Ore i mexü̃ ga Cuáü̃ ümatüxü̃ 6:30 - Tupanaarü Ore

³⁰ Rü yexguma ga nümagü rü nüxna nacagü, rü ñanagürügü nüxü̃: —¿Ta̱xacürü cua̱xruxü̃xü̃ tá toxü̃ cudauxẽxẽ nax cuxü̃́ tayaxõgüxü̃ca̱x nax aixcüma Cristu quixĩxü̃? ¿Rü ta̱xacü i to i mexü̃ tá toxca̱x cuxü i ñu̱xmax?

Ore i mexü̃ ga Cuáü̃ ümatüxü̃ 6:30 Referans Kwoze

Ore i mexü̃ ga Cuáü̃ ümatüxü̃ 12:37

Rü woo ga Ngechuchu rü duü̃xü̃güpe̱xewa nanaxü ga muxü̃ma ga taxü̃ ga mexü̃ ga cua̱xruü̃gü ga Tupanaarü poramaxã naxüxü̃, natürü yexguma rü ta tama nüxü̃́ nayaxõgü ga duü̃xü̃gü.

1 Corintios 1:22

Ngẽma Yudíugü rü nüxü̃ nadaugüchaü̃ i cua̱xruü̃gü i Tupanaarü poramaxã üxü̃. Rü ngẽma Griégugü rü naxca̱x nadaugü i ñoma i naanecüã̱x i duü̃xü̃güarü cua̱x.

Ore i mexü̃ ga Cuáü̃ ümatüxü̃ 10:38

Natürü ngẽxguma chanaxüxgu i ngẽma Chaunatü üxü̃, rü woo tama choxü̃́ peyaxõgügu, rü chanaxwa̱xe i nüxü̃́ peyaxõgü i ngẽma mexü̃gü i Chaunatüarü poramaxã chaxüxü̃. Erü ngẽmawa tá nüxü̃ pecua̱x nax Chaunatü rü chowa nangẽxmaxü̃ rü choma i nawa changexmaxü̃ —ñanagürü.

Ore i mexü̃ ga Cuáü̃ ümatüxü̃ 6:36

Natürü marü pemaxã nüxü̃ chixu rü woo nax choxü̃ pedaugüxü̃ rü tama choxü̃́ peyaxõgü.

Ore i mexü̃ ga Cuáü̃ ümatüxü̃ 2:18

Rü yexguma ga yema Yudíugüarü ãẽ̱xgacügü rü Ngechuchuna nacagü, rü ñanagürügü: —¿Ta̱xacürü cua̱xruxü̃xü̃ tá toxü̃ cudauxẽxẽ nax nawa nüxü̃ tacuáxü̃ca̱x nax aixcüma Tupana yixĩxü̃ ya cuxü̃ mucü nax ícunawoxü̃xü̃ca̱x i ñaa duü̃xü̃gü i nua? —ñanagürügü.

Popera ga Yudíugü ga yaxõgüxü̃ca̱x ümatüxü̃ 2:4

Rü nümatama ga Tupana rü ta taxca̱x nanango̱xẽxẽ nax aixcüma yixĩxü̃ i Cristugagu tüxü̃́ nangẽxmaxü̃ i ngẽma maxü̃. Yerü nüma ga Tupana rü Naãxẽ ya Üünexü̃wa tüxü̃ nanawe̱x ga naguxü̃raü̃xü̃ ga taxü̃ ga mexü̃gü rü cua̱xruxü̃gü ga norü poramaxã naxüxü̃ yema nüma nanaxwa̱xexü̃ãcüma.

Ngechuchuarü ngúexü̃gü ga yamugüxü̃arü puracüchiga 4:30

¡Rü curü poramaxã nameexẽxẽ i duü̃xü̃gü i ida̱xaweexü̃! ¡Rü duü̃xü̃güxü̃ nawe̱x i cua̱xruü̃gü i curü poramaxã cuxüxü̃ i naégagu ya curü ngü̃xẽẽruxü̃ ya üünecü ya Ngechuchu! —ñanagürügü.

Ore i mexü̃ ga Márcu ümatüxü̃ 15:32

¡Ñu̱xma rü ínaxĩ̱x i curuchawa i ngẽma Cristu i Iraétanüxü̃arü Ãẽ̱xgacü nax nüxü̃ idaugüxü̃ca̱x rü nüxü̃́ yaxõgüxü̃ca̱x! —ñanagürügü. Rü woo ga yema máetagüxü̃ ga naxrüxü̃ curuchawa ipotagüxü̃, rü namaxã naguxchigagü.

