Ore i mexü̃ ga Cuáü̃ ümatüxü̃ 4:23 - Tupanaarü Ore

²³ Natürü ningaica rü marü norü orawa nangu nax yíxema aixcüma Tupanaxü̃ icua̱xüü̃güxe rü tá Tupanaãxẽ i Üünexü̃arü ngü̃xẽẽmaxã aixcüma mea nüxü̃ ticua̱xüü̃güxü̃, erü ngẽmaãcü nixĩ ya Tupana nanaxwa̱xexü̃ nax nüxü̃ ticua̱xüü̃güxü̃.

Ore i mexü̃ ga Cuáü̃ ümatüxü̃ 4:23 Referans Kwoze

Filipenses 3:3

Natürü yíxema aixcüma Tupanape̱xewa imexe, rü yixema tixĩgü. Rü Tupanaxü̃ ticua̱xüü̃gü i Naãxẽ ya Üünexü̃arü ngü̃xẽẽmaxã. Rü tataãẽgü erü Ngechuchu ya Cristuarü duü̃xü̃gü tixĩgü. Rü tama tayaxõgü nax ngẽma yigü íiwíecha̱xmüxü̃pe̱xechiraü̃xü̃ca̱x Tupanape̱xewa imexü̃.

Ore i mexü̃ ga Cuáü̃ ümatüxü̃ 5:25

Rü aixcüma pemaxã nüxü̃ chixu rü nawa tá nangu i ora rü ñu̱xmatama nixĩ nax Tupana Nanega tá naxĩnüexü̃ i ngẽma duü̃xü̃gü i yuexü̃. Rü yíxema Tupana Nanega ĩnüexe rü tá tamaxẽ.

Gálatas 4:6

Rü Tupana tüxna nanamu ga Naãxẽ ya Üünexü̃ nax tüxü̃ nüxü̃ nadauxẽẽxü̃ca̱x nax aixcüma naxacügüxüchi ixĩgüxü̃. Rü ngẽmaca̱x i ñu̱xma rü marü name i “Pa Chaunatüx”, ñatarügü nüxü̃ ya Tupana.

Romanos 8:26

Rü ngẽxgumarüxü̃ ta Tupanaãxẽ tüxü̃ narüngü̃xẽxẽ nax iporaexü̃ca̱x i ngẽxguma yarüturaegu nax ínangu̱xẽẽgüxü̃. Rü yixema rü tama nüxü̃ tacua̱x nax mea Tupanamaxã idexagüxü̃ rü ta̱xacüca̱x iyumüxẽgüxü̃. Natürü Naãxẽ ya Üünecü rü naxauxãcüma naga i tama nüxü̃ icuáxü̃maxã Tupanamaxã nidexa rü taxca̱x nayumüxẽ.

Ore i mexü̃ ga Cuáü̃ ümatüxü̃ 12:23

Rü yexguma ga Ngechuchu rü ñanagürü nüxü̃: —Marü nawa nangu nax nayuxü̃ ya Tupana Nane ya duü̃xü̃xü̃ ixĩcü nax wenaxarü Nanatüxü̃tawa naxũxü̃ca̱x.

Efesios 6:18

Rü name i guxü̃guma peyumüxẽgüxü̃. ¡Rü guxü̃guma Tupanaãxẽ i Üünexü̃arü ngü̃xẽẽmaxã Tupanana peca! ¡Rü pexuãxẽ nax taguma nüxü̃ perüxoexü̃ca̱x! Rü ngẽmaãcü name i naxca̱x peyumüxẽgü i guxü̃ma i duü̃xü̃gü i Tupanaaxü̃́ yaxõgüxü̃.

Ore i mexü̃ ga Cuáü̃ ümatüxü̃ 4:21

Rü Ngechuchu ngĩxü̃ nangãxü̃ rü ñanagürü: —Pemax i Chamáriaanecüã̱xgü rü tama aixcüma nüxü̃ pecua̱xgü ya yimá nüxü̃ picua̱xüü̃gücü. Natürü toma i Yudíugü rü aixcüma nüxü̃ tacua̱x ya yimá nüxü̃ ticua̱xüü̃gücü, erü Yudíugügagu nixĩ ya Tupana namaxẽxẽẽxü̃ i duü̃xü̃gü. ¡Choxü̃́ yaxõ, Pa Ngecüx! Rü aixcüma tá ínangu i ngunexü̃ nax taxũtáma daa ma̱xpǘnewa rüe̱xna Yerucharéü̃wa nüxü̃ nax picua̱xüü̃güxü̃ ya Tanatü ya Tupana.

Ore i mexü̃ ga Cuáü̃ ümatüxü̃ 1:17

Rü Moichéxü̃ nixĩ ga namuxü̃ ga Tupana nax tüxü̃ nangúexẽẽxü̃ca̱x ga norü mugü. Natürü Ngechuchu ya Cristuxü̃ nixĩ ga namuxü̃ nax tüxü̃ nangúexẽẽxü̃ca̱x nax yigü ingechaü̃güxü̃ rü nagu imaxẽxü̃ca̱x i norü ore i aixcüma ixĩxü̃.

