¡Taxṹ i pemuü̃exü̃, Pa Chauxacügüx! Pema rü noxretama pixĩgü natürü Penatü ya Tupana rü norü ngúchaü̃ nixĩ nax pexna naxããxü̃ i pechica i ngextá nüma ãẽ̱xgacü íyixĩxü̃wa.

Ore i mexü̃ ga Matéu ümatüxü̃ 25:34

Rü ngẽxguma i nüma ya Ãẽ̱xgacü rü tá ñanarügü nüxü̃ i ngẽma norü tügünecüwawa ngẽxmagüxü̃: “¡Nua pexĩ i pemax ya Chaunatü mexü̃ pemaxã uegugüxe! ¡Rü nüma ãẽ̱xgacü íyixĩxü̃wa pichocu rü penayaxu i pechica ga noxritama naane naxü̱xgu pexca̱x namexẽẽxü̃!

Yema Cuáü̃ nüxü̃ dauxü̃ i yixcüra tá ngupetüxü̃chiga 2:9

Choma nüxü̃ chacua̱x i ngẽma cuxüxü̃ rü nüxü̃ chacua̱x nax ngúxü̃ quingexü̃. Rü nüxü̃ chacua̱x ta nax cungearü diẽruã́xü̃ i ñoma i naanewa, natürü daxũguxü̃ i naanewa cuxü̃́ nangẽxma i ngẽma taguma gúxü̃. Rü nüxü̃ chacua̱x nax chixri cuchiga yadexagüxü̃ i ngẽma duü̃xü̃gü i nügü ixugüxü̃ nax Yudíugü yixĩgüxü̃. Natürü i nümagü rü aixcüma Chatanáarü duü̃xü̃gümare nixĩgü.

2 Corintios 6:10

Rü woo tangechaü̃gügu, natürü guxü̃guma tataãẽgü. Rü woo ñoma i naanewa tama tamuarü ngẽmaxü̃ã̱xgügu, natürü togagu muxü̃ma i duü̃xü̃gü nanayauxgü i maxü̃ i taguma gúxü̃. Rü woo taxuxü̃ma toxü̃́ nangẽxma i ñoma i naanewa, natürü aixcüma toxü̃́ nangẽxma i guxü̃ma.

Chofonía 3:12

“Pa Yerucharéü̃x, cuwa tá chayaxügüxẽxẽ i ñuxre i duü̃xü̃gü i mecümaxü̃ i tama nügü icua̱xüü̃güxü̃. Rü nümagü rü tá choxü̃́ nayaxõgü.

Ichaía 29:19

Rü ngẽma iraxü̃ nüxü̃́ ngẽxmagüxü̃ rü Cori ya Tupanamaxã tá nataãẽgü. Rü woo i ngẽma ngearü diẽruã̱xgüxü̃ rü tá Iraétanüxü̃arü Tupana ya üünecümaxã nataãẽgü.

Popera ga Chantiágu ümatüxü̃ 1:12

Rü tataãxẽ ya yíxema yáxna namaxã ĩnüxe i ngẽxguma ta̱xacü tüxna ĩnügu. Erü ngẽxguma yáxna namaxã taxĩnügu, rü Tupana tá tümamaxã nataãxẽ rü tá tüxna nanaxã i norü ãmare i maxü̃ i taguma gúxü̃. Rü ngẽma nixĩ i ãmare ya Tupana tümamaxã ixunetaxü̃ ya yíxema nüxü̃ ngechaü̃güxe.

2 Tesalonicenses 1:5

Rü ngẽma guxchaxü̃gü i pexca̱x ínguxü̃wa nüxü̃ tacua̱x nax Tupana pexü̃ íyamexẽẽgüxü̃ nax pichocuxü̃ca̱x i ngextá nüma ãẽ̱xgacü íyixĩxü̃wa. Rü ngẽmaca̱x nixĩ i ngúxü̃ pingegüxü̃ i ñu̱xmax.

