Ore i mexü̃ ga Luca ümatüxü̃ 23:2 - Tupanaarü Ore

² Rü yéma Pirátupe̱xewa inanaxügüe nax Ngechuchuxü̃ yaxugüexü̃. Rü ñanagürügü: —Ñaa yatü rü nüxü̃ itayangaugü nax nanuexẽẽãxü̃ i torü duü̃xü̃gü. Rü nüxü̃ nixu nax tama namexü̃ nax ãẽ̱xgacü ya Rómawa ngẽxmacüaxü̃́ tanaxütanüxü̃ i diẽru. Rü nügü nixu nax nüma yixĩxü̃ i torü ãẽ̱xgacü i Cristu —ñanagürügü.

Ore i mexü̃ ga Luca ümatüxü̃ 23:2 Referans Kwoze

Ore i mexü̃ ga Cuáü̃ ümatüxü̃ 19:12

Rü yemawena rü Pirátu nagu narüxĩnü ga ñuxãcü Ngechuchuxü̃ nax ínanguxuchixẽẽxégaxü̃. Natürü yema Yudíugü rü poraãcü aita naxüe, rü ñanagürügü: —Ngẽxguma tá ícunanguxuchixẽẽ̱xgu rü tama curü ãẽ̱xgacü ya Chécharuxü̃ cungechaü̃. Erü ngexerüxe ya ãẽ̱xgacüxü̃ tügü ingucuchixẽẽ́xẽ, rü Rómacüã̱x ya ãẽ̱xgacü ya Chécharuarü uanü tixĩ —ñanagürügü.

Ore i mexü̃ ga Luca ümatüxü̃ 23:14

Rü Pirátu ñanagürü nüxü̃: —Pema nua cha̱u̱xca̱x penaga i ñaa yatü, rü nüxü̃ pixu nax nanuexẽẽãxü̃ i duü̃xü̃gü. Natürü pepe̱xewa nüxna chaca i ngẽmachiga rü taxuxü̃ma nawa ichayangau i ngẽma chixexü̃ i naxca̱x ípenaxuaxü̃xü̃.

Ngechuchuarü ngúexü̃gü ga yamugüxü̃arü puracüchiga 24:5

Rü marü nüxü̃ tadau nax ñaa yatü rü wüxi i da̱xaweanerüxü̃ nax yixĩxü̃. Erü guxü̃ i naanewa norü ngu̱xẽẽtaemaxã nügü nayatoyexẽxẽ i Yudíugü. Rü nüma rü naeru nixĩ i ngẽma duü̃xü̃gü i nüxü̃́ yaxõgüxü̃ i Ngechuchu i Nacharétucüã̱x.

Ore i mexü̃ ga Cuáü̃ ümatüxü̃ 18:30

Rü nüma ga duü̃xü̃gü rü Pirátuxü̃ nangãxü̃gü, rü ñanagürügü: —Ngẽxguma chi tama wüxi i taxü̃ i chixexü̃ naxü̱xgu, rü taxũchima cuxü̃tawa tanaga —ñanagürügü.

Ore i mexü̃ ga Márcu ümatüxü̃ 12:17

Rü yexguma ga Ngechuchu rü ñanagürü nüxü̃: —¡Ãẽ̱xgacüna ngĩxü̃ pexã i ngẽma ãẽ̱xgacüarü ixĩcü, rü Tupanana ngĩxü̃ pexã i ngẽma Tupanaarü ixĩcü! —ñanagürü. Rü yexguma yema orexü̃ naxĩnüegu, rü namaxã naba̱i̱xãchiãẽgü.

Ore i mexü̃ ga Matéu ümatüxü̃ 22:21

Rü nümagü nanangãxü̃gü, rü ñanagürügü: —Rómacüã̱x ya ãẽ̱xgacü ya tacüchicüna̱xã nixĩ —ñanagürügü. Rü yexguma ga Ngechuchu rü ñanagürü nüxü̃: —¡Ãẽ̱xgacüna ngĩxü̃ pexã i ngẽma ãẽ̱xgacüarü ixĩcü, rü Tupanana ngĩxü̃ pexã i ngẽma Tupanaarü ixĩcü! —ñanagürü.

