Ore i mexü̃ ga Luca ümatüxü̃ 2:10 - Tupanaarü Ore

¹⁰ Natürü yema orearü ngeruxü̃ ga daxũcüã̱x, rü ñanagürü nüxü̃: —¡Taxṹ i pemuü̃exü̃! Erü pexca̱x nua chanange i wüxi i ore i taãẽxẽẽruxü̃ i guxü̃ i duü̃xü̃güca̱x ixĩxü̃.

Ore i mexü̃ ga Luca ümatüxü̃ 2:10 Referans Kwoze

Ichaía 40:9

Rü ngẽma naga rü ñanagürü: —¡Pa Chióü̃x, wüxi ya ma̱xpǘnechitaerugu naxĩnagü rü tagaãcü naxunagü i ñaa ore i mexü̃! ¡Rü cuma, Pa Yerucharéü̃x, rü tama cumuü̃ãcüma rü tagaãcüma Yudáanearü ĩanegücüã̱xmaxã nüxü̃ ixu i ñaa ore i ñaxü̃: “Nanuxma ya yimá perü Cori ya Tupana”, ñaxü̃! —ñanagürü.

Ichaía 61:1

Tupanaãxẽ i Üünexü̃ rü chowa nangẽxma, erü Tupana rü choxü̃ naxuneta rü choxü̃ inamuãchi nax yíxema ngearü diẽruã̱xgüxemaxã nüxü̃ chixuxü̃ca̱x i mexü̃ i ore rü tüxü̃ chataãẽxẽẽgüxü̃ca̱x ya yíxema naxĩ̱xãchiãẽgüxe. Rü choxü̃ naxuneta nax yíxema to i nachixü̃anewa gagüxemaxã nüxü̃ chixuxü̃ca̱x nax paxa tá ítanguxü̃xü̃ rü yíxema poxcupataxü̃wa ngẽxmagüxe rü tá ta ítanguxü̃xü̃

Ichaía 52:7

Rü wüxi i taãxẽ nixĩ nax ma̱xpǘneanewa taxca̱x ne naxũxü̃ ya yimá orearü ngeruxü̃ i mexü̃ i ore taxca̱x nua ngecü rü tamaxã nüxü̃ ixucü nax Tupana tá tüxü̃ rüngü̃xẽẽxü̃ rü tüxü̃ ínanguxü̃xẽẽxü̃ naxme̱xwa i tórü uanü. Rü wüxi i taãxẽ tá nixĩ i ngẽxguma Chióü̃cüã̱xgüxü̃ ñaxgu: —Perü Tupana rü marü pemaxã inacua̱x —ñaxgu.

Ore i mexü̃ ga Matéu ümatüxü̃ 28:18

Rü yexguma ga Ngechuchu rü naxca̱x nixũ, rü ñanagürü nüxü̃: —Tupana rü guxü̃ma i pora choxna naxã nax daxũguxü̃ i naanemaxã rü ñoma i naanemaxã ichacuáxü̃ca̱x.

Naanearü ügüchiga 12:3

Rü mexü̃ namaxã tá chaxuegu i ngẽma duü̃xü̃gü i mexü̃ cumaxã uegugüxü̃. Rü chixexü̃ tá namaxã chaxuegu i ngẽma duü̃xü̃gü i chixexü̃ cumaxã uegugüxü̃. Rü cugagu tá nixĩ i mexü̃ namaxã chaxueguxü̃ i guxü̃ma i duü̃xü̃gü i ñoma i naanewa ngẽxmagüxü̃ —ñanagürü.

Ore i mexü̃ ga Matéu ümatüxü̃ 14:27

Natürü ga Ngechuchu rü namaxã nidexa rü ñanagürü nüxü̃: —¡Peporae! rü choma chixĩ. ¡Rü taxṹ i pemuü̃exü̃! —ñanagürü.

Ore i mexü̃ ga Luca ümatüxü̃ 1:30

Rü yexguma ga Gábi rü ñanagürü ngĩxü̃: —Pa Maríax, ¡taxṹ i cumuü̃xü̃! Erü Tupana rü poraãcü cumaxã nataãxẽ.

