Ore i mexü̃ ga Luca ümatüxü̃ 21:36 - Tupanaarü Ore

³⁶ Rü ngẽmaca̱x name nixĩ i pegü ípemexẽẽgü. ¡Rü guxü̃guma peyumüxẽgü nax ngẽmaãcü tama pexü̃ naxüpetüxü̃ca̱x i guxü̃ma i ngẽma ãũcümaxü̃gü i tá íngugüxü̃, rü aixcüma pimexü̃ca̱x i ngẽxguma nape̱xewa pengugügu ya Tupana Nane ya duü̃xü̃xü̃ ixĩcü! —ñanagürü ga Ngechuchu.

Ore i mexü̃ ga Luca ümatüxü̃ 21:36 Referans Kwoze

Nüxíraxü̃xü̃ ga popera ga Cuáü̃ ümatüxü̃ 2:28

Rü ñu̱xmax, Pa Chauxacügüx, rü name nixĩ nax meama Cristuaxü̃́ peyaxõgüxü̃ nax tama nüxü̃ imuü̃exü̃ca̱x, rü tama ixãneexü̃ca̱x nape̱xewa i ngẽxguma wena nua naxũxgu.

Nüxíraxü̃xü̃ ga popera ga Pedru ümatüxü̃ 5:8

Rü name nixĩ i guxü̃guma pegüna pedaugü rü ípexuãẽgü, erü perü uanü i Chataná rü ñoma wüxi ya leóü̃ ya idüraxüchicürüxü̃ nanañaane rü tümaca̱x nadau nax texéxü̃ tá chixexü̃gu nanguxẽẽxü̃.

Ore i mexü̃ ga Matéu ümatüxü̃ 25:13

Rü ñu̱xũchi ñanagürü ga Ngechuchu: —¡Pexũãẽgü! Erü tama nüxü̃ pecua̱x i ta̱xacürü ngunexü̃ rü ta̱xacürü ora tá ínangu ya Tupana Nane ya duü̃xü̃xü̃ ixĩcü —ñanagürü.

Ore i mexü̃ ga Matéu ümatüxü̃ 24:42

¡Pexũãxẽgü! Erü tama nüxü̃ pecua̱x i ta̱xacürü ora tá ínangu i perü Cori.

Nüxíraxü̃xü̃ ga popera ga Pedru ümatüxü̃ 4:7

Rü marü ningaica nax nagúxü̃ i ñoma i naane rü guxü̃ma i ta̱xacü i nawa ngẽxmaxü̃. Rü ngẽmaca̱x name nixĩ nax pexuãẽgüxü̃, rü mea peãxẽxü̃ pecuáxü̃, rü guxü̃guma peyumüxẽgüxü̃.

1 Corintios 16:13

¡Rü pexuãxẽgü nax taxuxü̃ma i chixexü̃gu peyixü̃ca̱x! ¡Rü meama peyaxõgüama woo ta̱xacü pexü̃ üpetügu! Rü name nixĩ i peporaeama rü taxuca̱xma pemuü̃e.

Ore i mexü̃ ga Luca ümatüxü̃ 18:1

Ngechuchu rü wüxi ga to ga cua̱xruxü̃ namaxã nixu nax yemawa nangúexẽẽãxü̃ca̱x nax taguma nüxü̃ naxoexü̃ca̱x nax nayumüxẽgüxü̃.

Ore i mexü̃ ga Márcu ümatüxü̃ 13:33

Rü ngẽmaca̱x, ¡ipedaue rü pexuãẽgü! Erü tama nüxü̃ pecua̱x i ta̱xacürü ora tá ínangu i ngẽma pemaxã nüxü̃ chixuxü̃.

Popera ga Yúda ümatüxü̃ 1:24

Rü yimá nüxicatama Tupana ixĩcü ya tórü Maxẽxẽẽruxü̃ ixĩcü, rü nüxü̃́ nangẽxma i pora nax pexna nadauxü̃ nax tama pecadugu peyixü̃ca̱x. Rü nüxü̃́ nangẽxma i pora nax iyanaxoxẽẽãxü̃ca̱x i perü chixexü̃gü nax ngẽmaãcü ngearü pecaduãcüma rü taãẽãcüma nape̱xewa pengugüxü̃ca̱x i ngextá nüma ínaxüünexü̃wa ãẽ̱xgacü íyixĩxü̃wa. Rü tanaxwa̱xe i tórü Cori ya Ngechuchu ya Cristuégagu Tupanaxü̃ ticua̱xüü̃gü, erü nüma rü naxüüne, rü guxü̃étüwa nangẽxma, rü guxü̃arü yexera napora, rü guxü̃maxã inacua̱x. Rü yemaacü nixĩ ga nũxcüma, rü ngẽmaãcü nixĩ i ñu̱xmax, rü guxü̃gutáma ngẽmaãcü nixĩ. Rü ngẽmaãcü yixĩ.

