Ãẽ̱xgacügü ga guxchaxü̃güarü mexẽxẽruü̃gü 4:2 - Tupanaarü Ore

² Rü yemaca̱x ga nüma ga Cori ya Tupana rü wüxi ga Canaáü̃tanüxü̃ ga ãẽ̱xgacü ga Yabíü̃me̱xẽgu nanayixẽxẽ ga yema Iraétanüxü̃. Rü nüma ga Yabíü̃ rü ĩane ga Achóxarü ãẽ̱xgacü nixĩ. Rü yema norü churaragüarü ãẽ̱xgacü rü Chíchara nixĩ ga naéga. Rü nüma ga Chíchara rü Aróche-goíü̃gu naxãchiü̃.

Ãẽ̱xgacügü ga guxchaxü̃güarü mexẽxẽruü̃gü 4:2 Referans Kwoze

Ãẽ̱xgacügü ga guxchaxü̃güarü mexẽxẽruü̃gü 4:16

Rü yexgumayane ga nüma ga Baráx rü yema Chícharaarü churaragüwe rü yema carugüwe nangẽ ñu̱xmata Aróche-goíü̃wa nangu. Rü yema ngunexü̃gu rü taxuxü̃ma ga Chícharaarü churaragü ínayaxü. Rü guxü̃ma nayue.

Yochué 11:1

Rü yexguma Yabíü̃ ga Achóxarü ãẽ̱xgacü nüxü̃ cuáchigagu ga yema nüxü̃ ngupetüxü̃ ga yema ĩanegü ga daiãcuxü̃, rü norü orearü ngeruü̃güxü̃ namuãchitanü naxca̱x ga yema togü ga ãẽ̱xgacügü nax nügü nangü̃xẽẽgüxü̃ca̱x. Rü yema ãẽ̱xgacügü ga naxca̱x yéma namugaxü̃ rü ñaagü nixĩ: Ĩane ga Madóü̃arü ãẽ̱xgacü ga Yobáx, rü Chimróü̃arü ãẽ̱xgacü, rü Axcháarü ãẽ̱xgacü, rü guxü̃ma ga ãẽ̱xgacügü ga ínamáxpü̱xanexü̃wa yexmagüxü̃ ga nórtewaama, rü guxü̃ma ga ãẽ̱xgacügü ga natü ga Yudáü̃arü Dóxraanewa yexmagüxü̃ ga naxtaxa ga Quinérexarü súrwaama ügüxü̃, rü yema ãẽ̱xgacügü ga Dóxarü Dóxraanewa yexmagüxü̃ ga oéstewaama, rü yema Cananéugü ga éstewaama rü oéstewaama yexmagüxü̃, rü yema Amoréutanüxü̃, rü Itítagü, rü Ferechéugü, rü Yebuchéugü ga ma̱xpǘneanegu ãchiü̃güxü̃, rü Ebéugü ga ma̱xpǘne ga Ermóü̃gu ãchiü̃güxü̃ ga Mispáarü naanewa yexmagüxü̃.

Wiyaegü 83:9

Pa Tupanax ¡ẽcü ngẽma torü uanügüxü̃ nadai yexgumarüxü̃ nax cunada̱i̱xü̃ ga yema Madiáü̃tanüxü̃ rü ãẽ̱xgacü ga Chíchara rü ãẽ̱xgacü ga Yabíü̃ ga Quichóü̃arü natügu yuxü̃ ga Endóxarü ĩanewa! Rü nümagü rü ñu̱xma rü wamüanexü̃ ga waixü̃mü nixĩgü.

1 Chamué 12:9

Natürü ga nümagü rü norü Cori ya Tupanaxü̃ narüngümae. Rü yemaca̱x nüma ga Tupana rü ĩane ga Achóxarü ãẽ̱xgacü ga Yabíü̃arü churaragüeru ga Chícharame̱xẽwa nanayexmagüxẽxẽ. Rü ñu̱xũchi Firitéugüme̱xẽwa rü Moáarü ãẽ̱xgacüme̱xẽwa nanayexmagüxẽxẽ. Rü yexmagü nixĩ ga perü o̱xigümaxã nügü daixü̃.

Ãẽ̱xgacügü ga guxchaxü̃güarü mexẽxẽruü̃gü 10:7

Rü yemaca̱x nüma ga Cori ya Tupana rü namaxã nanu rü Firitéugüme̱xẽwa rü Amóü̃tanüxü̃me̱xẽwa nanayexmagüxẽxẽ nax namaxã inacua̱xgüxü̃ca̱x.

Ore i mexü̃ ga Matéu ümatüxü̃ 18:25

Natürü yema norü duü̃xü̃ rü nangearü diẽruã̱x, rü taxuacüma norü ãẽ̱xgacüaxü̃́ nanaxütanü. Rü yemaca̱x ga yema ãẽ̱xgacü rü norü churaragüxü̃ namu nax mugüruxü̃ namaxã nataxegüxü̃ca̱x ga yema yatü, wüxigu tümamaxã ga naxma̱x rü naxacügü rü norü yemaxü̃gü, nax yemaacü naxütanüãxü̃ca̱x ga norü ngetanü.

Ichaía 50:1

Nüma ya Tupana rü ñanagürü nüxü̃: —Pa Iraétanüxü̃x, ¡Taxṹ i nagu perüxĩnüexü̃ nax íchanatáxü̃ i perü mama i Iraéane ñoma wüxi ya yatü naxma̱xü̃ ítáxü̃rüxü̃! ¡Rü taxṹ i nagu perüxĩnüexü̃ nax pemaxã chataxexü̃ nax togüarü mugüruxü̃ pixĩgüxü̃ca̱x rü yemaacü chanaxütanüxü̃ca̱x ga wüxi ga chorü ngetanü! Rü pemaxã chataxe nagagu ga yema perü pecadugü yerü tama chauga pexĩnüechaü̃. Rü perü mama i Iraéane rü íchanata̱x yerü pema rü tama chauga pexĩnüe.