Ichaía 29:13

Rü nüma ya Cori ya Tupana rü ñanagürü choxü̃: —Ñaa duü̃xü̃gü rü norü dexawaxicatama nügü nixugüe nax chorü duü̃xü̃gü yixĩgüxü̃, natürü tama chauga naxĩnüe. Rü naã̱xmaxãxicatama choxü̃ nicua̱xüü̃gü, natürü norü maxü̃newa rü tama chaugu narüxĩnüe. Rü ngẽma norü cua̱xüü̃gü rü duü̃xü̃güarü ĩnüwa nanayauxgü.

Ichaía 58:2

Rü nümagü rü guxü̃ i ngunexü̃gu cha̱u̱xca̱x nadaugü rü chomaxã nüxü̃ nixugü nax chauga naxĩnüechaü̃xü̃ ñoma mea namaxẽxü̃rüxü̃ rü chorü mugügu naxĩnüexü̃rüxü̃. Rü nümagü rü choxna naxca̱x nacagü i mexü̃ i mugü rü choxna nangaicamagüchaü̃.

Romanos 8:15

Yerü pema rü tama penayauxgü ga wüxi ga naãxẽ i pexü̃ muü̃ẽẽxü̃. Natürü yema Naãxẽ ga peyauxgüxü̃ rü Tupanaxacügü pexü̃ nixĩgüxẽxẽ. Rü ngẽmatama Naãxẽ ya Üünexü̃ nixĩ i tüxü̃ rüngü̃xẽẽxü̃ nax Tupanaxü̃ ñagüxü̃: “Pa Papax”, ñagüxü̃ nüxü̃.

Yochué 24:14

Rü nüma ga Yochué rü ñanagürü ta: —Rü ñu̱xma rü name i aixcüma Cori ya Tupanaxü̃ pengechaxü̃gü rü naga pexĩnüe rü norü ngúchaü̃ pexü. Rü name nixĩ i nüxna pexĩgachixü̃ i ngẽma nũxcüma ga perü o̱xigüarü tupananetagü ga taxtü ga Eufrátecutüwa rü Equítuanewa nüxü̃ yacua̱xüü̃güxü̃.

Nüxíraxü̃xü̃ ga popera ga Pedru ümatüxü̃ 2:9

Natürü pema nixĩ i duü̃xü̃gü i tórü ãẽ̱xgacü ya Tupana pexü̃ dexü̃ nax norü puracü pexügüxü̃ca̱x. Rü pema nixĩ i duü̃xü̃gü i nape̱xewa ixüünexü̃, erü nümatama ya Tupana rü norü duü̃xü̃güxü̃ pexü̃ nixĩgüxẽxẽ nax nüxü̃ pixuxü̃ca̱x i ngẽma mexü̃gü i norü poramaxã naxüxü̃. Rü nümatama ya Tupana nixĩ ga ẽanexü̃wa pexü̃ ínanguxü̃xẽẽxü̃ nax norü ngóonexü̃ i mexẽchixü̃gu pechocuxü̃ca̱x.

Wiyaegü 51:6

Cuma rü nüxü̃ cungechaü̃ i ngẽma duü̃xü̃ i aixcüma nüxü̃ ixuxü̃ i norü pecadugü. Rü chauãẽwa cunanguxẽxẽ i cua̱x.

Wiyaegü 17:1

Pa Corix ¡choxü̃́ nüxü̃ naxĩnü i ngẽma cuxna naxca̱x chacaxü̃, erü wüxi i mexü̃ nixĩ! ¡Rü choxü̃́ nüxü̃ naxĩnü i ngẽxguma tagaãcü curü ngü̃xẽxẽca̱x cuxna chacaxgu! ¡Rü choxü̃́ nüxü̃ naxĩnü i chorü yumüxẽ! Erü choma rü tama wüxi i dorata̱xáxü̃ chixĩ.

1 Chamué 12:24

Rü ñu̱xma i pema rü penaxwa̱xe i Cori ya Tupanaaxü̃́ peyaxõgü rü aixcüma nüxü̃ picua̱xüü̃gü. ¡Rü nagu perüxĩnüe nax ñuxãcü poraãcü pexü̃ nax nangü̃xẽxẽxü̃!

Ore i mexü̃ ga Cuáü̃ ümatüxü̃ 16:32

Rü nawa tá nangu i ngunexü̃ rü ñu̱xmatátama nixĩ i nax pegü pewoonexü̃. Rü wüxichigü i pema rü tá pepatawa pexĩ, rü chaxica tá nua choxü̃ peta̱x. Natürü tama chaxica changexma, erü Chaunatü rü chauxü̃tawa nangẽxma.

