Ore i mexü̃ ga Luca ümatüxü̃ 21:19 - Tupanaarü Ore

¹⁹ Rü ngẽxguma aixcüma peyaxõgüamagu rü tama choxü̃ ípeta̱xgu, rü tá penayauxgü i maxü̃ i taguma gúxü̃.

Ore i mexü̃ ga Luca ümatüxü̃ 21:19 Referans Kwoze

Popera ga Yudíugü ga yaxõgüxü̃ca̱x ümatüxü̃ 10:36

Rü ngẽma guxchaxü̃gü i pexca̱x íngugüxü̃, rü name nixĩ i yáxna namaxã pexĩnüe nax penaxüxü̃ca̱x i Tupanaarü ngúchaü̃ rü penayaxuxü̃ca̱x i ngẽma ãmare i pemaxã inaxunetaxü̃.

Ore i mexü̃ ga Matéu ümatüxü̃ 10:22

Rü chaugagu tá guxü̃ i duü̃xü̃gü pexchi naxaie. Natürü yíxema aixcüma yaxṍxe rü tama choxü̃ ítáxe, rü yíxema tá tixĩ ya nayaxúxe i maxü̃ i taguma gúxü̃.

Popera ga Chantiágu ümatüxü̃ 1:3

Erü pema nüxü̃ pecua̱x rü ngẽxguma guxchaxü̃maxã perü õxü̃ naxü̱xgu, rü ngẽmawa pengúe nax yáxna namaxã pexĩnüexü̃ca̱x i ngẽma guxchaxü̃gü i pingegüxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 3:10

Cuma rü meama cuyanguxẽxẽ i ngẽma cuxü̃ chamuxü̃ nax aixcüma cuyaxõõmaxü̃ naétüwa i ngẽma guxchaxü̃gü i cuxca̱x ínguxü̃. Rü ngẽmaca̱x tá cuxü̃ íchapoxü̃ nax tama cuxna nanguxü̃ca̱x i ngẽma guxchaxü̃ i taxü̃ i ñoma i naanewa tá ínguxü̃ nax guxü̃ma i ñoma i naanecüã̱x i duü̃xü̃güxü̃ naxüxü̃ca̱x.

Romanos 5:3

Rü ngẽxgumarüxü̃ ta tataãẽgü i woo ngúxü̃ ingegügu. Erü nüxü̃ tacua̱x rü ngẽma ngúxü̃ rü tüxü̃ narüngü̃xẽxẽ nax yexeraãcü iporaexü̃ rü yáxna namaxã ixĩnüexü̃ca̱x.

Romanos 2:7

Rü maxü̃ i taguma guxü̃maxã Tupana tá tüxü̃́ nanaxütanü ya yíxema guxü̃guma mexü̃ taxügüãcüma naxca̱x daugüxe nax Tupana tümamaxã taãẽxü̃ rü naxca̱x daugüxe nax Tupanaxü̃tawa tangugüxü̃.

Wiyaegü 37:7

Rü name nax cungea̱xmarexü̃ nape̱xewa ya Cori ya Tupana. ¡Rü yáxna naxĩnü! Rü nüma rü tá cuxü̃ narüngü̃xẽxẽ. ¡Rü taxṹ i quixãũãchixü̃ ega ngẽma chixexü̃ ügüxü̃ rü namuarü ngẽmaxü̃ã̱xgügu rü mea yaxũxgu i ngẽma nagu naxĩnüexü̃!

Yema Cuáü̃ nüxü̃ dauxü̃ i yixcüra tá ngupetüxü̃chiga 14:12

Rü ngẽmaca̱x ya yíxema Tupanaarü duü̃xü̃gü ixĩgüxe rü mea norü orega ĩnüexe rü name nixĩ nax yáxna namaxã taxĩnüexü̃ i tümaarü guxchaxü̃gü rü Ngechuchuaxü̃́ nax tayaxõgüamaxü̃.

Popera ga Yudíugü ga yaxõgüxü̃ca̱x ümatüxü̃ 6:11

Rü wüxichigü i pema rü tanaxwa̱xe i ngẽmaãcü noxrirüxü̃ mexü̃ i perü ngúchaü̃maxã nüxü̃ perüngü̃xẽẽgüecha i taenexẽgü ñu̱xmatáta penayauxgü i ngẽma maxü̃ i ípenangu̱xẽẽgüxü̃.

1 Tesalonicenses 1:3

Rü guxü̃guma i ngẽxguma Tanatü ya Tupanamaxã tidexagügu, rü nüxna tacua̱xãchie nax aixcüma mea peyaxõgüãcüma penaxüxü̃ i Tupanaarü puracü, rü nüxü̃ pengechaü̃güãcüma togüxü̃ perüngü̃xẽẽxü̃. Rü mea ípenangu̱xẽẽxü̃ ya tórü Cori ya Ngechuchu ya Cristu rü ngẽmaca̱x yáxna namaxã pexĩnüe i ngẽma ngúxü̃ i ñu̱xma pingegüxü̃.