Ichaía 41:27

Rü chomatama nixĩ ga noxriarü ügügu Chióü̃maxã nüxü̃ chixuxü̃, rü Yerucharéü̃wa chanamuxü̃ ga wüxi ga orearü uruxü̃ nax natanüxü̃maxã nüxü̃ yanaxuxü̃ca̱x nax paxatáma nawoeguxü̃ ga yema namücügü ga to ga nachixü̃anewa yexmagüxü̃.

Colosenses 1:23

Natürü ngéma nax pengugüxü̃ca̱x, rü penaxwa̱xe nax guxü̃guma aixcüma peyaxõgüxü̃ rü taguma nüxü̃ perüxoexü̃ i ngẽma ore i mexü̃ ga marü nüxü̃ pexĩnüexü̃ nachiga i ngẽma maxü̃ i ípenangu̱xẽẽxü̃. Rü ngẽmatama ore nixĩ i ñu̱xma gúxü̃ i naanewa nüxü̃ yaxugüexü̃, rü choma i Pauru nixĩ i nawa chapuracüxü̃ nax nüxü̃ chixuxü̃ca̱x i ngẽma ore.

Ngechuchuarü ngúexü̃gü ga yamugüxü̃arü puracüchiga 13:32

Rü ngẽmaãcü i toma rü núma tangugü nax pemaxã nüxü̃ tixuxü̃ca̱x i ngẽma ore i aixcüma mexü̃. Rü dücax, rü yema uneta ga nũxcümaü̃güxü̃ ga tórü o̱xigümaxã nüxü̃ yaxuxü̃ ga Tupana, rü taxca̱x nayanguxẽxẽ ga yexguma Ngechuchuxü̃ wena namaxẽẽgu. Rü wiyaegüpanewa i norü taxre i capíturuwa rü ngẽmachiga nüxü̃ nixu i ngẽxguma: “Cuma nixĩ i Chaune, rü choma nixĩ i Cunatü chixĩxü̃”, ñaxgu.

Ore i mexü̃ ga Luca ümatüxü̃ 24:47

Rü yematama ore i ümatüxü̃wa nüxü̃ nixu rü yimá Cristuégagu tá nixĩ i nüxü̃ yaxugüxü̃ i ore i mexü̃. Rü Yerucharéü̃wa tá inaxügü i ngẽma ñu̱xmatáta guxü̃ i naanewa nangu nax ngẽmaãcü duü̃xü̃gü nüxü̃ rüxoexü̃ca̱x i nacüma i chixexü̃ nax Tupana nüxü̃́ nüxü̃ rüngü̃maxü̃ca̱x i norü pecadugü.

Ore i mexü̃ ga Luca ümatüxü̃ 8:1

Rü yemawena ga Ngechuchu rü Gariréaanearü ĩanegügu nixũãgüchigü. Rü duü̃xü̃gümaxã nüxü̃ nixuchigü ga Tupanaarü ore nax ñuxãcü ãẽ̱xgacü yixĩxü̃ ya Tupana. Rü ínayaxümücügü ga yema 12 ga norü ngúexü̃gü.

Efesios 3:8

Rü chaugüca̱x rü choma nixĩ i guxü̃ i Tupanaarü duü̃xü̃güarü ñaxtüwaama chaxüxü̃. Natürü Tupana choxü̃ nangechaü̃ rü choxna nanaxã i ngẽma puracü i mexü̃ nax ngẽma tama Yudíugü ixĩgüxü̃maxã nüxü̃ chixuxü̃ca̱x ga yema mexü̃gü ga taguma iyagúxü̃ ga taxca̱x naxüxü̃ ga Cristu.

Ore i mexü̃ ga Luca ümatüxü̃ 1:19

Rü Chacaríaxü̃ nangãxü̃ ga yema daxũcüã̱x, rü ñanagürü: —Choma nixĩ i Gábi i Tupanaarü puracü chaxüxü̃. Rü nüma nixĩ i núma choxü̃ namuxü̃ nax cumaxã nüxü̃ chixuxü̃ca̱x i ñaa ore i mexü̃.

