Lebítanüxü̃arü puracüchiga 9:24 - Tupanaarü Ore

²⁴ Rü nawa ínaxũxũ ga üxüema ga yaguxü̃ ga yema naxü̃na ga yagugüchaü̃xü̃ rü yema chíxü̃ ga ãmarearü guruü̃étügu nuxü̃. Rü yexguma yemaxü̃ nadaugügu ga Iraétanüxü̃, rü norü taãẽmaxã tagaãcü aita naxüe, rü ñu̱xũchi waixü̃müanegu nanangücuchitanü.

Lebítanüxü̃arü puracüchiga 9:24 Referans Kwoze

Ãẽ̱xgacügü ga guxchaxü̃güarü mexẽxẽruü̃gü 6:21

Rü yexguma ga yema orearü ngeruxü̃ i daxũcüã̱x rü norü naixmena̱xã ga nangexü̃nemaxã nüxü̃ ningõgü ga yema namachi rü paũgü, rü gumá nuta rü ninai rü yema nixĩ ga yaxãxẽẽxü̃ ga namachi rü paũgü. Rü ñu̱xũchi nüma ga Tupanaarü orearü ngeruxü̃ rü inarütaxu.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 21:26

Rü yexma Tupanaaxü̃́ nanaxü ga ãmarearü guruxü̃ rü yéma ínanagu ga ãmaregü ga norü chixexü̃arü ütanüruxü̃ nax Tupanaxü̃ nangüxmüxẽẽxü̃ca̱x. Rü ñu̱xũchi Cori ya Tupanamaxã nidexa rü nüxü̃ naca̱a̱xü̃. Rü nüma ga Cori ya Tupana rü nanangãxü̃ rü daxũguxü̃ ga naanewa üxüema narünguxẽxẽ, rü yema ãmarearü guruxü̃étügu nangu.

Wiyaegü 80:1

Pa Cori Pa Tupana Pa Iraétanüxü̃arü Dauruxü̃x, rü cuma nixĩ i carnérugürüü̃ãcü Yúchetanüxü̃maxã icucuáxü̃. Rü cuma nax ngẽma taxre i daxũcüã̱xchicüna̱xãgü i ixãxpe̱xatüxü̃arü ngãxü̃wa nax curütoxü̃ ¡rü nüxü̃ naxĩnü i torü yumüxẽ! ¡Rü toxü̃ nangechaxü̃ãcüma mea nüxü̃ nadawenü ya Efraíü̃tanüxü̃ rü Bẽyamíü̃tanüxü̃ rü Manachétanüxü̃! ¡Rü inachi, rü nua naxũ nax curü poramaxã toxü̃ ícunguxü̃xẽẽxü̃ca̱x!

Ãẽ̱xgacügü ga guxchaxü̃güarü mexẽxẽruü̃gü 13:23

Natürü ga tüma rü tanangãxü̃ga rü ñatarügü: —Ngẽxguma chi Cori ya Tupana tüxü̃ daixchaü̃gu rü taxũchima tüxü̃́ nanayaxu i ngẽma tórü ãmare i naxca̱x iguxü̃, rü taxũchima tüxü̃ nanawe̱x i ngẽma nüxü̃ idaugüxü̃, rü bai chi i tamaxã nüxü̃ yaxuxü̃ i ngẽma ñu̱xma tamaxã naxunagüxü̃ —ñatarügü.

Lebítanüxü̃arü puracüchiga 6:13

Rü ngẽmaãcü ya yima üxü i ãmarearü guruü̃wa naixü̃ne rü tagutáma peyaxoxẽxẽ.

Ínachoxü̃xü̃chiga 3:2

Rü yéma rü wüxi ga chuchuxü̃eta ga iya̱u̱xraxü̃wa nixĩ ga Moichéca̱x nangóxü̃ ga Cori ya Tupanaarü orearü ngeruxü̃ ga daxũcüã̱x. Rü nüma ga Moiché rü mea nüxü̃ nadawenü rü nüxü̃ nicua̱xãchi ga yema chuchuxü̃eta ga nax yayauraxü̃, natürü tama nixa.

Naanearü ügüchiga 15:17

Rü yexguma marü nachütagu rü guxü̃wama naxẽanegu, rü ngürüãchi yéma nango̱x ga wüxi ga buetare ga üxüã́xü̃ ga yéma icaixquexü̃. Rü nango̱x ta ga wüxi ga omüema ga iyauraxü̃ ga yema naxü̃na ga dategüxü̃tanüwa gopetüemaxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 7:11

Rü guxü̃ma ga Tupanaarü orearü ngeruü̃gü ga daxũcüã̱x rü nüxü̃ ínachimaeguãchi ga yema tochicaxü̃ rü yema 24 ga ãẽ̱xgacügü rü yema ãgümücü ga daxũcüã̱x ga maxẽxü̃. Rü nüma ga yema Tupanaarü orearü ngeruü̃gü ga daxũcüã̱x rü yema tochicaxü̃pe̱xegu nanangücuchitanü, rü Tupanaxü̃ nicua̱xüü̃gü.

