Joel 2:17 - Tupanaarü Ore

¹⁷ ¡Rü pexauxe, Pa Chacherdótegüx i Tupanaarü Puracümaxã Icua̱xgüxex, rü ãmarearü guruü̃pe̱xewa Tupanamaxã nüxü̃ pixu rü ñaperügügü nüxü̃! —¡Nüxü̃ nangechaxü̃ i ñaa curü duü̃xü̃gü, Pa Torü Corix ya Tupanax! ¡Rü taxṹ i cunangexrüxü̃ nax togü nüxü̃ cugüexü̃! ¡Rü taxṹ i cunangexrüxü̃ nax togü i nachixü̃anecüã̱xgü namaxã icuáxü̃! ¡Rü taxṹ i cunangexrüxü̃ i ngẽma tama yaxõgüxü̃ nax curü duü̃xü̃güxü̃ nacugüexü̃ ñaxü̃maxã!: “¿Ngexcü ya yimá perü Tupana?” ñaxü̃maxã nacugüexü̃ —ñaperügügü.

Joel 2:17 Referans Kwoze

Echequié 8:16

Rü ñu̱xũchi Tupanapata ga taxü̃neã̱xtü ga aixepewaama yexmaxü̃wa choxü̃ naga ga Tupanapataca̱x ixücuxü̃wa. Rü yema ãmarearü guruü̃pe̱xewa nüxü̃ chadau ga 25 ga yatügü ga Tupanapata ga taxü̃nena ãca̱xwe̱xgüxü̃ ga ésteguama caxã́pü̱xügüxü̃. Rü waixü̃müanegu nangücuchitanü rü üa̱xcüxü̃ nicua̱xüü̃gü.

Wiyaegü 115:2

¿Rü tü̱xcüü̃ i ngẽma tama yaxõgüxü̃ rü ínacagü rü ñanagürügü: —¿Ngexcü nixĩ ya perü Tupana? —ñanagürügü?

Wiyaegü 79:10

Rü ngẽma duü̃xü̃gü i tama cuxü̃́ yaxõgüxü̃ rü taxuca̱xma tü̱xcüü̃ ñanagürügü: —¿Ngecü nixĩ ya yimá norü Tupana? —ñanagürügü. Rü ñu̱xma rü nüxü̃ tadauxchaü̃ nax ñuxãcü tá cunada̱i̱xü̃ i ngẽma torü uanügü ga curü duü̃xü̃güxü̃ daixü̃. Rü woo i ngẽma nachixü̃anecüã̱xgü i tama cuxü̃́ yaxõgüxü̃ rü tanaxwa̱xe nax nümagü rü ta nüxü̃ nacua̱xgüxü̃ca̱x i ngẽma cuxüxü̃.

Ore i mexü̃ ga Matéu ümatüxü̃ 23:35

Rü ngẽmaca̱x Tupana tá pexü̃ napoxcue naxca̱x i guxü̃ma ga norü duü̃xü̃gü ga imexü̃gü ga perü o̱xigü daixü̃. Rü Abéwa nixĩ ga inaxügüãxü̃ ga nax nadaiaxü̃. Rü Chacaría ga Berequía nane ga Tupanapatape̱xegu ga ãmarearü guruü̃xü̃tagu peyama̱xgücügu nixĩ ga iyacuáxü̃.

Amúx 7:2

Rü yexguma nüxü̃ chada̱u̱xgu ga yema munügü nax nangõ̱xgüãxü̃ ga guxcüma ga guma maxẽ ga yexwacax ügücü, rü Cori ya Tupanaxü̃ ñachagürü: —¡Pa Cori ya Tupanax, ẽcü toxü̃ nangechaxü̃! ¿Ta̱xacümaxã tá tamaxẽxü̃ i toma i curü duü̃xü̃gü i Acóbutanüxü̃ nax tanoxrexüchixü̃? —ñachagürü.