1 Tesalonicenses 1:6

Rü pema rü meama nagu pexĩ ga yema pexü̃ tangúexẽẽxü̃ rü yema tüxü̃ nangúexẽẽxü̃ ga tórü Cori ya Ngechuchu. Rü ngẽma taãxẽ i Tupanaãxẽ ya Üünecü pexna ãxü̃maxã penayauxgü ga yema ore ga woo yemaca̱x poraãcü ngúxü̃ nax pingegüxü̃.

2 Corintios 8:2

Rü woo taxü̃ ga guxchaxü̃gü nüxü̃́ yexmagüxü̃, natürü nataãẽgü. Rü woo tama namuarü diẽruã̱xgü, natürü yema nüxü̃́ yexmacü ga diẽrumaxã togüxü̃ narüngü̃xẽẽgü, ñoma nataarü diẽruã̱xgüxü̃rüxü̃.

Ngechuchuarü ngúexü̃gü ga yamugüxü̃arü puracüchiga 14:22

Rü gumá ĩanegüwa rü yema yaxõgüxü̃xü̃ nixucu̱xẽgü, rü nüxü̃́ nanangúchaü̃xẽẽgü nax guxü̃guma mea yaxõgüãxü̃ca̱x. Rü namaxã nüxü̃ nixugüe, rü ñanagürügü: —Ngẽma Tupana ãẽ̱xgacü ixĩxü̃wa nax ixücuxü̃ca̱x, rü tanaxwa̱xe i muxü̃ma i guxchaxü̃gümaxã yáxna taxĩnüexü̃ i ñoma i naanewa —ñanagürügü.

Ore i mexü̃ ga Luca ümatüxü̃ 14:15

Rü yexguma yemaxü̃ naxĩnügu ga wüxi ga yatü ga mechawa rütoxü̃ rü Ngechuchuxü̃ ñanagürü: —Rü tataãxẽ ya yíxema Tupana ãẽ̱xgacü ixĩxü̃wa chibüxe —ñanagürü.

Ore i mexü̃ ga Luca ümatüxü̃ 13:28

Rü ngéma tá pexauxe, rü tá pixü̃́xchapütagü i ngẽxguma nüxü̃ peda̱u̱xgu i Abraáü̃ rü Ichaá rü Acóbu rü guxü̃ma i Tupanaarü orearü uruü̃gü nax Tupana ãẽ̱xgacü ixĩxü̃wa nangẽxmagüxü̃ rü pema rü nüxna ípewoxü̃xü̃.

Ore i mexü̃ ga Luca ümatüxü̃ 4:18

“Cori ya Tupanaãxẽ rü chowa nangẽxma. Rü nüma rü choxü̃ naxuneta nax nüxü̃ chixuxü̃ca̱x i ore i mexü̃ namaxã i ngẽma duü̃xü̃gü i ngearü diẽruã̱xgüxü̃. Rü choxü̃ namu nax yema duü̃xü̃gü ga norü uanügü to ga nachixü̃anewa gagüxü̃maxã nüxü̃ chixuxü̃ca̱x rü tá nax ínanguxü̃xü̃. Rü choxü̃ namu nax ngẽma ingexetügüxü̃ chidauuchixẽẽxü̃ca̱x rü nax íchananguxü̃xẽẽxü̃ca̱x i ngẽma duü̃xü̃gü i togüme̱xẽwa ngẽxmagüxü̃.

Ore i mexü̃ ga Matéu ümatüxü̃ 11:5

¡Rü Cuáü̃maxã nüxü̃ pixu rü ngẽma ngexetügüxü̃ rü marü nidauchigü, rü ngẽma ichixeparaxü̃ rü marü inachigü, rü ngẽma chaxüneã̱xgüxü̃ rü marü naxca̱x nitaanegü, rü ngẽma ngauchi̱xẽgüxü̃ rü marü ningo̱xnamachixẽgü, rü ngẽma yuexü̃ rü wenaxarü namaxẽ, rü ngẽma ngearü diẽruã̱xgüxü̃ rü marü namaxã nüxü̃ tixu i Tupanaarü ore i mexü̃!

