Ore i mexü̃ ga Luca ümatüxü̃ 4:18 - Tupanaarü Ore

¹⁸ “Cori ya Tupanaãxẽ rü chowa nangẽxma. Rü nüma rü choxü̃ naxuneta nax nüxü̃ chixuxü̃ca̱x i ore i mexü̃ namaxã i ngẽma duü̃xü̃gü i ngearü diẽruã̱xgüxü̃. Rü choxü̃ namu nax yema duü̃xü̃gü ga norü uanügü to ga nachixü̃anewa gagüxü̃maxã nüxü̃ chixuxü̃ca̱x rü tá nax ínanguxü̃xü̃. Rü choxü̃ namu nax ngẽma ingexetügüxü̃ chidauuchixẽẽxü̃ca̱x rü nax íchananguxü̃xẽẽxü̃ca̱x i ngẽma duü̃xü̃gü i togüme̱xẽwa ngẽxmagüxü̃.

Ore i mexü̃ ga Luca ümatüxü̃ 4:18 Referans Kwoze

Ichaía 61:1

Tupanaãxẽ i Üünexü̃ rü chowa nangẽxma, erü Tupana rü choxü̃ naxuneta rü choxü̃ inamuãchi nax yíxema ngearü diẽruã̱xgüxemaxã nüxü̃ chixuxü̃ca̱x i mexü̃ i ore rü tüxü̃ chataãẽxẽẽgüxü̃ca̱x ya yíxema naxĩ̱xãchiãẽgüxe. Rü choxü̃ naxuneta nax yíxema to i nachixü̃anewa gagüxemaxã nüxü̃ chixuxü̃ca̱x nax paxa tá ítanguxü̃xü̃ rü yíxema poxcupataxü̃wa ngẽxmagüxe rü tá ta ítanguxü̃xü̃

Ore i mexü̃ ga Matéu ümatüxü̃ 11:5

¡Rü Cuáü̃maxã nüxü̃ pixu rü ngẽma ngexetügüxü̃ rü marü nidauchigü, rü ngẽma ichixeparaxü̃ rü marü inachigü, rü ngẽma chaxüneã̱xgüxü̃ rü marü naxca̱x nitaanegü, rü ngẽma ngauchi̱xẽgüxü̃ rü marü ningo̱xnamachixẽgü, rü ngẽma yuexü̃ rü wenaxarü namaxẽ, rü ngẽma ngearü diẽruã̱xgüxü̃ rü marü namaxã nüxü̃ tixu i Tupanaarü ore i mexü̃!

Ngechuchuarü ngúexü̃gü ga yamugüxü̃arü puracüchiga 10:38

Rü pema nüxü̃ pecua̱x nax Tupana naporaxẽẽxü̃ ga Ngechuchu ya Nacharétucüã̱x rü nüxna namuaxü̃ ga Naãxẽ ya Üünecü. Rü nüma ga Ngechuchu rü mexü̃ naxü ga yema íyaxũgüxü̃wa, rü nanameexẽxẽ ga guxü̃ma ga yema ngo̱xome̱xẽwa yexmagüxü̃, yerü Tupana nüxü̃ narüngü̃xẽxẽ.

Ore i mexü̃ ga Luca ümatüxü̃ 7:22

Rü yemaca̱x Ngechuchu nanangãxü̃ rü ñanagürü: —¡Pewoegu rü Cuáü̃maxã nüxü̃ peyarüxu i ngẽma pematama nüxü̃ pedauxü̃ rü nüxü̃ pexĩnüexü̃! ¡Rü namaxã nüxü̃ pixu i ngẽma ingexetüxü̃ rü marü nidauuchigü, rü ngẽma ichixeparaxü̃ rü marü inachigü, rü ngẽma chaxüneã̱xgüxü̃ rü marü naxca̱x nitaanegü, rü ngẽma ngauchi̱xẽgüxü̃ rü marü ningo̱xnamachixẽgü, rü ngẽma yuexü̃ rü wenaxarü namaxẽ, rü ngẽma ingearü diẽruã̱xgüxü̃maxã marü nüxü̃ tixu i Tupanaarü ore i mexü̃!

