Ore i mexü̃ ga Cuáü̃ ümatüxü̃ 1:43 - Tupanaarü Ore

⁴³ Rü moxü̃ãcü ga Ngechuchu rü nügü namexẽxẽ nax Gariréaanewa naxũxü̃ca̱x. Rü yéma Ferípexü̃ nadau rü ñanagürü nüxü̃: —¡Chowe rüxũ! —ñanagürü.

Ore i mexü̃ ga Cuáü̃ ümatüxü̃ 1:43 Referans Kwoze

Ore i mexü̃ ga Cuáü̃ ümatüxü̃ 14:8

Rü yexguma ga Ferípe rü ñanagürü: —Pa Corix, ¡Toxü̃ nüxü̃ nadauxẽxẽ ya Cunatü! Rü ngexicatama nixĩ i tanaxwa̱xexü̃ —ñanagürü.

Ore i mexü̃ ga Matéu ümatüxü̃ 9:9

Rü yéma inaxũãchi ga Ngechuchu. Rü nüxü̃ nadau ga wüxi ga yatü ga Matéugu ãégaxü̃ ga yéma rütoxü̃ ga Rómaarü ãẽ̱xgacüca̱x diẽru ngĩxü̃ ínayauxgüxü̃wa, yerü woetama yemawa napuracü. Rü Ngechuchu rü ñanagürü nüxü̃: —¡Chowe rüxũ! —ñanagürü. Rü yexguma ga Matéu rü inachi, rü nawe narüxũ.

Ichaía 65:1

Tupana rü ñanagürü: —Yema duü̃xü̃gü ga taxuxü̃ma ga ta̱xacüca̱x choxna cagüxü̃ nixĩ ga chauxü̃tawa ĩxü̃. Rü yema duü̃xü̃gü ga tama cha̱u̱xca̱x daugüxü̃ nixĩ ga choxü̃ yangaugüxü̃. Rü duü̃xü̃gü ga taguma chomaxã idexagüxü̃maxã nixĩ ga nüxü̃ ñachaxü̃: “Chanuxma nixĩ”, ñachaxü̃.

Ore i mexü̃ ga Cuáü̃ ümatüxü̃ 12:21

Rü yema Griégugü rü Ferípeca̱x naxĩ. Rü nüma ga Ferípe rü Gariréaanearü ĩane ga Bechaídacüã̱x nixĩ. Rü yema Griégugü rü nüxü̃ naca̱a̱xü̃gü rü ñanagürügü: —Pa Corix, nüxü̃ tadaugüchaü̃ ya Ngechuchu —ñanagürügü.

Nüxíraxü̃xü̃ ga popera ga Cuáü̃ ümatüxü̃ 4:19

Rü yixema rü Tupanaxü̃ tangechaü̃gü, yerü nüma rü nüxíra tüxü̃ nangechaü̃.

Ore i mexü̃ ga Cuáü̃ ümatüxü̃ 6:5

Rü yexguma Ngechuchu nüxü̃ dawenügu rü nüxü̃ nadau ga yema muxü̃ma ga duü̃xü̃gü ga nawe rüxĩxü̃. Rü Ferípena naca, rü ñanagürü: —¿Rü ngextá tá naxca̱x tataxe i paũ naxca̱x i ñaa duü̃xü̃gü nax nachibüexü̃ca̱x? —ñanagürü.

Filipenses 3:12

Rü ñu̱xma rü tama chanaxwa̱xe i nagu perüxĩnüe nax guxü̃xü̃ chacuáxü̃ i Cristuchiga, rü ẽ̱xna guxü̃wama nax chamexü̃. Natürü naxca̱x chadauama nax Ngechuchu ya Cristuarü ngúchaü̃ chaxüxü̃ca̱x, yerü yemaca̱x nixĩ ga nüma ga cha̱u̱xca̱x nadauxü̃ ga noxrix.