Chacaría 11:11

Rü yema ngunexü̃gu inarüxo ga yema uneta. Rü yema carnérugümaxã taxegüxü̃ rü choxü̃ inangugügü. Rü yexguma nüxü̃ nicua̱xãchitanü nax Cori ya Tupana yixĩxü̃ ga nawa idexacü ga yema chaxüxü̃.

Ichaía 66:2

¡Rü choma nixĩ i chanaxüxü̃ i guxü̃ma i ñoma i naanewa nüxü̃ idauxü̃ rü yemaacü nixĩ ga nangóexü̃! Rü choma ya Cori nixĩ i ngẽma ñachaxü̃. Rü choma rü tüxü̃ chadawenü ya yíxema ngearü diẽruã̱xgüxe rü yíxema naxĩ̱xãchiãẽgüxe ya naga ĩnüexe i chorü ore.

Ucu̱xẽgüchiga 19:1

Taxuwama name nax taechitamare imaxü̃xü̃ rü ixuxwa̱xexü̃ ixĩxü̃. Rü narümemae nax tama imuarü diẽruã́xü̃ rü aixcüma mexü̃gu rüxĩnüxü̃.

Ucu̱xẽgüchiga 16:19

Tama name i ngẽma diẽruã̱xgüxü̃ i nügü icua̱xüü̃güxü̃maxã cuxãmücü. Rü narümemae nixĩ i ngẽma ngearü diẽruã̱xgüxü̃ i tama nügü icua̱xüü̃güxü̃maxã cuxãmücü.

1 Chamué 2:8

Tupana rü tümaarü guxchaxü̃wa tüxü̃ narüngü̃xẽxẽ ya yíxema ngearü diẽruã̱xgüxe. Rü guxchirepáü̃wa tüxü̃ ínayaxuchi ya yíxema diẽruca̱x caxaxü̃wa̱xegüxe rü ãẽ̱xgacüxü̃ tüxü̃ nixĩxẽxẽ nax ngẽmaãcü tachigaxü̃ i yatügütanüwa tarütoxü̃ca̱x rü ãẽ̱xgacütanüwa tangexmaxü̃ca̱x. Erü Cori ya Tupana nixĩ i norü yora i ngẽma nagu naxǘnagüxü̃ i ñoma i naane, yerü nüma nixĩ ga nagu naxǘnagüãxü̃.

Ore i mexü̃ ga Luca ümatüxü̃ 16:25

Natürü Abraáü̃ rü ñanagürü nüxü̃: “Pa Chaunex, ¡nüxna nacua̱xãchi nax taxuxü̃ma cuxü̃́ taxuxü̃ ga yexguma cumaxü̱̃xgu! Natürü Lácharo rü poraãcü guxchaxü̃wa nayexma. Rü ngẽmaca̱x i ñu̱xma rü nua mexü̃wa nangẽxma i Lácharo, rü cuma rü ngéma poxcuchicawa ngúxü̃ quinge.

Wiyaegü 37:16

Rü ngẽma muxü̃ i diẽru i ngẽma duü̃xü̃gü i chixexü̃ nüxü̃́ ngẽxmaxü̃arü yexera name nixĩ i ngẽma noxretama i nüxü̃́ ngẽxmaxü̃ ya yimá yatü ya mexü̃gu rüxĩnücü.

Ore i mexü̃ ga Matéu ümatüxü̃ 5:1

Rü yexguma Ngechuchu nüxü̃ da̱u̱xgu ga yema muxü̃ma ga duü̃xü̃gü, rü wüxi ga ma̱xpǘnegu naxĩnagü namaxã ga norü ngúexü̃gü. Rü yéma narüto, rü norü ngúexü̃gü nüxü̃ ínachomaeguãchi.