Ore i mexü̃ ga Luca ümatüxü̃ 11:42 - Tupanaarü Ore

⁴² Natürü wüxi i ngechaü̃ nixĩ i pexca̱x, Pa Parichéugüx, erü pema rü ngẽma penetügü i mentawa rü rúdawa rü berdúrawa rü Tupanana penaxã i ngẽma nüxna üxü̃, natürü tama tümagu perüxĩnüe ya yíxema ngearü diẽruã̱xgüxe rü tama aixcüma Tupanaxü̃ pengechaxü̃gü. Rü name i Tupanana penaxã i ngẽma nüxna üxü̃, rü naétü name i ngẽma ngearü diẽruã̱xgüxü̃na penaxã i perü diẽru.

Ore i mexü̃ ga Luca ümatüxü̃ 11:42 Referans Kwoze

Ore i mexü̃ ga Matéu ümatüxü̃ 23:23

Pa Ngúexẽẽruü̃gü i Mugüwa Ngu̱xẽẽtaegüxü̃ rü Pa Parichéugüx, pema rü duü̃xü̃güpe̱xewa mea pemaxẽneta. Pema rü perü mentawa rü aníswa rü comínuwa rü Tupanana penaxã i ngẽma diésmu i nüxna üxü̃, natürü tama naga pexĩnüe i Tupanaarü mugü i guxü̃ i mugüarü yexera ixĩxü̃. Rü wüxi i ngechaü̃ nixĩ i pexca̱x erü tama mea duü̃xü̃gümaxã ipecua̱x, rü tama pexü̃́ nangechaü̃tümüü̃gü, rü tama Tupanamaxã pixaixcümagü. Rü ngẽma mexü̃gü nixĩ ya Tupana naxwa̱xexü̃ nax penaxüxü̃. Rü ngẽxgumarüxü̃ ta name nax Tupanaga pexĩnüexü̃ rü nüxna penaxãxü̃ i ngẽma diésmu i nüxna üxü̃.

Ore i mexü̃ ga Luca ümatüxü̃ 18:12

Choma rü guxcü ya yüxügu rü taxree̱xpü̱xcüna chaxaure rü tama chachibü nax cugu charüxĩnüxü̃ca̱x. Rü chorü diẽruwa rü guxü̃guma mea cuxna chanaxã i ngẽma diésmu i cuxna üxü̃”, ñanagürü.

Nüxíraxü̃xü̃ ga popera ga Cuáü̃ ümatüxü̃ 4:20

Ngẽxguma chi texé ñagügu: “Choma rü Tupanaxü̃ changechaü̃”, ñagügu, natürü tümaenexẽchi taxaixgu, rü tidora. Erü ngẽxguma tama nüxü̃ tangechaü̃gu i tümaenexẽ i nüxü̃ tadauxü̃, rü taxuacüma nüxü̃ tangechaü̃ ya Tupana ya tama nüxü̃ tadaucü.

Maraquía 3:8

Rü ñu̱xma i choma rü pexna chaca: “¿Ẽ̱xna namexü̃ yixĩxü̃ i wüxi i duü̃xü̃ rü choxü̃́ nangĩ́xü̃? Rü dücax i pemax, rü aixcüma nixĩ i choxü̃́ pengĩ́exü̃. Rü ngẽxguma rü ta rü ípecagüamaxü̃ rü ñapegügüxü̃: ‘¿Rü ta̱xacüwa i cuxü̃́ tangĩ́exü̃?’ ñapegügüxü̃. Rü dücax, rü choxü̃́ pengĩ́e nawa i ngẽma diésmugü rü ãmaregü i choxrü ixĩxü̃.

Miquéa 6:8

Rü nüma ya Cori ya Tupana rü marü cumaxã nüxü̃ nixu, Pa Duü̃xü̃x, i ta̱xacü nixĩ i nape̱xewa mexü̃ rü ta̱xacü nixĩ i ngẽma cuxü̃́ nanaxwa̱xexü̃. Rü ngẽma cuxü̃́ nanaxwa̱xexü̃ nixĩ nax mexü̃ cuxüxü̃ rü quixaixcümaxü̃ rü curü Tupanaga nax cuxĩnüxü̃ rü tama cugü quicua̱xüxü̃.

Ucu̱xẽgüchiga 21:3

¡Nagu namaxü̃ i ngẽma nacümagü i mexü̃, rü ngẽma nixĩ i guxü̃ma i ãmaregüarü yexera Tupanaca̱x rümemaexü̃!

Ore i mexü̃ ga Matéu ümatüxü̃ 23:27

Pa Ngúexẽẽruü̃gü i Mugüwa Ngu̱xẽẽtaegüxü̃ rü Pa Parichéugüx, pema rü duü̃xü̃güpe̱xewa mea pemaxẽneta. Rü wüxi i ngechaü̃ nixĩ i pexca̱x, erü ñoma yuetachique̱xegü i düxétüwa cómüxü̃maxã chauxetügüxü̃ natürü aixepewa rü yuetachina̱xãmaxã rü naguxü̃raü̃xü̃ i ãũãchixü̃maxã napagüxü̃rüxü̃ pixĩgü. Erü perü düxétüwa i duü̃xü̃gü nüxü̃ ídaugüxü̃waxicatama pime, natürü perü aixepewa i perü ĩnüwa nangẽxma i naguxü̃raü̃xü̃ i chixexü̃.

1 Chamué 15:22

Rü nüma ga Chamué rü ínaca rü ñanagürü: —¿Ta̱xacü nixĩ i ngẽma rümemaexü̃ cuxca̱x? ¿Rü cuxca̱x rü ngẽma naxü̃nagü Tupanaca̱x iguxü̃ rüe̱xna Tupanaga nax ixĩnüexü̃? Rü dücax rü ngẽma Tupana yexera namaxã taãẽxü̃ nixĩ nax naga ixĩnüexü̃, rü tama carnérugüarü chíxü̃ naxca̱x nax iguxü̃.

Ore i mexü̃ ga Matéu ümatüxü̃ 23:13

Pa Ngúexẽẽruü̃gü i Mugüwa Ngu̱xẽẽtaegüxü̃ rü Pa Parichéugüx, pema rü duü̃xü̃güpe̱xewa mea pemaxẽneta. Rü wüxi i ngechaü̃ nixĩ i pexca̱x erü duü̃xü̃güaxü̃́ penaguxchaxẽxẽ nax Tupanaxü̃tawa nangugüxü̃ca̱x. Rü woo i pema rü taxũtáma ngẽxma pechocu, natürü nüxü̃́ penaguxchaxẽxẽ nax ngẽxma nachocuxü̃ca̱x i ngẽma togü i nüxü̃́ nangúchaü̃xü̃ nax ngẽxma nachocuxü̃.

Maraquía 2:17

Rü pema rü perü dexamaxã marü düxwa peyapaxẽxẽ ya Tupana. Rü ngẽmaétüwa i pemax rü ípecagüama rü ñaperügügü: —¿Rü ñuxũ ñatarügügü i tomax rü ngẽmaca̱x tayapaxẽẽxü̃ nax toxü̃ naxĩnüxü̃? —ñaperügügü. Rü pema rü ñaperügügü: —Nüma ya Cori ya Tupana rü namaxã nataãxẽ i ngẽma duü̃xü̃gü i chixexü̃ ügüxü̃ rü taxũtáma nanapoxcue —ñaperügügü. ¿Tama ẽ̱xna peyaxõgü nax Tupana rü aixcümacü yixĩxü̃?

Maraquía 1:6

Rü nüma ya Cori ya Tupana ya Guxü̃étüwa Ngẽxmacü rü chacherdótegüxü̃ ñanagürü: —Ngẽma buxü̃gü rü nanatügüxü̃ nangechaü̃, rü ngẽma naxü̃taxü̃gü rü norü coriga naxĩnü. Rü choma nax Penatü chixĩxü̃ ¿rü tü̱xcüü̃ i tama choxü̃ pengechaü̃xü̃? Rü choma nax perü Cori chixĩxü̃ ¿rü tü̱xcüü̃ i tama chauga pexĩnüexü̃? Natürü i pemax rü choxü̃ pexo, rü naétü ñaperügügü: “¿Ta̱xacüwa i cuxü̃ taxoxü̃?” ñaperügügü.

Ngu̱xẽẽtaeruü̃arü ore 7:18

Rü name nax naga cuxĩnüxü̃ i ngẽma ucu̱xẽ nax tama cuchixecümaxü̃ rü tama wüxi i naechitamare maxü̃xü̃ quixĩxü̃. Rü yíxema aixcüma Tupanaxü̃ ngechaü̃xe rü mea tá tüxü̃́ ínanguxuchi i guxü̃ma i ta̱xacü i taxüxü̃.

Neemía 10:37

Rü togümaxã itaxunetagü nax Tupanapata ga taxü̃nearü yemaxü̃pataü̃wa tananaxü̃ca̱x i ngẽma nüxíraxü̃xü̃ i torü trigute̱xe rü nüxíraxü̃xü̃ i tonetüarü o, rü yima nüxíraü̃cü ya torü bínu rü nüxíraxü̃xü̃ i torü chíxü̃ nax chacherdótegüna tanaxãxü̃ca̱x. Rü yexgumarüxü̃ ta togümaxã itaxunetagü rü ngẽma 10 i tonetügüarü owa rü wüxi tá nixĩ i Lebítanüxü̃na taxãgüxü̃ erü ngẽma nixĩ i toonegüwa nüxna üxü̃ nax nayauxgüãxü̃ca̱x.