Joel 2:28 - Tupanaarü Ore

²⁸ Rü ñanagürü ta: —Rü nawena i ngẽma pemaxã nüxü̃ chixuxü̃ rü tá guxü̃ma i duü̃xü̃güca̱x núma chanamu i Chauãxẽ. Rü ngẽma penegü rü pexacügü rü tá chorü orexü̃ nixugüe. Rü ngẽma yaxü̃ i duü̃xü̃gü rü tá nixãnegügü. Rü ngẽma ngextü̱xüxü̃gü rü tá nüxü̃ nadaugü i ẽxü̃guxü̃ i taguma texé nüxü̃ dauxü̃.

Joel 2:28 Referans Kwoze

Echequié 39:29

Rü tagutáma wena nüxna chaxãca̱xwe̱x, erü ngẽma Iraétanüxü̃tanüwa tá chanamu i Chauãxẽ. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.

Ngechuchuarü ngúexü̃gü ga yamugüxü̃arü puracüchiga 2:39

Rü ñaa Tupanaarü uneta, rü pexca̱x nixĩ, rü pexacügüca̱x, rü guxü̃ i duü̃xü̃gü i yáxü̃wa ngẽxmagüxü̃ca̱x nixĩ. Erü guxü̃ i duü̃xü̃gü i tórü Cori ya Tupana nügüxü̃tawa naxca̱x ca̱xaxü̃ca̱x nixĩ i ngẽma uneta —ñanagürü ga Pedru.

Ichaía 32:15

Rü ngẽmawena ya Cori ya Tupana rü tá tatanüwa nanamu i Naãxẽ ya Üünecü. Rü ngẽxguma i ngẽma naane i taxuxü̃ma i nanetü i mexü̃ nawa rüxüxü̃ rü tá naane i mexü̃xü̃ nananguxuchi. Rü ngẽma naanewa rü tá yexeraãcü name i nanetü.

Ichaía 44:3

Rü choma rü tá chayaya̱xẽxẽ i dexá i naxnücüanewa, rü íyapaanexü̃wa rü tá chanango̱xẽxẽ i natüacügü. Rü petaagüna tá chanamu ya Chauãxẽ ya Üünecü rü tá petaagüxü̃ charüngü̃xẽxẽ.

Chacaría 12:10

Rü ngẽma Dabítaagütanüwa rü Yerucharéü̃cüã̱xgütanüwa tá chanamu i Chauãxẽ i Üünexü̃ nax yamecümaxü̃ca̱x rü nayumüxẽgüwa̱xegüxü̃ca̱x i ngẽma Dabítanüxü̃ rü ngẽma Yerucharéü̃cüã̱xgü. Rü ngẽxguma tá nüxü̃ nadaugügu ya yima nacanapacütüxü̃güãcü rü tá nangechaü̃gü. Rü naxca̱x tá naxauxe ñoma wüxi i nane i nügümaxã wüxicacüca̱x naxauxexü̃rüxü̃. Rü ñoma nüxíraü̃cü ya nane yu̱xguca̱x naxauxegurüxü̃ tá naxca̱x naxauxe.

Ucu̱xẽgüchiga 1:23

¡Iperüxĩnüe i chorü ucu̱xẽgü! Rü tá pexna chanaxã i ngẽma cua̱x i aixcüma mexü̃ rü tá pexü̃ nüxü̃ chacua̱xẽxẽ i chorü ĩnü.

Ore i mexü̃ ga Cuáü̃ ümatüxü̃ 7:39

Rü yexguma yema ñaxgu ga Ngechuchu rü nüxü̃ nixu nax guxü̃ma ga yema nüxü̃́ yaxõgüxü̃ rü tá nayauxgüãxü̃ i Naãxẽ ya Üünexü̃. Natürü tama yexgumatama nanayauxgü, yerü tauta wenaxarü daxũguxü̃ ga naaneca̱x nataegu ga Ngechuchu nax guxü̃arü ãẽ̱xgacü yixĩxü̃ca̱x.

