Ore i mexü̃ ga Luca ümatüxü̃ 11:36 - Tupanaarü Ore

³⁶ Ngẽxguma ngóonexü̃wa cungexmagu rü cuwa natauxgu i ẽanexü̃, rü curü maxü̃ rü mexü̃wa tá nangẽxma ñoma wüxi i omü i cuxü̃ báxixü̃rüxü̃ —ñanagürü.

Ore i mexü̃ ga Luca ümatüxü̃ 11:36 Referans Kwoze

Ucu̱xẽgüchiga 20:27

Ngẽma naãxẽ ya Tupana wüxichigü i duü̃xü̃na ãxü̃, rü guxü̃ma i norü maxü̃gu nabáxi.

Ucu̱xẽgüchiga 6:23

Ngẽma mugü rü ngu̱xẽẽtaegü rü ñoma wüxi i omü i naixü̃rüxü̃ tá cuxca̱x nanangóonexẽxẽ. Rü ngẽma ucu̱xẽgü rü tá cuxü̃ inayarüwe̱xãchixẽxẽ nax nawe̱xguxü̃ca̱x i curü maxü̃.

2 Corintios 4:6

Erü nümatama ya Tupana ga noxri naane naxü̱xgux rü ẽanexü̃wa nanango̱xẽxẽ ga ngóonexü̃. Rü nümatama nixĩ i ñu̱xma i tüxü̃ yango̱xnaãẽxẽẽgüxü̃ nax ngẽmawa nüxü̃ icuáxü̃ca̱x nax nüma rü naxüünexü̃. Rü ngẽma norü üüne rü Ngechuchu ya Cristuchiwewa nixĩ i nangóxü̃.

Norü taxre ga popera ga Pedru ümatüxü̃ 3:18

Rü ngẽmaca̱x, Pa Chauenexẽgüx, penaxwa̱xe nax pegü peporaexẽẽxü̃ nax wüxichigü i ngunexü̃ yexeraãcü tórü Cori ya Ngechuchu ya Cristu ya tórü Maxẽxẽẽruü̃xü̃ pecuáxü̃ca̱x rü yexeraãcü nüxü̃ picuáetanüxü̃ca̱x nax aixcüma pexü̃ nangechaü̃xü̃. ¡Rü ngẽmaca̱x name i ñu̱xma rü guxü̃gutáma nüxü̃ ticua̱xüxü̃gü! Rü ngẽmaãcü yixĩ.

Colosenses 3:16

Rü name nixĩ i guxü̃guma peãẽwa nangẽxma i Cristuarü ore i taãxẽ pexna ãxü̃. Rü name nixĩ i nüxü̃ pecuáãcüma ngẽma oremaxã pegü pengúexẽxẽ rü pegü pixucu̱xẽgü. Rü name nixĩ i Tupanana moxẽ pexãgüãcüma nagu pewiyaegü i naguxü̃raü̃xü̃ i norü wiyaegü.

Ucu̱xẽgüchiga 1:5

Yíxema cua̱x tüxü̃́ ngẽxmaxe rü itarüxĩnü i ñaa ucu̱xẽgü nax ngẽmaãcü yexera cua̱x tüxü̃́ ngẽxmaxü̃ca̱x, rü yexera tümaãẽxü̃ tacuáxü̃ca̱x.

Popera ga Chantiágu ümatüxü̃ 1:25

Natürü yíxema mea nawa ngúxe rü naga ĩnüxe i ngẽma ore i aixcüma ixĩxü̃ i pecaduwa tüxü̃ ínguxuchixẽẽxü̃, rü ngẽxguma tayangu̱xẽẽgu i ngẽma ore nüxü̃ ixuxü̃, rü Tupana tá tüxü̃ narüngü̃xẽxẽ.

Popera ga Yudíugü ga yaxõgüxü̃ca̱x ümatüxü̃ 5:14

Natürü yíxema yaxṍxe ya nüxü̃ cuáxe nax mea tanangugüxü̃ nax ta̱xacü yixĩxü̃ i ngu̱xẽẽtae i mexü̃ rü ẽ̱xna chixexü̃, rü aixcüma nüxü̃ tacua̱x i Tupanaarü ore. Rü yíxema rü ñoma wüxi i duü̃xü̃ i yáxü̃ i namachimaxã ãwemüxü̃rüxü̃ tixĩ.

