Lebítanüxü̃arü puracüchiga 4:32 - Tupanaarü Ore

³² Rü ngẽxguma yíxema duü̃xẽarü ãmare rü wüxi i carnéruxacü yixĩxgu, rü name nax wüxi i carnéruxacü i ngexü̃ i taxuwama chixexü̃ nax yixĩxü̃.

Lebítanüxü̃arü puracüchiga 4:32 Referans Kwoze

Lebítanüxü̃arü puracüchiga 4:28

Rü ngẽxguma yíxema duü̃xẽ nüxü̃ icua̱xãchigu nax pecadu taxüxü̃, rü name nax chopatawa tanagaxü̃ i wüxi i cabra i taxuwama chixexü̃ nax tümaarü pecaduarü ütanüruxü̃ yixĩxü̃ca̱x i ngẽma ãmare.

Nüxíraxü̃xü̃ ga popera ga Pedru ümatüxü̃ 3:18

Yerü nümatama ga Cristu rü ngúxü̃ ninge, rü wüxicanatama guxãarü pecaduca̱x nayu. Rü nüma rü taxuxü̃ma ga chixexü̃ naxü, natürü chixexü̃ ga duü̃xü̃güca̱x ngúxü̃ ningẽ nax Tupanaxü̃tawa pexü̃ nagagüxü̃ca̱x. Rü woo nayu ga naxü̃ne, natürü ga naãxẽ rü namaxü̃.

Nüxíraxü̃xü̃ ga popera ga Pedru ümatüxü̃ 2:22

Nüma ga Cristu rü taguma pecadu naxü, rü taguma texéxü̃ nawomüxẽxẽ.

Yema Cuáü̃ nüxü̃ dauxü̃ i yixcüra tá ngupetüxü̃chiga 5:6

Rü ñu̱xũchi nüxü̃ chadau ga wüxi ga Carnéruxacü ga ma̱xwa írüdaxü̃ ga yexma chixü̃ naxü̃tagu ga gumá tochicaxü̃wa rütocü rü norü ngãxü̃tanügu ga yema ãgümücü ga daxũcüã̱x ga maxẽxü̃ rü yema 24 ga ãẽ̱xgacügü. Rü nüxü̃́ nayexma ga 7 ga naxchata̱xcu̱xre rü 7 ga naxetü. Rü gumá 7 ga naxetü rü ngẽma nixĩ i ngẽma 7 i Tupanaãxẽ ya Üünecü i guxü̃wama i ñoma i naanewa namugüxü̃.

Nüxíraxü̃xü̃ ga popera ga Pedru ümatüxü̃ 2:24

Rü nümatama ga Cristu rü nügüxü̃negu nayange ga tórü pecadugü ga yexguma curuchagu nayu̱xgu. Rü yemaacü nanaxü nax nüxü̃ rüxoexü̃ca̱x i tórü chixexü̃ rü naxca̱xicatama imaxẽxü̃ca̱x. Nüma rü pexca̱x nanapi̱x nax yemaacü pexü̃ nameexẽẽxü̃ca̱x.

Popera ga Yudíugü ga yaxõgüxü̃ca̱x ümatüxü̃ 9:14

Natürü nagü ya Cristu rü naporaxüchi norü yexera ya yimá nagü i ngẽma naxü̃nagü. Rü nüma ya Cristu rü Tupanaãxẽarü poramaxã nügü inaxã rü nayu nax ãmare i ngẽarü chixexü̃ã́xü̃ yixĩxü̃ca̱x nax yemaacü yanaxoxẽẽãxü̃ca̱x i tórü chixexü̃ i tórü ĩnüwa ngẽxmagüxü̃ nax ngẽmaãcü Tupana ya Maxü̃cüca̱x imaxẽxü̃ca̱x.

Popera ga Yudíugü ga yaxõgüxü̃ca̱x ümatüxü̃ 7:26

Rü ñu̱xma rü Ngechuchu rü Chacherdóte ya Guxü̃étüwa Ngẽxmacü nixĩ ya inaxwa̱xecü. Erü nüma rü aixcüma naxüüne, rü nawa nataxuma i chixexü̃, rü nangearü pecaduã̱x, rü taguma duü̃xü̃gürüxü̃ pecadu naxü. Rü nüma nixĩ i daxũguxü̃ i naaneétüwa ngẽxmaxü̃ rü namaxã inacuáxü̃.