Ngechuchuarü ngúexü̃gü ga yamugüxü̃arü puracüchiga 2:33

Rü Tupana rü daxũguxü̃ ga naanewa nanaga nax norü tügünecüwawa yanatoxü̃ca̱x. Rü Tanatü ya Tupana rü marü nüxna nanamu ga Naãxẽ ya Üünecü ga nũxcüma nüxü̃ yaxuxü̃ rü tá nua nax namuaxü̃. Rü ñu̱xma ya yimá Ngechuchu rü núma totanüwa nanamu i ngẽma Naãxẽ ya Üünecü. Rü ngẽma Naãxẽ nua üxü̃ nixĩ i ñu̱xma nüxü̃ pedauxü̃ rü nüxü̃ pexĩnüexü̃.

Ore i mexü̃ ga Luca ümatüxü̃ 3:6

Rü guxü̃ma i duü̃xü̃gü rü tá nüxü̃ nadaugü ya yimá maxẽxẽxẽruxü̃ ya Tupana núma namucü”, ñanagürü ga Ichaía ümatüxü̃ ga ore.

Gálatas 3:28

Rü ñu̱xma rü Tupanape̱xewa rü nüetama nixĩ ega woo Yudíugü pixĩgügu rü ẽ̱xna tama. Rü nüetama ega woo wüxi i coriarü duü̃xü̃gü pixĩgügu rü ẽ̱xna taxúearü duü̃xü̃gü pixĩgügu. Rü nüetama ega woo piyatügu rü ẽ̱xna pingexgu. Erü ñu̱xma nax Ngechuchu ya Cristuarü duü̃xü̃gü nax pixĩgüxü̃, rü wüxitama i duü̃xü̃ pixĩgü i guxãma i pemax.

Ichaía 40:5

Rü ngẽxguma i nüma ya Cori ya Tupana rü tá nügü nango̱xẽxẽ nax ñuxãcü naporaxüchixü̃. Rü guxü̃ma i duü̃xü̃gü rü tá nüxü̃ nadaugü i ngẽma norü pora. Rü Cori ya Tupanatama nixĩ i ngẽma ñaxü̃ —ñanagürü.

Iraétanüxü̃arü muxchiga 12:6

Rü nüma ga Cori ya Tupana rü ñanagürü: —¡Choxü̃ iperüxĩnüe i ñaa pemaxã tá nüxü̃ chixuxü̃! Rü ngẽxguma petanüwa nangẽxmagu i wüxi i chorü orearü uruxü̃, rü choma nixĩ i chanango̱xetüxẽẽxü̃ rü nanegüwa namaxã chidexaxü̃.

Ichaía 49:6

Rü nüma ya Tupana rü ñanagürü: —Choma rü cuxü̃ chamu nax cunanutaque̱xexü̃ca̱x i Acóbuarü duü̃xü̃gü rü nachixü̃aneca̱x cunawoeguxẽẽxü̃ca̱x i ngẽma Iraétanüxü̃. Rü naétü cuxü̃ chamu nax wüxi i omü quixĩxü̃ca̱x naxca̱x i guxü̃ma i nachixü̃anegü. Rü cuxü̃ chamu nax nüxü̃ nüxü̃ cucua̱xẽẽxü̃ca̱x i chorü ore i maxü̃ nüxna ãxü̃ i guxü̃ma i nachixü̃anecüã̱x woo ngẽma yáxü̃wa ngẽxmagüxü̃ —ñanagürü.

Ngechuchuarü ngúexü̃gü ga yamugüxü̃arü puracüchiga 21:9

Rü nüma nüxü̃́ iyexma ga ãgümücü ga naxacügü ga taguma ixãtecü ga Tupanaarü orexü̃ ixugüecü.

Yeremía 23:28

Rü ngẽxguma wüxi i orearü uruxü̃ rü naxãnegügu, rü name nax nüxü̃ yaxuxü̃ nax wüxi i nanegü yixĩxü̃. Natürü ngẽxguma nayauxãgu i chorü ore rü name i aixcüma mea nüxü̃ nixu rü tama ínayatoxẽxẽ. Rü ngẽma naxchawena̱xã i trigu rü taxuacüma ngẽma trigumaxã nügügu tanangugü. Rü ngẽma chorü ore rü ñoma üxürüxü̃ nixĩ. Rü ñoma wüxi i martíyu i nutapüta ipuxẽẽxü̃rüxü̃ nixĩ. Rü choma ya Cori ya Tupana nixĩ i ngẽma ñachaxü̃.

Ichaía 54:13

Rü choma tá chanangúexẽxẽ i guxü̃ma i penegü, rü ngẽmaãcü guxãtáma taãẽwa tamaxẽ.

Ore i mexü̃ ga Luca ümatüxü̃ 1:67

Rü nanatü ga Chacaríana nangu ga Tupanaãxẽ ya Üünecü. Rü nüxü̃ nixu ga yema ore ga Tupana namaxã nüxü̃ ixuxü̃.

Popera ga Yudíugü ga yaxõgüxü̃ca̱x ümatüxü̃ 1:1

Nũxcüma ga Tupana rü mue̱xpü̱xcüna rü naguxü̃raü̃xü̃ãcüma norü orearü uruü̃güwa tórü o̱xigümaxã nidexa.

Iraétanüxü̃arü muxchiga 11:17

Rü choma rü tá ngẽxma ícharüxĩ, rü ngéma tá cumaxã chidexa. Rü tá ngẽma ãẽ̱xgacügüna chanaxã i ngẽma Chauãxẽ i cuwa ngẽxmaxü̃ nax nümagü cuxü̃ nangü̃xẽẽgüxü̃ca̱x nax namaxã inacua̱xgüxü̃ i ñaa duü̃xü̃gü. Rü ngẽxguma rü marü taxũtáma cuxica namaxã icucua̱x.

Ichaía 49:26

Rü ngẽma perü uanügü rü nügü tátama nangõ̱xcue, rü nagüwa tátama naxaxegü ñoma bínu yaxaxgüxü̃rüxü̃. Rü ngẽmaãcü i guxü̃ma i duü̃xü̃gü rü tá nüxü̃ nicua̱xãchitanü nax choma ya Cori ya Tupana ya Acóbuarü duü̃xü̃güarü ngü̃xẽẽruxü̃ ya poracü nax chixĩxü̃. Rü choma nixĩ i Iraétanüxü̃xü̃ íchanguxü̃xẽxẽxü̃ —ñanagürü ga Tupana.

Yeremía 23:25

Rü marü nüxü̃ chaxĩnü i norü doragü i ngẽma orearü uruü̃güneta i chauégagu idexagünetaxü̃ rü nüxü̃ yaxugüexü̃ nax choma namaxã chidexaxü̃ i nanegüwa.

Echequié 36:27

Rü pewa tá chanamaxẽxẽ ya Chauãxẽ ya Üünecü nax ngẽmaãcü mea peyanguxẽẽxü̃ca̱x i chorü mugü.

Echequié 37:14

Rü choma rü tá pexna chanamu i Chauãxẽ i Üünexü̃, rü pema rü tá íperüdagü. Rü tá perü naanewa tátama wena pexü̃ changexmagüxẽxẽ. Rü ngẽxguma tá nixĩ i nüxü̃ pecuáxü̃ nax choma ya Cori ya Tupana chixĩxü̃ i pemaxã nüxü̃ chixuxü̃ i ngẽma, rü choma nixĩ i pexü̃ chinguxẽẽxü̃. Rü choma ya Cori ya Tupana nixĩ i ngẽma ñachaxü̃’ ” —ñanagürü.

Danié 7:1

Rü wüxi ga chütaxü̃ ga yexguma marü wüxi ga taunecü Babiróniaanewa ãẽ̱xgacü yixĩxgu ga Berchachá, rü Danié rü naxãnegü rü nango̱xetü. Rü yexguma naba̱i̱xãchigu rü nanaxümatü ga yema nagu naxãnegüxü̃. Rü ñaa nixĩ ga yema naxümatüxü̃:

1 Chamué 19:21

Rü yemaxü̃ nacua̱xgu ga Chaú, rü togü ga norü duü̃xü̃güxü̃ yéma namugü. Natürü yemagü rü tá rü yexguma yéma nangugügu rü Tupanaãxẽ nüxna nangu rü inanaxügüe nax Tupanaarü oremaxã yadexagüxü̃. Rü norü tomaepü̱xtücumü inamuãchitanü ga Chaú, rü yema duü̃xü̃gü rü ta rü yematama nüxü̃ nangupetü.