Ore i mexü̃ ga Luca ümatüxü̃ 16:13 - Tupanaarü Ore

¹³ Taxucürüwama i wüxi i duü̃xü̃ rü nataxrearü coriã̱x. Erü wüxi i norü corichi rü tá naxai, rü ngẽma to rü tá nüxü̃ nangechaü̃. Rüe̱xna wüxica̱x rü tá mea napuracü rü ngẽma to rü tá nüxü̃ naxo. Rü pema rü taxucürüwama Tupanaca̱x pemaxẽ ega perü diẽruguama perüxĩnüegu —ñanagürü ga Ngechuchu.

Ore i mexü̃ ga Luca ümatüxü̃ 16:13 Referans Kwoze

Ore i mexü̃ ga Matéu ümatüxü̃ 6:24

Taxucürüwa wüxíe rü tataxrearü coriã̱x. Erü wüxi i tümaarü cori rü tá nüxü̃ tangechaü̃ rü ngẽma to rü tá naxchi taxai. Rü naga tá taxĩnü i ngẽma wüxi rü ngẽma to rü taũtáma naga taxĩnü. Rü taxucürüwa Tupanaaxü̃́ cupuracü ega yexera curü diẽruguama curüxĩnügu.

Ore i mexü̃ ga Luca ümatüxü̃ 14:26

—Rü ngẽxguma texé chowe rüxũxchaü̃gu, rü tanaxwa̱xe i choxü̃ tangechaü̃ tümanatüarü yexera, rü tümaéarü yexera, rü tümama̱xarü yexera, rü tümaxacügüarü yexera, rü tümaenexẽgüarü yexera, rü tümaeya̱xgüarü yexera, rü tümaarü maxü̃arü yexera rü ta. Rü ngẽxguma tama ngẽmaãcü choxü̃ tangechaü̃gu rü taxucürüwama aixcüma chorü ngúexü̃ tixĩ.

Popera ga Chantiágu ümatüxü̃ 4:4

Pa Duü̃xü̃gü i Chixri Maxẽxü̃x, ¿Tama ẽ̱xna nüxü̃ pecua̱x rü ngẽxguma ñoma i naanewa ngẽxmaxü̃ i chixexü̃güxü̃ pengechaxü̃gügu rü Tupanamaxã perüxuanügu? Erü texé ya ñoma i naanewa ngẽxmagüxü̃ i chixexü̃güxü̃ ngechaü̃güxe rü Tupanamaxã tarüxuanügü.

Yochué 24:15

Natürü ngẽxguma tama Cori ya Tupanawe perüxĩxchaü̃gu ¡rü ñu̱xmatama nüxü̃ pixu i ta̱xacürü tupanawe tá perüxĩxü̃, rüe̱xna ngẽma tupananetagü ga nũxcüma ga perü o̱xigü nüxü̃ icua̱xüü̃güxü̃ ga taxtü ga Eufrátecutüwa, rüe̱xna ngẽma norü tupananetagü i Amoréutanüxü̃ i ñaa naanegu ãchiü̃güxü̃! Natürü i chomax rü chauxacügü rü Cori ya Tupanawe tá nixĩ i tarüxĩxü̃ —ñanagürü ga Yochué.

Ore i mexü̃ ga Luca ümatüxü̃ 11:23

Yíxema tama chauétüwa üxe rü chauxchi taxai. Rü yíxema tama choxü̃ rüngü̃xẽẽ́xẽ nax Tupanaca̱x tayagagüxü̃ i duü̃xü̃gü rü cha̱u̱xcha̱xwa tanangianexẽxẽ.

Ore i mexü̃ ga Luca ümatüxü̃ 16:9

Rü pemaxã nüxü̃ chixu rü ngẽma diẽru i tama aixcüma mexü̃ i ñoma i naanewa pexü̃́ ngẽxmaxü̃ rü name nixĩ i ngẽmamaxã nüxü̃́ penangúchaü̃xẽxẽ i duü̃xü̃gü nax Tupanaxü̃tawa nangugüxü̃. Rü ngẽmaãcü i ngẽxguma nagu̱xgu i ngẽma ñoma i naanewa pexü̃́ ngẽxmaxü̃ rü peyuegu, rü tá pexü̃́ nangẽxma ya pemücügü ya pexü̃ yaxugüxü̃ i daxũguxü̃ i naanewa.

Ore i mexü̃ ga Matéu ümatüxü̃ 4:10

Rü nüma ga Ngechuchu rü ñanagürü nüxü̃: —¡Choxna ixũgachi, Pa Chatanáx! Erü Tupanaarü ore i ümatüxü̃ rü ñanagürü: “¡Nüxü̃ icua̱xüxü̃ ya Cori ya curü Tupana, rü yimágaxicatama naxĩnü!” —ñanagürü.

Ore i mexü̃ ga Luca ümatüxü̃ 9:50

Natürü Ngechuchu rü ñanagürü nüxü̃: —Tama name i nüxna nax penachu̱xuxü̃. Erü texé ya tama taxchi aixe, rü tórü ngü̃xẽẽruxü̃ tixĩ —ñanagürü.

Ore i mexü̃ ga Luca ümatüxü̃ 16:12

Rü ngẽxguma tama mea namaxã ipecua̱xgu i ngẽma togüarü ixĩxü̃, ¿rü texé tá pexna tanaxã i ngẽma pexna üxü̃?