Ore i mexü̃ ga Cuáü̃ ümatüxü̃ 7:39 - Tupanaarü Ore

³⁹ Rü yexguma yema ñaxgu ga Ngechuchu rü nüxü̃ nixu nax guxü̃ma ga yema nüxü̃́ yaxõgüxü̃ rü tá nayauxgüãxü̃ i Naãxẽ ya Üünexü̃. Natürü tama yexgumatama nanayauxgü, yerü tauta wenaxarü daxũguxü̃ ga naaneca̱x nataegu ga Ngechuchu nax guxü̃arü ãẽ̱xgacü yixĩxü̃ca̱x.

Ore i mexü̃ ga Cuáü̃ ümatüxü̃ 7:39 Referans Kwoze

Ngechuchuarü ngúexü̃gü ga yamugüxü̃arü puracüchiga 2:17

“Rü ñanagürü ya Tupana: ‘Ngẽma nawa iyacuáxü̃ i ngunexü̃gügu rü guxü̃ i duü̃xü̃gütanüwa tá chanamu i Chauãxẽ ya Üünecü. Rü penegü rü pexacügü rü tá nüxü̃ nixugügü i chorü ore. Rü choma rü tá chayango̱xetüxẽxẽ i perü ngextü̱xüxü̃gü, rü tá nüxü̃ nadaugü i ngẽma tá nüxü̃ chawéxü̃. Rü perü yaguã̱xgümaxã tá chidexa i nanegüwa.

Joel 2:28

Rü ñanagürü ta: —Rü nawena i ngẽma pemaxã nüxü̃ chixuxü̃ rü tá guxü̃ma i duü̃xü̃güca̱x núma chanamu i Chauãxẽ. Rü ngẽma penegü rü pexacügü rü tá chorü orexü̃ nixugüe. Rü ngẽma yaxü̃ i duü̃xü̃gü rü tá nixãnegügü. Rü ngẽma ngextü̱xüxü̃gü rü tá nüxü̃ nadaugü i ẽxü̃guxü̃ i taguma texé nüxü̃ dauxü̃.

Ngechuchuarü ngúexü̃gü ga yamugüxü̃arü puracüchiga 2:33

Rü Tupana rü daxũguxü̃ ga naanewa nanaga nax norü tügünecüwawa yanatoxü̃ca̱x. Rü Tanatü ya Tupana rü marü nüxna nanamu ga Naãxẽ ya Üünecü ga nũxcüma nüxü̃ yaxuxü̃ rü tá nua nax namuaxü̃. Rü ñu̱xma ya yimá Ngechuchu rü núma totanüwa nanamu i ngẽma Naãxẽ ya Üünecü. Rü ngẽma Naãxẽ nua üxü̃ nixĩ i ñu̱xma nüxü̃ pedauxü̃ rü nüxü̃ pexĩnüexü̃.

Ngechuchuarü ngúexü̃gü ga yamugüxü̃arü puracüchiga 2:4

Rü guxü̃ma ga yema yexmagüxü̃ rü Tupanaãxẽ ya Üünecü nüxna nangu. Rü inanaxügüe nax to ga nagawa yadexagüxü̃ yema Naãxẽ ya Üünecü naxwa̱xexü̃ãcüma.

Ore i mexü̃ ga Cuáü̃ ümatüxü̃ 16:7

Natürü aixcüma pemaxã nüxü̃ chixu rü pexca̱x narümemae nixĩ nax Chaunatüca̱x chataeguxü̃. Rü ngẽxguma chi tama Chaunatüxü̃tawa chaxũxgu rü taxũchima núma naxũ ya Naãxẽ ya Üünecü ya perü ngü̃xẽẽruxü̃. Natürü ngẽxguma ngéma chaxũxgu rü choma tá núma chanamu.

Ore i mexü̃ ga Cuáü̃ ümatüxü̃ 12:16

Rü noxri ga norü ngúexü̃gü rü tama nüxü̃ nacua̱xgü ga Ngechuchuchiga nax yixĩxü̃ ga yema ore. Natürü nawena ga yexguma marü Ngechuchu daxũwa ũxgu, rü yexguma nixĩ ga nüxna nacua̱xãchiexü̃ ga guxü̃ma ga yema Ngechuchuxü̃ ngupetüxü̃, rü yema Tupanaarü ore ümatüxü̃ãcü nüxü̃ nax nangupetüxü̃.

Ichaía 32:15

Rü ngẽmawena ya Cori ya Tupana rü tá tatanüwa nanamu i Naãxẽ ya Üünecü. Rü ngẽxguma i ngẽma naane i taxuxü̃ma i nanetü i mexü̃ nawa rüxüxü̃ rü tá naane i mexü̃xü̃ nananguxuchi. Rü ngẽma naanewa rü tá yexeraãcü name i nanetü.

