Ãẽ̱xgacügü ga guxchaxü̃güarü mexẽxẽruü̃gü 2:1 - Tupanaarü Ore

^1-2 Rü Tupanaarü orearü ngeruxü̃ i dauxü̃cüã̱x rü Guirigáwa inaxũãchi rü Boquíü̃wa naxũ rü yéma Iraétanüxü̃xü̃ ñanagürü: —Choma nixĩ ga Equítuanewa pexü̃ íchagaxü̃, rü ñaa naane ga perü o̱xigümaxã nüxü̃ chixuxü̃wa pexü̃ chagagüxü̃. Yerü yexguma perü o̱xigümaxã nüxü̃ chixuxgu rü ñachagürü: “Ngẽma chorü uneta i pemaxã nüxü̃ chixuxü̃ rü tagutáma ichayanaxoxẽxẽ. Natürü tama chanaxwa̱xe i pema nax ta̱xacürü uneta namaxã pexügüxü̃ i ngẽma duü̃xü̃gü i ngéma maxẽxü̃. Rü ngẽma chanaxwa̱xexü̃ nixĩ nax nagu pepogüexü̃ i ngẽma norü ãmarearü guruü̃gü”, ñachagürü. Natürü i pema rü tama chauga pexĩnüe. ¡Rü dücax, nüxü̃ peda̱u̱x i ngẽma pexüxü̃!

Ãẽ̱xgacügü ga guxchaxü̃güarü mexẽxẽruü̃gü 2:1 Referans Kwoze

Ínachoxü̃xü̃chiga 20:2

—Choma nixĩ i curü Tupana ga Equítuanewa cuxü̃ íchanguxuchixẽẽxü̃ naxme̱xwa ga Equítuanecüã̱xgü ga puracü cuétü nugüxü̃.

Ínachoxü̃xü̃chiga 23:20

Rü dücax, choma rü tá cupe̱xegu chayamu i chorü orearü ngeruxü̃ i daxũcüã̱x nax cuxna nadauxü̃ca̱x i ngẽma nama i nagu quixũxü̃wa rü nawa cuxü̃ nagaxü̃ca̱x i ngẽma nachica i cuxca̱x chamexẽẽxü̃.

Naanearü ügüchiga 12:7

Rü yema nachicawa rü Cori ya Tupana rü Abráü̃ca̱x nango̱x. Rü ñanagürü nüxü̃: —Ñaa naane tá nixĩ i cutaagüna chaxãxü̃ —ñanagürü. Rü yexguma ga Abráü̃ rü yexma Tupanaégagu nanaxü ga wüxi ga ãmarearü guruxü̃ yerü yéma nixĩ ga naxca̱x nangóxü̃.

Chacaría 11:10

Rü yexguma rü chanayaxu ga chorü naixmena̱xã ya Ngü̃xẽẽgu ãégane. Rü chayabüye. Rü yema rü wüxi ga cua̱xruxü̃ nixĩ nax iyanaxoxü̃ ga yema Tupanaarü uneta ga guxü̃ma ga nachixü̃anegümaxã naxüxü̃.

Yeremía 14:21

¡Rü ngẽma cuéga i üünexü̃gagu, rü taxṹ i toxü̃ cuxoxü̃! ¡Rü taxṹ i nüxü̃ cuxoxü̃ ya yima ĩane ya curü tochicaxü̃ i üünexü̃ nawa ngẽxmane! ¡Rü nüxna nacua̱xãchi ga yema curü uneta ga tomaxã cuxüxü̃, rü taxṹ i nüxü̃ curüngü̃maxü̃!

Ichaía 63:9

Rü nüma ya Tupana rü tama togüxü̃ núma namuxü̃ nax norü duü̃xü̃güxü̃ ínanguxü̃ẽẽxü̃ca̱x. Rü nümatama ya Tupana nixĩ ga ínanguxü̃xẽẽãxü̃ nawa ga norü ĩ̱xãchiãxẽ yerü poraãcü nüxü̃ nangechaxü̃ rü nüxü̃́ nangechaü̃tümüxü̃gü. Rü yemaca̱x guxü̃guma norü uanügüme̱xẽwa ínananguxü̃xẽxẽ.

Wiyaegü 89:34

Rü taxũtáma chanangexrü i ngẽma chorü uneta ga namaxã nüxü̃ chixuxü̃ rü aixcüma tá chayanguxẽxẽ i guxü̃ma i ngẽma chorü ore.