Ore i mexü̃ ga Márcu ümatüxü̃ 8:11

Rü Ngechuchuxü̃tawa nangugü ga Parichéugü, rü inanaxügüe ga nax namaxã yaporagatanücüüxü̃. Rü nüxna nacagüe nax nüxü̃ nüxü̃ nadauxẽẽxü̃ca̱x ga wüxi ga cua̱xruxü̃ ga Tupanaarü poramaxã naxüxü̃, nax yemaacü nüxü̃ naxügüxü̃ca̱x, rü nüxü̃ nacua̱xgüxü̃ca̱x rü aixcüma Tupana Nane yixĩxü̃.

Ichaía 5:19

Rü pema rü ñaperügügü: —¡Paxa naxü ya Cori ya Tupana i ngẽma naxüxchaü̃xü̃, nax nüxü̃ idauxü̃ca̱x! ¡Rü Tupana ya Üünecü ya Iraéanearü Tupana rü paxa yanguxẽẽã i ngẽma nagu naxĩnüxü̃ nax nüxü̃ icuáxü̃ca̱x i ngẽma tá naxüxü̃! —ñaperügügü.

Nüxíraxü̃xü̃ ga popera ga ãẽ̱xgacügüchiga 13:5

Rü yexgumatama ga yema ãmarearü guruxü̃ rü nangĩãchi rü guma tanimaca ga naétüwa yexmacü rü nagüane yema Cori ya Tupanaarü orearü uruxü̃ nüxü̃ ixuxü̃rüxü̃. Rü yemawa nango̱x nax aixcüma Tupana yixĩxü̃ ga namuxü̃ nax nüxü̃ yaxuxü̃ca̱x ga yema ore.

Nüxíraxü̃xü̃ ga popera ga ãẽ̱xgacügüchiga 13:3

Rü yematama ngunexü̃gu ga yema orearü uruxü̃ rü ãẽ̱xgacümaxã nüxü̃ nixu ga wüxi ga cua̱xruxü̃ nax yemawa nüxü̃ nacuáxü̃ca̱x nax aixcüma Tupanaarü ore yixĩxü̃ ga nüxü̃ yaxuxü̃, rü ñanagürü: —Ñaa nixĩ i cua̱xruxü̃ i Cori ya Tupana nüxü̃ ixuxü̃: “Rü ñaa ãmarearü guruxü̃ rü tá nangĩãchi rü yima tanimaca ya naétüwa ngẽxmacü rü tá nagüane” —ñanagürü.

Ínachoxü̃xü̃chiga 4:8

Rü ñu̱xũchi ga Cori ya Tupana rü ñanagürü nüxü̃: —Rü ngẽxguma chi tama ngẽma nüxíraxü̃xü̃ i cua̱xruü̃gagu cuxü̃́ yaxõgüã̱gu, rü ngẽma to i cua̱xruü̃gagu tá nixĩ i cuxü̃́ yaxõgüãxü̃.

Ínachoxü̃xü̃chiga 7:9

—Ngẽxguma Faraóü̃ pexna naxca̱x caxgux nax penaxüxü̃ i wüxi i mexü̃ i chorü poramaxã üxü̃, rü tá Aróü̃maxã nüxü̃ quixu nax Faraóü̃pe̱xegu nañaaxü̃ca̱x ya norü naixmena̱xã nax ãxtapexü̃ nanguxuchixü̃ca̱x —ñanagürü.

Ore i mexü̃ ga Cuáü̃ ümatüxü̃ 6:2

Rü muxü̃ma ga duü̃xü̃gü rü Ngechuchuwe narüxĩ. Yerü marü nüxü̃ nadaugü ga yema cua̱xruü̃gü ga Tupanaarü poramaxã naxüxü̃ ga yexguma duü̃xü̃gü ga ida̱xaweegüxü̃ca̱x yataanexẽẽgüãgu.

Ore i mexü̃ ga Cuáü̃ ümatüxü̃ 6:14

Rü yexguma yema duü̃xü̃gü nüxü̃ daugügu ga yema cua̱xruxü̃ ga Tupanaarü poramaxã naxüxü̃ ga Ngechuchu, rü ñanagürügü: —Aixcümaxü̃chi daa nixĩ ya Tupanaarü orearü uruxü̃ ga gumá ínanguxẽẽcü —ñanagürügü.