Romanos 8:9

Natürü i pemax, rü tama pexenearü ngúchaü̃gu pemaxẽ, erü Naãxẽ ya Üünecüarü ngúchaü̃gu nixĩ i pemaxẽxü̃ erü pewa namaxü̃ i Tupanaãxẽ ya Üünecü. Rü yíxema tama tüxü̃́ nangẽxmaxe i Cristuãxẽ rü tama Cristuarü duü̃xü̃ tixĩ.

Ngechuchuarü ngúexü̃gü ga yamugüxü̃arü puracüchiga 2:38

Rü Pedru nanangãxü̃, rü ñanagürü: —¡Nüxü̃ perüxoe i pecüma i chixexü̃ rü Tupanaca̱x pedaugüe rü Ngechuchuégagu ípebaiü̃ nax pexü̃́ nüxü̃ nangü̃maxü̃ca̱x i perü pecadugü ya Tupana! Rü Tupana tá pexna nanamu i Naãxẽ ya Üünecü.

Ore i mexü̃ ga Cuáü̃ ümatüxü̃ 20:22

Rü yexguma rü naétü “cue”, ñanagürü ga Ngechuchu. Rü ñu̱xũchi ñanagürü nüxü̃: —¡Penayauxgü i Tupanaãxẽ ya Üünecü!

Ore i mexü̃ ga Cuáü̃ ümatüxü̃ 12:23

Rü yexguma ga Ngechuchu rü ñanagürü nüxü̃: —Marü nawa nangu nax nayuxü̃ ya Tupana Nane ya duü̃xü̃xü̃ ixĩcü nax wenaxarü Nanatüxü̃tawa naxũxü̃ca̱x.

Ichaía 44:3

Rü choma rü tá chayaya̱xẽxẽ i dexá i naxnücüanewa, rü íyapaanexü̃wa rü tá chanango̱xẽxẽ i natüacügü. Rü petaagüna tá chanamu ya Chauãxẽ ya Üünecü rü tá petaagüxü̃ charüngü̃xẽxẽ.

Efesios 4:30

¡Rü pexuãxẽgü nax tama penangechaü̃xẽẽxü̃ca̱x i Tupanaãxẽ ya Üünecü! Erü yimá nixĩ ya Tupana pexna namucü nax nüxü̃ pecuáxü̃ca̱x nax aixcüma norü duü̃xü̃gü pixĩgüxü̃ ñu̱xmatáta ngẽma ngunexü̃ i nagu pexca̱x núma naxũxü̃ ya Cristu.

2 Corintios 3:8

Natürü yema Moichéarü mugüarü yexera narümemaexü̃chi i ngẽma Tupanaarü uneta i ngexwaca̱xü̃xü̃ i Naãxẽ ya Üünexü̃ tamaxã nüxü̃ ixuxü̃.

Ngechuchuarü ngúexü̃gü ga yamugüxü̃arü puracüchiga 4:31

Rü yexguma yumüxẽwa nüxü̃ nachauegu, rü gumá ĩpata ga nawa nangutaque̱xegüne rü naxĩã̱xãchi. Rü Tupanaãxẽ ya Üünecü rü nüxna nangu ga guxü̃ma. Rü tama namuü̃eãcüma nüxü̃ nixugüe ga Tupanaarü ore.

Ngechuchuarü ngúexü̃gü ga yamugüxü̃arü puracüchiga 3:13

Tórü o̱xigü ga Abraáü̃ rü Ichaá rü Acóbu rü togü ga tórü o̱xigü rü nüxü̃́ nayaxõgü ga Tupana. Rü yimátama Tupana nixĩ ya ñu̱xma Ngechuchuxü̃ tachigaxẽẽcü, nax guxü̃arü yexera yixĩxü̃ca̱x. Rü gumátama Ngechuchu ya Tupanaarü ngü̃xẽẽruxü̃ ixĩcü nixĩ ga pema ãẽ̱xgacü ga Pirátuxü̃tawa penagagücü. Rü yexguma nüxü̃ yangéxchaü̃gu ga Pirátu, rü pema rü tama penaxwa̱xegü nax yange̱xãxü̃.

Ore i mexü̃ ga Cuáü̃ ümatüxü̃ 17:5

Rü ñu̱xma Pa Chaunatüx, rü chanaxwa̱xe i cugüxü̃tawa choxü̃ cungexmaxẽxẽ nax choxü̃́ nangẽxmaxü̃ca̱x ga yematama pora ga cumaxã choxü̃́ yexmaxü̃ ga noxri tauta naane uxgu.