Ore i mexü̃ ga Matéu ümatüxü̃ 26:41

¡Rü ipedaue rü Tupanana naxca̱x peca nax pexü̃ nangü̃xẽẽxü̃ca̱x nax tama choxü̃ ípetáxü̃ca̱x! Erü aixcüma peãẽwa rü ípememare nax ngúxü̃ pingegüxü̃, natürü pexene rü natura —ñanagürü ga Ngechuchu.

Maraquía 3:2

¿Natürü texé tá namaxã tapora ya yimá Cori i ngẽma ngunexü̃ i nagu ínanguxü̃? ¿Rü texé tá nape̱xegu tachiama? Erü ngẽxguma ínanguxgu rü ñoma wüxi i üxüemaãcü tá ínangu nax yamexẽẽgüãxü̃ca̱x i tórü maxü̃. Rü ñoma wüxi ya chaũrüxü̃ tá inanayi̱xẽxẽ i guxü̃ma i tórü ãũãchixü̃.

1 Tesalonicenses 5:17

¡Rü guxü̃guma peyumüxẽgü!

Ore i mexü̃ ga Márcu ümatüxü̃ 13:37

Rü ngẽma ore i pemaxã nüxü̃ chixuxü̃, rü guxü̃ i duü̃xü̃güca̱x nixĩ. ¡Rü ipedaueecha! —ñanagürü.

Norü taxre ga popera ga Timutéuca̱x naxümatüxü̃ ga Pauru 4:5

¡Natürü cuma rü mea cugüna nadau, rü ínaxuãxẽ! ¡Rü namaxã napora i ngẽxguma ngúxü̃ cuxca̱x ínguxgu! ¡Rü nüxü̃ ixuama i ngẽma ore i mexü̃ i tüxü̃ maxẽxẽxẽxü̃! ¡Rü mea yanguxẽxẽ i ngẽma puracü ya Tupana cuxna ãxü̃!

Colosenses 4:2

¡Rü guxü̃guma peyumüxẽgü! ¡Rü pexuãxẽgü nax tama nüxü̃ iperüngümaexü̃ca̱x nax Tupanana moxẽ pexãgüxü̃!

Ngechuchuarü ngúexü̃gü ga yamugüxü̃arü puracüchiga 10:2

Rü nüma nixĩ ga wüxi ga yatü ga meama Tupanaaxü̃́ yaxõcü. Rü wüxigu naxma̱xmaxã rü naxacügümaxã Tupanaxü̃ nangechaü̃gü. Rü mucüma ga norü diẽrumaxã nüxü̃ narüngü̃xẽxẽ ga duü̃xü̃gü ga Yudíugü ga ingearü diẽruã̱xgüxü̃. Rü guxü̃guma nayumüxẽ rü Tupanamaxã nidexa.

Wiyaegü 1:5

Rü ngẽmaca̱x i ngẽma duü̃xü̃gü i chixexü̃gu maxẽxü̃ rü ngẽxguma Tupana nüxü̃ icagügu, rü taxumaxãtama nügü ínapoxü̃gü i ngẽxguma poxcu namaxã naxuegugu. Rü ngẽma chixexü̃gu maxẽxü̃ rü tá nangechica natanüwa i ngẽma duü̃xü̃gü i Tupanape̱xewa imexü̃.

Yox 27:10

Rü ngẽma duü̃xü̃ i chixexü̃gu maxü̃xü̃, rü tama Tupana ya Guxãétüwa Ngẽxmacügu narüxĩnü, rü bai i ñuxgu namaxã yadexaxü̃ nax norü ngü̃xẽẽca̱x ínaca̱xaxü̃.

Ore i mexü̃ ga Luca ümatüxü̃ 20:35

Natürü ngẽma duü̃xü̃gü i Tupanape̱xewa mexü̃ nax wena namaxẽxü̃ nax daxũguxü̃ i naanewa naxĩxü̃ca̱x rü ngéma rü taxũtáma nixãma̱xgü rü ẽ̱xna nixãtegü.

Yeremía 35:19

rü choma ya Cori ya Guxãétüwa Ngẽxmacü ya Iraétanüxü̃arü Tupana rü pemaxã nüxü̃ chixu rü tagutáma nataxu nax wüxi i nataxa ya Yonadá rü chorü ngü̃xẽẽruxü̃ yixĩxü̃ca̱x” —ñanagürü.

Ore i mexü̃ ga Matéu ümatüxü̃ 8:20

Ngechuchu nanangãxü̃ rü ñanagürü: —Ngowagü rü nüxü̃́ nangẽxma i naxmaü̃gü, rü werigü rü nüxü̃́ nangẽxma i naxchiãü̃gü. Natürü yimá Tupana Nane ya duü̃xü̃xü̃ ixĩcü, rü nataxuma i ta̱xacü i nagu yacuxeruxü̃ —ñanagürü.

Ore i mexü̃ ga Matéu ümatüxü̃ 24:43

¡Rü nagu perüxĩnüe! Rü ngẽxguma chi wüxi i ĩpataarü yora nüxü̃ cua̱xgu nax ta̱xacürü oragu tá ínanguxü̃ i ngĩ́ta̱xaxü̃ rü taxũchima nape. Erü nüxna chi nadau ya napata nax tama ngẽxma naxücuxü̃ca̱x i ngẽma ngĩ́ta̱xaxü̃ nax ta̱xacüca̱x ngéma yangĩ́xü̃ca̱x.

Ore i mexü̃ ga Matéu ümatüxü̃ 24:44

Rü ngẽmaca̱x name nixĩ i pexuãẽgü i pemax. Erü ngẽma ngunexü̃ i tama nagu íperüxĩnüexü̃gu tá nixĩ i ngürüãchi ínanguxü̃ ya Tupana Nane ya duü̃xü̃xü̃ ixĩcü.

Ore i mexü̃ ga Luca ümatüxü̃ 1:19

Rü Chacaríaxü̃ nangãxü̃ ga yema daxũcüã̱x, rü ñanagürü: —Choma nixĩ i Gábi i Tupanaarü puracü chaxüxü̃. Rü nüma nixĩ i núma choxü̃ namuxü̃ nax cumaxã nüxü̃ chixuxü̃ca̱x i ñaa ore i mexü̃.

Ore i mexü̃ ga Luca ümatüxü̃ 21:35

Rü ñoma wüxi ya yüta ya ngürüãchi ta̱xacü iyaxúnerüxü̃ tá nixĩ naxca̱x i guxü̃ma i duü̃xü̃gü i ñoma i naanecüã̱x i ngẽxguma wenaxarü núma chaxũxgu.

2 Corintios 4:14

Rü nüxü̃ tacua̱x rü Tupana ga yuwa Cori ya Ngechuchuxü̃ írüdaxẽẽcü, rü yimátama Tupana tá nixĩ ya wüxigu Ngechuchumaxã yuwa toxü̃ írüdagüxẽẽcü. Rü wüxigu pemaxã tá nügüxü̃tawa toxü̃ nagagüxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 6:17

Erü marü ínangu i ngẽma ngunexü̃ i ãũcümaxü̃ i nagu norü numaxã napoxcuexü̃ i duü̃xü̃gü. ¿Rü texé tá namaxã tapora i ngẽma?” ñanagürügü.

Yema Cuáü̃ nüxü̃ dauxü̃ i yixcüra tá ngupetüxü̃chiga 7:9

Rü yemawena ichadawenü, rü nüxü̃ chadau ga muxũchixü̃ma ga naguxü̃raü̃xü̃ ga nachixü̃anecüã̱x, rü naguxü̃raü̃xü̃ ga duü̃xü̃gütücumü, rü naguxü̃raü̃xü̃ ga ĩanegücüã̱x, rü naguxü̃raü̃xü̃ ga duü̃xü̃gü ga to ga nagawa idexagüxü̃. Rü yema tochicaxü̃pe̱xegu rü gumá Carneruxacüpe̱xegu nachigü. Rü yema nax namuxũchixü̃ rü taxucürüwa texé tayaxugü nax ñuxre yixĩxü̃. Rü naxchiru ga icómüxü̃ rü imáxü̃maxã nixãxchiru. Rü naxme̱xwa nanangegü ga wairaatügü.

Yema Cuáü̃ nüxü̃ dauxü̃ i yixcüra tá ngupetüxü̃chiga 8:2

Rü ñu̱xũchi nüxü̃ chadau ga yema 7 ga Tupanaarü orearü ngeruü̃gü ga daxũcüã̱x ga yexma Tupanape̱xegu chigüxü̃. Rü wüxichigüna nanaxã ga norü cornéta.

Yema Cuáü̃ nüxü̃ dauxü̃ i yixcüra tá ngupetüxü̃chiga 11:4

Rü ngẽma taxre i orearü uruü̃gü nixĩ i norü cua̱xruxü̃ i ngẽma taxre i nanetü i oribugü rü ngẽma taxre i omüarü üruü̃gü i tórü Cori ya ñoma i naanearü yora ixĩcüpe̱xewa ngẽxmagüxü̃.