Yeremía 4:2

Rü ngẽxguma cha̱u̱xca̱x pewoeguxgu rü aixcüma chauégagu ipexunetagu, rü choma rü tá taxü̃ i ngü̃xẽxẽ chixĩ naxca̱x i guxü̃ma i nachixü̃anegü, rü tá choxü̃ nicua̱xüü̃gü —ñanagürü.

Yeremía 3:10

Rü naétüwa ga yema chixexü̃ ga naxügüxü̃ ga yema Yudáanecüã̱xgü ga choxna ĩgüxü̃, rü choxü̃ nawomüxẽẽgümare rü tama aixcüma cha̱u̱xca̱x nawoegu. Rü chomatama ya Cori ya Tupana nixĩ i nüxü̃ chixuxü̃ i ngẽma —ñanagürü.

Ucu̱xẽgüchiga 15:8

Nüma ya Cori ya Tupana tama nanayaxu i norü ãmaregü i ngẽma chixexü̃gu maxẽxü̃. Natürü taãẽãcü nanayaxu i tümaarü yumüxẽgü ya yíxema aixcüma mea maxẽxe.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 29:17

Pa Chorü Tupanax, choma nüxü̃ chacua̱x nax guxü̃guma mea cunangugüxü̃ i torü ĩnü rü namaxã cutaãẽxü̃ nax tixaixcümagüxü̃. Rü ngẽmaca̱x aixcüma mexü̃gu charüxĩnüãcüma chorü ngúchaü̃maxã cuxna chanana i guxü̃ma i ñaa ãmaregü. Rü ñu̱xma rü chataãxẽ erü nüxü̃ chadau i ñaa curü duü̃xü̃gü i nuxã ngutaque̱xexü̃ rü guxü̃ma i norü ngúchaü̃maxã cuxna nanana i ngẽma norü ãmaregü.

Romanos 1:9

Rü Tupanaaxü̃́ nixĩ i guxü̃ma i chorü ngúchaü̃maxã chapuracüxü̃ rü nüxü̃ chixuxü̃ i norü ore i mexü̃ i Nanechiga. Rü nüma ya Tupana choxü̃ nadau rü nüxü̃ nacua̱x nax guxü̃guma pexca̱x chayumüxẽxü̃.

Wiyaegü 147:11

Natürü ngẽma aixcüma namaxã nataãẽxü̃ nixĩ nax nüxü̃ ticua̱xüü̃güxü̃ ya yíxema nagu yaxõgüxe i norü ngechaü̃.

Echequié 22:30

Rü choma rü ngẽma duü̃xü̃gütanügu naxca̱x chadau i wüxi i duü̃xü̃ i chope̱xewa ñaa nachixü̃aneétüwa chogüxü̃ nax tama chanapoxcuexü̃ca̱x i ngẽma duü̃xü̃gü, natürü taxuxü̃ma ichayangau.

Charumóü̃arü wiyae 2:14

Pa Chorü Muxtucux, ¿tü̱xcüü̃ ma̱xpǘnegüarü nutatanügu quicu̱x? ¡Choxü̃́ cugü nawe̱xchametü! ¡Choxü̃́ nüxü̃ naxĩnüxẽxẽ i cuga! Rü chataãxẽ nax cuxü̃ chadauxü̃. Rü namaixcura i cuga nax nüxü̃ chaxĩnüxü̃ —ñanagürü choxü̃.

Wiyaegü 32:2

Rü nataãxẽ ya yimá yatü ya Tupana nüxü̃́ nüxü̃ irüngümacü i norü pecadu rü norü maxü̃wa rü nataxuma i dora.

Ichaía 10:20

Rü ngẽma ngunexü̃gu rü ngẽma noxretama i Iraéanecüã̱xgü i Acóbutanüxü̃ i íyaxüxü̃, rü taxũtáma wena nüxü̃́ nayaxõgü i ngẽma chixri namaxã icuáxü̃. Rü tá Cori ya Tupana ya üünecü ya norü Tupanaca̱x nawoegu rü yimaaxü̃́ tá aixcüma nayaxõgü.

Ore i mexü̃ ga Cuáü̃ ümatüxü̃ 5:28

¡Taxṹ i peba̱i̱xãchiexü̃ namaxã i ngẽma ore i pemaxã nüxü̃ chixuxü̃! Erü tá ínangu i ora i nagu guxü̃ma i duü̃xü̃gü i yuexü̃ rü tá nüxü̃ naxĩnüexü̃ i Nanega.

Ore i mexü̃ ga Cuáü̃ ümatüxü̃ 16:2

Rü ngutaque̱xepataü̃güwa tá pexü̃ ínawoxü̃. Rü tá nawa nangu nax texé pexü̃ daixü̃ rü tá nagu tarüxĩnü nax ngẽmaãcü mexü̃ Tupanaca̱x taxüxü̃.