Ore i mexü̃ ga Luca ümatüxü̃ 16:15 - Tupanaarü Ore

¹⁵ Rü yexguma ga Ngechuchu rü ñanagürü nüxü̃: —Pema rü duü̃xü̃güpe̱xewa mea pemaxẽneta, natürü Tupana pexü̃ nacua̱x nax ta̱xacügu perüxĩnüexü̃. Rü woo duü̃xü̃gü pexü̃ nicua̱xüü̃gü naxca̱x i ngẽma pexüxü̃, natürü Tupana rü naãxẽwa nangu̱x i ngẽma —ñanagürü ga Ngechuchu.

Ore i mexü̃ ga Luca ümatüxü̃ 16:15 Referans Kwoze

1 Chamué 16:7

Natürü ga Tupana rü Chamuéxü̃ ñanagürü: —Tama name i norü düxétümarewa rü norü máchanemarewa nax cungugüxü̃ ya wüxi ya yatü. Tama daa nixĩ. Choma rü tama duü̃xü̃gü nangugüxü̃ãcüma chanayaxu ya wüxi ya yatü. Duü̃xü̃gü rü ngẽma düxétüxü̃nemare nixĩ i nangugügüxü̃, natürü i choma rü ngẽma norü maxü̃ rü norü ĩnü nixĩ i ngẽma changugüxü̃ —ñanagürü.

Ucu̱xẽgüchiga 21:2

Wüxichigü ya yatü, rü naxca̱x name i guxü̃ma i ngẽma naxüxü̃, natürü nüma ya Cori ya Tupana nixĩ i nangugüxü̃ i norü ĩnü i wüxichigü i duü̃xü̃.

1 Corintios 4:5

Rü ngẽmaca̱x tama name nax yaxtacüma texéxü̃ pengugüarü maxü̃ã́xü̃. Natürü name nixĩ i ípenangu̱xẽxẽ nax núma naxũxü̃ ya tórü Cori. Rü nüma tá nixĩ i nango̱xẽẽãxü̃ i guxü̃ma i ngẽma ñu̱xma icúxü̃ rü guxü̃ma i ngẽma duü̃xü̃gü naãẽwa nagu rüxĩnüexü̃. Rü ngẽxguma tá nixĩ ya Tupana i tüxü̃ yacua̱xüxü̃ ya wüxichigü ya yíxema aixcüma mexü̃ ügüxe.

Yeremía 17:10

Rü choma ya Tupanaxicatama nixĩ i aixcüma chanangugüxü̃ i norü ĩnü i wüxichigü i duü̃xü̃, rü chaxicatama nixĩ i nüxü̃ chacuáxü̃ nax ta̱xacügu naxĩnüxü̃. Rü ngẽma tamaxü̃xü̃ãcütama tá tüxü̃́ chanaxütanü ya wüxíechigü —ñanagürü.

Ucu̱xẽgüchiga 16:5

Nüma ya Cori ya Tupana tama namaxã nataãxẽ i ngẽma nügü icua̱xüü̃güxü̃. Nümagü rü aixcüma tá nüxü̃́ nangẽxma i norü poxcu naxca̱x i ngẽma naxügüxü̃.

Ngechuchuarü ngúexü̃gü ga yamugüxü̃arü puracüchiga 15:8

Rü yimá Tupana ya guxãarü maxü̃xü̃ cuácü rü tüxü̃ nüxü̃ nadauxẽxẽ nax nadeaxü̃ i ngẽma duü̃xü̃gü i tama Yudíugü ixĩgüxü̃, yerü nüxna nanamu ga Naãxẽ ya Üünecü yema tüxna namuaxü̃rüxü̃.

Nüxíraxü̃xü̃ ga popera ga Pedru ümatüxü̃ 3:4

Natürü name nixĩ i perü maxü̃wa pegü pimexẽxẽgü rü guxü̃ma i duü̃xü̃gümaxã pimecümagü rü taguma texémaxã penuãẽgü, erü ngẽma nixĩ i perü mexü̃ i taguma iyarüxoxü̃ i aixcüma mexü̃ i Tupanape̱xewa.

Ore i mexü̃ ga Luca ümatüxü̃ 11:39

Natürü nüma ga Cori ga Ngechuchu rü ñanagürü nüxü̃: —Pema i Parichéugü rü ñoma pochíyu rü poratu i düxétüwaxicatama iyaxuxü̃rüxü̃ pixĩgü. Natürü perü ĩnüwa rü ngĩ̱xgu rü chixexü̃gu perüxĩnüe.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 29:17

Pa Chorü Tupanax, choma nüxü̃ chacua̱x nax guxü̃guma mea cunangugüxü̃ i torü ĩnü rü namaxã cutaãẽxü̃ nax tixaixcümagüxü̃. Rü ngẽmaca̱x aixcüma mexü̃gu charüxĩnüãcüma chorü ngúchaü̃maxã cuxna chanana i guxü̃ma i ñaa ãmaregü. Rü ñu̱xma rü chataãxẽ erü nüxü̃ chadau i ñaa curü duü̃xü̃gü i nuxã ngutaque̱xexü̃ rü guxü̃ma i norü ngúchaü̃maxã cuxna nanana i ngẽma norü ãmaregü.