Joel 1:9

Rü ngẽma chacherdótegü rü naxauxe erü Tupanapata ya taxü̃newa rü marü nataxuma i trigute̱xe rü bínu nax ngẽma Cori ya Tupanana naxãmaregüxü̃ca̱x.

Ochéa 14:2

Rü name nax ñaãcü peyumüxẽgüxü̃ rü ñaperügügü: —¡Pa Torü Cori ya Tupanax, rü toxü̃́ nüxü̃ irüngüma i guxü̃ma i torü chixexü̃gü! ¡Rü mea toxü̃́ nayaxu i ñaa torü cua̱xüxü̃ i cuxna taxãxü̃!

Nüxíraxü̃xü̃ ga popera ga ãẽ̱xgacügüchiga 6:3

Rü yema naxmachiã ga nüxíra nawa ixücuxü̃ ga guma Tupanapata ga taxü̃ne rü 4 ga metruarü ngãxü̃ nixĩ ga norü tachiã rü 9 metru nixĩ ga norü ma̱x. Rü yemaacü ga yema nüxíra nawa ixücuxü̃arü ma̱x rü Tupanapata ga taxü̃nearü tachiãtama nixĩ.

Ínachoxü̃xü̃chiga 34:9

Rü ñanagürü: —¡Pa Corix, Pa Corix, rü ngẽxguma aixcüma yixĩxgu nax chomaxã cutaãẽxü̃ rü ẽcü toxü̃ íixümücü! Rü aixcüma nixĩ i tama inaxĩnüechaxü̃xü̃ i ñaa duü̃xü̃gü. ¡Natürü toxü̃́ nüxü̃ irüngüma i torü pecadugü rü chixexü̃gü, rü toxü̃ nade nax curü duü̃xü̃gü tixĩgüxü̃ca̱x! —ñanagürü.

Miquéa 7:10

Rü ñu̱xũchi nüma i ngẽma chorü uanü rü tá nüxü̃ nadau i ñuxãcü Tupana choxü̃ rüngü̃xẽẽxü̃ rü ngẽmaca̱x tá poraãcü naxãnee. Rü nüma i ngẽma chorü uanü rü choxü̃ ñanagürüchire̱x: —¿Ngexcü nixĩ ya yimá curü Cori ya Tupana? —ñanagürüchire̱x. Natürü wüxi i ngunexü̃ rü tá chataãxẽ i ngẽxguma nüxü̃ chada̱u̱xgu nax nagu napúgüxü̃ i chorü uanü ñoma namaarü ãcharaxü̃gu napúgüxü̃rüxü̃.

Amúx 7:5

Rü yexguma ga choma rü Cori ya Tupanaxü̃ ñachagürü: —¡Pa Cori ya Tupanax, ẽcü toxü̃ nangechaxü̃ rü íyachaxãchi i ngẽma poxcu! ¿Rü ta̱xacümaxã tá tamaxẽxü̃ i tomax i curü duü̃xü̃gü i Acóbutanüxü̃ nax tanoxrexüchixü̃? —ñachagürü.

Echequié 20:9

Natürü chaugünatama chachogü nax tama chanachixexẽẽxü̃ca̱x i chauéga rü ñu̱xũchi tama chixri chauchiga yadexagüxü̃ca̱x ga yema nachixü̃anegü ga Iraétanüxü̃ natanüwa maxẽxü̃. Erü nape̱xewa ga yema nachixü̃anegü rü Iraétanüxü̃maxã chaugü chixu rü chanaxuegu nax Equítuanewa tá íchanagaxü̃xü̃.

Ichaía 37:20

Rü ñu̱xmax, Pa Corix, Pa Torü Tupanax ¡rü toxü̃ ínanguxü̃xẽxẽ naxme̱xwa i ngẽma Achíriaanearü ãẽ̱xgacü nax ngẽmaãcü guxü̃ i nachixü̃anegü i ñoma i naanewa ngẽxmagüxü̃ nüxü̃ cua̱xgüxü̃ca̱x nax cuxicatama yixĩxü̃ nax Tupana quixĩxü̃! —ñanagürü ga norü yumüxẽwa.