Ngechuchuarü ngúexü̃gü ga yamugüxü̃arü puracüchiga 26:18

Rü cuxü̃ chamu nax ngẽma duü̃xü̃güxü̃ choxü̃ cucua̱xẽẽxü̃ca̱x rü nüxü̃ naxoexü̃ca̱x i nacüma i chixexü̃gü rü chauga naxĩnüexü̃ca̱x. Rü cuxü̃ chamu nax Chatanáme̱xẽwa ícunanguxü̃xẽẽxü̃ca̱x i ngẽma duü̃xü̃gü nax chowe naxĩxü̃ca̱x rü choxü̃́ yaxõgüãxü̃ca̱x nax choma nüxü̃́ nüxü̃ icharüngümaxü̃ca̱x i norü pecadugü, rü nüxü̃́ nangẽxmaxü̃ca̱x i nachica natanüwa i guxü̃ma i chorü duü̃xü̃gü i üünegüxü̃”, ñanagürü choxü̃ ga Cori.

Ichaía 42:7

Rü cuxü̃ chamu nax cuyadauchitanüxẽẽxü̃ i ngẽma ngexetügüxü̃ rü poxcupataxü̃wa ícunanguxü̃xẽẽxü̃ca̱x i ngẽma poxcuexü̃ i waanexü̃wa ngẽxmagüxü̃.

Ore i mexü̃ ga Cuáü̃ ümatüxü̃ 12:46

Choma nax nangóonexẽẽruxü̃ chixĩxü̃, rü ñoma i naanewa chaxũ nax guxãma ya texé ya choxü̃́ yaxõgüxe rü tama ẽanexü̃wa tangexmagüxü̃ca̱x.

Nüxíraxü̃xü̃ ga popera ga Pedru ümatüxü̃ 2:9

Natürü pema nixĩ i duü̃xü̃gü i tórü ãẽ̱xgacü ya Tupana pexü̃ dexü̃ nax norü puracü pexügüxü̃ca̱x. Rü pema nixĩ i duü̃xü̃gü i nape̱xewa ixüünexü̃, erü nümatama ya Tupana rü norü duü̃xü̃güxü̃ pexü̃ nixĩgüxẽxẽ nax nüxü̃ pixuxü̃ca̱x i ngẽma mexü̃gü i norü poramaxã naxüxü̃. Rü nümatama ya Tupana nixĩ ga ẽanexü̃wa pexü̃ ínanguxü̃xẽẽxü̃ nax norü ngóonexü̃ i mexẽchixü̃gu pechocuxü̃ca̱x.

Colosenses 1:13

Yerü nüma ga Tupana rü marü Chatanáme̱xẽwa tüxü̃ ínanguxü̃xẽxẽ rü Nane ya nüxü̃ nangechaü̃cüme̱xẽwa tüxü̃ nangẽxmagüxẽxẽ.

Ichaía 32:3

Rü ngẽma ãẽ̱xgacügü rü tá mea nüxü̃ nadau i guxü̃ma i ngẽma nachixü̃anewa ngupetüxü̃. Rü ngẽxguma norü duü̃xü̃gü namaxã idexagügu rü tá mea nüxü̃́ inaxĩnüe. Rü taxũtáma ñu̱xãẽãcü norü duü̃xü̃gümaxã inacua̱xgü, natürü meamare tá namaxã inacua̱xgü. Rü ngẽxguma duü̃xü̃gümaxã yadexagügu rü tá mea nango̱x i norü dexa.

Wiyaegü 147:3

Rü nüma rü tüxü̃ nataãẽxẽxẽ ya yíxema poraãcü ngechaü̃ ingegüxe rü tüxü̃́ nayana̱i̱xgü i tümaarü o̱xrigü.

Ichaía 35:5

Rü ngẽma ngunexü̃gu rü ngẽma ingexetüxü̃ rü tá nidauuchitanü, rü ngẽma ingauchiẽxü̃ rü tá ningo̱xnamachixẽgü.

Ore i mexü̃ ga Matéu ümatüxü̃ 5:3

“Tataãẽgü ya yíxema nüxü̃ icua̱xãchitanüxe i tümaarü pecadu rü Tupanawe rüxĩxe, erü tümaca̱x nixĩ i daxũguxü̃ i naane ya Tupana ãẽ̱xgacü ixĩxü̃wa.

