Ore i mexü̃ ga Luca ümatüxü̃ 15:4 - Tupanaarü Ore

⁴ —¿Texé i petanüwa rü ngẽxguma tüxü̃́ nangẽxmagu i 100 i tümaarü carnérugü rü wüxi tüxü̃́ iyarütaxu̱xgu, rü taux ẽ̱xna i nachitaxü̃wa tanawogüxü̃ i ngẽma 99, rü naxca̱x tayadauxü̃ i ngẽma tüxü̃́ iyarütaxuxü̃ ñu̱xmata nüxü̃ itayangau?

Ore i mexü̃ ga Luca ümatüxü̃ 15:4 Referans Kwoze

Echequié 34:16

Rü choma rü tá naxca̱x chadau i chorü carnérugü i iyarütauxexü̃. Rü tá chayagagü i ngẽma chorü carnérugü i choxna ítüexü̃. Rü ngẽma ibüyeparagüxü̃ rü tá chayanaixgüpara. Rü ngẽma turaexü̃ rü tá nüxü̃ charüngü̃xẽxẽxü̃ natürü ngẽma ingüexü̃ rü iporaexü̃ rü tá chayanaxoxẽxẽ. Rü ngẽmaãcü i choma rü tá mea namaxã ichacua̱x i chorü carnérugü —ñanagürü.

Ore i mexü̃ ga Luca ümatüxü̃ 19:10

Rü Tupana Nane ya duü̃xü̃xü̃ ixĩcü, rü ñoma i naanewa naxũ nax naxca̱x yadauxü̃ca̱x i ngẽma duü̃xü̃gü i iyarütauxexü̃ nax namaxẽxẽẽãxü̃ca̱x —ñanagürü.

Nüxíraxü̃xü̃ ga popera ga Pedru ümatüxü̃ 2:25

Rü pema ga ü̃pa rü ñoma carnérugü i irütauxexü̃rüxü̃ pixĩgü. Natürü i ñu̱xma rü marü Cristuca̱x pewoegu. Rü nüma nixĩ i perü dauruxü̃ yixĩxü̃, rü nüma nixĩ i pexna nadauxü̃.

Ore i mexü̃ ga Matéu ümatüxü̃ 12:11

Rü Ngechuchu nanangãxü̃, rü ñanagürü: —¿Texé i petanüwa rü ngẽxguma chi ngü̃xchigaarü ngunexü̃gu wüxi i perü carnéru puchugu nguxgu, rü taux ẽ̱xna i ngẽxgumatama ípeyadaugüxü̃ rü ípenatúxuchixü̃ woo ngü̃xchigaarü ngunexü̃ yixĩxgu?

Echequié 34:31

Rü pematama nixĩ i chorü carnérugü pixĩgüxü̃ rü chorü naanewa pengẽxmagüxü̃. Rü choma nixĩ i perü Tupana chixĩxü̃. Rü choma ya Cori ya Tupana nixĩ i pemaxã nüxü̃ chixuxü̃ i ngẽma —ñanagürü.

Wiyaegü 119:176

Choma rü ñoma wüxi i carnéru i rütaxuxü̃rüxü̃ chixĩ. ¡Rü nua naxũ nax cha̱u̱xca̱x cuyadauxü̃ca̱x, erü tama nüxü̃ charüngüma i curü mugü!

Ichaía 53:6

Rü guxãma i yixema rü itarütauxe ñoma carnérugü irütauxexü̃rüxü̃. Yerü wüxichigü ga yixema rü nagu taxĩ ga tóxrütama ngúchaü̃. Natürü nüma ga Cori ya Tupana rü gumá norü duü̃cüxü̃ nayangexẽxẽ ga guxü̃ma ga tórü chixexü̃gü.

Yeremía 50:6

Chorü duü̃xü̃gü rü ñoma carnérugü i rütauxexü̃rüxü̃ nixĩgü. Rü norü dauruü̃gü rü chixri nüxna nadaugü, rü yemaca̱x máxpü̱xanexü̃gu narütauxe rü ínatüe. Rü düxwa nüxü̃ narüngümae ga napüxü̃ rü tama nüxü̃ nacua̱xgü nax ngexta nayexmaxü̃.

Ore i mexü̃ ga Luca ümatüxü̃ 13:15

Rü yexguma ga Cori ga Ngechuchu rü nanangãxü̃, rü ñanagürü: —Pa Duü̃xü̃güx i Mea Maxẽnetaxü̃x, ¿Tama ẽ̱xna guxã i pema rü ngü̃xchigaarü ngunexü̃gu peyawẽxü̃ i perü woca rü ẽ̱xna perü búru nax peyaxaxexẽxẽxü̃ca̱x?

Echequié 34:8

Rü choma ya Cori ya Tupana rü chauégagu pemaxã nüxü̃ chixu rü muxü̃ma ga naeü̃gü ga idüraexü̃ rü marü naxca̱x nangĩ̱xgü rü nanangõ̱xcu ga chorü carnérugü, yerü nangearü dauruxü̃ã̱xgü. Rü pema i norü dauruü̃gü rü tama naxca̱x peyadaugü. Rü pema rü pegünaxicatama pedaugü rü tama chorü carnérugüna pedaugü.

Romanos 2:1

Rü ngẽmaca̱x, Pa Duü̃xü̃x, rü woo texé quixĩxgu rü taxuacüma Tupanape̱xewa cugüétüwa cuchogü ega togüxü̃ quixuxgu. Erü ngẽxguma togüxü̃ quixuxgu nax nachixexü̃ rü cugütama chixexü̃gu cungu̱xẽxẽ, erü cuma nax cumücüxü̃ quixuxü̃ rü cuma rü ta cunaxü i ngẽma chixexü̃ i cumücüxü̃ naxca̱x quixuxü̃.

Yeremía 33:13

Rü yima mápü̱xanexü̃wa, rü doxonexü̃wa, rü Négueanearü ĩanegüwa, rü Bẽyamíü̃anewa, rü yima ĩanegü ya Yerucharéü̃arü ngaicamana ngẽxmagünewa, rü guxü̃ma ya Yudáanearü ĩanegüwa rü wena tá nüxü̃ tadau i carnérugüarü dauruü̃gü i norü carnérugü ixugüxü̃. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.

Echequié 34:4

Rü ngẽma chorü carnéru ya turaxü̃ rü pema rü tama nüxü̃ perüngü̃xẽxẽ, rü ngẽma ida̱xawexü̃ rü tama penaxüxü̃, rü ngẽma ibüyeparaxü̃ rü tama peyana̱i̱xpara, rü ngẽma rütaxuxü̃ rü tama naxca̱x peyadau. Natürü i pema rü namaxã pechixecümagü rü chixrimare nüxna pedaugü.

Ore i mexü̃ ga Luca ümatüxü̃ 15:3

Rü yexguma ga Ngechuchu rü ñaa ore ga cua̱xruxü̃xü̃ namaxã nixu, rü ñanagürü: