Ore i mexü̃ ga Luca ümatüxü̃ 13:34 - Tupanaarü Ore

³⁴ Rü dücax, Pa Yerücharéü̃cüã̱x, pema peyadaietanü i Tupanaarü orearü uruü̃gü, rü nutamaxã ípenamuxũchigü i Tupanaarü orearü ngeruü̃gü i pexca̱x núma namugüxü̃. Rü ñuxree̱xpü̱xcüna wüxigu chaugüxü̃tagu pexü̃ chanutaque̱xexẽẽchaü̃, ñoma wüxi i ota ya naxacüã̱x nügütüü̃gu tüxü̃ nutaque̱xexü̃rüxü̃. Natürü pema rü tama penaxwa̱xe.

Ore i mexü̃ ga Luca ümatüxü̃ 13:34 Referans Kwoze

Ngechuchuarü ngúexü̃gü ga yamugüxü̃arü puracüchiga 7:52

Rü perü o̱xigü rü chixri namaxã inacua̱xgü ga guxü̃ma ga Tupanaarü orearü uruü̃gü. Rü nanadai ga yema orearü uruü̃gü ga nüxü̃ ixuchigagüxü̃ nax núma tá naxũxü̃ ga gumá mecü ya Ngechuchu. Rü yexguma ínanguxgu ga gumá Ngechuchu rü pema rü Pirátupe̱xewa ípenaxuaxü̃ rü peyama̱x.

Ichaía 30:15

Rü yimá Cori ya Iraétanüxü̃arü Tupana ya Üünecü rü ñanagürü: —¡Cha̱u̱xca̱x pewoegu rü chauga pexĩnüe rü ngẽmaãcü taxũtáma pexü̃ nangupetü! Rü ngẽxguma mea perüchogu rü chauga pexĩnüegu rü ngẽmaãcü tá nixĩ i pexü̃́ nangẽxmaxü̃ i perü pora —ñanagürü. Natürü i pema rü tama chauga pexĩnüechaü̃, rü ñaperügügüama: —Tomagü rü cowarugu tá tibuxmüama —ñaperügügü. Rü aixcüma tá nixĩ i ngẽmaãcü perü uanügücha̱xwa pibuxmüxü̃. Rü pema rü ñaperügügüama: —Cowarugü i poraexüchixü̃gu tá tibuxmüama —ñaperügügüama. Natürü perü uanügü i pewe ngẽgüxü̃ rü tá pexü̃ narüporamaegüama.

Ore i mexü̃ ga Luca ümatüxü̃ 23:28

Natürü ga Ngechuchu rü yema ngexü̃güxü̃ nadawenü, rü ñanagürü nüxü̃: —Pa Ngecügüx, Pa Yerucharéü̃cüã̱x ¡taxṹ i cha̱u̱xca̱x pexauxexü̃, natürü pegüca̱xtama pexauxe rü pexacügüca̱x!

Ore i mexü̃ ga Luca ümatüxü̃ 19:44

Rü tá nagu napogüe ya perü ĩane, rü tá pexü̃ nadai. Rü taxucütama ya nuta ngextá nügüxétü nanugüxüra i perü ĩanearü poxeguxü̃tápü̱x. Rü ngẽmaãcü tá pexü̃ naxüpetü, yerü tama nüxü̃ pecua̱xgüchaü̃ ga yexguma Tupana pexü̃ íyada̱u̱xgu —ñanagürü.

Chacaría 1:4

Rü tama name nax yema perü o̱xigürüxü̃ pixĩgüxü̃. Yerü yexguma nüxna chaxãgagu ga chorü orearü uruü̃gü nax namaxã nüxü̃ yaxugüxü̃ca̱x ga chauga nax nüxü̃ naxoexü̃ca̱x ga chixexü̃ ga nacümagü rü chixri nax namaxẽxü̃, natürü ga nümagü ga perü o̱xigü rü tama chauga naxĩnüechaü̃ rü tama choxü̃ nacua̱xgüchaü̃. Rü choma i Cori ya Tupana nixĩ i nüxü̃ chixuxü̃ i ngẽma.

Ochéa 11:7

Rü nüma i ngẽma chorü duü̃xü̃gü rü nanaxügüama nax choxna yaxĩgachixü̃. Rü tagaãcü nayumüxẽgüchire̱x, natürü taxúema tanangãxü̃, erü nawe narüxĩama i ngẽma tupananetagü i taxucürüwa nüxü̃ rüngü̃xẽẽxü̃.

Ochéa 11:2

Natürü yexguma yexeraãcü naxca̱x chacagu nax chowe naxĩxü̃ca̱x, rü nüma ga Iraétanüxü̃ rü yexeraãcü choxna nixĩgachi. Rü nüma ga chorü duü̃xü̃gü rü tupananetagüca̱x ínanagu ga ãmaregü rü ngẽmachicüna̱xãgüca̱x ínanagu ga pumarate̱xe.

Yeremía 6:16

Cori ya Tupana rü norü duü̃xü̃güxü̃ ñanagürü: —¡Ẽcü namagügu peyachigü rü penadauanegü! ¡Rü naxca̱x ípeca̱x rü ngexü̃rüü̃xü̃ yixĩxü̃ i ngẽma nũxcümaü̃xü̃ i nama, rü ngextá yixĩxü̃ i nangẽxmaxü̃ i ngẽma nama i mexü̃! ¡Rü ngẽmagu pexĩ rü tá petaãẽgü! —ñanagürü. Natürü nümagü rü ñanagürügü: —Tama nagu taxĩchaxü̃ —ñanagürügü.

Yeremía 2:30

Rü choma rü chanapoxcu ga petanüxü̃gü, natürü tama chauga naxĩnüe, rü yemaacü natüca̱xmamare nixĩ nax chapoxcuexü̃. Rü pematama penadai ga perü orearü uruü̃gü, ñoma leóü̃gü i idüraexü̃ nada̱i̱xü̃rüxü̃.

Wiyaegü 36:7

Rü ngẽma curü ngechaü̃, Pa Tupanax, rü namexẽchi. Rü ngẽmaca̱x i duü̃xü̃gü rü cuxpe̱xatütüxü̃ca̱x nibuxmü nax ícupoxü̃xü̃ca̱x.

Rux 2:12

¡Rü Tupana cuxü̃́ naxütanü i ngẽma! ¡Rü nüma ya Cori ya Iraéanecüã̱xgüarü Tupana ga norü ngü̃xẽẽca̱x cudaucü cuxü̃́ naxütanü naxca̱x ga guxü̃ma ga yema mexü̃ ga cuxüxü̃! —ñanagürü.

Ore i mexü̃ ga Matéu ümatüxü̃ 22:6

Rü ga togü rü yema ãẽ̱xgacüarü duü̃xü̃güxü̃ ínayauxü̃ rü nayacua̱i̱xgü ñu̱xmata nayuexẽẽã.

Ore i mexü̃ ga Matéu ümatüxü̃ 22:3

Rü norü duü̃xü̃güxü̃ namu nax naxca̱x yaca̱xaxü̃ca̱x ga yema duü̃xü̃gü ga marü ü̃paacü nüxna naxuxü̃. Natürü yema duü̃xü̃gü ga marü nüxna naxuchiréxü̃ rü tama yéma naxĩxchaü̃.

Auxexü̃chiga 1:16

Rü ngẽma ñu̱xma choxü̃ ngupetüxü̃ rü choxü̃ naxauxẽxẽ. Rü chauxetügü rü chauxgüxü̃etümaxã nanapagü. Rü taxúema texé choxü̃ tataãẽxẽxẽ rü choxü̃ tayaporaxẽxẽ. Rü chauchicawa nawogü i chauxacügü yerü torü uanügü rü toxü̃ narüporamae”, ñanagürü ga guma ĩane ga Yerucharéü̃.

Ichaía 50:2

¿Rü ta̱xacüca̱x tama texéxü̃ nua chayangau ga yexguma nua chaxũxgu? ¿Rü yexguma nua ichacagügu rü ta̱xacüca̱x taxúema choxü̃ tangãxü̃? ¿Ẽ̱xna nagu perüxĩnüe nax tama chaporaxü̃ nax togüme̱xẽwa pexü̃ chapuxü̃xü̃? ¿Ẽ̱xna nagu perüxĩnüe nax tama chaporaxü̃ nax pexü̃ íchanguxü̃xẽxẽxü̃ naxme̱xwa i perü uanü? Rü aixcüma pemaxã nüxü̃ chixu rü choma choxü̃́ nangẽxma i pora nax chanamuxü̃ i már rü natügü nax yachegüxü̃ca̱x rü ngẽmaãcü naxnücüane nax yaxĩgüxü̃ca̱x rü choxnigü rü ngearü dexáã́xü̃maxã nayuexü̃ rü yayixexü̃.

Wiyaegü 91:4

Rü nüma rü tá nügüpe̱xátütüü̃wa cuxü̃ nangẽxmaxẽxẽ rü ngéma rü taxuxü̃táma cuxü̃ nangupetü. Rü nüma rü tá aixcüma cuxna nadau rü tá cuxü̃ ínapoxü̃.

Wiyaegü 81:13

Rü yexguma chi chauga pexĩnüegu, Pa Chorü Duü̃xü̃güx, rü chi nagu pexĩxgu ga yema pexü̃ chamuxü̃, Pa Iraétanüxü̃x, rü chi paxaxüchi chanaxãneexẽxẽ ga yema pemaxã rüxuanüã̱xgüxü̃ rü chi chanapoxcu —ñanagürü ga Tupana.

Wiyaegü 57:1

¡Cuxü̃́ changechaü̃tümüxü̃, Pa Chorü Tupanax, cuxü̃́ changechaü̃tümüxü̃! Erü cuxca̱x chiña nax choxü̃ ícupoxü̃xü̃ca̱x. Rü cuxpe̱xatütüü̃gu chaugü chicúxchaü̃ ñu̱xmatáta nangupetü i ngẽma ãũcümaxü̃.

Neemía 9:30

Rü mucüma ga taunecü rü yáxna namaxã cuxĩnü ga yema torü o̱xigü. Rü Cuãxẽ ya Üünecüwa rü curü orearü uruü̃güwa cuyaxucu̱xẽgüchire̱x, natürü ga nümagü rü tama cuga naxĩnüechaü̃. Rü yemaca̱x nixĩ ga ñoma ga naanewa yexmagüxü̃ ga nachixü̃anegüme̱xẽwa cunayexmagüxẽẽxü̃.

Yeremía 35:14

Rü ngẽma Recáx nane ga Yonadátanüxü̃ rü meama naga naxĩnüe ga yema mugü ga norü o̱xi namaxã nüxü̃ ixuxü̃ rü tama nayaxaxgü ya bínu. Rü ñu̱xma rü ta tama nayaxaxgü, yerü naga naxĩnüe ga norü o̱xi. Choma rü marü muẽ̱xpü̱xcüna pemaxã nüxü̃ chixu ga chorü mugü, natürü tama naga pexĩnüe.

Yeremía 26:23

Rü nümagü ga yema yéma namugüxü̃ rü Equítuanewa Uríaxü̃ nayagagü, rü ãẽ̱xgacü ga Yoaquíü̃na nayamugü. Rü nüma rü norü duü̃xü̃güxü̃ namu nax yama̱xgüãxü̃ca̱x. Rü ñu̱xũchi wüxi ga ãxmaxü̃ ga ngexü̃rüüxü̃mare ga duü̃xü̃gü ga yuxü̃ nagu yata̱xcuchixü̃gu nayata̱xcuchigü ga yema naxü̃ne.

Wiyaegü 149:2

Rü pemax, Pa Iraétanüxü̃ i Chióü̃cüã̱x i Tupanaarü Duü̃xü̃gü Pixĩgüxex ¡rü namaxã petaãxẽgü! Erü nüma nixĩ i perü ãẽ̱xgacü ga pexü̃ nango̱xẽẽxü̃.

Neemía 9:26

Natürü naétüwa ga guxü̃ma ga yema naxca̱x cuxüxü̃ rü tama cuga naxĩnüechaü̃, rü cumaxã nanueama, rü tama naga naxĩnüe ga curü mugü. Rü nanadai ga yema curü orearü ngeruü̃gü ga naxucu̱xẽgüxü̃ nax cuxca̱x nawoeguxü̃ca̱x. Rü yemaacü poraãcü chixexü̃ cupe̱xewa naxügü.

Wenaxarü naxümatü ga Tupanaarü mugü 32:29

Rü ngẽxguma chi duü̃xü̃gü i naãẽxü̃ icuáxü̃ yixĩgügu rü chi nügüãẽgu mea naxĩnüegu, rü chi nüxü̃ nacua̱xgü nax ta̱xacü yixĩxü̃ i ngẽma yixcüra tá naxca̱x ínguxü̃.

