Ore i mexü̃ ga Cuáü̃ ümatüxü̃ 2:18 - Tupanaarü Ore18 Rü yexguma ga yema Yudíugüarü ãẽ̱xgacügü rü Ngechuchuna nacagü, rü ñanagürügü: —¿Ta̱xacürü cua̱xruxü̃xü̃ tá toxü̃ cudauxẽxẽ nax nawa nüxü̃ tacuáxü̃ca̱x nax aixcüma Tupana yixĩxü̃ ya cuxü̃ mucü nax ícunawoxü̃xü̃ca̱x i ñaa duü̃xü̃gü i nua? —ñanagürügü. Gade chapit la |
Rü nimuetanü ga duü̃xü̃gü ga Ngechuchuxü̃tawa ngutaque̱xegüxü̃. Rü inanaxügü ga Ngechuchu ga namaxã nax yadexaxü̃. Rü ñanagürü: —Ñaa duü̃xü̃gü i chixecümaxü̃ i ñomaü̃cüü maxẽxü̃ rü naxca̱x ínacagü i wüxi i cua̱xruxü̃ i Tupanaarü poramaxã üxü̃. Natürü Tupana rü wüxixicatama i cua̱xruxü̃ tá nüxü̃ nawe̱x. Rü yema cua̱xruxü̃ ga Tupana Yonáwa duü̃xü̃güxü̃ wéxü̃rüxü̃ tá nixĩ i nüxü̃ nawéxü̃.
Rü yema ñaxguwena ga Ngechuchu rü Tupanapata ga taxü̃negu naxücu. Rü yexguma yéma ínangu̱ẽẽtaeyane rü naxca̱x naxĩ ga chacherdótegüarü ãẽ̱xgacügü rü Yudíugüarü ãẽ̱xgacügü. Rü Ngechuchuna nacagüe rü ñanagürügü: —¿Texégagu cunaxü i ngẽma nua cuxüxü̃? ¿Rü texé cuxna taxãga nax cunaxüxü̃ca̱x i ngẽma? —ñanagürügü.
Rü yematama ngunexü̃gu ga yema orearü uruxü̃ rü ãẽ̱xgacümaxã nüxü̃ nixu ga wüxi ga cua̱xruxü̃ nax yemawa nüxü̃ nacuáxü̃ca̱x nax aixcüma Tupanaarü ore yixĩxü̃ ga nüxü̃ yaxuxü̃, rü ñanagürü: —Ñaa nixĩ i cua̱xruxü̃ i Cori ya Tupana nüxü̃ ixuxü̃: “Rü ñaa ãmarearü guruxü̃ rü tá nangĩãchi rü yima tanimaca ya naétüwa ngẽxmacü rü tá nagüane” —ñanagürü.