Chacaría 11:8

Rü wüxi ga tauemacügutama rü íchanawoxü̃ ga tomaepü̱x ga norü dauruü̃gü, yerü tama yáxna namaxã chaxĩnü, rü chauxchi naxaie.

Yeremía 38:4

Rü yexguma yemaxü̃ naxĩnüegu ga yema ãẽ̱xgacüarü ngü̃xẽẽruü̃gü, rü ñanagürügü ãẽ̱xgacüxü̃: —Pa Ãẽ̱xgacüx, name nixĩ i tayama̱x i ñaa yatü erü ngẽma dexa i nüxü̃ yaxuxü̃maxã nananuexẽxẽ i tórü churaragü i nua tórü ĩanewa yaxǘgüxü̃ rü nananuexẽxẽ i guxü̃ma i duü̃xü̃gü. Rü ñaa yatü rü tama daa ĩanearü mexü̃ca̱x nadau, natürü norü chixexü̃ca̱x nixĩ i nadauxü̃ —ñanagürügü.

Yeremía 20:10

Rü nüxü̃ chaxĩnü nax duü̃xü̃gü rü cugüãcüma chauchiga yadexagüxü̃. Rü guxü̃wama choxü̃ naxãxũnegüxü̃ i duü̃xü̃gü rü ngẽmaca̱x chamuü̃. Rü nügümaxã ñanagürügü: “Ngĩxã ítanaxuaxü̃gü”, ñanagürügü. Rü woo i ngẽma chomücügü rü ínanangu̱xẽẽgü nax ngürüãchi ta̱xacürü chixexü̃ chaxüxü̃. Rü ñanagürügü: “Rü nügü tátama nixĩ i chixexü̃gu nanguxẽẽxü̃, rü ngẽxguma i yixema rü tá tayayauxgü rü yixema inaxwa̱xexü̃ tá namaxã taxü”, ñanagürügü.

Wiyaegü 62:4

Rü ngẽma duü̃xü̃gü i chixexü̃ rü ngẽma nagu naxĩnüexü̃xicatama nixĩ nax choxü̃ ínata̱xüchigüxü̃. Rü ngẽma namaxã nataãẽgüxü̃ nixĩ i norü dora. Rü naã̱xmaxã choxü̃ nicua̱xüü̃gü, natürü norü ĩnüwa rü chomaxã naguxchigagü.

Ngechuchuarü ngúexü̃gü ga yamugüxü̃arü puracüchiga 24:13

Rü ñu̱xma taxucürüwama cuxü̃ nanawe̱xgü nax ta̱xacürü chixexü̃ yixĩxü̃ i ngẽma naxca̱x choxü̃ ínaxuaxü̃güxü̃.

Ore i mexü̃ ga Luca ümatüxü̃ 23:5

Natürü nümagü rü yexeraãcü Ngechuchuxü̃ nixugüeama, rü ñanagürügü: —Nüma rü guxü̃ma i Yudéaanewa rü norü ngu̱xẽẽtaemaxã nananuexẽxẽ i duü̃xü̃gü. Rü Gariréaanewa inanaxügü ga yemaacü nax duü̃xü̃güxü̃ nangúexẽẽxü̃, rü ngẽmaãcü nanaxü ñu̱xmata núma Yudéaanewa nangu —ñanagürügü.

Ore i mexü̃ ga Matéu ümatüxü̃ 17:27

Natürü ngẽma nax taxúema tamaxã nuxü̃ca̱x, rü chanaxwa̱xe i cuyaxütanüxü̃ i ngẽma diẽru. ¡Rü yea naxtaxawa naxũ, rü ngéma yapoxwaxe! ¡Rü ngẽma nüxíraxü̃xü̃ i choxni i cunapoxwaü̃xü̃ rü naã̱xwa tá nüxü̃ icuyangau i wüxi i diẽru i nagu mexü̃ nax yangutanüxẽẽxü̃ca̱x i cha̱u̱xca̱x rü cuxca̱x rü ta! ¡Rü Tupanapatawa nange i ngẽma diẽru, rü yaxütanü! —ñanagürü.