Chacaría 9:9

¡Rü poraãcü petaãẽgü, Pa Chióü̃cüã̱xgü! ¡Rü perü taãẽmaxã pewiyaegü, Pa Yerucharéü̃cüã̱xgüx! Erü pexca̱x tá ínangu ya perü ãẽ̱xgacü ya poracü ya mea pemaxã icuácü. Natürü i nüma rü tama nügü yacua̱xüxü̃ãcüma ínangu. Rü wüxi i búruxacüétügumare ínangu.

Ore i mexü̃ ga Luca ümatüxü̃ 1:13

Natürü yema daxũcüã̱x ga Tupanaarü orearü ngeruxü̃ rü ñanagürü nüxü̃: —Pa Chacaríax, ¡taxṹ i cumuü̃xü̃! Erü Tupana rü marü nüxü̃ naxĩnü i curü yumüxẽ. Rü cuxma̱x i Erichabé rü cuxü̃́ tá ixãxãcü, rü Cuáü̃gu tá cunaxüéga.

Ore i mexü̃ ga Márcu ümatüxü̃ 1:15

Rü ñanagürü: —Marü nawa nangu i ngunexü̃ ga Tupana nagu unetaxü̃. Rü marü pexna nangaicama nax perü ãẽ̱xgacü yixĩxü̃. ¡Rü nüxü̃ perüxoe i pecüma i chixexü̃ rü peyaxõgü i norü ore i mexü̃! —ñanagürü.

Ichaía 49:6

Rü nüma ya Tupana rü ñanagürü: —Choma rü cuxü̃ chamu nax cunanutaque̱xexü̃ca̱x i Acóbuarü duü̃xü̃gü rü nachixü̃aneca̱x cunawoeguxẽẽxü̃ca̱x i ngẽma Iraétanüxü̃. Rü naétü cuxü̃ chamu nax wüxi i omü quixĩxü̃ca̱x naxca̱x i guxü̃ma i nachixü̃anegü. Rü cuxü̃ chamu nax nüxü̃ nüxü̃ cucua̱xẽẽxü̃ca̱x i chorü ore i maxü̃ nüxna ãxü̃ i guxü̃ma i nachixü̃anecüã̱x woo ngẽma yáxü̃wa ngẽxmagüxü̃ —ñanagürü.

Romanos 10:15

¿Rü ñuxãcü tá texé nüxü̃ tixu i Cristuchiga ega taxúema tüxü̃ nüxü̃ yarüxuxẽẽgu? Rü ngẽmaca̱x nixĩ i Tupanaarü ore i ümatüxü̃ i ñaxü̃: “Wüxi i taãxẽ nixĩ nax ínangugüxü̃ i ngẽma Tupanaarü orearü uruü̃gü nax duü̃xü̃gümaxã nüxü̃ yanaxugüxü̃ i ngẽma ore i mexü̃ i Cristuchiga”, ñaxü̃.

Ore i mexü̃ ga Márcu ümatüxü̃ 16:15

Rü ñanagürü nüxü̃: —¡Guxü̃ i naanewa pexĩ rü guxü̃ i duü̃xü̃gümaxã nüxü̃ peyarüxu i ore i mexü̃!

Ore i mexü̃ ga Matéu ümatüxü̃ 28:5

Rü yexguma ga yema orearü ngeruxü̃, rü ñanagürü ngĩxü̃ ga yema ngecügü: —¡Taxṹ i pemuü̃exü̃! Choma nüxü̃ chacua̱x rü naxca̱x pedaugü ya Ngechuchu ga gumá curuchawa yapotagüãcü.

Ichaía 52:10

Rü Tupana rü guxü̃ i nachixü̃anegüxü̃ nanawe̱x i norü pora. Rü guxü̃ i nachixü̃anegüwa tá nüxü̃ nacua̱xgü nax tórü Tupana tüxü̃ ínguxü̃xẽẽxü̃.

Ore i mexü̃ ga Luca ümatüxü̃ 2:11

Erü ñu̱xma rü Dabíarü ĩane ya Beréü̃gu nabu ya wüxi ya maxẽxẽẽruxü̃. Rü nüma rü Cori ya Cristu nixĩ.