Ore i mexü̃ ga Luca ümatüxü̃ 10:29

Natürü ga yema ngúexẽẽruxü̃ ga Moichéarü mugüwa ngu̱xẽẽtaexü̃, rü nügüétüwa nachogüchaü̃. Rü yemaca̱x Ngechuchuna naca, rü ñanagürü: —¿Rü texé tixĩ ya chomücü? —ñanagürü.

Yema Cuáü̃ nüxü̃ dauxü̃ i yixcüra tá ngupetüxü̃chiga 2:23

Rü ngẽmawa guxü̃ma i ngẽma yaxõgüxü̃ tá nüxü̃ nacua̱xgü nax aixcüma nüxü̃ chacuáxü̃ i norü maxü̃ rü ngẽma naãxẽwa nagu naxĩnüexü̃. Rü wüxichigü i pemax rü tá pexü̃́ chanaxütanü ngẽxgumarüxü̃ nax ñuxãcü cha̱u̱xca̱x pemaxẽxü̃.

Nüxíraxü̃xü̃ ga popera ga Pedru ümatüxü̃ 5:5

Rü ngẽxgumarüxü̃ ta i pemax, Pa Ngextü̱xücügüx, rü name nixĩ i naga pexĩnüe i ngẽma perü ãẽ̱xgacügü i Tupanaarü puracümaxã icua̱xgüxü̃. Rü guxãma i pema i yaxõgüxü̃, rü name nixĩ i wüxichigü mea pegüga pexĩnüe rü tama pegügu perüxĩnüe nax pemücügüarü yexera pixĩgüxü̃. Erü Tupanaarü ore i ümatüxü̃wa rü ñanagürü: “Tupana rü tama norü me nixĩ i ngẽma duü̃xü̃gü i nügü icua̱xüxü̃güxü̃. Natürü nüxü̃ narüngü̃xẽxẽ rü namaxã namecüma i ngẽma duü̃xü̃gü i tama nügü icua̱xüxü̃güxü̃”, ñanagürü i ngẽma ore.

Romanos 3:20

Rü ñu̱xma nax taxúema aixcüma naga ĩnüexü̃ i ngẽma mugü, rü ngẽmaca̱x taxucürüwama texé tügü tixu nax ngẽma mugü taxaurexü̃gagu Tupanape̱xewa tamexü̃. Erü ngẽma mugü tüxü̃ nüxü̃ cua̱xẽẽxü̃ nixĩ nax ipecaduã̱xgüxü̃.

Ore i mexü̃ ga Cuáü̃ ümatüxü̃ 2:25

Rü yemaca̱x ga nüma rü taxuca̱xma texé namaxã nüxü̃ tixu nax ta̱xacügu naxĩnüexü̃ ga yema duü̃xü̃gü. Yerü nümatama marü nüxü̃ nacua̱x nax ta̱xacügu naxĩnüexü̃ ga naãxẽwa ga wüxichigü.

Ore i mexü̃ ga Matéu ümatüxü̃ 23:5

Rü nümagü rü mea namaeneta, rü guxü̃ma i ngẽma naxügüxü̃, rü nanaxügü nax duü̃xü̃gü nüxü̃ daugüxü̃ca̱x. Rü nacatüwa rü nachacüügüwa nayana̱i̱xcuchigü i Tupanaarü ore i ãxchiü̃xü̃. Rü naxchirupechinüwa nanapaicu i bopü̱xüxü̃ i ngã̱xãẽruü̃gü.

Ore i mexü̃ ga Luca ümatüxü̃ 18:21

Rü yexguma ga gumá yatü rü ñanagürü: —Woetama chorü bucüma meama chayanguxẽxẽ i guxü̃ma i ngẽma mugü i nüxü̃ quixuxü̃ —ñanagürü.

Ucu̱xẽgüchiga 20:6

Nangexma i muxü̃ma i duü̃xü̃gü i nügü ixugüxü̃ nax mexü̃gü yixĩgüxü̃, natürü bai i wüxi ingẽxmaxü̃ i nüxna rüyoexü̃.

Ore i mexü̃ ga Luca ümatüxü̃ 18:11

Rü yema Parichéu rü yexma nachi, rü ñaaãcü nayumüxẽ: “Pa Tupanax, moxẽ cuxna chaxã erü tama togürüxü̃ chixexü̃ chaxü, rü tama ngẽmagürüxü̃ changĩ́ta̱a̱x, rü tama chixri chamaxü̃, rü tama nai i ngexü̃maxã ichape. Rü bai i ñaa yatü i Rómaarü ãẽ̱xgacüca̱x diẽru ngĩxü̃ dexü̃rüxü̃ chixĩ.

