Ore i mexü̃ ga Cuáü̃ ümatüxü̃ 16:13 - Tupanaarü Ore

¹³ Rü ngẽxguma núma naxũxgu i Tupanaãxẽ ya Üünexü̃ i aixcüma ixĩxü̃, rü nüma tá pexü̃ nangúexẽxẽ i guxü̃ma i ore i aixcüma ixĩxü̃. Erü nüma rü tama nüechama tá nidexa, natürü ngẽma ore i Chaunatüxü̃tawa rü chauxü̃tawa nüxü̃ naxĩnüxü̃ tá nixĩ i nüxü̃ yaxuxü̃. Rü tá pexü̃ nüxü̃ nacua̱xẽxẽ i guxü̃ma i ta̱xacü i yixcüra tá ngupetüxü̃.

Ore i mexü̃ ga Cuáü̃ ümatüxü̃ 16:13 Referans Kwoze

Ore i mexü̃ ga Cuáü̃ ümatüxü̃ 14:26

Natürü Chaunatü rü tá chauégagu núma nanamu i Naãxẽ ya Üünexü̃ nax pexü̃ nangü̃xẽẽxü̃ca̱x. Rü nüma i Naãxẽ ya Üünexü̃ tá pexü̃ nangúexẽxẽ i guxü̃ma, rü tá nüxna pexü̃ nacua̱xãchixẽxẽ i guxü̃ma i ore ga pemaxã nüxü̃ chixuxü̃.

Ore i mexü̃ ga Cuáü̃ ümatüxü̃ 14:17

Rü nüma i Naãxẽ ya Üünexü̃ tá nixĩ i pexca̱x nango̱xẽẽãxü̃ i ore i aixcüma ixĩxü̃. Rü ñoma i naanecüã̱x i duü̃xü̃gü rü taxucürüwama nanayauxgü, erü tama nüxü̃ nadaugü rü tama nüxü̃ nacua̱xgü. Natürü i pema rü marü nüxü̃ pecua̱x, erü nüma rü petanüwa nangẽxma. Rü guxü̃gutáma pewa nangẽxma.

Ore i mexü̃ ga Cuáü̃ ümatüxü̃ 15:26

Natürü choma rü Chaunatüégagu tá pexca̱x núma chanamu i perü Ngü̃xẽẽruxü̃ ya Naãxẽ ya Üünecü i tá pexü̃ nüxü̃ cua̱xẽxẽxü̃ i ore i aixcüma ixĩxü̃. Rü ngẽxguma ínanguxgu rü nüma tá meama pemaxã nüxü̃ nixu i chauchiga.

Nüxíraxü̃xü̃ ga popera ga Cuáü̃ ümatüxü̃ 2:27

Natürü Cristu rü marü pexna nanamu i Naãxẽ ya Üünexü̃, rü nüma rü pewa namaxü̃. Rü ngẽmaca̱x tama penaxwa̱xe i to i perü ngúexẽẽruxü̃, erü nümatama i Naãxẽ ya Üünexü̃ rü pexü̃ nangúexẽxẽ i guxü̃ma. Rü norü ngu̱xẽẽtae rü aixcüma nixĩ rü tama dora nixĩ. Rü ngẽmaca̱x name nixĩ nax guxü̃guma Cristuaxü̃́ peyaxõgüxü̃, ngẽma Naãxẽ ya Üünexü̃ pexü̃ ngúexẽẽxü̃rüxü̃.

Nüxíraxü̃xü̃ ga popera ga Cuáü̃ ümatüxü̃ 2:20

Natürü guxãma i pema rü Cristu ya Üünecü marü pexna nanamu i Naãxẽ ya Üünexü̃, rü ngẽmaca̱x meama nüxü̃ pecua̱x i Tupanaarü ore i aixcüma ixĩxü̃.

Ore i mexü̃ ga Cuáü̃ ümatüxü̃ 12:49

Tama chaugagutama chidexa, natürü yimá Chaunatü ya núma choxü̃ mucü, rü yimá nixĩ i chomaxã nüxü̃ ixucü nax ta̱xacüxü̃ tá duü̃xü̃gümaxã chixuxü̃ rü ñuxãcü tá chanangúexẽẽxü̃.

