Lebítanüxü̃arü puracüchiga 1:3 - Tupanaarü Ore

³ Rü ngẽma tümaarü ãmare rü tá tümaxü̃natama nixĩ. Rü wüxi i woca iyatüxü̃ i taxuwama chixexü̃ tá nixĩ. Rü chopataã̱xtüwa ngẽxmaxü̃ i guruü̃wa tá nixĩ i itayaguxü̃. Rü ngẽxguma i choma ya Cori ya Tupana rü tá chanayaxu.

Lebítanüxü̃arü puracüchiga 1:3 Referans Kwoze

Wenaxarü naxümatü ga Tupanaarü mugü 15:21

Natürü ngẽxguma nachixegu i ngẽma naxü̃na, rüe̱xna yangãnechigügu rüe̱xna nangexetügu, rü tama name nax Tupanana penaxãxü̃ rü peyaguxü̃.

Popera ga Yudíugü ga yaxõgüxü̃ca̱x ümatüxü̃ 9:14

Natürü nagü ya Cristu rü naporaxüchi norü yexera ya yimá nagü i ngẽma naxü̃nagü. Rü nüma ya Cristu rü Tupanaãxẽarü poramaxã nügü inaxã rü nayu nax ãmare i ngẽarü chixexü̃ã́xü̃ yixĩxü̃ca̱x nax yemaacü yanaxoxẽẽãxü̃ca̱x i tórü chixexü̃ i tórü ĩnüwa ngẽxmagüxü̃ nax ngẽmaãcü Tupana ya Maxü̃cüca̱x imaxẽxü̃ca̱x.

Ínachoxü̃xü̃chiga 12:5

Natürü ngẽma naxü̃na rü chanaxwa̱xe nax nayatüxü̃ rü wüxi ya taunecü nüxü̃́ ngẽxmaxü̃ rü taxuwama nachixexü̃. Rü name nax wüxi i carnéruxacü rüe̱xna wüxi i chíbuxacü nax yixĩxü̃.

Efesios 5:27

Rü yemaacü tüxü̃ nimexẽxẽ nax nügütama tüxü̃ nawéxü̃ca̱x nax aixcüma guxü̃wama imexü̃ rü nax nataxuxü̃ma i ta̱xacü i tórü chixexü̃ rü bai i írarüwa. Rü yemaacü tüxü̃ nade nax ixüünegüxü̃ca̱x rü guxü̃wama nape̱xewa imexü̃ca̱x.

Wenaxarü naxümatü ga Tupanaarü mugü 17:1

¡Rü taxũtáma Tupanana penaxã i wüxi i woca i yatüxü̃ rüe̱xna wüxi i carnéru i ta̱xacürü chixexü̃ nawa ngẽxmaxü̃! Erü nüma ya Tupana rü poraãcü naxchi naxai i ngẽma.

Popera ga Yudíugü ga yaxõgüxü̃ca̱x ümatüxü̃ 7:26

Rü ñu̱xma rü Ngechuchu rü Chacherdóte ya Guxü̃étüwa Ngẽxmacü nixĩ ya inaxwa̱xecü. Erü nüma rü aixcüma naxüüne, rü nawa nataxuma i chixexü̃, rü nangearü pecaduã̱x, rü taguma duü̃xü̃gürüxü̃ pecadu naxü. Rü nüma nixĩ i daxũguxü̃ i naaneétüwa ngẽxmaxü̃ rü namaxã inacuáxü̃.

Efesios 2:18

Rü ñu̱xma rü guxãma i yixema rü Cristugagu tüxü̃́ natauxcha nax Tanatü ya Tupanana ingaicamagüxü̃. Rü ngẽmatama Naãxẽ ya Üünexü̃ nixĩ i tüxü̃ rüngü̃xẽẽxü̃ nax nüxna ingaicamagüxü̃ca̱x ya Tanatü ya Tupana.

Naanearü ügüchiga 22:8

Rü nanatü nanangãxü̃ rü ñanagürü: —Pa Chaunex, nüma ya Tupana tá nixĩ ya nüxü̃ cuácü nax nangẽxmaxẽẽãxü̃ i wüxi i carnéruxacü nax naxca̱x yaguxü̃ —ñanagürü. Rü yemaacü wüxigu inaxĩ.