Ore i mexü̃ ga Cuáü̃ ümatüxü̃ 14:13

Rü guxü̃ma i ta̱xacü i chauégagu Tupanaxü̃tawa naxca̱x ípecaxü̃ rü tá pexna chanaxã. Rü ngẽmaãcü tá chanaxü nax chaugagu nangóxü̃ca̱x i Chaunatüarü pora.

Ore i mexü̃ ga Cuáü̃ ümatüxü̃ 7:12

Rü yema duü̃xü̃gü ga yéma yexmagüxü̃, rü nügütanüwa poraãcü Ngechuchuchiga nidexagü. Rü ñuxre ga yema duü̃xü̃gü rü ñanagürügü: —Yimá rü wüxi ya yatü ya mecü nixĩ —ñanagürügü. Natürü ga togü rü ñanagürügü: —Ngẽma yatü rü tama name erü duü̃xü̃güxü̃ nawomüxẽxẽ —ñanagürügü.

Ore i mexü̃ ga Cuáü̃ ümatüxü̃ 6:14

Rü yexguma yema duü̃xü̃gü nüxü̃ daugügu ga yema cua̱xruxü̃ ga Tupanaarü poramaxã naxüxü̃ ga Ngechuchu, rü ñanagürügü: —Aixcümaxü̃chi daa nixĩ ya Tupanaarü orearü uruxü̃ ga gumá ínanguxẽẽcü —ñanagürügü.

Ore i mexü̃ ga Cuáü̃ ümatüxü̃ 1:33

Choma rü noxri tama nüxü̃ chacua̱x ga texe nax yixĩxü̃ ga nümax. Natürü ga Tupana ga choxü̃ mucü nax dexáwamare duü̃xü̃güxü̃ íchabaiü̃xẽẽxü̃, rü ñanagürü choxü̃: “Yimá nüxü̃ cudaucü nax Chauãxẽ i Üünexü̃ naétügu írüxĩxü̃, rü yimá tá nixĩ ya Chauãxẽ i Üünexü̃ duü̃xü̃güna nguxẽẽcü”, ñanagürü choxü̃.

Ore i mexü̃ ga Cuáü̃ ümatüxü̃ 1:21

Rü wenaxarü nüxna nacagü rü ñanagürügü: —¿Texé ẽ̱xna quixĩ? ¿Ẽ̱xna cuma ga nũxcümaü̃cü ga Tupanaarü orearü uruxü̃ ga Ería quixĩxü̃? —ñanagürügü. Rü Cuáü̃ nanangãxü̃ rü ñanagürü: —Tama Ería chixĩ —ñanagürü. Rü nümagü rü wenaxarü nüxna nacagüe rü ñanagürügü: —¿Ẽ̱xna cuma quixĩxü̃ ya yimá orearü uruxü̃ ga Moiché nüxü̃ ixucü ga ínguxchaü̃cü? —ñanagürügü. Rü Cuáü̃ nanangãxü̃ rü ñanagürü: —Tama yimá chixĩ —ñanagürü.

Ore i mexü̃ ga Luca ümatüxü̃ 24:49

Rü dücax, choma rü pexca̱x tá chanamu i Naãxẽ ya Üünexü̃ i Chaunatü pexca̱x namaxã ixunetaxü̃. Natürü chanaxwa̱xe i númatátama daa ĩane ya Yerucharéü̃wa pengẽxmagü, ñu̱xmatáta penayauxgü i ngẽma Tupanaãxẽ ya Üünecü i daxũwa ne ũxü̃ i tá pexü̃ poraexẽẽxü̃ —ñanagürü.

Ore i mexü̃ ga Luca ümatüxü̃ 7:16

Rü yexguma yemaxü̃ nadaugügu ga duü̃xü̃gü, rü guxü̃ma namuü̃e. Rü inanaxügüe ga Tupanaxü̃ nax yacua̱xüü̃güxü̃. Rü ñanagürügü: —Wüxi i Tupanaarü orearü uruxü̃ i poraxü̃ tatanüwa nango̱x —ñanagürügü. Rü ñanagürügü ta: —Tupana nua naxũ nax norü duü̃xü̃güxü̃ yanangü̃xẽẽxü̃ca̱x —ñanagürügü.

Ore i mexü̃ ga Luca ümatüxü̃ 3:16

Natürü ga Cuáü̃ rü guxãxü̃ ñanagürü: —Aixcüma i choma rü dexáwamare pexü̃ íchabaiü̃xẽxẽ, natürü tá ínangu i to i Tupanaarü orearü uruxü̃, rü nüma tá pexna nananguxẽxẽ i Tupanaãxẽ ya Üünecü wüxi i üxüemarüxü̃. Erü nüma rü choxü̃ narüyexera nax naporaxü̃. Rü choma rü nape̱xewa rü taxuwama chame rü bai i norü chapatucunüarü wẽgüwa chame.