Efesios 4:14

Rü taũtáma ñoma buxü̃gürüxü̃ tixĩgü i tórü õwa. Rü ngẽxguma ta̱xacürü to i ngu̱xẽẽtaexü̃ ixĩnüegu rü taxũtáma naga taxĩnüe nax tama ñoma buanecü ngextámare cuecürüxü̃ tüxü̃ yaxĩgüxẽẽxü̃ca̱x. Rü taxũtáma nawe tarüxĩ i ngẽma duü̃xü̃gü i norü doramaxã tüxü̃ womüxẽẽgüxü̃ rü norü ngu̱xẽẽtaemaxã tüxü̃ ítüexẽẽchaü̃xü̃.

Ore i mexü̃ ga Matéu ümatüxü̃ 13:52

Rü yexguma ga Ngechuchu rü ñanagürü nüxü̃: —Rü guxü̃ma i ngúexẽẽruxü̃ i Tupanaarü mugüwa ngu̱xẽẽtaexü̃ rü nanaxwa̱xe nax mea nüxü̃ nacuáxü̃ i ngẽma nũxcümaü̃xü̃ i Tupanaarü ore rü ñaa ngexwaca̱xü̃xü̃ i chorü ore, ngẽxgumarüxü̃ i wüxi i yatü i norü taxepatawa duü̃xü̃güca̱x inawéxü̃ i norü ngẽmaxü̃gü i ngexwacaxü̃güxü̃ rü norü ngẽmaxü̃gü i nũxcümaü̃güxü̃ —ñanagürü ga Ngechuchu.

Ochéa 6:3

¡Rü ngĩxã pora taxüe nax aixcüma Cori ya Tupanaxü̃ icuáxü̃ca̱x rü naga ixĩnüexü̃ca̱x! Rü nüma ya Cori ya Tupana rü aixcüma tá taxca̱x ínangu ñoma üa̱xcü guxü̃guma ínguxü̃rüxü̃ rü ñoma pucü guxü̃guma waixü̃mü iwaimüanexẽẽcürüxü̃”, ñanagürügü tá —ñanagürü ya Tupana.

Ichaía 42:16

Rü ngẽma ngexetügüxü̃ rü tá chanagagü nawa i namagü i taguma nüxü̃ nacua̱xgüxü̃ rü taguma nagu naxĩxü̃. Rü ngẽma waanexü̃ i nawa namaxẽ rü tá ngóonexü̃xü̃ chayaxĩxẽxẽ. Rü ngẽma naane i chixri i weanexü̃ rü tá mea ichanawe̱xãchianexẽxẽ. Rü guxü̃ma i ngẽma rü tá chanaxü erü tama nüxna chixũgachi i chorü duü̃xü̃gü i Iraétanüxü̃.

Ichaía 8:20

Rü ngẽmaãcü tá tanayaxu i wüxi i ucu̱xẽ rüe̱xna wüxi i ore i tüxü̃́ mexü̃ —ñanagürügü tá. Natürü woo ngẽma ñaxgu pexü̃, ¡rü taxṹ i naga pexĩnüexü̃ i ngẽma pemaxã nüxü̃ yaxuxü̃! Erü ngẽma nagu naxĩnüxü̃ rü wüxi i doramare nixĩ.

Ore i mexü̃ ga Matéu ümatüxü̃ 5:15

Rü taxúema wüxi i omüwa tanangixichi nax wüxi i caichaũtüü̃gu tayaxǘcuchixü̃ca̱x. Natürü wüxi i omüwa tanangixichi nax norü ǘchicaxü̃gu tanaxǘnagüxü̃ca̱x, nax ngéma tüxü̃ nabáxixü̃ca̱x ya guxãma ya yima ĩwa ngẽxmagüxe.

Ore i mexü̃ ga Luca ümatüxü̃ 11:35

¡Mea cugüna nadau nax tama ẽanexü̃xü̃ nanguxuchixü̃ca̱x i ngẽma ngóonexü̃ i cuwa ngẽxmaxü̃.

Ore i mexü̃ ga Luca ümatüxü̃ 11:37

Rü yexguma nüxü̃ nachauxgu ga nax yadexaxü̃ ga Ngechuchu rü wüxi ga Parichéu nüxna naxu nax napatawa yachibüxü̃ca̱x. Rü yema Parichéupatawa naxũ, rü mechawa nayarüto.