Ore i mexü̃ ga Luca ümatüxü̃ 3:36 - Tupanaarü Ore

³⁶ Rü Chéra rü Caináü̃ nane nixĩ. Rü Caináü̃ rü Arpacháx nane nixĩ. Rü Arpacháx rü Chéü̃ nane nixĩ. Rü Chéü̃ rü Noé nane nixĩ. Noé rü Laméx nane nixĩ.

Ore i mexü̃ ga Luca ümatüxü̃ 3:36 Referans Kwoze

Norü taxre ga popera ga Pedru ümatüxü̃ 2:5

Rü yexgumarüxü̃ ta ga Tupana rü tama nüxü̃́ nüxü̃ narüngüma ga norü chixexü̃ ga yema nũxcümaü̃güxü̃ ga duü̃xü̃gü. Rü mucü ga taxüchicü naxca̱x yéma nanamu nax gumámaxã nadaiaxü̃ca̱x ga yema duü̃xü̃gü ga chixexü̃ ügüxü̃. Natürü ga Tupana rü Noéxü̃ nadau nax meama duü̃xü̃güxü̃ yaxucu̱xẽgüxü̃ nax nüxü̃ naxoexü̃ca̱x ga norü chixexü̃gü. Rü yemaca̱x ga Tupana rü Noéxü̃ namaxẽxẽ namaxã ga 7 ga natanüxü̃. Natürü nanadai ga guxü̃ma ga yema togü ga duü̃xü̃gü.

Nüxíraxü̃xü̃ ga popera ga Pedru ümatüxü̃ 3:20

Rü yema naãxẽgü ga yexma poxcuexü̃, rü yema nixĩ ga naãxẽgü ga yema duü̃xü̃gü ga Noé maxü̃gu tama ixĩnüechaü̃xü̃ woo Tupana yáxna namaxã naxĩnü ga yexguma Noé naxüyane ga gumá wapuru. Rü 8 ga duü̃xü̃güxicatama nixĩ ga gumá wapurugu ichoü̃xü̃, rü yema nixĩ ga gumá mucü ga taxüchicüarü dexáétüwa maxẽxü̃.

Popera ga Yudíugü ga yaxõgüxü̃ca̱x ümatüxü̃ 11:7

Rü yexguma Noémaxã yadexaxgu ga Tupana, rü nüma ga Noé rü nayaxõ rü naga naxĩnü. Rü Tupana rü namaxã nüxü̃ nixu rü tá ínanguxü̃ ga mucü ga taxüchicü ga taguma duü̃xü̃gü nüxü̃ daucü rü tá guxü̃wama inanguanexẽẽcü. Rü Tupana namaxã nüxü̃ nixu nax naxüaxü̃ca̱x ga wüxi ga wapuru ga taxü̃ne nax tama nayuexü̃ca̱x ga nüma rü naxma̱x rü nanegü rü naneã̱xgü. Rü Tupanaga naxĩnü ga Noé, rü nanaxü ga gumá wapuru, rü yemaacü tama nayue ga nüma rü napatacüã̱x yerü Tupanaaxü̃́ nayaxõ. Natürü yema togü ga duü̃xü̃gü rü tama Noérüxü̃ nayaxõgü, rü yemaca̱x Tupana nanapoxcue. Rü nüma ga Tupana rü Noéxü̃ nixu nax nape̱xewa namexü̃, yerü nüxü̃́ nayaxõ.

Ore i mexü̃ ga Luca ümatüxü̃ 17:27

Rü yexguma ga duü̃xü̃gü rü nachibüe, rü naxaxegü, rü nixãma̱xgü, rü nixütexacügü ñu̱xmata nawa nangu ga yema ngunexü̃ ga Noé naweü̃gu nagu ixüexü̃. Rü ínangu ga mucü ga taxüchicü, rü guxü̃ma ga yema duü̃xü̃gü rü nayue.

Echequié 14:14

Rü ngẽxguma chi ngẽma nachixü̃anewa namaxẽgu i Noé, rü Danié, rü Yox, rü ngẽma tomaepü̱xica chitama nixĩ i maxẽxü̃ erü aixcüma nayaxõgü. Rü choma ya Cori ya Tupana nixĩ i cumaxã nüxü̃ chixuxü̃ i ngẽma.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 1:17

Rü Chéü̃ nanegü nixĩ ga Eráü̃, rü Achú, rü Arpacháx, rü Lux, rü Aráü̃. Rü Aráü̃ nanegü nixĩ ga Úx, rü Yúx, rü Guétex, rü Máx.

Naanearü ügüchiga 9:18

Rü ñaagü nixĩ ga yema Noé nanegü ga guma wapuruwa íchoü̃xü̃: Rü wüxi nixĩ ga Chéü̃, rü to nixĩ ga Cáü̃, rü to nixĩ ga Yapéx. Rü nüma ga Cáü̃ rü nüxü̃́ nayexma ga wüxi ga nane ga Canaáü̃gu ãégaxü̃.

Naanearü ügüchiga 9:1

Rü Tupana rü ñaa mexü̃ ga dexa Noémaxã rü nanegümaxã naxuegu, rü ñanagürü: —¡Pimu rü penapaxẽxẽ i ñaa naane!

Naanearü ügüchiga 8:1

Natürü ga Tupana rü tama Noéxü̃ inayarüngüma, rü tama nüxü̃ inayarüngüma ga guxü̃ma ga yema naeü̃gü ga wüxigu Noémaxã wapuruwa yexmagüxü̃. Rü yemaca̱x ga Tupana rü nayabuanexẽxẽ, rü yema dexá rü inanaxügü ga nax íyaxexü̃.

Naanearü ügüchiga 7:23

Rü Noé rü guxü̃ma ga guma wapuruwa yexmagüxü̃icatama namaxẽ. Natürü guxü̃ma ga yema togü ga tama wapuruwa yexmagüxü̃ rü nayue ga duü̃xü̃gü, rü naeü̃gü, rü naxü̃nagü, rü naeü̃gü ga ixãxpe̱xatüxü̃ rü naeü̃gü ga naxtanecamaxã waixü̃müanegu ixĩxü̃.

Naanearü ügüchiga 7:13

Rü marü 7 ga ngunexü̃ naxü̃pa nax inanguxü̃ ga ñaa naane rü yematama ngunexü̃gu nixĩ ga Noé ga yaxüexü̃ nagu ga guma wapuru tümamaxã ga naxma̱x rü namaxã ga gumá tomaepü̱x ga nanegü ga Chéü̃ rü Cáü̃ rü Yapéx rü tümamaxã ga guxema tomaepü̱x ga naneã̱xgü.

Naanearü ügüchiga 6:22

Rü nüma ga Noé rü nayanguxẽxẽ ga guxü̃ma ga yema Tupana namaxã nüxü̃ ixuxü̃.

Naanearü ügüchiga 5:3

Rü nüma ga Adáü̃ rü nüxü̃́ nayexma ga 130 ga taunecü ga yexguma nabuxgu ga nane ga nanaraü̃xü̃chicü. Rü Chéxgu nanaxüéga.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 1:1

Ñaagü nixĩ ga yema Adáü̃taagü: Chéx, rü Caináü̃, rü Mararéx, rü Yérex, rü Enóx, rü Matucharéü̃, rü Laméx, rü Noé. Rü Noé nanegü nixĩ ga Chéü̃, rü Cáü̃, rü Yapéx.

Ore i mexü̃ ga Luca ümatüxü̃ 3:35

Rü Nacóx rü Cherúx nane nixĩ. Rü Cherúx rü Ragáu nane nixĩ. Rü Ragáu rü Pérex nane nixĩ. Rü Pérex rü Ébe nane nixĩ. Rü Ébe rü Chéra nane nixĩ.

Ore i mexü̃ ga Luca ümatüxü̃ 3:37

Rü Laméx rü Matucharéü̃ nane nixĩ. Rü Matucharéü̃ rü Enóx nane nixĩ. Rü Enóx rü Yérex nane nixĩ. Rü Yérex rü Mararéx nane nixĩ. Rü Mararéx rü Caináü̃ nane nixĩ.