Nüxíraxü̃xü̃ ga popera ga Cuáü̃ ümatüxü̃ 4:6

Natürü i yixema rü Tupanaxacügü tixĩgü. Rü yíxema Tupanaxü̃ cuáxe rü tüxü̃́ itarüxĩnü. Natürü yíxema tama Tupanaxü̃ cuáxe rü tama tüxü̃́ itarüxĩnü. Rü ngẽmawa nüxü̃ tacua̱x nax texé tixĩgüxü̃ ya aixcüma Tupanaãxẽarü duü̃xü̃gü ixĩgüxe rü texé tixĩgüxü̃ ya uanüarü duü̃xü̃gü ixĩgüxe.

Ore i mexü̃ ga Cuáü̃ ümatüxü̃ 14:6

Rü Ngechuchu nanangãxü̃, rü ñanagürü: —Choma nixĩ i nama i Chaunatüxü̃tawa nadaxü̃. Rü ngẽma nüxü̃ chixuxü̃ rü aixcüma nixĩ. Rü choma nixĩ i duü̃xü̃güxü̃ chamaxẽxẽẽxü̃. Rü chaugaguxicatama nixĩ i Chaunatüxü̃tawa nangugüxü̃ i duü̃xü̃gü.

Yema Cuáü̃ nüxü̃ dauxü̃ i yixcüra tá ngupetüxü̃chiga 1:19

Rü ñu̱xma rü chanaxwa̱xe i cunaxümatü i ngẽma marü nüxü̃ cudauxü̃. Rü ngẽma nixĩ i ngẽma ñu̱xma ngupetüxü̃, rü ngẽma yixcüra tá ngupetüxü̃.

Ore i mexü̃ ga Cuáü̃ ümatüxü̃ 8:38

Choma rü yema Chaunatü choxü̃ wéxü̃ nixĩ i pemaxã nüxü̃ chixuxü̃. Rü name i pema rü ta penaxü i ngẽma Penatüchiga nüxü̃ pexĩnüexü̃ —ñanagürü ga Ngechuchu.

2 Tesalonicenses 2:3

¡Rü taũtáma naga pexĩnüe i ngẽma duü̃xü̃gü i ngẽmaãcü pexü̃ womüxẽẽgüchaü̃xü̃! Erü naxü̃pa nax Ngechuchu núma ũxü̃ rü tá ínangu i ngẽma yatü i Tupanaarü uanü ixĩxü̃, rü tá nananuexẽxẽ i muxü̃ma i duü̃xü̃gü i yaxõgüchiréxü̃. Natürü Tupana marü ngẽma yatümaxã nanaxuegu rü tá nax napoxcuxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 1:1

Ñaa nixĩ ga yema ore ga Tupana Ngechuchu ya Cristuxü̃ nüxü̃ nacua̱xẽẽxü̃ nax nüxĩ́ norü duü̃xü̃güxü̃ nüxü̃ nacua̱xẽẽxü̃ca̱x i ngẽma paxa tá ínguxü̃. Rü nüma ga Ngechuchu ya Cristu rü norü orearü ngeruxü̃ ga daxũcüã̱xü̃ namu nax norü duü̃ ga Cuáü̃maxã nüxü̃ yaxuxü̃ca̱x.

2 Tesalonicenses 2:12

Rü ngẽmaca̱x düxwa Tupana tá poxcu namaxã naxuegu i guxü̃ma i ngẽma duü̃xü̃gü i tama yaxõgüchaü̃xü̃ i ngẽma ore i aixcüma ixĩxü̃ rü ñu̱xũchi namaxã taãẽgüxü̃ i ngẽma chixexü̃ nax naxügüxü̃.

Ngechuchuarü ngúexü̃gü ga yamugüxü̃arü puracüchiga 27:24

Rü ñanagürü choxü̃: “¡Taxṹ i cumuü̃xü̃, Pa Paurux! Erü Rómaarü ãẽ̱xgacü ya Chécharupe̱xewa tá cungu, rü cugagu tá Tupana nanamaxẽxẽxẽ i guxü̃ma i ngẽma cumücügü i cumaxã ngẽxma wapurugu ĩxü̃”, ñanagürü choxü̃.