Wiyaegü 7:9

Pa Cori Pa Tupana ya Ixaixcümacüx, cuma rü cunangugü i wüxichigü i duü̃xü̃güarü ĩnügü rü norü ngúchaü̃gü i naãẽwa nagu naxĩnüexü̃. ¡Rü iyanaxoxẽxẽ i norü chixexü̃ i ngẽma chixexü̃gu maxẽxü̃! ¡Natürü yíxema mexü̃gu maxü̃́xẽ rü tüxna nadau nax tama chixexü̃gu tanguxü̃ca̱x!

Ngechuchuarü ngúexü̃gü ga yamugüxü̃arü puracüchiga 1:18

(Rü yema diẽru ga norü chixexü̃ca̱x nüxna ãxü̃maxã naxca̱x nataxe ga wüxi ga naane. Rü yemawena rü naerumaxã inanago rü niwã́ĩpütüwe rü ínayixü̃ ga guxü̃ma ga naü̃nüta.

Ore i mexü̃ ga Luca ümatüxü̃ 20:47

Rü tüxü̃ nawomüxẽẽgüãcüma tüxna nanapuxü̃ ya tümapatagü ya yíxema yutegüxe. Rü ñu̱xũchi nanama̱xẽxẽ i norü yumüxẽgü nax duü̃xü̃gü nagu rüxĩnüexü̃ca̱x nax aixcüma mexü̃gü yixĩgüxü̃. Natürü nümagü tá nixĩ i yexeraãcü napoxcuexü̃ —ñanagürü.

Ore i mexü̃ ga Luca ümatüxü̃ 20:20

Rü yema chacherdótegüarü ãẽ̱xgacügü rü Ngechuchuxü̃tawa nanamugü ga ñuxre ga norü duü̃xü̃gü nax mexü̃ ga duü̃xü̃gürüxü̃ yéma iyanaxĩnüẽxü̃ca̱x ga norü ngu̱xẽẽtae, natürü naxca̱x nax nadaugüxü̃ca̱x nax norü ngu̱xẽẽtaegagu nachixü̃anearü ãẽ̱xgacüxü̃tawa Ngechuchuxü̃ ínaxuaxü̃güxü̃ca̱x.

Ore i mexü̃ ga Matéu ümatüxü̃ 6:16

Rü ngẽxguma tama pechibüeãcüma peyumü̃xẽgügu rü tama name i pegü pengechaü̃chíwexẽẽgü naxrüxü̃ i ngẽma nügü írümegünetaxü̃rüxü̃. Erü nümagü rü ngẽmaãcü nanaxügü nax togü nüxü̃ nax daugüxü̃ca̱x i ngẽma nax Tupanaca̱x naxaureexü̃. Rü aixcüma pemaxã nüxü̃ chixu rü ngẽma nax duü̃xü̃gü nüxü̃ daugüxü̃xicatama nixĩ i norü ãmare.

Ore i mexü̃ ga Matéu ümatüxü̃ 6:5

Rü ngẽxguma peyumüxẽgügu, rü tama name i ngẽma nügü írümegünetaxü̃rüxü̃ pixĩgü. Erü nümagü rü ngẽxguma nayumüxẽgügu, rü norü me nixĩ nax chiãcü nayumüxẽgüxü̃ i ngutaque̱xepataü̃güwa rü ĩanegüarü namagüwa nax duü̃xü̃gü nüxü̃ daugüxü̃ca̱x. Rü aixcüma pemaxã nüxü̃ chixu rü ngẽma nax duü̃xü̃gü nüxü̃ daugüxü̃xicatama nixĩ i norü ãmare.

Ore i mexü̃ ga Matéu ümatüxü̃ 6:2

Rü ngẽxguma texéxü̃ curüngü̃xẽẽgu, rü tama name i nüxü̃ quixuchigaxü̃ i ngẽma cuxüxü̃, naxrüxü̃ i ngẽma nügü írümegünetaxü̃. Erü nümagü rü norü me nixĩ i ngutaque̱xepataü̃güwa rü ĩanegüarü namagüwa nüxü̃ nixuchigagü i ngẽma mexü̃ i naxügüxü̃. Rü ngẽmaãcü nanaxügü nax duü̃xü̃gü mea nachiga idexagüxü̃ca̱x. Natürü choma rü aixcüma pemaxã nüxü̃ chixu rü ngẽma nax duü̃xü̃gü nüxü̃ icua̱xüü̃güxü̃ nixĩ i norü ãmare.