Wenaxarü naxümatü ga Tupanaarü mugü 5:29

¡Rü chierüx guxü̃guma aixcüma ngẽmaguxicatama naxĩnüeechagu, rü choxü̃ nangechaü̃gügu rü guxü̃ i ngunexü̃gügu yanguxẽẽgüãgu i chorü mugü i nümagü rü naxacügü nax ngẽmaãcü guxü̃guma nataãẽgüxü̃ca̱x!

Yema Cuáü̃ nüxü̃ dauxü̃ i yixcüra tá ngupetüxü̃chiga 11:8

Rü ngẽma naxü̃negü i ngẽma taxre rü tá yima ĩane ga tórü Cori nawa curuchawa ipotane ya Yerucharéü̃arü plazawa nawogü. Rü yima ĩane rü nachixe rü ngẽmaca̱x Chodómaarü ĩanemaxã rü Equítuanemaxã nanaxugü.

Ngechuchuarü ngúexü̃gü ga yamugüxü̃arü puracüchiga 8:1

Rü Chauru rü yéma nayexma rü norü me nixĩ ga Estébaü̃xü̃ nax yama̱xgüxü̃. Rü yematama ngunexü̃gu rü inanaxügü nax poraãcü nawe yangexü̃tanüxü̃ ga yema yaxõgüxü̃ ga Yerucharéü̃wa yexmagüxü̃. Rü düxwa ga guxü̃ma rü Yudéaanegu rü Chamáriaanegu nügü nawoone. Rü yema ngúexü̃gü ga Ngechuchu imugüxü̃xicatama ínayaxügü ga Yerucharéü̃wa.

Ngechuchuarü ngúexü̃gü ga yamugüxü̃arü puracüchiga 7:59

Rü yexguma nutamaxã ínamuxũchigüãguyane, rü nayumüxẽ ga Estébaü̃ rü ñanagürü: —Pa Cori Pa Ngechuchux, ¡Nayaxu i chauãxẽ! —ñanagürü.

Ore i mexü̃ ga Luca ümatüxü̃ 15:28

Natürü ga gumá naenexẽ ga rüyamaẽcü rü nanu, rü tama ĩgu naxücuchaü̃. Rü yemaca̱x düxwa ga nanatü rü naxca̱x ítaxũxũ, rü nüxü̃ tayaca̱xaxü̃ nax yaxücuxü̃ca̱x.

Joel 2:23

¡Rü petaãxẽgü, Pa Chióü̃cüã̱xgü! ¡Rü namaxã petaãẽgü ya Cori ya Tupana! Yerü pexca̱x nanapuxẽxẽ ga yexguma meama nawa nanguxgu nax mucüca̱x napuxẽẽãxü̃ rü taunecüca̱x napuxẽẽãxü̃ yema noxri mea napuxẽẽã̱xgurüxü̃.

Auxexü̃chiga 4:13

Rü yema guma ĩane ga Yerucharéü̃maxã ngupetüxü̃ rü norü orearü uruü̃günetagagu nixĩ, rü norü chacherdótegüarü chixexü̃gagu nixĩ. Yerü nümagü rü guma ĩanewa nanadai ga duü̃xü̃gü ga taxuxü̃ma ga chixexü̃ ügüchiréxü̃.

Wiyaegü 17:8

¡Rü choxna nadau ñoma cugüpü̱xüxetüna cudauxü̃rüxü̃! ¡Rü choxü̃ ídüxü namaxã ya cuxpe̱xatügü!

Yeremía 35:17

Rü ngẽmaca̱x i choma ya Cori ya Guxãétüwa Ngẽxmacü ya Iraétanüxü̃arü Tupana rü ñachagürü: Ngẽma Yudáanearü duü̃xü̃güca̱x rü Yerucharéü̃arü duü̃xü̃güca̱x tá íchananguxẽxẽ i guxü̃ma i ngẽma guxchaxü̃gü ga namaxã chaxuegugüxü̃. Yerü namaxã chidexa, natürü tama chauga naxĩnüe. Rü naxca̱x chaca, natürü tama cha̱u̱xca̱x naxĩ” —ñanagürü.