Ore i mexü̃ ga Matéu ümatüxü̃ 24:13

Natürü yíxema naétüwa mea Tupanaaxü̃́ yaxõõmáxẽ rü yíxema tá tixĩ ya aixcüma nayaxúxe i maxü̃ i taguma gúxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 1:9

Rü choma i Cuáü̃ rü peenexẽ chixĩ. Rü ñu̱xma nax Ngechuchuarü duü̃xü̃ chixĩxü̃ rü pexrüxü̃ chaxãchica i Tupana ãẽ̱xgacü íyixĩxü̃wa. Rü Ngechuchuca̱x pexrüxü̃ ngúxü̃ chinge, natürü nüma pexü̃ naporaexẽẽxü̃rüxü̃ choxü̃ naporaxẽxẽ nax yáxna namaxã chaxĩnüxü̃ca̱x i guxü̃ma i ngẽma ngúxü̃ i chingexü̃. Rü choma rü capaxũ ga Pátmugu chapoxcu naxca̱x nax nüxü̃ chixuxü̃ ga Tupanaarü ore ga Ngechuchuchiga.

Popera ga Yudíugü ga yaxõgüxü̃ca̱x ümatüxü̃ 6:15

Rü Abraáü̃ rü meama ínanangu̱xẽxẽ ga gumá nane ga Tupana namaxã ixunetacü. Rü yemaca̱x nabu ga gumá nane ga Ichaá ga Tupana namaxã nüxü̃ ixucü.

2 Tesalonicenses 3:5

Rü tanaxwa̱xe i tórü Cori ya Ngechuchu pexü̃ narüngü̃xẽxẽ nax pegü pengechaü̃güxü̃ca̱x, ngẽma Tupana tüxü̃ ngechaü̃xü̃rüxü̃. Rü naxca̱x ítaca nax pexü̃ naporaexẽẽxü̃ca̱x nax Cristurüxü̃ namaxã peporaexü̃ca̱x i ngẽma ngúxü̃gü i pexca̱x íngugüxü̃.

Romanos 8:25

Natürü ngẽxguma tauta nüxü̃ idaugügu i ngẽma írüngu̱xẽẽgüxü̃, rü name nax mea ínangu̱xẽẽgüxü̃ ñu̱xmata nüxü̃ idaugü woo ngúxü̃ ingegügu.

Ore i mexü̃ ga Luca ümatüxü̃ 8:15

Natürü gumá triguchire ga mexü̃ ga waixü̃mügu yixü̃ne, rü ngẽma nixĩ i duü̃xü̃gü i aixcüma taãẽãcü nayauxgüxü̃ i Tupanaarü ore, rü naga ĩnüexü̃, rü mea naxca̱x maxẽxü̃. Rü ngẽma nixĩ i duü̃xü̃gü i aixcüma Tupanawe rüxĩxü̃ rü naxügüxü̃ i ngẽma nüma nanaxwa̱xexü̃.

Wiyaegü 40:1

Choma rü íchananguxẽxẽ nax choxü̃ nangü̃xẽẽxü̃ca̱x ga Cori ya Tupana. Rü nüma rü nüxü̃ naxĩnü ga chorü yumüxẽ.

Romanos 15:4

Rü guxü̃ma ga yema nũxcüma ümatüxü̃ ga Tupanaarü orewa, rü naxümatü nax tüxü̃ nangu̱xẽẽxü̃ca̱x nax taguma nüxü̃ rüxoexü̃ ega woo ta̱xacürü guxchaxü̃ taxca̱x ínguxgu. Rü yema Tupanaarü ore rü naxümatü nax tüxü̃ nataãẽxẽẽxü̃ca̱x rü tüxü̃ nüxü̃ nacua̱xẽẽxü̃ca̱x nax aixcüma Tupanaarü ixĩgüxü̃.

Abacú 3:16

Rü yexguma nüxü̃ chaxĩnügu ga yema ãũcümaxü̃ i tá cuxüxü̃ rü chamuü̃, rü poraãcü chidu̱xruchicüra. Rü taxucürüwa ichachi rü guxü̃ma i chauxune rü ínayaturaãchi. Natürü woo ngẽmaãcü nax yixĩxü̃ rü mea tá íchananguxẽxẽ i ngẽma ngunexü̃ ya Tupana tá nagu guxchaxü̃ naxca̱x íngu̱xẽẽxü̃ i ngẽma churaragü i chixexü̃ tamaxã ügüxü̃.

Romanos 5:4

Rü ngẽxguma yáxna namaxã ixĩnüegu i ngẽma ngúxü̃ rü Tupana rü tamaxã nataãxẽ. Rü ngẽma nax tamaxã nataãẽxü̃ rü ngẽmaca̱x mea ítanangu̱xẽxẽ nax tüxü̃́ tá nangẽxmaxü̃ i tachica i mexü̃ i Tupanaxü̃tawa.

Popera ga Chantiágu ümatüxü̃ 1:4

Rü ngẽma nax yáxna namaxã pexĩnüexü̃ i guxchaxü̃gü rü wüxi i perü poraxẽẽruxü̃ nixĩ nax mea Tupanaga pexĩnüexü̃ca̱x, rü norü orearü cua̱xwa pengugüxü̃ca̱x, rü taxuwama nachixexü̃ca̱x i perü maxü̃.

Norü taxre ga popera ga Pedru ümatüxü̃ 1:6

Rü ngẽma cua̱xétüwa penaxwa̱xe nax wüxichigü mea tügümaxã itacuáxü̃. Rü ngẽma nax mea tügümaxã itacuáxü̃étüwa penaxwa̱xe nax yáxna pexĩnüexü̃. Rü ngẽma nax yáxna pexĩnüexü̃étüwa penaxwa̱xe nax Tupanaga pexĩnüexü̃.