Ore i mexü̃ ga Luca ümatüxü̃ 6:20

Rü yexguma Ngechuchu rü norü ngúexü̃güxü̃ nadawenü, rü ñanagürü nüxü̃: —¡Petaãxẽgü i pemax ya ingearü diẽruã̱xgüxe! Erü Tupana ãẽ̱xgacü ixĩxü̃wa rü pexü̃́ nangẽxma i pechica.

Maraquía 4:2

Natürü i pemax nax aixcüma choxü̃ pengechaü̃güxü̃ rü chaucüma tá meama pewa nango̱x ñoma üa̱xcü nangóanexẽẽxü̃rüxü̃ rü taãxẽ ixãxü̃rüxü̃. Rü pemax rü taãẽmaxã tá piyuxnagütanü ñoma wocaxacügü naxpüü̃wa iyayi̱xü̃rüxü̃.

Popera ga Chantiágu ümatüxü̃ 2:5

Pa Chauenexẽgü ya Pexü̃ Changechaü̃güxe, ¡Iperüxĩnüe i ñaa ore! Tupana tüxü̃ nade ya yíxema ñoma i naanewa ngearü diẽruã̱xgüxe, erü nanaxwa̱xe nax nüxü̃́ tayaxõgüxü̃ rü tanayauxgüxü̃ i ngẽma maxü̃ i taguma gúxü̃ i tümamaxã inaxunetaxü̃ ya yíxema nüxü̃ ngechaü̃güxe.

Ore i mexü̃ ga Cuáü̃ ümatüxü̃ 3:34

Rü yimá Tupana núma namucü, rü Tupanaarü orexü̃ nixu. Erü Tupana rü nüxna nanamu i Naãxẽ ya Üünexü̃ nax guxü̃guma naxü̃tawa nangẽxmaxü̃ca̱x.

Ichaía 59:21

Rü nüma ya Tupana rü ñanagürü: —Ñaa nixĩ i chorü uneta i ngẽma duü̃xü̃gümaxã nüxü̃ chixuxü̃: “Rü ngẽma Chauãxẽ i cuwa ngẽxmaxü̃, rü ngẽma chorü ore i cua̱xwa ngẽxmaxü̃ rü tagutáma cuxna rü cunegüna rü cutaagüna nixũgachi” —ñanagürü ya Cori ya Tupana.

Ichaía 50:4

Rü choma i Ichaía rü ñachagürü: —Tupana rü choxü̃ nangu̱xẽxẽ nax norü ore i taãxẽ tüxna ãxü̃maxã chayaxucu̱xẽgüxü̃ nax naporaexü̃ca̱x i ngẽma ipaexü̃ rü ngúxü̃ ingegüxü̃. Rü guxü̃ i pa̱xmama rü Tupana choxü̃ ínarüdaxẽxẽ nax wüxi i ngúetanüxü̃ i mexü̃rüxü̃ nüxü̃ chaxĩnüxü̃ca̱x i norü ngu̱xẽẽtae.

Danié 9:24

Rü 70 i yüxügü ngupetüguwena rü yima curü ĩane ya üünene ya Yerucharéü̃ rü ngẽma curü duü̃xü̃gü i Iraétanüxü̃ rü düxwa tá inayarüxo i norü chixexü̃ i naxügüxü̃ rü tá Tupanaga naxĩnüe. Rü Tupana tá nüxü̃́ inanaxoxẽxẽ i ngẽma norü chixexü̃gü, rü tá nüxü̃́ nüxü̃ inarüngüma i ngẽma norü chixexü̃. Rü tá ningucuchi ya yimá aixcüma mecü nax guxü̃guma norü duü̃xü̃gümaxã mea inacuáxü̃ca̱x. Rü ngẽmaãcü tá ningu ga yema Tupana cuxü̃ wéxü̃. Rü wena tá nanamexẽxẽ ya yima napata ya üünene.

Ichaía 57:15

Erü choma ya Tupana ya Guxü̃étüwa Ngẽxmacü rü guxü̃guma chamaxü̃ rü chauéga rü Üünecü nixĩ. Rü ñachagürü: “Choma rü daxũwa chamaxü̃ i ngextá ínaxüünexü̃wa. Natürü tüxü̃ charüngü̃xẽẽxü̃ rü tüxü̃ chaporaxẽxẽ ya yíxema ngearü diẽruã̱xgüxe rü yíxema naxĩ̱xãchiãẽgüxe”.

Ichaía 49:9

Rü pema rü tá ñaperügü nüxü̃ i ngẽma poxcuexü̃: “¡Marü ípenguxü̃!” ñaperügü tá. Rü ngẽma ẽanexü̃wa ngẽxmagüxü̃ rü tá ñaperügü nüxü̃: “¡Ípechoxü̃ rü nangóonexü̃wa pexĩ!” ñaperügü tá. Pema rü guxü̃ma i namagücüwawa tá nüxü̃ peyangau i mecü ya maxẽ, rü guxü̃ne ya ma̱xpǘnegüwa rü tá nayima ya maxẽ naxca̱x i perü wocagü.

Ichaía 45:13

Rü choma nixĩ ga chanango̱xẽẽxü̃ ga Chíru ga Pérchiaanearü ãẽ̱xgacü. Rü ñu̱xma rü tá nüxü̃ charüngü̃xẽxẽxü̃ i guxü̃wa nax wena naxüaxü̃ca̱x ya chorü ĩane ya Yerucharéü̃. Rü nüma i Chíru rü ngetanüãcüma tá ínananguxü̃xẽxẽ i ngẽma Iraétanüxü̃ i to ga naanewa ne nagagüxü̃. Rü choma ya Cori ya Tupana ya Guxãétüwa Ngẽxmacü nixĩ i ngẽma ñachaxü̃” —ñanagürü.

Wiyaegü 34:18

Rü nüma ya Cori ya Tupana rü ínamemare nax tüxü̃ nangü̃xẽẽxü̃ ya yíxema ngúxü̃ ingegüxe Rü tüxü̃ ínanguxü̃xẽxẽ ya yíxema ngechaxü̃ ingegüxe.

Wiyaegü 2:6

—Choma rü marü nüxü̃ chaxuneta ya yimá ãẽ̱xgacü ya choma chanaxwa̱xecü nax yima ma̱xpǘne ya üünene ya Chióü̃wa ãẽ̱xgacü yixĩxü̃ca̱x —ñanagürü.

Chofonía 3:12

“Pa Yerucharéü̃x, cuwa tá chayaxügüxẽxẽ i ñuxre i duü̃xü̃gü i mecümaxü̃ i tama nügü icua̱xüü̃güxü̃. Rü nümagü rü tá choxü̃́ nayaxõgü.

Wiyaegü 2:2

Rü ñoma i naanecüã̱x i nachixü̃anegüarü ãẽ̱xgacügü rü Tupanamaxã rü yimá ãẽ̱xgacü ya nüma yangucuchixẽẽcümaxã nanue, rü wüxigu nagu narüxĩnüe nax ñuxãcü yimáxü̃ ínata̱xüchigüxü̃.

Ore i mexü̃ ga Cuáü̃ ümatüxü̃ 1:41

Rü yexgumatama ga André, rü naenexẽ ga Chimóü̃ca̱x nayadau. Rü ñanagürü nüxü̃: —Rü marü nüxü̃ itayangau ya yimá nũxcüma Tupana nüxü̃ unetacü ga Cristu —ñanagürü.

Ore i mexü̃ ga Matéu ümatüxü̃ 12:20

Rü yimá dexne ya ibüyecü rü taxũtáma nayabüyexüchi. Rü ngẽma omü i íxrarüwatama ngéma icaixquexü̃ rü taxũtáma nayaxoxẽẽxü̃chi. Rü mea tá duü̃xü̃gümaxã inacua̱x ñu̱xmatáta guxü̃ i chixexü̃xü̃ naporamae.

Wiyaegü 51:17

Rü ngẽma cuma cunaxwa̱xexü̃, Pa Tupanax, nixĩ i wüxi i duü̃xü̃ i nüxü̃ rüxoxü̃ i chixexü̃. Rü cumax, Pa Tupanax, rü tama nüxü̃ cuxo i ngẽma duü̃xü̃ i nügümaxã nangechaü̃ãcüma cumaxã nügü ixuxü̃ nax nachixexü̃.

Chacaría 11:11

Rü yema ngunexü̃gu inarüxo ga yema uneta. Rü yema carnérugümaxã taxegüxü̃ rü choxü̃ inangugügü. Rü yexguma nüxü̃ nicua̱xãchitanü nax Cori ya Tupana yixĩxü̃ ga nawa idexacü ga yema chaxüxü̃.

Echequié 9:4

Rü ñanagürü nüxü̃: —¡Ẽcü, nagu ixũãgüchigü ya daa ĩane ya Yerucharéü̃ rü yaxüégacatü i guxü̃ma i ngẽma duü̃xü̃gü i ñaa ĩanearü chixexü̃gagu ngechaü̃güxü̃ rü ngúxü̃ ingegüxü̃! —ñanagürü.

Ichaía 66:2

¡Rü choma nixĩ i chanaxüxü̃ i guxü̃ma i ñoma i naanewa nüxü̃ idauxü̃ rü yemaacü nixĩ ga nangóexü̃! Rü choma ya Cori nixĩ i ngẽma ñachaxü̃. Rü choma rü tüxü̃ chadawenü ya yíxema ngearü diẽruã̱xgüxe rü yíxema naxĩ̱xãchiãẽgüxe ya naga ĩnüexe i chorü ore.

Naanearü ügüchiga 3:15

Rü ñu̱xma rü pemaxã chanaxuegu nax cuma rü ngẽma nge rü pegümaxã perüxuanügüxü̃. Rü ngẽxgumarüxü̃ ta i cuxacügü rü ngĩxacügü rü tá nügümaxã narüxuanügü. Rü yimá ngĩne rü tá cuxü̃ nipúmüeru rü cuma rü tá cunangõ̱xchinecutü —ñanagürü.

Ngechuchuarü ngúexü̃gü ga yamugüxü̃arü puracüchiga 4:27

Rü aixcüma nixĩ, Pa Tupanax, ga daa ĩanewa ga ãẽ̱xgacügü ga Eróde rü Pirátu nax nügümaxã nangutaque̱xegüxü̃ namaxã ga to ga nachixü̃anegücüã̱x rü totanüxü̃ ga Iraétanüxü̃, nax yama̱xgüãxü̃ca̱x ya curü ngü̃xẽẽruxü̃ ya üünecü ya Ngechuchu ya cuma nüxü̃ cuxunetacü nax Cristu yixĩxü̃ca̱x.

Wiyaegü 45:7

Rü cumax, Pa Ãẽ̱xgacüx, namaxã cutaãxẽ i ngẽma mexü̃ ixĩxü̃, natürü naxchi cuxai i ngẽma chixexü̃. Rü yemaca̱x nixĩ ga Tupana chixü̃ ga paacaxü̃maxã cuxü̃ nabaeruxü̃ rü cuxü̃ naxunetaxü̃ nax cumücügüarü yexera taãxẽ cuxü̃́ ngẽxmaxü̃ca̱x.

Ore i mexü̃ ga Matéu ümatüxü̃ 12:18

“Daa nixĩ ya chorü duü̃ ya chomatama nüxü̃ chaxunetacü rü nüxü̃ changechaü̃cü rü namaxã chataãẽxü̃chicü. Rü nüxna tá chanamu i Chauãxẽ i Üünexü̃. Rü nüma rü ngẽma duü̃xü̃gü i tama Yudíugü ixĩgüxü̃maxã tá nüxü̃ nixu i ore i mexü̃ i aixcüma ixĩxü̃.

Ore i mexü̃ ga Luca ümatüxü̃ 4:17

Rü nüxna nanaxãgü ga popera ga Tupanaarü orearü uruxü̃ ga Ichaía ümatüxü̃. Rü yexguma yangenaátüãgu, rü nüxü̃ inayangau ga ínaxümatüxü̃wa ga ore ga ñaxü̃:

Ngechuchuarü ngúexü̃gü ga yamugüxü̃arü puracüchiga 4:26

Ngẽma nachixü̃anegüarü ãẽ̱xgacügü rü Tupanamaxã nanue, rü nügümaxã nangutaque̱xegü nax wüxigu nügümaxã nagu naxĩnüexü̃ca̱x nax ñuxãcü tá nüxü̃ nax nayexeragüxü̃ca̱x ya Cori ya Tupana rü Nane ya nüxü̃ naxunetacü ya Cristu”, ñanagürü ga Dabíwa.