Amúx 7:10

Rü Amachía nixĩ ga chacherdóte ga Betéwa. Rü yexguma nüxü̃ nacua̱xgu ga yema Amú nüxü̃ ixuxü̃, rü paxãma wüxi ga norü orearü ngeruü̃xü̃ Iraéanearü ãẽ̱xgacü ga Yeruboáü̃xü̃tawa namu nax namaxã nüxü̃ yanaxuxü̃ca̱x ga ore ga ñaxü̃: —Amú rü Iraécüã̱xgü i duü̃xü̃gütanügu nixũgüchigü rü cumaxã nananuexẽxẽ, Pa Ãẽ̱xgacüx. Rü curü duü̃xü̃gü rü marü tama yáxna namaxã naxĩnüe nax ngẽmaãcü yadexaxü̃.

Wiyaegü 35:11

Rü ñu̱xma rü ínangugü i duü̃xü̃gü i chixexü̃gü i doraxü̃ ixugüxü̃. Rü choxna naxca̱x nacagüe i chixexü̃ i choma tama nüxü̃ chacuáxü̃.

Nüxíraxü̃xü̃ ga popera ga ãẽ̱xgacügüchiga 18:17

Rü yexguma Eríaxü̃ nada̱u̱xgu rü ñanagürü: —¿Cuma ẽ̱xna quixĩ i ngẽma yatü i Iraéanecüã̱xgüca̱x chixexü̃ ícunguxẽẽxü̃? —ñanagürü.

Ore i mexü̃ ga Matéu ümatüxü̃ 27:11

Rü ãẽ̱xgacü ga Pirátuxü̃tawa Ngechuchuxü̃ nagagü. Rü nüma ga Pirátu rü Ngechuchuna naca, rü ñanagürü: —¿Cuma quixĩxü̃ i Yudíugüarü Ãẽ̱xgacü? —ñanagürü. Rü Ngechuchu nanangãxü̃, rü ñanagürü: —Ngẽma nüxü̃ quixuxü̃ chixĩ i chomax —ñanagürü.

Ore i mexü̃ ga Márcu ümatüxü̃ 15:2

Rü nüma ga Pirátu rü Ngechuchuna naca rü ñanagürü: —¿Cuma quixĩxü̃ i Yudíugüarü ãẽ̱xgacü? —ñanagürü. Rü Ngechuchu nanangãxü̃, rü ñanagürü: —Yimá nüxü̃ quixucü chixĩ —ñanagürü.

Ore i mexü̃ ga Cuáü̃ ümatüxü̃ 18:29

Rü yemaca̱x ga gumá ãẽ̱xgacü ga Rómacüã̱x ga Pirátu rü napatawa ínaxũxũ nax duü̃xü̃gümaxã yadexaxü̃ca̱x. Rü ñanagürü nüxü̃: —¿Ta̱xacüca̱x ípenaxuaxü̃ ya daa yatü? —ñanagürü.

Romanos 13:7

Rü wüxichigü i ngẽma ãẽ̱xgacügü, rü name nixĩ i nüxna penaxã i ngẽma nüxna üxü̃. ¡Rü nüxü̃́ penaxütanü i ngẽma diẽru i perü ãẽ̱xgacügü nagu unetaxü̃ẽ̱xpü̱x nax nüxü̃́ penaxütanüxü̃! ¡Rü penaxü̱x i ngẽma ĩanearü puracü i perü ãẽ̱xgacügü pexü̃ muxü̃ nax penaxüxü̃ca̱x! ¡Rü nüxü̃ pengechaü̃gü rü naga pexĩnüe i ngẽma perü ãẽ̱xgacügü! Erü ngẽma nixĩ i mexü̃ nax penaxüxü̃.