Joel 2:28

Rü ñanagürü ta: —Rü nawena i ngẽma pemaxã nüxü̃ chixuxü̃ rü tá guxü̃ma i duü̃xü̃güca̱x núma chanamu i Chauãxẽ. Rü ngẽma penegü rü pexacügü rü tá chorü orexü̃ nixugüe. Rü ngẽma yaxü̃ i duü̃xü̃gü rü tá nixãnegügü. Rü ngẽma ngextü̱xüxü̃gü rü tá nüxü̃ nadaugü i ẽxü̃guxü̃ i taguma texé nüxü̃ dauxü̃.

Ngechuchuarü ngúexü̃gü ga yamugüxü̃arü puracüchiga 20:23

Rü ngẽma nüxü̃ chacuáxü̃ nixĩ nax Tupanaãxẽ ya Üünecü chomaxã nüxü̃ ixuxü̃ nax guxü̃nema ya ĩane i ngextá íchixũgüxü̃wa rü tá choxü̃ napoxcuexü̃ rü ngúxü̃ tá chingexü̃. Rü ngexicatama nixĩ i nüxü̃ chacuáxü̃.

Ore i mexü̃ ga Cuáü̃ ümatüxü̃ 3:32

Rü nüma rü tamaxã nüxü̃ nixuchiga ga yema nüxü̃ nadauxü̃ rü nüxü̃ naxĩnüxü̃. Natürü noxretama nüxü̃́ nayaxõgü i ngẽma nüxü̃ yaxuxü̃.

Ngechuchuarü ngúexü̃gü ga yamugüxü̃arü puracüchiga 11:28

Rü natanüwa nayexma ga wüxi ga orearü uruxü̃ ga Agábu ga naéga. Rü wüxi ga ngutaque̱xewa rü inachi ga Agábu rü Tupanaãxẽ ya Üünecü nanamu nax yadexaxü̃, rü nüxü̃ nixu nax wüxi i taiya i taxü̃ tá ínguxü̃ i guxü̃ i nachixü̃anegüwa. Rü aixcüma ínangu ga yema taiya ga yexguma Cláudiu rü Rómaarü ãẽ̱xgacü ixĩxgu.

Ichaía 11:2

Rü Cori ya Tupanaãxẽ rü guxü̃gutáma naxü̃tawa nangẽxma rü namaxã inacua̱x. Rü tá nüxna nanaxã i cua̱x nax mea naãẽxü̃ nacuáxü̃ca̱x. Rü tá nüxna nanaxã i tauxcha nax mea nügümaxã inacuáxü̃ca̱x. Rü tá nüxna nanaxã i pora rü tá nüxü̃ narüngü̃xẽxẽ nax Tupanaarü ngúchaü̃xü̃ nacuáxü̃ rü naga naxĩnüxü̃.

Ore i mexü̃ ga Cuáü̃ ümatüxü̃ 16:12

Choma rü choxü̃́ nangẽxma i muxü̃ma i to i ore i pemaxã nüxü̃ chixuxchaü̃chiréxü̃. Natürü ngẽxguma chi pemaxã nüxü̃ chixuxgu rü taxũchima nüxü̃ pecua̱xgü.

Popera ga Yudíugü ga yaxõgüxü̃ca̱x ümatüxü̃ 1:1

Nũxcüma ga Tupana rü mue̱xpü̱xcüna rü naguxü̃raü̃xü̃ãcüma norü orearü uruü̃güwa tórü o̱xigümaxã nidexa.

Nüxíraxü̃xü̃ ga popera ga Cuáü̃ ümatüxü̃ 5:6

Rü nüxü̃ tacua̱x nax aixcüma Tupana Nane yixĩxü̃ ya Ngechuchu. Yerü yexguma ñoma ga naanewa nayexmagu rü dexáwa ínabaiegu, rü nümatama ga Tupana nüxü̃ nixu nax Nane yixĩxü̃. Rü yexguma curuchagu nayu̱xgu rü nagü inabaãgu ga Ngechuchu, rü Tupana rü wenaxarü inanawe̱x nax aixcüma Nane nax yixĩxü̃. Rü yexgumarüxü̃ ta ga Naãxẽ ya Üünexü̃ i taguma idoraxü̃, rü tüxü̃ nüxü̃ nacua̱xẽxẽ nax aixcüma Tupana Nane nax yixĩxü̃.