Lebítanüxü̃arü puracüchiga 19:33 - Tupanaarü Ore

³³ ¡Rü taxṹ i ngúxü̃ nüxü̃ pingexẽxẽxü̃ i ngẽma to i nachixü̃anecüã̱x i petanügu ãpataxü̃!

Lebítanüxü̃arü puracüchiga 19:33 Referans Kwoze

Ínachoxü̃xü̃chiga 23:9

Rü taxũtáma chixri namaxã icucua̱x i ngẽma to i nachixü̃anecüã̱x i duü̃xü̃. Yerü pema rü Equítuanewa rü to ga nachixü̃anecüã̱xgü pixĩgü, rü meama nüxü̃ picua̱x nax ñuxãcü yixĩxü̃ ga yexguma to ga nachixü̃anewa peyexmagügu.

Ínachoxü̃xü̃chiga 22:21

Rü taxũtáma chixeãcü namaxã icucua̱x i ngẽma to i nachixü̃anecüã̱x i duü̃xü̃. Yerü pema rü ta rü Equítuanewa to i nachixü̃anecüã̱xgü pixĩgü.

Maraquía 3:5

Rü nüma ya Cori ya Tupana ya Guxãétüwa Ngẽxmacü rü ñanagürü: —Choma rü tá aixcüma pexna chaca i perü chixexü̃ca̱x. Rü chomatátama nüxü̃ chixugüe i ngẽma yuüexü̃, rü ngẽma nai i ngexü̃maxã maxẽxü̃, rü ngẽma doramaxã nügü ípoxü̃xü̃, rü ngẽma norü puracütanüxü̃maxã rü ngẽma yutegüxemaxã, rü ngẽma taxcutagümaxã chixri icua̱xgüxü̃. Rü ngẽxgumarüxü̃ tá ta nüxü̃ chixugüe i ngẽma chixri tümamaxã icua̱xgüxü̃ ya duü̃xẽgü ya to i nachixü̃anecüã̱xgü, rü ngẽma tama chauga ĩnüexü̃ —ñanagürü.

Wenaxarü naxümatü ga Tupanaarü mugü 24:14

Rü tama name i tüxü̃ pepuracüxẽẽmare rü ñu̱xũchi tama tüxü̃́ penaxütanü i ngẽma puracü i taxüxü̃ ya yíxema duü̃xẽ ya perüxü̃ Iraétanüxü̃ ixĩxẽ ya ngearü diẽruã́xẽ. Rü ngẽxgumarüxü̃ ta name nixĩ nax mea tüxü̃́ penaxütanüxü̃ ya yíxema to i nachixü̃anecüã̱x ya wüxi ya perü ĩanegu ãpataxe.

Echequié 22:29

Rü ngẽma duü̃xü̃gü i taarü naaneã̱xgüxü̃ rü chixexü̃gu namaxẽ rü nangĩ̱xgü. Rü tama aixcüma mea tüxü̃́ nanaxütanü ya yíxema nüxü̃́ puracüexe ya ngearü diẽruã̱xgüxe. Rü chixri tümamaxã inacua̱xgü ya yíxema to i nachixü̃anecüã̱xgü ixĩgüxe.

Echequié 22:7

Rü ngẽma duü̃xü̃gü i cuwa maxẽxü̃ rü tama nanatüxü̃ rü tama naéxü̃ nangechaü̃gü. Rü chixri tümamaxã inacua̱x ya yíxema yutegüxe rü yíxema taxcuexe rü yíxema to i nachixü̃anewa ne ĩxẽ.

Wenaxarü naxümatü ga Tupanaarü mugü 24:17

¡Rü taxũtáma chixri tümamaxã pechopetü ya yíxema to i nachixü̃anecüã̱x i petanüwa ngẽxmagüxe, rü bai ya yíxema taxcutagü! ¡Rü yíxema yutegüe rü taxũtáma tümachiruca̱x tüxna peca ega pexü̃tawa diẽruca̱x ítacaxgu nax yixcüama pexü̃́ tanatáeguxẽẽxü̃ca̱x!

Wenaxarü naxümatü ga Tupanaarü mugü 24:18

¡Rü taxṹ i nüxü̃ iperüngümaexü̃ ga pemax rü Equítuanecüã̱xarü mugüruü̃gü pixĩgüxü̃, rü nüma ga Cori ya perü Tupana nixĩ ga yéma pexü̃ ínguxü̃xẽẽcü! Rü ngẽmaca̱x i ñu̱xma rü pexü̃ chamu nax peyanguxẽẽxü̃ i guxü̃ma i ngẽma pemaxã nüxü̃ chixuxü̃.

Wenaxarü naxümatü ga Tupanaarü mugü 27:19

“Rü ngẽma duü̃xü̃ i wüxi ya duü̃xẽ ya to i nachixü̃anecüã̱xmaxã chixri icuáxü̃, rüe̱xna wüxi ya yutéxemaxã chixri icuáxü̃, rüe̱xna wüxi ya taxcutamaxã chixri icuáxü̃ rü chixexü̃wa nangẽxma”. Rü ngẽxguma i guxü̃ma i duü̃xü̃gü rü “Ngẽmaãcü yixĩ”, ñanagürügü tá.

Ínachoxü̃xü̃chiga 22:20

Rü texé ya yíxema tupananetagüca̱xmare ínaguxe i tümaarü ãmaregü rü tama Cori ya Tupanaca̱xicatama ínaguxe, rü name nax yu namaxã pexueguxü̃.