Lebítanüxü̃arü puracüchiga 16:17 - Tupanaarü Ore

^17-18 Rü ngẽxguma Aróü̃ ngẽma naxmachiã i üünexü̃chixü̃arü aixepewa nangẽxmagu nax Tupanape̱xewa naxca̱x íyaca̱xaxü̃ca̱x nax duü̃xü̃güarü pecaduxü̃ íyanangü̃maxü̃ca̱x, rü taxúetama nüxna tangaicama ya yima Tupanapata. Rü ngẽxguma Tupana Aróü̃xü̃ ngãxü̃gu rü marü nüxü̃́ nüxü̃ iyanangümagu i Aróü̃arü pecadugü rü Aróü̃patacüã̱xarü pecadugü rü guxü̃ma i Iraétanüxü̃arü pecadugü, rü nüma i Aróü̃ rü tá ínaxũxũ nax Tupanaarü puracüca̱x namexẽẽãxü̃ca̱x i ngẽma ãmarearü guruxü̃ i Tupanapatape̱xewa ngẽxmaxü̃. Rü yimá nagü i ngẽma wocaxacü rü ngẽma chíbu rü tá íxracü ngéma nange, rü yimámaxã tá nanacha i ngẽma ãmarearü guruü̃chatacu̱xregü rü nacüwagü.

Lebítanüxü̃arü puracüchiga 16:17 Referans Kwoze

Ore i mexü̃ ga Luca ümatüxü̃ 1:10

Rü yema pumarate̱xe íyaguyane rü guxü̃ma ga duü̃xü̃gü ga düxétüwa yexmagüxü̃ rü ínayumüxẽgü.

Ichaía 53:6

Rü guxãma i yixema rü itarütauxe ñoma carnérugü irütauxexü̃rüxü̃. Yerü wüxichigü ga yixema rü nagu taxĩ ga tóxrütama ngúchaü̃. Natürü nüma ga Cori ya Tupana rü gumá norü duü̃cüxü̃ nayangexẽxẽ ga guxü̃ma ga tórü chixexü̃gü.

Ínachoxü̃xü̃chiga 34:3

¡Rü taxúetama cuwe dauxü̃ taxĩ! Rü tama chanaxwa̱xe nax texé nüxna ngaicamaxü̃ ya daa ma̱xpǘne, rü woo carnérugü, rü woo wocagü rü tama chanaxwa̱xe nax norü ngaicamana maxẽ nangõ̱xgüãxü̃ —ñanagürü ga Tupana.

Nüxíraxü̃xü̃ ga popera ga Pedru ümatüxü̃ 3:18

Yerü nümatama ga Cristu rü ngúxü̃ ninge, rü wüxicanatama guxãarü pecaduca̱x nayu. Rü nüma rü taxuxü̃ma ga chixexü̃ naxü, natürü chixexü̃ ga duü̃xü̃güca̱x ngúxü̃ ningẽ nax Tupanaxü̃tawa pexü̃ nagagüxü̃ca̱x. Rü woo nayu ga naxü̃ne, natürü ga naãxẽ rü namaxü̃.

Nüxíraxü̃xü̃ ga popera ga Pedru ümatüxü̃ 2:24

Rü nümatama ga Cristu rü nügüxü̃negu nayange ga tórü pecadugü ga yexguma curuchagu nayu̱xgu. Rü yemaacü nanaxü nax nüxü̃ rüxoexü̃ca̱x i tórü chixexü̃ rü naxca̱xicatama imaxẽxü̃ca̱x. Nüma rü pexca̱x nanapi̱x nax yemaacü pexü̃ nameexẽẽxü̃ca̱x.

Popera ga Yudíugü ga yaxõgüxü̃ca̱x ümatüxü̃ 9:7

Natürü yema to ga naxmachiãwa rü yema chacherdótegüarü ãẽ̱xgacüxicatama nixĩ ga wüxicanatama yexma ücuxü̃ ga wüxichigü ga taunecügu. Rü yexguma yexma naxücu̱xgu rü yéma nanange ga nagü nax gumámaxã yema baúxü̃ namaxcuétüxü̃. Rü yemaacü ga yema chacherdótegüarü ãẽ̱xgacü rü Tupanana nanaxã ga gumá nagü nax noxrütama pecaduxü̃ rü yema duü̃xü̃güarü pecadu ga naxücüraxü̃xü̃ iyanangümaxü̃ca̱x ga Tupana.