Maraquía 3:15

Rü yixema rü nüxü̃ tadau i ngẽma duü̃xü̃gü i nügü írütagüxü̃ rü nataãẽgü. Rü ngẽma chixexü̃arü üruü̃gü rü guxü̃ma i ta̱xacü i naxügüxü̃wa rü mea nüxü̃́ ínanguxuchi. Rü woo Tupanaxü̃ naxügügu rü taxuxü̃ma i poxcu naxca̱x ínangu”, ñaperügügü —ñanagürü ga Tupana.

Wiyaegü 49:18

Rü woo ñu̱xma nax maxü̃gu rü nataãxẽ, rü duü̃xü̃gü rü nüxü̃ nicua̱xüü̃gü naxca̱x i norü ngẽmaxü̃gü, natürü wüxi i ngunexü̃gu rü tá nayu rü marü tagutáma ñomaarü ngóonexü̃xü̃ nadau.

Wiyaegü 49:13

Rü ngẽmaãcü nixĩ i nayuexü̃ i ngẽma duü̃xü̃gü i nügügutama yaxõgüxü̃. Rü ngẽmaãcütama nayue i ngẽma duü̃xü̃gü i nügütama icua̱xüü̃güxü̃.

Ore i mexü̃ ga Cuáü̃ ümatüxü̃ 21:17

Rü norü tomaepü̱xcüna Pedruna naca, rü ñanagürü: —Pa Chimóü̃ Pa Cuáü̃ Nanex, ¿aixcümaxü̃chi yixĩxü̃ i choxü̃ cungechaü̃xü̃? —ñanagürü. Rü yexguma ga Pedru rü nangechaü̃, yerü norü tomaepü̱xcüna Ngechuchu nüxna naca rü aixcüma nüxü̃ nangechaü̃. Rü ñanagürü ga Pedru: —Pa Corix, cuma nüxü̃ cucua̱x i guxü̃ma. Rü cuma nüxü̃ cucua̱x nax aixcümaxü̃chi cuxü̃ changechaü̃xü̃ —ñanagürü. Rü Ngechuchu ñanagürü nüxü̃: —Ẽcü, ¡nüxna nadau i chorü duü̃xü̃gü i ñoma carnérugürüxü̃ ixĩgüxü̃!

Wiyaegü 10:3

Rü ngẽma chixexü̃ i duü̃xü̃ rü norü ngẽmaxü̃gümaxã nügü nicua̱xüxü̃. Rü ngẽma duü̃xü̃ i nügüna nanuxũchixü̃ i diẽru, rü Cori ya Tupanaxü̃ naxo.

Ore i mexü̃ ga Luca ümatüxü̃ 18:9

Rü Ngechuchu rü nüxü̃ nixu ga ñaa ore nachiga ga yema duü̃xü̃gü ga nügü írümegünetaxü̃ rü tama togüxü̃ cuáxchaü̃güxü̃.

Ore i mexü̃ ga Luca ümatüxü̃ 18:14

Rü pemaxã nüxü̃ chixu rü gumá yatü ga Rómaarü ãẽ̱xgacüca̱x diẽru ngĩxü̃ decü rü yexguma napataca̱x nataeguxgu rü Tupana rü marü nüxü̃́ narüngüma i norü pecadugü. Natürü yema Parichéu rü Tupana rü tama nüxü̃́ narüngüma i norü pecadugü. Erü texé ya tügü icua̱xüxü̃xe rü Tupana tá tüxü̃ naxãnexẽxẽ. Natürü texé ya tama tügü icua̱xüxü̃xe rü Tupana rü tá tüxü̃ nicua̱xüxü̃ —ñanagürü ga Ngechuchu.

Ngechuchuarü ngúexü̃gü ga yamugüxü̃arü puracüchiga 1:24

Rü ñaãcü nayumüxẽgü: —Pa Corix, cuma nüxü̃ cucua̱x i guxü̃ma i duü̃xü̃güarü maxü̃. ¡Rü ñu̱xma rü toxü̃ nawe̱x i ngexü̃rüüxü̃ i ñaa taxrewa nixĩ i cunaxwa̱xexü̃ nax cunamuxü̃ca̱x nax naxüaxü̃ca̱x i ñaa puracü ga Yúda ítáxü̃ ga yexguma norü poxcuwa naxũxgu! —ñanagürügü.

Romanos 8:27

Rü Tupana ya mea nangugücü i torü ĩnü rü nüxü̃ nacua̱x nax ñuxũ ñaxü̃chiga yixĩxü̃ i ngẽma Naãxẽ ya Üünecü nüxü̃ ixuxü̃. Erü ngẽma Naãxẽ ya Üünecü rü Tupanaarü ngúchaxü̃ãcüma nüxü̃ naca̱a̱xü̃ tümaca̱x ya yíxema norü duü̃xü̃gü ixĩgüxe.