Lebítanüxü̃arü puracüchiga 19:14 - Tupanaarü Ore

¹⁴ ¡Rü taxṹ i chixexü̃ namaxã cuxueguxü̃ i ngẽma ngauxchiẽ̱xü̃! ¡Rü taxṹ i tüxü̃ quitoxyepe̱xexü̃ ya yíxema ngexetüxe! ¡Ẽcü Tupanaxü̃ nawe̱x nax nüxü̃ cungechaxü̃xü̃! Rü choma nixĩ ya Cori ya Tupana.

Lebítanüxü̃arü puracüchiga 19:14 Referans Kwoze

Wenaxarü naxümatü ga Tupanaarü mugü 27:18

“Rü ngẽma duü̃xü̃ ya wüxi ya ngexetüxe tümaarü namana tüxü̃ ixũgachixẽẽxü̃, rü chixexü̃wa nangẽxma”. Rü ngẽxguma i guxü̃ma i duü̃xü̃gü rü “Ngẽmaãcü yixĩ”, ñanagürügü tá.

Lebítanüxü̃arü puracüchiga 19:32

¡Rü ngẽxguma yaxegüpe̱xewa cungexmagu rü inachi rü inawe̱x nax nüxü̃ cungechaxü̃xü̃! ¡Rü inawe̱x nax nüxü̃ cungechaxü̃xü̃ ya curü Tupana! Rü choma nixĩ i Cori ya Tupana.

Nüxíraxü̃xü̃ ga popera ga Pedru ümatüxü̃ 2:17

Rü name nixĩ i mea penayauxgü i guxü̃ma i duü̃xü̃gü. ¡Rü nüxü̃ pengechaxü̃ i taenexẽgü i yaxõgüxü̃! ¡Rü nüxü̃ pemuü̃e ya Tupana! ¡Rü naga pexĩnüe ya yimá ãẽ̱xgacü ya Rómawa ngẽxmacü!

Romanos 14:13

Rü ngẽmaca̱x, Pa Chauenexẽgüx, rü tama name nax tamücügüxü̃ ixuechaxü̃. Rü narümemae nixĩ i nüxü̃ perüxoe i guxü̃ma i chixexü̃ i peenexẽgüxü̃ pecadugu yixẽẽxü̃ rü ẽ̱xna norü õxü̃ chixexẽẽxü̃.

Lebítanüxü̃arü puracüchiga 25:17

Rü tama name i pegügu pidauxcüraxü̃gü. ¡Rü perü Cori ya Tupanaga pexĩnüe! Erü choma nixĩ i perü Cori ya Tupana chixĩxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 2:14

Natürü nangẽxma i ta̱xacü icuxüxü̃ i tama chorü me ixĩxü̃. Rü ngẽma nixĩ nax cugüxü̃tawa cunangexmagüxẽẽxü̃ i ñuxre i curü duü̃xü̃gü i tama nüxü̃ rüxoexü̃ ga gumá nũxcümaü̃cü ga Balaáü̃arü ngu̱xẽẽtae. Rü nüma ga Balaáü̃ rü Baláxü̃ naxuxcu̱xẽ nax pecadugu nayixẽẽãxü̃ca̱x ga Iraétanüxü̃gü. Rü nüma ga Baláx rü yema Iraétanüxü̃güaxü̃́ nanangúchaü̃xẽxẽ nax nangõ̱xgüãxü̃ca̱x ga õna ga namaxã tupananetachicüna̱xãgüxü̃ yacua̱xüü̃güxü̃. Rü yexgumarüxü̃ ta nüxü̃́ nanangúchaü̃xẽxẽ nax ngexü̃gü i naxü̃nemaxã taxexü̃gümaxã namaxẽxü̃ca̱x ga Yudíugü.

Neemía 5:15

Natürü yema nüxíraxü̃xü̃ ga ãẽ̱xgacügü, rü poraãcü duü̃xü̃güaxü̃́ nanaguxchaxẽẽgü, yerü duü̃xẽgüna 40 tachinü ga diẽruca̱x ínacagü nax guxema diẽrumaxã norü õnaca̱x rü bínuca̱x nataxegüxü̃ca̱x. Rü yexgumarüxü̃ ta ga yema norü ngü̃xẽẽruü̃gü rü duü̃xü̃güaxü̃́ nanaguxchaxẽẽgü. Natürü i choma rü tama ngẽma chaxü erü Cori ya Tupanaxü̃ chamuü̃.

Nüxíraxü̃xü̃ ga popera ga Pedru ümatüxü̃ 1:17

Rü pema nax “Pa Tonatüx”, ñapegüxü̃ nüxü̃ ya Tupana, rü ñu̱xma nax ñoma i naanewa pemaxẽxü̃ rü name nixĩ i guxü̃guma naga pexĩnüe rü nüxü̃ pemuü̃exü̃. Erü nüma rü aixcümaxü̃chi nanangugü i wüxichigü i duü̃xü̃güarü maxü̃ rü tüxü̃ napoxcu ya guxãma ya yíxema chixexü̃ ügüxe, rü taxúexü̃ma naxüpetü.

Romanos 12:14

Rü ngẽxguma chi texé chixexü̃ pexca̱x ínguxẽẽgu, rü name nixĩ i tümaca̱x peyumüxẽgü. Rü name nixĩ i Tupanana tümaca̱x peca nax tüxü̃ nangü̃xẽẽxü̃ca̱x rü tama tüxü̃ napoxcuxü̃ca̱x.

Naanearü ügüchiga 42:18

Natürü yema tomaepü̱x ga ngunexü̃guwena rü ñanagürü nüxü̃: —Choma rü Tupanaxü̃ chamuü̃. ¡Rü Ñaa tá pexü! Rü ngẽxguma tá nixĩ i taxũtáma pexü̃ chadaixü̃.

1 Corintios 10:32

Rü tama name i penaxü i ta̱xacü i togüxü̃ chixexü̃gu yixẽẽxü̃, rü woo Yudíugü yixĩgügu rü ẽ̱xna tama Yudíugü yixĩgügu, rü ẽ̱xna yaxõgüxü̃ yixĩgügu.

Lebítanüxü̃arü puracüchiga 19:15

Rü cumax, Pa Ãẽ̱xgacüx, ¡rü ngẽxguma poxcu cuxuegu̱xgu rü taxũtáma chixri cunaxü i ngẽma! ¡Rü taxũtáma naétüwa cuxü i ngẽma ngearü diẽruã́xü̃ ega aixcüma chixexü̃ naxü̱xgu! ¡Rü taxũtáma naga cuxĩnü i ngẽma diẽruã́xü̃! Rü cumax, Pa Ãẽ̱xgacüx, rü ngẽxguma poxcu cuxuegu rü name i ngẽma aixcüma guxchaxü̃ üxü̃maxã cunaxuegu i poxcu.

Wiyaegü 111:10

Rü yíxema aixcüma cua̱x tüxü̃́ ngẽxmaxe rü Cori ya Tupanaxü̃ ticua̱xüü̃gü. Rü yíxema Cori ya Tupanaxü̃ icua̱xüü̃güxe rü aixcüma tümaãẽxü̃ ticua̱x. Rü name nixĩ i guxü̃guma nüxü̃ ticua̱xüü̃gü.