Popera ga Yudíugü ga yaxõgüxü̃ca̱x ümatüxü̃ 1:3

Rü Nanewa nixĩ i nüxü̃ idauxü̃ nax ñuxãcü naxüünexü̃ i nüma ya Tupana. Rü nüma ya Nane, rü Nanatü ya Tupanarüü̃tama nixĩ. Rü ñu̱xma nax guxü̃arü ãẽ̱xgacü yixĩxü̃ ya Nane, rü nüma rü norü orearü poramaxã guxü̃maama inacua̱x. Rü nüma ya Nane nixĩ ga taxca̱x nayuxü̃ nax nüxü̃ rüxoexü̃ca̱x ga tórü pecadugü. Rü yemawena rü Nanatüxü̃tawa naxũ rü yéma Nanatüarü tügünecüwawa nayarüto.

Nüxíraxü̃xü̃ ga popera ga Timutéuca̱x naxümatüxü̃ ga Pauru 2:5

Erü Tupana rü wüxitama nixĩ rü nataxuma i to. Rü ngẽxgumarüxü̃ ta wüxitama nixĩ i Tupanape̱xewa taétüwa chogüxü̃. Rü nüma nixĩ ya Ngechuchu ya Cristu ya Tupana Nane ga duü̃xü̃xü̃ ixĩcü.

Ngechuchuarü ngúexü̃gü ga yamugüxü̃arü puracüchiga 4:12

Rü yimá Ngechuchuxicatama nixĩ ya tórü maxẽxẽxẽruxü̃, erü yixicatama nixĩ ga Tupana nüxü̃ unetacü i ñoma i naanewa nax tüxü̃ namaxẽxẽẽxü̃ca̱x —ñanagürü ga Pedru.

Danié 9:24

Rü 70 i yüxügü ngupetüguwena rü yima curü ĩane ya üünene ya Yerucharéü̃ rü ngẽma curü duü̃xü̃gü i Iraétanüxü̃ rü düxwa tá inayarüxo i norü chixexü̃ i naxügüxü̃ rü tá Tupanaga naxĩnüe. Rü Tupana tá nüxü̃́ inanaxoxẽxẽ i ngẽma norü chixexü̃gü, rü tá nüxü̃́ nüxü̃ inarüngüma i ngẽma norü chixexü̃. Rü tá ningucuchi ya yimá aixcüma mecü nax guxü̃guma norü duü̃xü̃gümaxã mea inacuáxü̃ca̱x. Rü ngẽmaãcü tá ningu ga yema Tupana cuxü̃ wéxü̃. Rü wena tá nanamexẽxẽ ya yima napata ya üünene.

Lebítanüxü̃arü puracüchiga 16:16

Rü nüma i Aróü̃ rü ngẽmaãcü tá nixĩ i chopataarü naxmachiã i üünexüchixü̃wa iyanaxoxẽẽãxü̃ i guxü̃ma i ngẽma Iraétanüxü̃arü ãũãchixü̃gü rü yema nax tama chauga naxĩnüexü̃, rü yema togü ga pecadugü ga naxügüxü̃. Rü ngẽma duü̃xü̃güpatagüarü ngãxü̃tanüwa ngẽxmane ya chopata, rü nüma i Aróü̃ rü ngẽxgumarüxü̃ tá ta nawa inanaxoxẽxẽ i ngẽma Iraétanüxü̃arü ãũãchixü̃gü.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 6:34

rü Chamué rü Ercaná nane nixĩ, rü Ercaná rü Yeruáü̃ nane nixĩ, rü Yeruáü̃ rü Erié nane nixĩ, rü Erié rü Tóa nane nixĩ,