Lebítanüxü̃arü puracüchiga 21:9 - Tupanaarü Ore

⁹ Rü ngẽxguma wüxi i chacherdótexacü rü ngexü̃ i naxü̃nemaxã taxexü̃ãcü namaxü̃gu, rü tama ngĩgü ingechaü̃ rü tama ngĩnatüxü̃ ingechaü̃. Rü name i noxtacüma maxãcü ngĩxü̃ pigu.

Lebítanüxü̃arü puracüchiga 21:9 Referans Kwoze

Naanearü ügüchiga 38:24

Rü nangupetü ga tomaepü̱x ga tauemacü, rü Yudámaxã nüxü̃ nayarüxugüe rü ñanagürügü: —Cuneã̱x i Tamára rü togü i yatügümaxã ipe rü ngẽmaca̱x i ñu̱xma rü ixãxacü rü itacharaü̃ —ñanagürügü. Rü yexguma ga nüma ga Yudá rü aita naxü rü ñanagürü —¡Ípenata̱xüchi rü peyagu! —ñanagürü.

Lebítanüxü̃arü puracüchiga 19:29

¡Rü taxũtáma cuxacüxü̃ cuxucu̱xẽ nax naxü̃nemaxã nataxexü̃ca̱x! Rü taxü̃ i ngẽmaãcü chixexü̃maxã cuyapaxẽẽxü̃ i cuchixü̃ane.

Popera ga Títoca̱x naxümatüxü̃ ga Pauru 1:6

Rü ngẽma yaxõgüxü̃arü ãẽ̱xgacü, rü name i mea namaxü̃ nax taxúema chixri nachiga idexagüxü̃ca̱x. Rü name i wüxitama tixĩ ya naxma̱x. Rü naxacügü rü name nax yaxõgüãxü̃ rü mea namaxẽxü̃ nax taxúema nüxü̃ ixuxü̃ca̱x nax tama nanatüga naxĩnüexü̃ rü chixri namaxẽxü̃.

Maraquía 2:3

Rü ñanagürüama: —Choma rü tá pexna chanayaxu i ngẽma puracü ga pexna chaxãxü̃. Rü pechiwegu tá chanawogü ya yima naü̃ i ngẽma naxü̃nagü i cha̱u̱xca̱x pedaixü̃. Rü wüxigu yima naü̃maxã tá pexü̃ íchawoxü̃ i pemax.

Echequié 9:6

¡Rü chopata ya taxü̃newa tá ipenaxügü nax penadaixü̃ rü guxü̃táma pedai rü yaxguã̱xgü, rü ngextü̱xüxü̃gü, rü paxü̃gü, rü buxü̃gü, rü ngexü̃gü! ¡Natürü taxũtáma nüxü̃ pedau i ngẽma ãégacatüxü̃! —ñanagürü. Rü yemaacü inanaxügüe nax nadaiaxü̃ ga yema ãẽ̱xgacügü ga yaxguã̱xgü ga Iraétanüxü̃maxã icua̱xgüxü̃.

Ichaía 33:14

Rü Chióü̃wa nidu̱xruxe i ngẽma chixexü̃gu maxẽxü̃. Rü ngẽma tama yaxõgüxü̃ rü poraãcü namuü̃e rü ñanagürügü: —¿Texé chi i tatanüwa tamaxama naétüwa ya yima üxü ya tüxü̃ iguxü̃ne ya guxü̃guma inaiechane? —ñanagürügü.

1 Chamué 2:34

Rü wüxi i curü cua̱xruxü̃ tá nixĩ i ngẽma taxre i cune i Oní rü Fineéxü̃ ngupetüxü̃, erü ngẽma taxre rü ngẽmatama i ngunexü̃gu tá nayue.

1 Chamué 2:17

Rü yemaacü naxãũcümaxü̃chi ga yema chixexü̃ ga yema chacherdótearü ngü̃xẽẽruü̃gü üxü̃ Cori ya Tupanape̱xewa, yerü nagu nidauxcüraxü̃gü ga yema ãmaregü ga nüma ga Cori ya Tupanaarü ixĩxü̃.

Yochué 7:25

Rü Yochué rü Acáü̃xü̃ ñanagürü: —¿Tü̱xcüü̃ chixexü̃ tatanüwa ícunguxẽxẽ? Rü ñu̱xma ya Cori ya Tupana rü ngẽma chixexü̃ tátama nixĩ i cuxna nanguxẽẽxü̃ —ñanagürü. Rü yema ñaxgu ga Yochué, rü guxü̃ma ga Iraétanüxü̃ rü nutamaxã Acáü̃xü̃ rü natanüxü̃xü̃ nadai. Rü ñu̱xũchi natanüwa nanangixichi.

Yochué 7:15

Rü yíxema tümaxü̃tagu nüxü̃ iyangaugüxe i ngẽma ngẽmaxü̃gü ga chachu̱xuxü̃, rü tá tüxü̃ nigugü namaxã i tümaxacügü rü guxü̃ma i tümaarü ngẽmaxü̃gü, erü tümagagu chixexü̃ naxca̱x ínangu i Iraétanüxü̃, erü tama naga taxĩnü i chorü mu —ñanagürü ga Tupana.

Lebítanüxü̃arü puracüchiga 20:14

Rü ngẽxguma wüxi i yatüxü̃ rü wüxi i ngexü̃maxã naxãxma̱xgu rü ñu̱xũchi ngĩémaxãtama naxãxma̱xgu, rü wüxi i pecadu i poraãcü chixexü̃ nixĩ i ngẽma naxüxü̃. Rü ngẽmaca̱x i nüma i ngẽma yatü rü ñu̱xũchi ngẽma taxre i ngexü̃gü rü name nax wüxicana maxü̃ãcü ípenaguxü̃. Rü ngẽmaãcü tá petanüwa inarüxo i ngẽma nacüma i chixexü̃.

Ínachoxü̃xü̃chiga 31:14

Rü ngẽma ngü̃chigaarü ngunexü̃gu rü nachu̱xu nax pepuracüexü̃, rü ngẽmaca̱x penaxwa̱xe i mea penaxaure. Rü yíxema tama naxaurexe i ngẽma ngunexü̃ rü tá tayu. Rü yíxema ngü̃chigaarü ngunexü̃gu puracüxe rü name nixĩ noxtacüma petanüwa tüxü̃ ípemuxũchixü̃.

Wenaxarü naxümatü ga Tupanaarü mugü 22:21

rü ngẽxguma i ngẽma ĩanearü ãẽ̱xgacügü rü ngĩnatüpataarü ĩã̱xgu tá ngĩxü̃ nayamugü. Rü yima ĩanearü yatügü rü ngẽxma tátama nutagümaxã ngĩxü̃ nima̱xgü nagagu i ngẽma chixexü̃chixü̃ i naxüxü̃ i Iraétanüxü̃tanüwa i ngĩnatüpatawa. Rü ngẽmaãcü tá peyanaxoxẽxẽ i ngẽma chixexü̃ i petanüwa ngẽxmaxü̃.