Ore i mexü̃ ga Cuáü̃ ümatüxü̃ 1:36

Rü yexguma Ngechuchuxü̃ nada̱u̱xgu ga yéma nax naxüpetüxü̃, rü Cuáü̃ rü ñanagürü: —¡Dücax! Yimá nixĩ ya Tupanaarü Carnéruxacü ya núma namucü nax pecaduca̱x nayuxü̃ca̱x —ñanagürü.

2 Corintios 9:7

Rü wüxichigü tanaxwa̱xe nax ngĩxü̃ itaxãxü̃ i ngẽma ngĩgu tarüxĩnücü nax ñuxre ngĩxü̃ itaxãxchaü̃xü̃. Rü tama name i aüãcüma ngĩxü̃ itaxã rü ẽ̱xna texé tüxü̃ muãcüma ngĩxü̃ itaxã. Erü Tupana rü nüxü̃ nangechaü̃ i ngẽma duü̃xü̃ i taãẽãcüma ngĩxü̃ ixãxü̃.

Maraquía 1:14

¡Rü guxchaxü̃ namaxã chaxuegu i ngẽma idorata̱xáxü̃ i chomaxã nüxü̃ ixuxü̃ nax naxü̃natanüwa tá wüxi i naxü̃na i mexü̃ choxna muxü̃, natürü chixemarexü̃ nixĩ i cha̱u̱xca̱x yamáxü̃! Rü choma nixĩ i Ãẽ̱xgacü ya Guxãétüwa Changexmaxü̃, rü choxü̃ nixĩ i namuü̃exü̃ i guxü̃ma i nachixü̃anecüã̱xgü —ñanagürü ya Tupana ya Guxü̃étüwa Ngẽxmacü.

Echequié 20:40

Rü guxü̃ma i Iraétanüxü̃ rü yima Iraéanewa ngẽxmane ya chorü ma̱xpǘne ya máchanenewa tá choxü̃ nicua̱xüü̃gü. Rü choma ya Cori ya Tupana nixĩ i nüxü̃ chixuxü̃ i ngẽma. Rü ngéma rü taãẽãcüma tá pexü̃ chayaxu. Rü ngéma rü tá chanaxwa̱xe nax choxna penaxãgüxü̃ i perü ãmaregü. Rü tá chanaxwa̱xe nax ngéma cha̱u̱xca̱x penanaxü̃ i ngẽma nüxíraxü̃xü̃ i penetügüarü o rü guxü̃ma i ngẽma togü i ãmaregü i choxna pexãxü̃.

Wiyaegü 110:3

Rü ngẽma ngunexü̃ i curü uanügüxü̃ curüporamaegu rü curü duü̃xü̃gü rü tá cuxme̱xwa nügü nangẽxmagüxẽxẽ. Rü nimexchiruãcüma tá cupe̱xewa nangugü. Rü ngẽma curü pora rü guxü̃gutáma nitachigü ñoma pucü ya guxü̃guma pa̱xmama rüngucürüxü̃.

Wiyaegü 40:8

Rü chomax, Pa Chorü Tupanax, rü namaxã chataãxẽ nax curü ngúchaü̃ chaxüxü̃. Rü chauãẽgu namaxã changuxü̃ i ngẽma curü ngu̱xẽẽtae.

Iraétanüxü̃arü muxchiga 29:13

Rü ngẽma ngunexü̃ i nagu ipenaxügüxü̃ i ngẽma peta rü cha̱u̱xca̱x tá penadai rü ípenagu i 13 i wocaxacügü i iyatüxü̃, rü taxre i carnérugü i iyatüxü̃, rü 14 i carnéruxacügü i iyatüxü̃ i wüxi ya taunecü nüxü̃́ ngẽxmagüxü̃ i taxuwama ichixexü̃. Rü ngẽmaãcü tá chauãẽgu nayatãũxü̃ i ngẽma naema rü namaxã tá chataãxẽ

Lebítanüxü̃arü puracüchiga 3:1

Rü ngẽxguma texé tümaarü woca i ngexü̃ rüe̱xna yatüxü̃ Cori ya Tupanana taxãxgu nax naxca̱x tayamáxü̃ca̱x rü tayaguxü̃ca̱x nax ngẽmamaxã tanangüxmüxẽẽxü̃ca̱x ya Cori ya Tupana, rü name i wüxi i naxü̃na i taxuwama chixexü̃ nax yixĩxü̃.

Ínachoxü̃xü̃chiga 24:5

Rü ñu̱xũchi nanamu ga ñuxre ga ingextü̱xü̃gü ga Iraétanüxü̃ nax nadaiaxü̃ca̱x ga wocagü ga iyatüxü̃ rü Tupanaca̱x nax ínaguaxü̃ca̱x. Rü yemawa inanawe̱xgü nax aixcüma wena Tupanaga naxĩnüexü̃.

Naanearü ügüchiga 22:13

Rü yexguma ga Abraáü̃ rü nadauegu, rü nüxü̃ nadau ga wüxi ga carnéru ga naxchata̱xcuremaxã chuchuxü̃chapa̱xagu choxü̃. Rü ínayadau, rü nayayaxu. Rü yema nima̱x rü nayagu nanechicüxü.

Ore i mexü̃ ga Cuáü̃ ümatüxü̃ 10:9

Choma nixĩ i ĩã̱x. Rü texé ya chowa ixücuxe rü tá tamaxü̃. Rü mexü̃wa tá tangexma ngẽxgumarüxü̃ i wüxi i carnéru i naxpüü̃gu ücuxü̃ rü ixũxũxü̃ rü mecü ya maxẽxü̃ iyangauxü̃.

Ore i mexü̃ ga Luca ümatüxü̃ 1:35

Rü nüma ga daxũcüã̱x ga Gábi rü ngĩxü̃ nangãxü̃, rü ñanagürü: —Tupanaãxẽ ya Üünecü tá cuxna nangu. Rü Tupana ya Guxü̃étüwa Ngẽxmacüarü pora rü wüxi i caixanexü̃rüxü̃ tá cugu nayanga̱i̱xema. Rü ngẽmaca̱x ngẽma cune rü Üünecü ya Tupana Nanemaxã tá nanaxugü i duü̃xü̃gü.

Ichaía 1:11

Rü nüma ya Cori ya Tupana rü ñanagürü pexü̃: —¿Ta̱xacüca̱x chauxü̃tawa penagagü i ngẽma muxü̃ i pexü̃nagü nax cha̱u̱xca̱x penada̱i̱xü̃ca̱x? Rü marü nüxü̃ charüchau i ngẽma carnérugü i cha̱u̱xca̱x ípeguxü̃ rü ngẽma wocaxacügüarü chíxü̃ i ípeguxü̃. Rü yimá nagü i ngẽma woca iyatüxü̃gü rü carnérugü, rü chíbuxacügü rü nawa chanaxoxéga.

Ínachoxü̃xü̃chiga 32:6

Rü moxü̃ãcü ga pa̱xmama rü ínarüdagü rü nanadai rü ínanagu ga carnérugü nax yemaacü nügü yamexẽẽgüxü̃ca̱x. Rü yemawena ga duü̃xü̃gü rü ínarütogü nax nachibüexü̃ca̱x rü naxaxegüxü̃ca̱x, rü ñu̱xũchi inachigü nax nataãẽgüxü̃ca̱x.

Ínachoxü̃xü̃chiga 29:42

Rü ñaa ãmaregü i ñu̱xma cha̱u̱xca̱x pigugüxü̃rüxü̃ tá nixĩ i guxü̃gutáma cha̱u̱xca̱x naxügüãxü̃ i pexacügü rü petaagü i chopataarü ĩã̱xpe̱xewa. Rü choma rü ngéma tá changexma nax cumaxã chidexaxü̃ca̱x.

Ínachoxü̃xü̃chiga 29:18

¡Rü ngẽma carnéru rü ãmarearü guruü̃wa cha̱u̱xca̱x yagu! Rü ngẽma naema i ngẽma ãmare rü choma rü tá poraãcü namaxã chataãẽxü̃chi.

Naanearü ügüchiga 22:2

Rü Tupana rü ñanagürü nüxü̃: —¡Íyaga ya cune ya Ichaá ya nügümaxã wüxicacü rü poraãcü nüxü̃ cungechaü̃cü! ¡Rü yéa Moríaanewa namaxã naxũ! Rü ngẽxguma ngéma cunguxgu rü chanaxwa̱xe i ngẽxma cha̱u̱xca̱x cuyama̱x rü cuyagu nagu ya yima ma̱xpǘne ya choma tá cumaxã nüxü̃ chaxunetane —ñanagürü.

Naanearü ügüchiga 8:20

Rü yemawena ga Noé rü Tupanaca̱x nanaxü ga wüxi ga ãmarearü guruxü̃. Rü nayayaxu ga ñuxre ga yema naxü̃nagü rü naeü̃gü ga ixãxpe̱xatüxü̃ ga mexü̃ nax namaxã Tupanaxü̃ yacua̱xüxüxü̃ca̱x. Rü Cori ya Tupanaca̱x nanadai rü yema ãmarearü guruü̃wa ínanagu.

Chacaría 13:7

Rü Cori ya Tupana ya Guxãxétüwa Ngẽxmacü rü ñanagürü: —¡Pa Tara i Taxrewa Ãmaguxü̃x, rü naxca̱x ixũ i chorü carnéruarü dauruxü̃ rü ngẽma chorü ngü̃xẽẽruxü̃! ¡Rü yama̱x ya yima carnéruarü dauruxü̃ nax nawoonexü̃ca̱x i carnérugü! Rü choma rü tá chanadai i ngẽma carnéruxacügü.

Iraétanüxü̃arü muxchiga 23:3

Rü ñu̱xũchi Balaáü̃ rü ñanagürü Baláxü̃: —¡Ẽcü nuxã ãmarearü guruü̃xü̃tagu rüxã̱ũ̱x! Rü choma rü yoxni tá íchayadau rü aixcüma cha̱u̱xca̱x ngéma naxũ ya Cori nax ngẽxma choxü̃ nanga̱xauxü̃ca̱x. Rü ñu̱xũchi tá cumaxã nüxü̃ chixu i ngẽma chomaxã nüxü̃ yaxuxü̃ —ñanagürü. Rü nüma ga Balaáü̃ rü wüxi ga ma̱xpǘne ga chianenewa naxũ, rü yéma nixĩ ga Tupana naxca̱x ngóxü̃. Rü nüma ga Balaáü̃ rü ñanagürü Tupanaxü̃: —Marü chanaxü i 7 i ãmarearü guruxü̃, rü wüxichigü i ngẽma guruü̃wa rü cuxca̱x chayagu i wüxi i wocaxacü rü wüxi i carnéru —ñanagürü.

2 Corintios 8:12

Erü ngẽxguma aixcüma wüxi ya duü̃xẽ tümaarü ngúchaü̃maxã ngẽma diẽru i tüxü̃́ ngẽxma̱xcüwa tümaenexẽca̱x ngĩxü̃ itaxãxchaü̃gu, rü Tupana rü taãẽãcüma ngĩxü̃ nayaxu. Erü nüma ya Tupana rü tama tüxna ngĩxca̱x naca i ngẽma tüxü̃́ taxu̱xcü.

Ore i mexü̃ ga Cuáü̃ ümatüxü̃ 10:7

Rü yexguma ga Ngechuchu rü wenaxarü ñanagürü nüxü̃: —Aixcüma pemaxã nüxü̃ chixu rü choma nixĩ i carnérupǘxü̃arü ĩã̱x i nawa yachocuxü̃ i carnérugü.

Iraétanüxü̃arü muxchiga 23:19

Rü Tupana rü tama duü̃xü̃gü nagu rüxĩnüxü̃gu narüxĩnü, rü taguma nidora rü taguma nanaxüchicüxü i norü ĩnü. Rü ngẽxguma ta̱xacüxü̃ yaxuxgu rü aixcümama nanaxü. Rü ngẽxguma ta̱xacüca̱x inaxunetagu rü aixcümama nayanguxẽxẽ.

Lebítanüxü̃arü puracüchiga 4:23

Natürü ngẽxguma nüxna yacua̱xãchigu nax pecadu naxüxü̃, rü name nax choxna namuaxü̃ i wüxi i chíbu i taxuwama chixexü̃.

Ínachoxü̃xü̃chiga 35:5

¡Rü ẽcü pegütanüwa penade i ãmaregü i Cori ya Tupanaca̱x ixĩxü̃! Rü guxãma ya yíxema inaxãgüxe rü name nixĩ i tümaarü ngúchaü̃maxã itanaxãgü. ¡Rü nua penana i úiru, rü diẽrumü rü bróũche,

Ínachoxü̃xü̃chiga 29:4

Rü ñu̱xũchi chopataarü ĩã̱xpe̱xewa tá cunaga ya Aróü̃xü̃ wüxigu nanegümaxã. ¡Rü namu nax naxaiyagüxü̃ca̱x!

Lebítanüxü̃arü puracüchiga 16:7

Ngẽmawena rü tá tüxü̃ niyaxu ya yíxema taxre ya chíbugü, rü ñu̱xũchi Tupanapataarü ĩã̱xpe̱xewa tá tüxü̃ nagagü nax ngéma Cori ya Tupanana tüxü̃ namugüxü̃ca̱x.

Lebítanüxü̃arü puracüchiga 8:21

Rü yemawena rü dexámaxã nanayaxu ga yema naü̃nütagü rü guma naparagü. Rü ñu̱xũchi ãmarearü guruü̃wa ínanagu ga guxü̃ma ga yema carnéru nax wüxi ga ãmare ga Cori ya Tupana naemamaxã nataãẽxü̃ca̱x. Rü nüma ga Moiché rü yemaacü ínanagu yema Cori ya Tupana namaxã nüxü̃ ixuxü̃rüxü̃.

Lebítanüxü̃arü puracüchiga 8:18

Rü nüma ga Moiché rü nanamu nax naxü̃tawa nagagüãxü̃ca̱x ga yema carnéru ga yatüxü̃ ga Tupanaarü ãmareca̱x yaguxü̃. Rü nüma ga Aróü̃ rü nanegü rü yema carnéruerugu nanuxme̱x.

Lebítanüxü̃arü puracüchiga 7:16

Natürü ngẽxguma ngẽma naxü̃na rü wüxi i unetaca̱x yixĩxgu nax cha̱u̱xca̱x tayamáxü̃ rüe̱xna wüxi i ãmare i ngúchaü̃maxã choxna taxãxü̃ yixĩxgu rü ngẽmatama i ngunexü̃ i nagu cha̱u̱xca̱x tayaguxü̃gu tá tanangõ̱x i namachi. Natürü ega nangẽxmagu i ngẽma íyaxüxü̃ rü marü name i moxü̃ãcü tanangõ̱x.

Ínachoxü̃xü̃chiga 38:1

Rü nüma ga Becharé rü acáchianaxca̱x nanaxü ga ãmarearü guruxü̃. Rü norü guruü̃cüwagü rü nawüxigumare ga norü tatachinü. Rü wüxichigü rü 2 metru rü naétü 25 chentímetru nixĩ ga norü tatachinü. Rü norü máxchane rü wüxi ga metru rü naétü 25 chentímetru nixĩ.

Ínachoxü̃xü̃chiga 36:3

Rü nümagü ga yema puracütanüxü̃ rü Moichéxü̃tawa nanayauxgü ga yema yemaxü̃gü ga Iraétanüxü̃ ixãgüxü̃ nax naxügüã̱xü̃ca̱x ga guma Tupanapata rü norü yemaxü̃gü. Rü nüma ga Iraétanüxü̃ rü guxü̃ ga ngunexü̃gu norü ngúchaü̃maxã inayaxãgüxü̃ ga norü ãmaregü.

Ínachoxü̃xü̃chiga 35:29

Rü guxü̃ma ga yema yatüxü̃gü rü ngexü̃gü ga Iraétanüxü̃ ga norü ngúchaü̃maxã inaxãgüchaü̃xü̃, rü Cori ya Tupanaca̱x inanaxãgü ga norü ãmaregü naxca̱x ga yema puracü ga Cori ya Tupana Moichémaxã nüxü̃ ixuxü̃.

Ínachoxü̃xü̃chiga 35:21

Rü guxü̃ma ga yema duü̃xü̃gü ga norü maxü̃wa ínanguxü̃ nax aixcüma norü ngúchaü̃ãcü Cori ya Tupanana naxãgüãxü̃ i norü ngẽmaxü̃gü, rü norü ãmaremaxã Moichéca̱x nawoegu. Rü Cori ya Tupanana nayaxãgü ga norü ãmaregü nax yemamaxã naxügüã̱xü̃ca̱x ga Tupanapata rü guxü̃ma ga norü yemaxü̃gü rü yema chacherdótechirugü rü ta.

Iraétanüxü̃arü muxchiga 23:30

Rü nüma ga Baláx rü nanaxü ga yema Balaáü̃ namaxã nüxü̃ ixuxü̃. Rü nayama̱x rü nayagu ga wüxi ga wocaxacü rü wüxi ga carnéru ga wüxichigü ga yema ãmarearü guruü̃wa.

Wenaxarü naxümatü ga Tupanaarü mugü 12:27

Rü ngẽma Tupanaarü ãmarearü guruü̃wa tá naxca̱x ípenagu i perü naxü̃nagü. Rü yimá nagü i ngẽma naxü̃nagü i Tupanana pexãxü̃ rü tá ngẽma ãmarearü guruü̃étügu penaba. Natürü i ngẽma namachi rü name nax penangṍxü̃.

Iraétanüxü̃arü muxchiga 23:27

Rü yexguma ga Baláx rü ñanagürü nüxü̃: —¡Ẽcü, ngĩxã rü tóxnamana tá cuxü̃ chaga! Rü bexmana ega ngẽma nachicawa chixexü̃ namaxã cuxuegu̱xgu i ngẽma Iraétanüxü̃ rü taxũtáma nanu ya Tupana —ñanagürü.

Lebítanüxü̃arü puracüchiga 1:10

Rü ngẽxguma texé tümaarü carnérutanüwa rüe̱xna chíbutanüwa choxna taxãxgu i wüxi i ãmare nax tayaguxü̃ca̱x rü name i wüxi i naxü̃na iyatüxü̃ i ngearü chixexü̃ã́xü̃ nax yixĩxü̃.

Lebítanüxü̃arü puracüchiga 4:15

Rü nüma i Iraétanüxü̃arü ãẽ̱xgacügü rü chope̱xewa tá naerugu ningõgügü rü ñu̱xũchi ngẽxma tátama nayawíyenaxãgü.

Lebítanüxü̃arü puracüchiga 6:8

Rü nüma ga Cori ya Tupana rü Moichémaxã nidexa rü ñanagürü nüxü̃:

Lebítanüxü̃arü puracüchiga 17:8

Rü namaxã nüxü̃ ixu rü ngẽma Iraétanüxü̃ rüe̱xna ngẽma to i nachixü̃anecüã̱x i petanügu ãpataxü̃ rü ngẽxguma chi ãmare inaxãxgu, rü tama chopataarü ĩã̱xwa nangeãgu nax ngéma choxna naxããxü̃ca̱x, rü pema rü wüxicana tá petanüwa ípenata̱xüchi.

Iraétanüxü̃arü muxchiga 15:8

Rü ngẽxguma wüxi i wocaxacü i yatüxü̃ yixĩgu nax cha̱u̱xca̱x pimáxü̃ nax cha̱u̱xca̱x peyaguxü̃ca̱x, rüe̱xna chorü ngüxmüxẽẽruxü̃ nax yixĩxü̃ca̱x, rüe̱xna wüxi i unetaca̱x nax yixĩxü̃ca̱x, rü naétü tá ipenaxã i 6 quíru i arína i taxre i litru i chíxü̃maxã ñumüxü̃. Rü ñu̱xũchi taxre i litru ya bínu tá naétü penaba nax cha̱u̱xca̱x nachixemaxü̃ca̱x i ngẽma ãmare.

Echequié 40:39

Rü yema ucapu ga ngu̱xẽẽchicawa nayexma ga ãgümücü ga mechagü. Rü wüxicüwawa nayexma ga taxre ga mechagü rü yema tocüwawa nayexma ga taxre. Rü yema mechagüétügu nixĩ ga nadaiaxü̃ ga naxü̃nagü ga Tupanaca̱x ínaguxchaü̃güxü̃, rü naxü̃nagü ga pecadugüarü ütanüca̱x ínagugüxü̃, rü yema naxü̃nagü ga nagagutama naxüxü̃ ga pecaduarü ütanüruxü̃ca̱x ínagugüxü̃.

Lebítanüxü̃arü puracüchiga 4:3

Rü ngẽxguma chacherdótegüarü ãẽ̱xgacü yixĩxgu i chixexü̃ üxü̃, rü ngẽma chixexü̃ i naxüxü̃gagu rü guxchaxü̃wa tá nangẽxmagü i guxü̃ma i duü̃xü̃gü. Rü ngẽma chacherdótearü ãẽ̱xgacüarü pecaduarü ütanüca̱x rü nüma rü choxü̃ tá namaxã naxãmareã̱x i wüxi i wocaxacü i yatüxü̃ i taxuwama chixexü̃.

Lebítanüxü̃arü puracüchiga 4:32

Rü ngẽxguma yíxema duü̃xẽarü ãmare rü wüxi i carnéruxacü yixĩxgu, rü name nax wüxi i carnéruxacü i ngexü̃ i taxuwama chixexü̃ nax yixĩxü̃.

Lebítanüxü̃arü puracüchiga 5:15

—Yíxema tama nüxü̃ cuáxe nax choxna tanaxãxü̃ i ngẽma choxna üxü̃ rü tümagagutama chope̱xewa pecadugu tangu. Rü ngẽma pecaduarü ütanüruxü̃ rü name i tümaarü carnérutanüwa tayayaxu i wüxi i carnéru i yatüxü̃ i taxuwama chixexü̃, rü chopatawa tanaga. Rü tá tanangugü i natanü nax ñuxre i diẽrumü naxãtanüxü̃ i ngẽma carnéru i tümaarü pecaduca̱x itaxãxü̃. Rü ngẽma diẽrumüarü ya rü chopatawa ngẽxmaxü̃ i yáruü̃wa tá tanangugü.

Lebítanüxü̃arü puracüchiga 5:18

Rü ngẽma pecaduca̱x rü tá tümaxü̃ natanüwa tayayaxu i wüxi i carnéru i taxuwama chixexü̃. Rü cuma rü tá cunangugü i natanü. Rü yíxema duü̃xẽ rü tá chacherdótexü̃tawa tanaga nax yamáaxü̃ca̱x nax ngẽmaãcü choma ya Cori ya Tupana tüxü̃́ nüxü̃ icharüngümaxü̃ca̱x i tümaarü pecadu i tümaechita taxüxü̃. Rü choma rü tá tüxü̃́ nüxü̃ icharüngüma i ngẽma pecadu.

Lebítanüxü̃arü puracüchiga 6:2

—Ngẽxguma texé chope̱xewa chixexü̃ uxgux rü tümamücüxü̃ tawomüxẽẽ̱xgu, rüe̱xna tügüxü̃́ tanayaxu̱xgu i ngẽma tüxü̃ namaxã nanguxü̃xẽẽxü̃, rüe̱xna texéaxü̃́ tangĩ̱xgu, rüe̱xna togüna tanapu̱xgu i norü ngẽmaxü̃gü, rü chixexü̃ taxü.

Lebítanüxü̃arü puracüchiga 9:2

Moiché rü Aróü̃xü̃ ñanagürü: —¡Nua naga i wüxi i wocaxacü i yatüxü̃ i ngexwaca yaxü̃ nax pecaduarü ütanüca̱x yamáxü̃ca̱x! ¡Rü ngẽxgumarüxü̃ ta nua naga i wüxi i carnéru i yatüxü̃ i taxuwama chixexü̃, rü Cori ya Tupanaca̱x ínagu!

Lebítanüxü̃arü puracüchiga 14:10

Rü ngẽma norü 8 i ngunexü̃gu ya yíxema tümaca̱x yataanexe rü tá tayayaxu i taxre i carnéruxacü i yatüxü̃ i ngearü chixexü̃ã́xü̃, rü ñu̱xũchi wüxi i carnéruxacü i ngexü̃ i wüxi ya taunecü nüxü̃́ ngẽxmaxü̃ i ngearü chixexü̃ã́xü̃. Rü ñu̱xũchi tá tanayaxu i 6 quíru i trigute̱xe i rümemaexü̃ i chíxü̃maxã ãéü̃xü̃. Rü ngẽxgumarüxü̃ tá ta tanayaxu i ngãxü̃ i litru i chíxü̃.

Lebítanüxü̃arü puracüchiga 23:12

Rü ngẽmatama ngunexü̃ i nagu penanaxü̃ i ngẽma nüxíra pebuxuxü̃ i perü tríguarü o, rü ngẽxgumarüxü̃ tá ta ipenamu i wüxi i carnéru i wüxi ya taunecü nüxü̃́ ngẽxmaxü̃ i taxuwama chixexü̃ nax perü ãmare i Cori ya Tupanaca̱x piguxü̃ yixĩxü̃ca̱x.

Lebítanüxü̃arü puracüchiga 23:18

Rü wüxigu ngẽma paũmaxã tá ngéma penagagü i 7 i carnéruxacügü i yatüxü̃ i wüxi ya taunecü nüxü̃́ ngẽxmagüxü̃ i taxuwama chixexü̃. Rü naétü tá penagagü i wüxi i wocaxacü i yatüxü̃ rü taxre i carnérugü i yatüxü̃. Rü ngẽma rü tá Cori ya Tupanaca̱x ípenagu nax naemamaxã nataãẽxü̃ca̱x. Rü ngẽxgumarüxü̃ ta ngéma tá penange i perü ãmaregü i trigute̱xe rü bínu.

Iraétanüxü̃arü muxchiga 19:2

—Choma nixĩ i Cori ya Tupana chixĩxü̃. ¡Rü Iraétanüxü̃maxã nüxü̃ ixu i ñaa mu!: “¡Rü cuxü̃tawa nagagüã i wüxi i woca i ngexü̃ i dauchapa̱xaxü̃ i taxuwama chixexü̃ i taguma namaxã napuracüexü̃!

Iraétanüxü̃arü muxchiga 28:11

Rü ngexwacaxü̃cü ya tauemacü nagu ngóxü̃ i ngunexü̃gu rü Cori ya Tupanaca̱x tá penadai rü peyagu i taxre i wocaxacügü i iyatüxü̃ rü wüxi i carnéru i yatüxü̃ rü 7 i carnéruxacügü i iyatüxü̃ i wüxi ya taunecü nüxü̃́ ngẽxmagüxü̃ i taxuwama chixexü̃.

Iraétanüxü̃arü muxchiga 28:19

Rü ngẽma ngunexü̃ i nagu penaxügüxü̃ i ngẽma peta rü Cori ya Tupanaca̱x tá penadai rü peyagu i taxre i wocaxacügü rü wüxi i carnéru rü 7 i carnéruxacügü i wüxi ya taunecü nüxü̃́ ngẽxmagüxü̃ i taxuwama chixexü̃.

Iraétanüxü̃arü muxchiga 28:31

Rü guxü̃ma i ngẽma ãmaregü i cha̱u̱xca̱x ípeguxü̃ rü norü arínamaxã rü norü bínumaxã tá choxna penaxã. Rü ngẽma tá nixĩ i ãmaregü i choxna pexãxü̃ naétü i ngẽma ãmaregü i guxü̃ i ngunexü̃gu cha̱u̱xca̱x ípeguxü̃. Rü ngẽma naeü̃gü i choxna pexãgüxü̃ rü nanaxwa̱xe nax taxuwama nachixexü̃.

Iraétanüxü̃arü muxchiga 29:2

Rü cha̱u̱xca̱x tá peyama̱x rü peyagu i wüxi i wocaxacü i yatüxü̃, rü wüxi i carnéru i yatüxü̃, rü 7 i carnéruxacügü i iyatüxü̃ i wüxi ya taunecü nüxü̃́ ngẽxmaxü̃ i taxuwama chixexü̃. Rü ngẽmaãcü tá chauãẽgu nayatãũxü̃ i ngẽma naema, rü namaxã tá chataãxẽ.

Norü taxre ga to ga popera ga ãẽ̱xgacügüchiga ümatüxü̃ 29:32

Rü norü mu ga yema naxü̃nagü ga Tupanaca̱x yéma nagagüxü̃ rü 70 ga woca ga iyatüxü̃ rü 100 ga carnérugü rü 200 ga carnéruxacügü. Rü guxü̃ma ga yema naxü̃nagü rü yéma nanagagü nax Tupanaca̱x ãmarearü guruü̃wa ínagugüaxü̃ca̱x.

Norü taxre ga to ga popera ga ãẽ̱xgacügüchiga ümatüxü̃ 35:12

Rü nüma ga yema Lebítanüxü̃ rü wüxichigü ga yema Iraétanüxü̃tücumüna nanana ga yema naxü̃nagü nax chacherdótegü Tupanape̱xewa nüxü̃́ ínaguxü̃ca̱x yema Moiché ümatüxü̃ ga poperawa nüxü̃ ixuxü̃rüxü̃. Rü yemaacütama nanaxü namaxã ga yema wocagü ga yexwacax yaexü̃.