Wiyaegü 89:51

Pa Corix, ngẽmaãcü nixĩ i ngúxü̃ toxü̃ ningexẽxẽ rü chixexü̃ tomaxã yaxugüexü̃ i ngẽma curü uanügü. Rü ngẽmaãcü ngextá ínaxũxü̃wa rü chixri nachiga nidexagü ya yimá cumatama nüxü̃ cuxunetacü nax curü duü̃xü̃ yixĩxü̃.

Wiyaegü 89:41

Rü guxü̃ma i ngẽma togü i duü̃xü̃gü i ngéma chopetüxü̃ rü naxca̱x nangĩ̱x i ta̱xacü i nüma nanaxwa̱xexü̃. Rü ngẽma nachixü̃anegü i nüxna ngaicamagüxü̃ rü nüxü̃ nacugüe ya yima ĩane.

Wiyaegü 79:4

Rü ngẽma nachixü̃anegü i torü ngaicamana ngẽxmagüxü̃ rü togu nidauxcüraxü̃gü rü toxü̃ nacugüe.

Wiyaegü 74:10

Pa Tupanax, ¿ñuxguxüratáta nixĩ i nüxü̃ nachauexü̃ i ngẽma torü uanügü nax chixri tomaxã nachopetüxü̃? ¿Rü ngẽxgumarüxü̃ ta rü ñuxguxüratáta nixĩ i nüxü̃ nachauexü̃ nax cumaxã chixexü̃ yaxugüexü̃?

Wiyaegü 42:10

Rü woo ya chauxchina̱xãgü rü ta nangúe nagagu i ngẽma chorü uanügü i guxü̃guma choxü̃ cugüexü̃ rü ñagüxü̃: —¿Ngexcü nixĩ ya curü Tupana? —ñagüxü̃.

Norü taxre ga to ga popera ga ãẽ̱xgacügüchiga ümatüxü̃ 8:12

Rü nüma ga Charomóü̃ rü Tupanaca̱x ínanagu ga norü ãmaregü nawa ga yema ãmarearü guruxü̃ ga Tupanapata ga taxü̃nepe̱xegu naxüxü̃.

Wenaxarü naxümatü ga Tupanaarü mugü 32:27

Natürü tama ngẽmaãcü namaxã chanaxüxchaü̃, erü tama chanaxwa̱xe nax choxü̃ nacugüexü̃ i chorü uanügü, rü choxü̃ ñagüxü̃: ‘Tama nixĩ ya Cori ya Tupana naxüxü̃ i ngẽma ñu̱xma ngupetüxü̃, rü yixema nixĩ i torü poramaxã naxüxü̃’, ñagüxü̃.

Ore i mexü̃ ga Matéu ümatüxü̃ 27:43

Rü nüma ya Ngechuchu nagu naxĩnügu rü Tupana tá nüxü̃ narüngü̃xẽxẽ. Ẽcü, ñu̱xma rü Tupana nüxü̃ rüngü̃xẽxẽ ega aixcüma nüxü̃ nangü̃xẽẽchaü̃gu. ¿Tama ẽ̱xna nümatama tamaxã nüxü̃ yaxuxü̃ nax Tupana Nane yixĩxü̃? —ñanagürügü.

Maraquía 1:9

Rü ñanagürü ta: —Dücax, Pa Chacherdótegüx, Tupanana peca nax nüxü̃́ pengechaü̃tümüxü̃xü̃ca̱x Natürü ngẽxguma chixemarexü̃ i ãmaregü nüxna pixãgügu ¡rü taxũtáma nagu perüxĩnüe nax ngẽmamaxã nataãẽxü̃ i nümax! —ñanagürü ya Tupana ya Guxü̃étüwa Ngẽxmacü.

Neemía 9:36

Rü dücax, rü ñaa naane ga torü o̱xigüna cuxãxü̃ nax nangõ̱xgüãxü̃ca̱x ga nabü rü norü yemaxü̃gü ga nawa rüxügüxü̃, natürü i ñu̱xma rü ñaatama naanewa rü to i nachixü̃anecüarü mugüruxü̃ tixĩgü.

Joel 1:13

Rü pemax, Pa Chacherdótegü i Tupanaarü Ãmarearü Guruxü̃maxã Icua̱xgüxex, rü name nixĩ i naxchiru i témüxü̃gu picu̱xgü, rü pexauxe, erü perü Tupanapata ya taxü̃newa rü marü nataxuma i trigu rü bínu i perü ãmareruxü̃ ixĩxü̃.

Wiyaegü 42:3

Ngunecü rü chütacü rü chaxaxu nax norü ngü̃xẽẽca̱x íchaca̱xaxü̃ca̱x. Rü yoxni i chorü uanügü rü choxü̃ nacugüe rü ñanagürügü: —¿Ngexcü nixĩ ya curü Tupana? —ñanagürügü.

Wenaxarü naxümatü ga Tupanaarü mugü 28:37

Rü guxü̃nema ya yima ĩanegü ya Cori ya Tupana pexü̃ mugünewa, rü pema rü wüxi i baixãchixẽẽruxü̃ rü cugüruxü̃ tá pixĩgü.

Iraétanüxü̃arü muxchiga 25:6

Natürü yexguma Moichémaxã Tupanapataa̱xtüwa nangutaque̱xegügu ga Iraétanüxü̃ ga íxauxexü̃, rü yexgumayane rü wüxi ga Iraétanüxü̃ rü wüxi ga ngexü̃ ga Madiáü̃anecüa̱xmaxã yéma naxüpetü nax napatawa nagaãxü̃ca̱x.

Ichaía 22:12

Rü ngẽma ngunexü̃gu rü nüma ya Cori ya Tupana ya Guxãétüwa Ngẽxmacü rü pemaxã nüxü̃ nixu nax pexauxexü̃ rü témüxü̃ i naxchirugu picu̱xgüxü̃ rü pegü pidüerugüxü̃ nax ngẽmaãcü penawéxü̃ca̱x nax aixcüma tá naga pexĩnüexü̃.

Yochué 7:9

Rü nüma i Canaáü̃tanüxü̃ rü guxü̃ma i duü̃xü̃gü i ñaa naanegu pegüxü̃ rü tá nüxü̃ nacuáchigagü i ngẽma toxü̃ ngupetüxü̃. Rü nüma rü tá wüxigu toxca̱x ínayaxüãchi nax toxü̃ nada̱i̱xü̃ca̱x, rü taxúetama ítayaxǘ i totanüwa. ¿Rü texé tá cuxü̃ ticua̱xüxü̃ rü cuxü̃ tataxẽxẽ i ngẽxguma? —ñanagürü ga Yochué.

Wiyaegü 42:4

Rü ngẽxguma ngẽmagu charüxĩnügu rü marü tama yáxna namaxã chaxĩnü i ngẽma nax chaxaxuxü̃. Rü nüxna chacua̱xãchi ga yexguma Tupanapatawa chanagagügu ga yema muxü̃ma ga duü̃xü̃gü. Rü taãẽãcü moxẽ nüxna taxã rü tanatachigaxẽxẽ.

Wiyaegü 42:11

¿Natürü ta̱xacüca̱x chi nüxü̃ charüxoxü̃? ¿Rü ta̱xacüca̱x chi ichaxoégaãẽxü̃? Erü Tupanaaxü̃́ nixĩ i chayaxõxü̃ rü yimáxü̃ tá nixĩ ichicua̱xüxü̃amaxü̃. Erü nüma nixĩ i chorü Tupana ya chorü maxẽxẽruxü̃ ixĩcü.