Ãẽ̱xgacügü ga guxchaxü̃güarü mexẽxẽruü̃gü 13:3

Natürü Cori ya Tupanaarü orearü ngeruxü̃ i daxũcüã̱x rü ngĩxca̱x nango̱x rü ñanagürü ngĩxü̃: —Cuma rü cungexacüecha, natürü i ñu̱xma rü tá cuxãxacü rü tá cuyatüxacü.

Ãẽ̱xgacügü ga guxchaxü̃güarü mexẽxẽruü̃gü 2:5

Rü yemaca̱x ga yema nachica rü Boquíü̃gu nanaxüégagü. Rü yema nachicawa Tupanaca̱x ínanagugü ga ãmaregü.

Yochué 3:10

Rü ngẽmawa tá nixĩ i nüxü̃ picuáxü̃ ya Tupana ya Maxü̃cü rü petanüwa nax nangẽxmaxü̃. Rü nüma ya Cori rü tá ínanawoxü̃ i Canaáü̃tanüxü̃, rü Itítanüxü̃, rü Ebéutanüxü̃, rü Ferechéutanüxü̃, rü Guerguechéutanüxü̃, rü Amoréutanüxü̃ rü Yebuchéutanüxü̃ nawa i ngẽma naane nax pema nawa pingugüxü̃ca̱x.

Wenaxarü naxümatü ga Tupanaarü mugü 7:9

Rü ngẽmaca̱x penaxwa̱xe nax nüxü̃ pecuáxü̃ nax nüma ya Cori ya Tupana rü aixcümaxü̃chi Tupana yixĩxü̃. Rü woo 1,000 e̱xpü̱xcüna yamuxgu i duü̃xü̃gü rü nüma ya Tupana rü guxü̃guma nayanguxẽxẽ i norü uneta i naxüxü̃ naxca̱x i ngẽma duü̃xü̃gü i ingóetanüxü̃ i nüxü̃ ngechaü̃güxü̃ rü yanguxẽẽgüxü̃ i norü mugü.

Wenaxarü naxümatü ga Tupanaarü mugü 4:34

¿Rü nangẽxmaxü̃ i ta̱xacürü tupana i guxü̃ i nachixü̃anegütanüwa ínanguxü̃xẽxẽxü̃ i wüxitücumü i duü̃xü̃gü nax norü duü̃xü̃gü yaxĩgüxü̃ca̱x? Natürü nüma ga Cori ya perü Tupana rü Equítuanewa pexü̃ ínagaxü̃ naétüwa ga muxü̃ma ga guxchaxü̃gü. Rü inanawe̱x ga norü pora ga yexguma inawéãgu ga cua̱xruü̃gü rü taxü̃ ga mexü̃gü rü ãũcümaxü̃gü rü daigü ga pepe̱xewa Equítuanewa pexca̱x naxüxü̃.

Iraétanüxü̃arü muxchiga 14:34

Rü pemax rü 40 ga ngunexü̃ pinge nax penangugügüxü̃ i ngẽma nachixü̃ane. Rü ngẽmaca̱x rü 40 ya taunecü tá nixĩ i ñaa chianexü̃gu ipexĩĩxü̃ nax ngẽmaãcü peyangutanüxẽẽxü̃ca̱x i perü poxcu. Rü ngẽma 40 i ngunexü̃ca̱x rü 40 ya taunecü tá nixĩ. Rü ngẽmawa tá nixĩ i nüxü̃ picua̱xãchitanü nax ta̱xacü tüxü̃ nangupetüxü̃ ya yíxema tama chauga ĩnüxe.

Lebítanüxü̃arü puracüchiga 26:44

Natürü woo ngẽma perü guxchaxü̃gügagu perü uanügüchixü̃anewa nax pengẽxmagüxü̃, rü choma rü tama choxü̃́ pewa̱xtümüü̃ rü tama pexü̃ chaxo. Rü ngẽmaca̱x taxũtáma pexü̃ chadai rü taxũtáma íchayanaxoxẽxẽ ga yema uneta ga perü o̱xigümaxã chaxüxü̃, erü choma nixĩ i perü Cori ya perü Tupana chixĩxü̃.