Yema Cuáü̃ nüxü̃ dauxü̃ i yixcüra tá ngupetüxü̃chiga 5:8

Rü yexguma nayauxãgu ga yema popera, rü yema ãgümücü ga daxũcüã̱x ga maxẽxü̃ rü yema 24 ga ãẽ̱xgacügü rü nacaxã́pü̱xügü nape̱xegu ga yema Carnéruxacü. Rü wüxichigü ga yema daxũcüã̱x ga maxẽxü̃ rü yema ãẽ̱xgacügü rü nüxü̃́ nayexma ga wüxi ga norü paxetaruxü̃ ga árpa. Rü yexgumarüxü̃ ta nüxü̃́ nayexma ga copu ga úirunaxca̱x ga pumarate̱xemaxã napagüxü̃. Rü yema pumarate̱xe rü nayixichi ga yexguma yaxaxgu. Rü yema pumaragü rü ngẽma nixĩ i Tupanaarü duü̃xü̃güarü yumüxẽgü.

Ore i mexü̃ ga Matéu ümatüxü̃ 26:39

Rü yexguma ga Ngechuchu rü yéaxüra naxũ. Rü waixü̃müanegu nanangücuchi. Rü nayumüxẽ rü ñanagürü: —Pa Chaunatüx, ngẽxguma cuma cunaxwa̱xegu, ¡rü nüxna choxü̃ ínanguxuchixẽxẽ i ñaa ngúxü̃ i tá chingexü̃! Natürü chanaxwa̱xe i curütama ngúchaü̃ cuxü rü tama i choxrü —ñanagürü.

Édra 3:11

Rü ñuxre ga nümagü rü nawiyaegü rü Tupanaxü̃ nicua̱xüü̃gü. Rü yema togü rü nanangãxü̃gü rü ñanagürügü: —¡Nüxna moxẽ pexã ya Cori ya Tupana erü nüma rü tamaxã namecüma rü ngẽma norü ngechaü̃ i taxca̱x rü taguma nagu̱x! —ñanagürügü. Rü guxü̃ma ga duü̃xü̃gü rü nataãẽgü, rü tagaãcü Cori ya Tupanaxü̃ nicua̱xüü̃gü, yerü marü inaxügü nax wena namexẽẽxü̃ ga Cori ya Tupanapata ga taxü̃ne.

Yema Cuáü̃ nüxü̃ dauxü̃ i yixcüra tá ngupetüxü̃chiga 4:9

Rü yema daxũcüã̱x ga maxẽxü̃, rü yexguma gumá tochicaxü̃wa rütocü ga woetama ngẽxmaechacüxü̃ yacua̱xüü̃gügu rü moxẽ nüxna naxãgügu, rü yema 24 ga ãẽ̱xgacügü rü nape̱xegu nacaxã́pü̱xügü, rü nüxü̃ nicua̱xüü̃gü, rü nape̱xegu nananu ga norü nga̱xcueruü̃gü.

Norü taxre ga to ga popera ga ãẽ̱xgacügüchiga ümatüxü̃ 6:2

Natürü i choma rü cuxca̱x chanaxü ya daa ĩpata ya taxü̃ne nax yimawa cungexmaechaxü̃ca̱x —ñanagürü.

Norü taxre ga popera ga ãẽ̱xgacügüchiga 19:15

Rü ñaãcü yéma nayayumüxẽ rü ñanagürü: —Pa Corix, Pa Iraétanüxü̃arü Tupana i Nua Daa Cupataarü Aixepewa i Nachica i Üünexü̃wa Ngẽxmaxex, rü cuxicatama nixĩ ya Tupana i norü yora quixĩxü̃ i guxü̃ma i nachixü̃anegü i ñoma i naanewa ngẽxmagüxü̃. Rü cumatama cunaxü ga daxũguxü̃ ga naane rü ñoma ga naane.

Iraétanüxü̃arü muxchiga 16:22

Natürü nüma ga Moiché rü Aróü̃ rü Tupanape̱xegu ñaxtüanegu nanangücuchitanü rü ñanagürügü nüxü̃: —Pa Tupanax, cuma nax cunamaxẽxẽẽxü̃ i guxü̃ma i duü̃xü̃gü, rü tama name i wüxitama i duü̃xü̃arü chixexü̃gagu rü guxü̃ma i duü̃xü̃gümaxã cunu —ñanagürügü.

Iraétanüxü̃arü muxchiga 14:5

Rü yexguma ga Moiché rü Aróü̃ rü ñaxtüanegu nanangücuchitanü nape̱xewa ga guxü̃ma ga duü̃xü̃gü.

Naanearü ügüchiga 17:3

Rü yexguma ga Abráü̃ rü waixü̃müanegu nanangücuchi. Rü yoxni ga Tupana rü nidexachigüama rü ñanagürü: —Ñaãcü tá nixĩ i cumaxã nax ichaxügaxü̃. Rü cuma tá nixĩ i norü o̱xi quixĩxü̃ i muxü̃tama i nachixü̃anecüã̱x i duü̃xü̃gü.

Lebítanüxü̃arü puracüchiga 10:2

Rü yemaca̱x Tupanawa ínaxũxũ ga üxüema ga ínaguxü̃. Rü yemaacü Tupanape̱xegu nayue.

Iraétanüxü̃arü muxchiga 23:21

Rü nüma ya Tupana rü tama nagu narüxĩnü i norü chixexü̃ i ngẽma duü̃xü̃gü i Iraétanüxü̃ i Acóbuarü duü̃xü̃gü ixĩgüxü̃. Rü nüma ya Cori ya norü Tupana rü natanüwa nangẽxma, rü tama chixexü̃ namaxã naxüxchaü̃. Rü nümagü rü norü ãẽ̱xgacüãcü nüxü̃ nacua̱xgü.