Efesios 5:27

Rü yemaacü tüxü̃ nimexẽxẽ nax nügütama tüxü̃ nawéxü̃ca̱x nax aixcüma guxü̃wama imexü̃ rü nax nataxuxü̃ma i ta̱xacü i tórü chixexü̃ rü bai i írarüwa. Rü yemaacü tüxü̃ nade nax ixüünegüxü̃ca̱x rü guxü̃wama nape̱xewa imexü̃ca̱x.

Ore i mexü̃ ga Cuáü̃ ümatüxü̃ 1:36

Rü yexguma Ngechuchuxü̃ nada̱u̱xgu ga yéma nax naxüpetüxü̃, rü Cuáü̃ rü ñanagürü: —¡Dücax! Yimá nixĩ ya Tupanaarü Carnéruxacü ya núma namucü nax pecaduca̱x nayuxü̃ca̱x —ñanagürü.

Ore i mexü̃ ga Cuáü̃ ümatüxü̃ 1:29

Rü moxü̃ãcü ga Cuáü̃ rü Ngechuchuxü̃ nadau ga naxca̱x nax yaxũxü̃. Rü ñanagürü ga Cuáü̃: —¡Dücax! Daa nixĩ ya yimá Tupanaarü Carnéruxacü ya núma namuãcü nax yanaxoxẽẽãxü̃ca̱x i ñoma i naanecüã̱x i duü̃xü̃güarü pecadugü.

Ore i mexü̃ ga Luca ümatüxü̃ 1:35

Rü nüma ga daxũcüã̱x ga Gábi rü ngĩxü̃ nangãxü̃, rü ñanagürü: —Tupanaãxẽ ya Üünecü tá cuxna nangu. Rü Tupana ya Guxü̃étüwa Ngẽxmacüarü pora rü wüxi i caixanexü̃rüxü̃ tá cugu nayanga̱i̱xema. Rü ngẽmaca̱x ngẽma cune rü Üünecü ya Tupana Nanemaxã tá nanaxugü i duü̃xü̃gü.

Ichaía 53:7

Rü nanacua̱i̱xgü, natürü nüma rü nügü inaxã rü tama nügüétüwa nidexa. Rü ñoma carnéru i ma̱xwa nagagüxü̃rüxü̃ namaxã nixĩgü. Natürü nüma rü nachianemare. Rü ñoma wüxi i carnéru i yoü̃ta̱xawa nagagüxü̃rüxü̃ nixĩ.

Lebítanüxü̃arü puracüchiga 5:6

Rü yíxema duü̃xẽ rü tümaarü pecaduarü ütanüruxü̃ tá Cori ya Tupanaca̱x tayama̱x i wüxi i chíbuxacü i ngexü̃ rüe̱xna wüxi i carnéruxacü i ngexü̃ i tümaxü̃naxüchitama ixĩxü̃. Rü nüma ya chacherdóte rü tá Tupanaca̱x nayagu i ngẽma tümaarü ãmare nax ngẽmaãcü Tupana tüxü̃́ nüxü̃ iyarüngü̃maxü̃ca̱x i tümaarü pecadu ya yíxema duü̃xẽ.

Ínachoxü̃xü̃chiga 12:5

Natürü ngẽma naxü̃na rü chanaxwa̱xe nax nayatüxü̃ rü wüxi ya taunecü nüxü̃́ ngẽxmaxü̃ rü taxuwama nachixexü̃. Rü name nax wüxi i carnéruxacü rüe̱xna wüxi i chíbuxacü nax yixĩxü̃.

Ínachoxü̃xü̃chiga 12:3

¡Rü guxü̃ma i Iraétanüxü̃maxã nüxü̃ pixu, rü ñapegürü tá nüxü̃: “Doma tauemacügu rü norü 10 i ngunexü̃gu, rü Tupana nanaxwa̱xe i wüxíechigü i pema rü peyama̱x i wüxi i carnéru rüe̱xna wüxi i chíbuxacü i wüxichigü ya ĩpatawa!

Lebítanüxü̃arü puracüchiga 1:3

Rü ngẽma tümaarü ãmare rü tá tümaxü̃natama nixĩ. Rü wüxi i woca iyatüxü̃ i taxuwama chixexü̃ tá nixĩ. Rü chopataã̱xtüwa ngẽxmaxü̃ i guruü̃wa tá nixĩ i itayaguxü̃. Rü ngẽxguma i choma ya Cori ya Tupana rü tá chanayaxu.