Ore i mexü̃ ga Cuáü̃ ümatüxü̃ 1:28

Rü yema nachica ga Betániagu ãégaxü̃wa nixĩ ga Cuáü̃ ga nüxü̃ yaxuxü̃ ga yema ore. Rü yema Betánia rü natü ga Yudáü̃arü tocutüwa nayexma. Rü yéma nixĩ ga Cuáü̃ ga duü̃xü̃güxü̃ ínabaiü̃xẽẽxü̃.

Ore i mexü̃ ga Luca ümatüxü̃ 19:10

Rü Tupana Nane ya duü̃xü̃xü̃ ixĩcü, rü ñoma i naanewa naxũ nax naxca̱x yadauxü̃ca̱x i ngẽma duü̃xü̃gü i iyarütauxexü̃ nax namaxẽxẽẽãxü̃ca̱x —ñanagürü.

Ore i mexü̃ ga Matéu ümatüxü̃ 10:3

Rü togü nixĩ ga Ferípe, rü Barturumé, rü Tumáchi, rü Matéu ga Rómaarü ãẽ̱xgacüca̱x diẽruarü yauxwa puracüchirécü. Rü togü nixĩ ga Chantiágu ga Arupéu nane, rü Tadéu.

Ore i mexü̃ ga Cuáü̃ ümatüxü̃ 6:7

Rü yexguma Ngechuchuxü̃ nangãxü̃ ga Ferípe, rü ñanagürü: —Woo chi naxca̱x itaxegügu i 200 i diẽru naguxü̃ i paũ, rü taxũchima nüxü̃́ ningu ega woo wüxichigüna íxraxü̃ ĩ̱xãchigügügu —ñanagürü.

Ore i mexü̃ ga Cuáü̃ ümatüxü̃ 1:35

Moxü̃ãcü ga Cuáü̃ rü wenaxarü yéma nayexma namaxã ga taxre ga norü ngúexü̃gü.

Ore i mexü̃ ga Matéu ümatüxü̃ 4:12

Rü yexguma Ngechuchu nüxü̃ ĩnügu nax napoxcuxü̃ ga Cuáü̃ ga báiü̃xẽẽruxü̃, rü Gariréaanewa naxũ.

Ore i mexü̃ ga Matéu ümatüxü̃ 8:22

Rü Ngechuchu nanangãxü̃, rü ñanagürü nüxü̃: —¡Noxtacüma chowe rüxũ! Rü nüe i ngẽma cutanüxü̃ i tama yaxõgüxü̃ iyata̱xgü i ngẽma yuexü̃ —ñanagürü.

Ore i mexü̃ ga Cuáü̃ ümatüxü̃ 1:29

Rü moxü̃ãcü ga Cuáü̃ rü Ngechuchuxü̃ nadau ga naxca̱x nax yaxũxü̃. Rü ñanagürü ga Cuáü̃: —¡Dücax! Daa nixĩ ya yimá Tupanaarü Carnéruxacü ya núma namuãcü nax yanaxoxẽẽãxü̃ca̱x i ñoma i naanecüã̱x i duü̃xü̃güarü pecadugü.

Ore i mexü̃ ga Cuáü̃ ümatüxü̃ 1:44

Rü nüma ga Ferípe rü ĩane ga Bechaídacüã̱x nixĩ. Rü yémacüã̱xgü ta nixĩ ga André rü Pedru.

Ore i mexü̃ ga Cuáü̃ ümatüxü̃ 2:11

Rü guma Gariréaanewa yexmane ga ĩane ga Canáwa nixĩ ga yema naxüxü̃ ga Ngechuchu. Rü yema nixĩ ga nüxíraxü̃xü̃ ga cua̱xruxü̃ ga Tupanaarü poramaxã üxü̃ ga nawa nügü inawéxü̃ ga Tupana Nane nax yixĩxü̃. Rü nüma ga norü ngúexü̃gü rü nüxü̃́ nayaxõgü.

Ore i mexü̃ ga Cuáü̃ ümatüxü̃ 1:37

Rü yema taxre ga Cuáü̃arü ngúexü̃gü rü nüxü̃ naxĩnüe ga yexguma yema ñaxgu. Rü Ngechuchuwe narüxĩ.