Ãẽ̱xgacügü ga guxchaxü̃güarü mexẽxẽruü̃gü 16:2 - Tupanaarü Ore

² Rü yexguma yema Gáchacüã̱x nüxü̃ cua̱xgügu ga guma ĩanewa nax nayexmaxü̃ ga Chanchóü̃ rü ínanachomaeguãchi ga guma ĩane, rü guxü̃ma ga yema ngunexü̃gügu nüxna nadaugü ga norü ĩã̱x. Rü chütacü rü napee yerü nagu naxĩnüegu rü ngunecü rü tá nayama̱xgü.

Ãẽ̱xgacügü ga guxchaxü̃güarü mexẽxẽruü̃gü 16:2 Referans Kwoze

1 Chamué 23:26

Rü nüma ga Chaú rü guma ma̱xpǘnecüwagu namaxã nixũ ga norü churaragü. Rü nüma ga Dabí rü norü tocüwagu Chaúcha̱xwa nibuxmü namaxã ga norü churaragü. Rü yexguma marü Chaú norü churaragümaxã Dabíxü̃ ínaxüexü̃gu nax yayauxgüãxü̃ca̱x, rü Chaúxü̃tawa nangu ga wüxi ga orearü ngeruxü̃ ga namaxã nüxü̃ yarüxuxü̃ nax paxa nataeguxü̃ca̱x yerü ga Firitéugü rü wenaxarü Iraéanegu nachocu.

Ngechuchuarü ngúexü̃gü ga yamugüxü̃arü puracüchiga 9:24

Natürü nüma ga Chauru rü nüxü̃ nacuáchiga nax yama̱xgüchaü̃ãxü̃. Rü yema Yudíugü rü ngunecü rü chütacü rü guma ĩanearü poxeguxü̃arü ĩã̱xgügu Chauruxü̃ nana̱ĩ̱xgüxü̃ nax yama̱xgüãxü̃ca̱x.

Ngechuchuarü ngúexü̃gü ga yamugüxü̃arü puracüchiga 23:15

Rü name nixĩ i pema rü ngẽma togü i pexrüxü̃ ãẽ̱xgacügütücumüwa ügüxü̃, rü churaragüarü ãẽ̱xgacüna naxca̱x peyacagü nax wena moxü̃ pepe̱xewa nagagüãxü̃ca̱x i Pauru. ¡Rü namaxã nüxü̃ pixu nax penaxwa̱xexü̃ nax mea nüxü̃ pecuáxchaü̃xü̃ i nachiga! Rü toma rü tá marü ítamemare nax namagu tayamáxü̃ca̱x naxü̃pa nax ínanguxü̃ —ñanagürügü.

Ore i mexü̃ ga Matéu ümatüxü̃ 27:1

Rü yexguma yangunegu rü guxü̃ma ga chacherdótegüarü ãẽ̱xgacügü rü Yudíugüarü ãẽ̱xgacügü, rü nügümaxã nanamexẽẽgü nax ñuxãcü Ngechuchuxü̃ yama̱xgüxü̃.

Ore i mexü̃ ga Matéu ümatüxü̃ 21:38

Natürü yexguma yema cori nanexü̃ nadaugügu ga yema puracütanüxü̃, rü nügümaxã ñanagürügü: “Ngẽmaarü tá nixĩ i ñaa naane i yixcama. ¡Rü ngĩxã tayama̱xgü nax tóxrü yixĩxü̃ca̱x!” ñanagürügü.

1 Chamué 19:11

Rü yexgumatama ga Chaú rü norü duü̃xü̃güxü̃ namu nax Dabípatawa naxĩxü̃ca̱x nax nüxna yéma yadaugüxü̃ca̱x rü moxü̃ãcü yama̱xgüãxü̃ca̱x. Natürü Micá ga Dabí naxma̱x rü ngĩtexü̃ ngĩgürügü: —Ngẽxguma taxũtáma quiñaxgu i ñaa chütaxü̃gu, rü moxü̃ ẽxü̃wa rü tá cuyu —ngĩgürügü.

Ãẽ̱xgacügü ga guxchaxü̃güarü mexẽxẽruü̃gü 15:18

Rü nüma ga Chanchóü̃ rü poraãcüma nita̱xawa rü yemaca̱x Tupanamaxã nidexa rü ñanagürü: —Ñu̱xma nax poraãcü choxü̃ nüxü̃ curüporamaexẽẽxü̃ i chorü uanügü rü ¿Tü̱xcüü̃ ta̱xawamaxã tá choxü̃ cuyuxẽxẽxü̃? ¿Ẽ̱xna naxme̱xgu tá choxü̃ cunguxẽxẽ i ñaa Firitéugü i tama cuxü̃́ yaxõgüxü̃? —ñanagürü.

Ore i mexü̃ ga Luca ümatüxü̃ 21:20

Rü ngẽxguma nüxü̃ peda̱u̱xgu nax perü uanügüarü churaragü Yerucharéü̃xü̃ íchomaeguãchixü̃, rü ngẽmawa tá nüxü̃ pecua̱x nax paxa tá nagu napogüexü̃ ya yima ĩane.

Ãẽ̱xgacügü ga guxchaxü̃güarü mexẽxẽruü̃gü 16:3

Natürü nüma ga Chanchóü̃ rü ngãxü̃cüxü naba̱i̱xãchi rü guma ĩanearü ücuchicawa naxũ rü nanabüxü̃ ga norü ĩã̱xgü guxü̃ma ga norü nacüwagümaxã rü norü chotaruü̃gümaxã. Rü guxü̃ma ga yema rü nügüãtügu nananugü. Rü ñu̱xũchi guma Ebróü̃arü to̱xma̱xtawa yexmane ya ma̱xpǘnewa nanana.