Ore i mexü̃ ga Matéu ümatüxü̃ 16:14

Rü nüma ga norü ngúexü̃gü rü nanangãxü̃ rü ñanagürügü: —Nangexma i duü̃xü̃gü rü: “Cuáü̃ ya báiü̃xẽẽruxü̃ quixĩ”, ñagüxü̃. Rü togü rü: “Ería quixĩ”, ñagüxü̃. Rü togü rü: “Yeremía quixĩ”, ñagüxü̃. Rü togü rü: “Wüxi ga nũxcümaü̃cü ga Tupanaarü orearü uruxü̃ quixĩ”, ñagüxü̃ —ñanagürügü.

Ucu̱xẽgüchiga 1:23

¡Iperüxĩnüe i chorü ucu̱xẽgü! Rü tá pexna chanaxã i ngẽma cua̱x i aixcüma mexü̃ rü tá pexü̃ nüxü̃ chacua̱xẽxẽ i chorü ĩnü.

Ore i mexü̃ ga Cuáü̃ ümatüxü̃ 14:26

Natürü Chaunatü rü tá chauégagu núma nanamu i Naãxẽ ya Üünexü̃ nax pexü̃ nangü̃xẽẽxü̃ca̱x. Rü nüma i Naãxẽ ya Üünexü̃ tá pexü̃ nangúexẽxẽ i guxü̃ma, rü tá nüxna pexü̃ nacua̱xãchixẽxẽ i guxü̃ma i ore ga pemaxã nüxü̃ chixuxü̃.

Ore i mexü̃ ga Matéu ümatüxü̃ 21:11

Rü yema Ngechuchuwe rüxĩxü̃ ga duü̃xü̃gü rü nanangãxü̃gü rü ñanagürügü: —Daa nixĩ ya Tupanaarü orearü uruxü̃ ya Ngechuchu ya Gariréaanewa ngẽxmane ya ĩane ya Nacharétucüã̱x ixĩcü —ñanagürügü.

Ichaía 12:3

Rü pema rü tá taãẽãcüma nawa pexaxegü i ngẽma dexá i maxü̃ tüxna naxãxü̃.

Wiyaegü 68:18

Pa Tupanax, yexguma Chióü̃ ya ma̱xpǘnegu cuxĩnagügu rü cugüwe cuyagagü i ngẽma ícuyauxü̃xü̃ i curü uanügü. Rü duü̃xü̃gütanüwa cunayaxu i ãmaregü. Rü woo i ngẽma tama cuga ĩnüechaü̃xü̃ rü natanüwa cunayaxu i ãmaregü nax ngéma Chióü̃wa cuxãpataxü̃ca̱x.

Ore i mexü̃ ga Cuáü̃ ümatüxü̃ 8:54

Rü Ngechuchu nanangãxü̃, rü ñanagürü nüxü̃: —Ega chaugü chitama chicua̱xüü̃gu rü ngẽma rü taxuwama name. Natürü yimá choxü̃ icua̱xüxü̃cü rü Chaunatü nixĩ. Rü yimá Chaunatütama nixĩ ya nüxü̃ pixucü nax perü Tupana yixĩxü̃.

Ore i mexü̃ ga Cuáü̃ ümatüxü̃ 16:14

Rü nüma rü tá chauxü̃tawa nanayaxu i chorü ngu̱xẽẽtae, rü ñu̱xũchi tá pexü̃ namaxã nangúexẽxẽ. Rü ngẽmaãcü tá choxü̃ nicua̱xüxü̃.

Ore i mexü̃ ga Cuáü̃ ümatüxü̃ 17:1

Rü yema ñaxguwena rü Ngechuchu daxũgu nadawenü, rü ñanagürü: —Pa Chaunatüx, marü nawa nangu i ngunexü̃ nax duü̃xü̃güarü pecaduca̱x chayuxü̃. Rü chanaxwa̱xe nax duü̃xü̃güxü̃ nüxü̃ cucua̱xẽẽxü̃ nax choma rü aixcüma Cune chixĩxü̃. Rü ngẽmaãcü i choma rü tá nüxü̃ nüxü̃ chacua̱xẽxẽ nax cuma rü aixcüma Tupana nax quixĩxü̃.

Ngechuchuarü ngúexü̃gü ga yamugüxü̃arü puracüchiga 19:2

Rü nüxna naca, rü ñanagürü nüxü̃: —¿Marü penayaxuxü̃ ga Tupanaãxẽ ya Üünecü ga yexguma peyaxõgügu? —ñanagürü. Rü nümagü nanangãxü̃, rü ñanagürügü: —Tama. Taguma nüxü̃ taxĩnüechiga nax ta̱xacü yixĩxü̃ i Tupanaãxẽ ya Üünecü —ñanagürügü.