Ore i mexü̃ ga Luca ümatüxü̃ 14:27 - Tupanaarü Ore

²⁷ Rü yíxema nüxü̃ oxe nax chaugagu ngúxü̃ tingeãcüma chowe tarüxũxü̃, rü taxucürüwama chorü ngúexü̃ tixĩ.

Ore i mexü̃ ga Luca ümatüxü̃ 14:27 Referans Kwoze

Ore i mexü̃ ga Matéu ümatüxü̃ 10:38

Rü yíxema tama yáxna namaxã ĩnüxe i ngẽma guxchaxü̃gü i chaugagu tümaca̱x ínguxü̃ rü tama chowe rüxũxe, rü taxucürüwama chorü duü̃xü̃ tixĩ.

Ore i mexü̃ ga Márcu ümatüxü̃ 10:21

Rü yexguma ga Ngechuchu rü nüxü̃ nangechaü̃ãcüma nüxü̃ nadawenü, rü nanangãxü̃ rü ñanagürü: —Rü wüxixicatama cuxü̃́ nataxu. ¡Rü íixũ, rü namaxã yataxe i guxü̃ma i curü ngẽmaxü̃gü, rü ñu̱xũchi togü i ngearü ngẽmaxü̃ã̱xgüxü̃na naxã i ngẽma curü natanü! Rü ngẽmaãcü tá cuxü̃́ nangẽxma i cuchica i daxũguxü̃ i naanewa. Rü ngẽmawena rü marü name i chowe curüxũ —ñanagürü.

Norü taxre ga popera ga Timutéuca̱x naxümatüxü̃ ga Pauru 3:12

Rü aixcüma cumaxã nüxü̃ chixu rü guxãma ya yíxema naxwa̱xegüxe nax Ngechuchu ya Cristuca̱x tamaxẽxü̃, rü duü̃xü̃gü rü tá tümawe ningẽxü̃tanü rü guxchaxü̃ tá tümaca̱x ínangugü.

Ngechuchuarü ngúexü̃gü ga yamugüxü̃arü puracüchiga 14:22

Rü gumá ĩanegüwa rü yema yaxõgüxü̃xü̃ nixucu̱xẽgü, rü nüxü̃́ nanangúchaü̃xẽẽgü nax guxü̃guma mea yaxõgüãxü̃ca̱x. Rü namaxã nüxü̃ nixugüe, rü ñanagürügü: —Ngẽma Tupana ãẽ̱xgacü ixĩxü̃wa nax ixücuxü̃ca̱x, rü tanaxwa̱xe i muxü̃ma i guxchaxü̃gümaxã yáxna taxĩnüexü̃ i ñoma i naanewa —ñanagürügü.

Ore i mexü̃ ga Matéu ümatüxü̃ 13:21

Natürü ngẽma nax tama aixcüma nagu naxĩnüexü̃ i ngẽma ore, rü paxaãchitama nayaxõgü, rü yixcüra ngẽxguma ngẽma oregagu guxchaxü̃gü nüxü̃ üpetügu rüe̱xna duü̃xü̃gü naxchi aiegu, rü ínanata̱xgü i ngẽma ore.

Norü taxre ga popera ga Timutéuca̱x naxümatüxü̃ ga Pauru 1:12

Rü ngẽmaca̱x nixĩ i ngúxü̃ chingexü̃ rü chapoxcuxü̃ i ñu̱xmax. Natürü tama naxca̱x chaxãne i ngẽma, erü choma nüxü̃ chacua̱x nax texéaxü̃́ chayaxõxü̃. Rü nüxü̃ chacua̱x nax naporaxü̃ i nüma nax nüxna nadauxü̃ca̱x i ngẽma puracü i choxna naxãxü̃ ñu̱xmatáta ngẽma ngunexü̃ i nagu wena núma naxũxü̃.

Ore i mexü̃ ga Cuáü̃ ümatüxü̃ 19:17

Rü ínaxũxü̃ ga Ngechuchu, rü norü curucha ngĩxü̃ ininge. Rü nachica ga “Duẽxẽerugu”, ãégaxü̃wa naxũ. Rü yema nachica rü Górguta nixĩ ga naéga ga Yudíugügawa.

Ore i mexü̃ ga Márcu ümatüxü̃ 15:21

Rü yéma naxüpetü ga wüxi ga yatü ga Chirénecüã̱x ga Chimóü̃gu ãégacü ga Areyándru rü Rúfu nanatü ixĩcü ga naanewa ne ũcü. Rü yexguma yéma naxüpetügu rü yema churaragü rü gumá yatüxü̃ ngĩxü̃ ningexẽẽgü ga Ngechuchuarü curucha.

Ore i mexü̃ ga Luca ümatüxü̃ 14:28

Rü ngẽxguma chi wüxíe i petanüwa rü wüxi ya ĩpata ya taxü̃ne taxüxchaü̃gu, ¿rü tama ẽ̱xna i tanangugüxíraxü̃ nax ñuxre i diẽrugu tá tüxü̃́ naxãtanüxü̃? Rü ngẽmawa nüxü̃ tacua̱x rü marü tüxü̃́ yangu i ngẽma tümaarü diẽru i tüxü̃́ ngẽxmacü nax tayanguxẽẽxü̃ca̱x ya yimá ĩ.