Ore i mexü̃ ga Luca ümatüxü̃ 2:4 - Tupanaarü Ore

^4-5 Rü yemaca̱x ga Yúche rü Gariréaanewa yexmane ga ĩane ga Nacharétuwa inaxũãchi, rü Yudéaanewa yexmane ga ĩane ga Beréü̃wa naxũ. Rü gumá nixĩ ga ĩane ga nũxcümaü̃cü ga ãẽ̱xgacü ga Dabí nagu buxü̃ne. Rü nüma ga Yúche rü Dabítanüxü̃ nixĩ rü yemaca̱x Beréü̃wa naxũ nax yaxugüxü̃ca̱x wüxigu ngĩmaxã ga María ga ngĩmaxã naxãxma̱xchaü̃cü. Natürü ga María rü itacharaü̃ nax naxãxacüxü̃.

Ore i mexü̃ ga Luca ümatüxü̃ 2:4 Referans Kwoze

Miquéa 5:2

Rü cumax, Pa Beréü̃ i Efráta, rü woo wüxi ya ĩane ya íxrane quixĩ natanüwa ya guxü̃nema ya Yudáanecüã̱x ya ĩanegü, natürü cugu tá nixĩ i nabuxü̃ ya yimá Iraéanecüã̱xgüarü ãẽ̱xgacü ya woetama marü ngẽxmaechacü.

Ore i mexü̃ ga Cuáü̃ ümatüxü̃ 7:42

Erü Tupanaarü ore i ümatüxü̃wa rü ñanagürü: “Cristu rü tá Dabítaxa nixĩ, rü tá nango̱x nawa ya yima ĩane ya Beréü̃ ga Dabí íbuxü̃wa”, —ñanagürügü.

1 Chamué 16:1

Rü yemawena ga Tupana rü Chamuéxü̃ ñanagürü: —Marütama nax Chaúca̱x nax cungechaü̃echaxü̃, erü marü tama chanaxwa̱xe nax Iraéanecüã̱xgüarü ãẽ̱xgacü nax yixĩxü̃. ¡Rü wüxi i carnéruchatacu̱xre nayaxu rü oribuarü chíxü̃maxã naxüãcu! ¡Rü Beréü̃wa naxũ rü ngẽxma naxca̱x yadau ya wüxi ya yatü ya Ichaxígu ãégacü! Erü wüxi ya nanexü̃ chayaxu nax Iraéanecüã̱xgüarü ãẽ̱xgacü yixĩxü̃ca̱x —ñanagürü.

Ore i mexü̃ ga Luca ümatüxü̃ 4:16

Rü Nacharétuwa naxũ ga Ngechuchu. Rü gumá nixĩ ga ĩane ga nanatü rü naé nawa nayaxẽẽgüne. Rü ngü̃xchigaarü ngunexü̃gu rü ngutaque̱xepataü̃gu naxücu, yerü yema nixĩ ga nacüma ga guxü̃ ga ngü̃xchigaarü ngunexü̃gu. Rü yéma inachi rü duü̃xü̃güca̱x nüxü̃ nadaumatü ga Tupanaarü ore ga ümatüxü̃.

Ore i mexü̃ ga Matéu ümatüxü̃ 2:23

Rü yexguma Gariréaanewa nanguxgu, rü ĩane ga Nacharétuwa naxũ. Rü yexma naxãchiü̃ nax yanguxü̃ca̱x ga yema ore ga nũxcümaü̃güxü̃ ga Tupanaarü orearü uruü̃gü nüxü̃ ixugüxü̃ ga ñaxü̃: “Ngechuchu ya Cristu rü Nacharétucüã̱xmaxã tá nanaxugü”, ñaxü̃.

Rux 4:17

Rü yemaxü̃ nadaugügu ga yema togü ga ngexü̃gü ga ngĩrü ngaicamagu ãchiü̃güxü̃ rü ngĩgürügü: —Wüxi ya ngĩtaxa ngĩxü̃́ nabu i Noemí —ngĩgürügügü. Rü Obéxgu inaxüégagü. Rü gumá Obéx nixĩ ga Ichaxí nanatü rü ãẽ̱xgacü ga Dabíarü o̱xi ixĩcü.

Rux 4:11

Rü nüma ga yema ãẽ̱xgacügü rü guxü̃ma ga yema duü̃xü̃gü ga yéma irüdaunüxü̃ rü nanangãxü̃ga rü ñanagürügü: —Aixcüma toma nixĩ i nua itarüdaunüxü̃ rü itarüxĩnüexü̃. Rü nüma ya Tupana i ñu̱xma cuxna imucü i ñaa nge, rü tanaxwa̱xe i ngĩxü̃ narüngü̃xẽxẽ nax naxãxacüxü̃ca̱x ngĩxrüxü̃ ga Raqué rü Léa ga ngĩwa ne ixĩcü i guxãma i yixema i Iraétanüxü̃. Rü cumax, Pa Boóx ¡rü Tupana cuxü̃ rüngü̃xẽxẽ nax wüxi ya yatü ya duü̃xü̃güpe̱xewa mecü quixĩxü̃ i nua Beréü̃wa i Efrátawa!

Rux 2:4

Rü yexguma Rux yéma yexmayane rü nüma ga Boó rü ínangu ga Beréü̃wa nax ne naxũxü̃, rü yema naanewa ínayadau. Rü yema buxetatanüxü̃xü̃ narümoxẽ rü ñanagürü: —¡Cori ya Tupana pexü̃tawa ngexma̱x! —ñanagürü. Rü nüma ga buxetatanüxü̃ rü nanangãxü̃gagü rü ñanagürügü: —¡Cori ya Tupana cuxü̃ rüngü̃xẽxẽ̱x! —ñanagürügü.

Ore i mexü̃ ga Cuáü̃ ümatüxü̃ 1:46

Rü ñanagürü ga Natanaé: —¿Ñuxãcü i ta̱xacürü mexü̃ i Nacharétuwa ne ũxü̃? —ñanagürü. Rü Ferípe nanangãxü̃, rü ñanagürü nüxü̃: —¡Dücax, ngĩxã rü ítayadau! —ñanagürü.

1 Chamué 17:58

Rü nüma ga Chaú rü nüxna naca rü ñanagürü: —Pa Ngextü̱xücüx ¡chomaxã nüxü̃ ixu rü texé nane quixĩxü̃! —ñanagürü. Rü nüma ga Dabí nanangãxü̃ rü ñanagürü: —Choma rü yimá curü duü̃ ya Ichaxí ya Beréü̃cüã̱x nane chixĩ —ñanagürü.

1 Chamué 17:12

Rü nayexma ga wüxi ga yatü ga Beréü̃cüã̱x ixĩcü rü Ichaxí nixĩ ga naéga. Rü nüma rü marü naya ga yexguma Chaú ãẽ̱xgacü ixĩxgu. Rü nüma ga Ichaxí rü nüxü̃́ nayexma ga 8 ga nanegü, rü wüxi ga nane rü Dabí nixĩ.

1 Chamué 16:4

Rü nüma ga Chamué rü nanaxü ga yema Tupana namaxã nüxü̃ ixuxü̃. Rü yexguma Beréü̃wa nanguxgu, rü guma ĩanearü ãẽ̱xgacügü rü namuü̃eãcüma nanayauxgü. Rü nüxna nacagüe rü ñanagürügü: —¿Ta̱xacüwa nua cuxũ? ¿Ẽ̱xna ngüxmüxẽxẽwa nua cuxũ? —ñanagürügü.

Rux 1:19

Rü yemaacü ga yema taxre rü ngĩgümaxã namagu ixĩ, rü ñu̱xmata Beréü̃wa nangugü. Rü yexguma Beréü̃gu nachocuxgu, rü guxü̃ma ga yema duü̃xü̃gü rü naba̱i̱xãchiãẽgü. Rü yema ĩanecüã̱x ga ngexü̃gü rü ngĩgürügügü: —¿Tama ẽ̱xna ñaa iyixĩ i Noemí? —ngĩgürügügü.

Naanearü ügüchiga 48:7

Rü guxema cué ga Raqué rü namagu choxna tayayu ga yexguma Padáü̃-aráü̃wa chataegugu. Rü ĩane ga Efrátaarü ngaicamagu nixĩ ga choxna tayuxü̃ ga Canaáü̃anewa. Rü yexma namagu nixĩ ga ngĩxü̃ chatáxü̃. Rü yima ĩane ya Efrátatama nixĩ i ñu̱xmax i Beréü̃gu ãégane —ñanagürü.

Naanearü ügüchiga 35:19

Rü yemaacü nixĩ ga nayuxü̃ ga Raqué. Rü yema nama ga Efrátawa nadaxü̃gu ngĩxü̃ nata̱xgü. Rü guma ĩane ga Efráta rü ñu̱xma rü Beréü̃gu naxãéga.

Ore i mexü̃ ga Matéu ümatüxü̃ 1:20

Rü yexguma yemagu ínaxĩnüyane, rü wüxi ga daxũcüã̱x ga Tupanaarü orearü ngeruxü̃, rü nanegüwa naxca̱x nango̱x rü namaxã nidexa. Rü ñanagürü nüxü̃: —Pa Yúche Pa Dabítanüxü̃x, ¡taxṹ i ngĩxü̃ cuxoxü̃ i María nax ngĩmaxã cuxãmaxü̃! Erü Tupanaãxẽ ya Üünecü ngĩxna nangu rü ngẽmaca̱x nixĩ i naxãxacüxü̃.

Ore i mexü̃ ga Luca ümatüxü̃ 2:3

Rü guxü̃ma ga duü̃xü̃gü rü norü ĩane ga nagu nabuxü̃newa nixĩchigü nax yéma yaxugüãxü̃ca̱x.