Ínachoxü̃xü̃chiga 33:14

Rü yexguma ga Tupana rü Moichéxü̃ nangãxü̃ rü ñanagürü: —Chomatátama cuxü̃ chaxümücü, rü tá cuxü̃ charüngü̃xẽxẽxü̃ —ñanagürü.

Ínachoxü̃xü̃chiga 14:19

Rü yexgumatama ga yema Tupanaarü duü̃xü̃ ga daxũcüã̱x rü yema caixanexü̃ ga noxri Iraétanüxü̃pe̱xegu ĩchiréxü̃ rü wixweama naxĩ.

Ínachoxü̃xü̃chiga 14:14

Rü pema rü taxuca̱xma pexoegaãẽgü. Erü nüma ya Cori ya Tupana rü tá pexü̃ ínapoxü̃ —ñanagürü.

Naanearü ügüchiga 48:16

Rü cuma nixĩ i cunamuxü̃ i curü orearü ngeruxü̃ i daxũcüã̱x nax choxü̃ ícupoxü̃xü̃ca̱x nawa i guxü̃ma i ãũcümaxü̃gü. ¡Rü mexü̃ namaxã naxuegu i ñaa buxü̃gü! Rü chanaxwa̱xe i ñaa buxü̃gügagu duü̃xü̃gü nüxna nacua̱xãchie i chauéga rü chorü o̱xi ga Abraáü̃éga rü chaunatü ga Ichaáéga. ¡Rü yamuxẽxẽ i naxacügü nax ngẽmaãcü namuxũchixü̃ca̱x i nataagü i ñoma i naanewa! —ñanagürü.

Naanearü ügüchiga 16:13

Rü yexguma yema daxũcüã̱xmaxã yadexa̱xguwena rü Agá rü ngĩgürügü: —Cuma nixĩ ya Tupana ya choxü̃ daucü —ngĩgürügü. Rü ñu̱xũchi ngĩgü ngĩgürügü: “Woo Tupana choxü̃ dauxü̃ rü ñu̱xma rü ta chamaxü̃”, ngĩgü ngĩgürügü.

Maraquía 3:1

Nüma ya Cori ya Guxãétüwa Ngẽxmacü rü ñanagürü pexü̃: —Choma rü chaugüpe̱xe tá chayamu i chorü orearü ngeruxü̃ nax yoxni chauxü̃pa nügü íyamexẽẽgüxü̃ca̱x i chomaxü̃. Rü yimá Cori ya naxca̱x peda̱u̱xcü rü ngürüãchi tá napata ya taxü̃negu naxücu. Rü ngẽmaãcü tá ínangu ya yimá perü maxẽxẽẽruxü̃ ga Tupana nüxü̃ ixucü ga yexguma perü o̱xigümaxã inaxunetagu —ñanagürü.

Ãẽ̱xgacügü ga guxchaxü̃güarü mexẽxẽruü̃gü 13:2

Rü Choráarü ĩanewa nayexma ga wüxi ga yatü ga Dáü̃tanüxü̃ ixĩcü ga Manóagu ãégacü. Rü guxema naxma̱x rü taguma taxãxacü yerü woetama tangexacüecha.

Wenaxarü naxümatü ga Tupanaarü mugü 1:8

Choma rü marü pexna chanaxã i ngẽma naane. ¡Rü ngéma pexĩ rü penayaxu i ngẽma naane i choma ya Cori ya Tupana yema nũxcümaü̃güxü̃ ga perü o̱xigü ga Abraáü̃, rü Ichaá, rü Acóbu, rü ñu̱xũchi nataagümaxã chaxueguxü̃ nax nüxna chanaxãxü̃!” ñanagürü ga Tupana.

Ãẽ̱xgacügü ga guxchaxü̃güarü mexẽxẽruü̃gü 11:24

Rü ngẽxguma chi Quemó, ya curü tupana ta̱xacü cuxna ãxgu, rü chi cuxrü nixĩ rü cuxü̃́ nachu̱xu. ¿Tama ẽ̱xna aixcüma yixĩxü̃ i ngẽma? Rü ngẽxgumarüxü̃ ta nixĩ i toma nax toxrü yixĩxü̃ i ngẽma naane i torü Cori ya Tupana toxna ãxü̃.

Wiyaegü 89:3

Rü cuma rü gumá curü duü̃xü̃ ga cumatama cuyaxucü ga Dabímaxã icuxuneta rü ñacurügü nüxü̃: