Ãẽ̱xgacügü ga guxchaxü̃güarü mexẽxẽruü̃gü 10:6 - Tupanaarü Ore

⁶ Natürü nüma ga Iraétanüxü̃ rü wenaxarü Cori ya Tupanape̱xewa chixexü̃ naxügü rü guxü̃raü̃xü̃ ga Baáchicüna̱xãxü̃ rü Ataréchicüna̱xãxü̃ nicua̱xüü̃gü. Rü yexgumarüxü̃ tá nüxü̃ nicua̱xüü̃gü ga Chíriacüã̱xgüarü tupanachicüna̱xãgü, rü Chidóü̃cüã̱xgüarü tupanachicüna̱xãgü, rü Moátanüxü̃arü tupanachicüna̱xãgü rü Amóü̃tanüxü̃arü tupanachicüna̱xãgü, rü Firitéugüarü tupanachicüna̱xãgü. Rü Cori ya Tupanaxü̃ narüngümae rü nüxü̃ narüxoe nax naxca̱x nangutaque̱xegüxü̃.

Ãẽ̱xgacügü ga guxchaxü̃güarü mexẽxẽruü̃gü 10:6 Referans Kwoze

Norü taxre ga popera ga ãẽ̱xgacügüchiga 23:13

Rü nüma ga Yochía rü yexgumarüxü̃ ta nagu nayanachixexẽxẽ ga guma tupananetagüarü ngutaque̱xepataxü̃gü ga Yerucharéü̃arü éstewaama yexmagüxü̃ ga ma̱xpǘne ga oribuarü súrwaama. Rü guma ngutaque̱xepataxü̃gü rü Iraéanearü ãẽ̱xgacü ga Charomóü̃ ínanaxüxü̃ ngĩxca̱x ga Chidóü̃cüã̱xgüarü tupananetachicüna̱xã ga chixexü̃ ga Ataré, rü naxca̱x ga Moátanüxü̃arü tupananetachicüna̱xã ga chixexü̃ ga Quemó, rü Amóü̃tanüxü̃arü tupananetachicüna̱xã ga chixexü̃ ga Mícoü̃.

Nüxíraxü̃xü̃ ga popera ga ãẽ̱xgacügüchiga 11:33

Erü nüma i Charomóü̃ rü choxü̃ ínata̱x rü Chidóü̃cüã̱xarü tupananeta i Ataréxü̃ nicua̱xüxü̃. Rü nüxü̃ nicua̱xüxü̃ i Moácüã̱xarü tupananeta i Quemó. Rü ngẽxgumarüxü̃ ta nüxü̃ nicua̱xüxü̃ i Amóü̃cüã̱xarü tupananeta i Mícoü̃. Rü ngẽma Charomóü̃ üxü̃ rü tama namaxã chataãxẽ erü tama nayanguxẽxẽ i ngẽma chorü mugü. Rü tama nanatü ga Dabí ga chauga ĩnücürüxü̃ nixĩ.

Nüxíraxü̃xü̃ ga popera ga ãẽ̱xgacügüchiga 11:7

Rü yemaca̱x ga Charomóü̃, rü guma ma̱xpǘne ga Yerucharéü̃arü éstewaama yexmanegu nanaxü ga wüxi ga ngutaque̱xepataxü̃ naxca̱x ga Quemó ga Moácüã̱xgüarü tupanachicüna̱xã ga buxe naxca̱x tüxü̃ yagugüxü̃. Rü yexgumarüxü̃ ta nanaxü naxca̱x ga Molóx, ga Amóü̃tanüxü̃arü tupanachicüna̱xã ga buxe naxca̱x tüxü̃ yagugüxü̃ ta.

Nüxíraxü̃xü̃ ga popera ga ãẽ̱xgacügüchiga 11:5

Rü nüma ga Charomóü̃ rü Chidóü̃cüã̱xgüarü tupana ga Ataréxü̃ nicua̱xüxü̃. Rü yexgumarüxü̃ ta nüxü̃ nicua̱xüüxü̃ ga Mícoü̃ ga Amóü̃cüã̱xarü tupana ga buxe naxca̱x tüxü̃ yagugüxü̃.

Yeremía 2:13

Rü ngẽma chorü duü̃xü̃gü rü taxre ga pecadu nixĩ ga chope̱xewa naxügüxü̃. Rü choxna nixĩgachi ga choma nax dexá i maxü̃xü̃ chixĩxü̃. Rü ñu̱xũchi nügüca̱x nanaxügü ga norü puchugü ga tama dexá nawa yexmaechaxü̃.

Wiyaegü 106:36

Rü yema duü̃xü̃güarü tupananetachicüna̱xãgüxü̃ nicua̱xüü̃gü rü yemagagu chixexü̃gu nayi.

Norü taxre ga popera ga ãẽ̱xgacügüchiga 17:16

Rü nüxü̃ narüxoe ga guxü̃ma ga norü Cori ya Tupanaarü mugü. Rü yemaca̱x nügüca̱x nanaxügü ga taxre ga wocaxacüchicüna̱xãgü ga úirunaxca̱x, rü nanaxügü ta ga tupananeta ga Acheráchicüna̱xãx. Rü naétü nüxü̃ nicua̱xüü̃gü ga üa̱xcü rü tauemacü rü woramacurigü rü ñu̱xũchi Baáchicüna̱xã rü ta.

Ãẽ̱xgacügü ga guxchaxü̃güarü mexẽxẽruü̃gü 16:23

Rü nümagü ga Firitéugüarü ãẽ̱xgacügü rü nataãẽgü rü nanaxüchíügü ga Chanchóü̃xü̃ nax yayauxgüxü̃. Rü norü tupana ga Dagóü̃ca̱x naxü̃na nadai rü ñu̱xũchi naxca̱x ínanagu. Rü ñaãcü nawiyaegü: —Tórü tupana rü taxme̱xgu nananguxẽxẽ i tórü uanü i Chanchóü̃ —ñanagürügü.

Norü taxre ga to ga popera ga ãẽ̱xgacügüchiga ümatüxü̃ 28:23

Rü yema nax Chíriaanearü churaragü rü ü̃pa Acháxü̃ rüporamaegüxü̃ ga yexguma namaxã nügü nadaixgu, rü yemaca̱x Acháx nagu narüxĩnü nax naporaxü̃ ga yema Damácuarü tupanagü. Rü yemaca̱x naxca̱x ãmaregü ínagu yerü nagu narüxĩnü nax nümagü rü tá nüxü̃ nangü̃xẽxẽxü̃ ega naxca̱x ãmare ínaguxgu. Natürü yema tupananetagügagu nixĩ ga guxchaxü̃ Acháxca̱x rü guxü̃ma ga Iraétanüxü̃ca̱x ínguxü̃.

Nüxíraxü̃xü̃ ga popera ga ãẽ̱xgacügüchiga 16:31

Rü yematama chixexü̃gü ga Yeruboáü̃ ga Nabáx nane üxü̃ naxü. Rü naétü rü Yechabé ga Chidóü̃arü ãẽ̱xgacü ga Ex-baáxacümaxã naxãxma̱x. Rü düxwa ngĩgagu nawa nangu ga norü tupananeta ga Baáxü̃ nax yacua̱xüxü̃xü̃.

1 Chamué 5:2

Rü ñu̱xũchi norü tupana ga Dagóü̃patagu nayaxǘcuchigü. Rü Dagóü̃chicüna̱xãxü̃tagu nanaxǘgü.

Ãẽ̱xgacügü ga guxchaxü̃güarü mexẽxẽruü̃gü 13:1

Natürü nüma ga Iraétanüxü̃ rü Cori ya Tupanape̱xewa wena chixexü̃ naxüe, rü yemaca̱x ga Cori ya Tupana rü Firitéugüme̱xẽgu nanayixẽxẽ ga 40 ga taunecü.

Ãẽ̱xgacügü ga guxchaxü̃güarü mexẽxẽruü̃gü 6:1

16 Natürü nüma ga Iraétanüxü̃ rü wena Cori ya Tupanape̱xewa chixexü̃ naxügü, rü yemaca̱x ga nüma ya Tupana rü 7 ga taunecü Madiáü̃tanüxü̃me̱xẽwa nanayexmagüxẽxẽ ga yema Iraétanüxü̃.

Ãẽ̱xgacügü ga guxchaxü̃güarü mexẽxẽruü̃gü 4:1

Rü yexguma Iraétanüxü̃arü ãẽ̱xgacü ga Aóx yuxguwena, rü nüma ga Iraétanüxü̃ rü wenaxarü Cori ya Tupanape̱xewa chixexü̃ naxügü.

Ãẽ̱xgacügü ga guxchaxü̃güarü mexẽxẽruü̃gü 3:7

Rü yema nacümagü ga Iraétanüxü̃ nagu maxẽxü̃ rü Cori ya Tupanape̱xewa rü poraãcü nachixe. Yerü Cori ya Tupanaxü̃ inarüngümae rü Baáchicüna̱xãgüxü̃ rü Acheráchicüna̱xãgüxü̃ nicua̱xüü̃gü.

Wenaxarü naxümatü ga Tupanaarü mugü 32:15

Natürü pema ga Iraétanüxü̃ ga guxü̃ma ga yema õnamaxã pingüe rü nüxna pixĩgachi ga Cori ya Tupana ya pexü̃ ngo̱xẽẽcü. Rü nüxü̃ pexo ya yimá perü dauruxü̃ rü perü poxü̃ruxü̃ ixĩcü.

Wenaxarü naxümatü ga Tupanaarü mugü 31:16

Rü yexguma ga Cori ya Tupana rü Moichémaxã nidexa rü ñanagürü: —Marü paxa tá cuyu, rü ñaa chorü duü̃xü̃gü i Iraétanüxü̃ rü paxa tá nawe narüxĩ i ngẽma tupananetagü i ngẽma naane i tá peyaxuxü̃wa ngẽxmagüxü̃. Rü ngẽxguma rü tá choxna nixĩgachitanü, rü ngẽmaãcü tá nagu narüchixe i ngẽma uneta i namaxã chaxüxü̃.

Wenaxarü naxümatü ga Tupanaarü mugü 31:17

Rü ngẽxguma i choma rü tá namaxã chanu, rü tá nüxna chixũgachi rü nüxica tá ngéma chanawogü. Rü marü taxũtáma marü nüxü̃ chacuáxchaü̃ i ngẽma Iraétanüxü̃. Rü guxchaxü̃gü rü ngúxü̃gü tá naxca̱x ínangugü. Rü ngẽmaca̱x i nümagü rü düxwa tá nügümaxã ñanagürügü: “¿Ẽ̱xna ñaa ngúxü̃ rü taxca̱x ínangu erü tórü Cori ya Tupana rü marü tama taxü̃tawa nangẽxma?” ñanagürügü.

Ãẽ̱xgacügü ga guxchaxü̃güarü mexẽxẽruü̃gü 10:5

Rü yexguma nayu̱xgu ga Yaí rü wüxi ga nachica ga Camóü̃gu ãégaxü̃gu nanata̱xgü.

Ãẽ̱xgacügü ga guxchaxü̃güarü mexẽxẽruü̃gü 11:24

Rü ngẽxguma chi Quemó, ya curü tupana ta̱xacü cuxna ãxgu, rü chi cuxrü nixĩ rü cuxü̃́ nachu̱xu. ¿Tama ẽ̱xna aixcüma yixĩxü̃ i ngẽma? Rü ngẽxgumarüxü̃ ta nixĩ i toma nax toxrü yixĩxü̃ i ngẽma naane i torü Cori ya Tupana toxna ãxü̃.

Ichaía 23:4

Natürü i ñu̱xma i pema i Chidóü̃cüã̱xgü rü poraãcü pexãnee. Rü noxri rü márgu pexca̱x ínangugüxü̃ i guxü̃ma i perü ngẽmaxü̃gü, natürü i ñu̱xma rü perü wapurugü ga márgu yarüüxü̃ne rü marü ínayachaxãchitanü. Rü ngẽmaca̱x ñoma wüxi i ngexü̃ i ãtéxü̃ i ngexacüxü̃rüxü̃ pixĩgü, rü poraãcü pengechaü̃gü.

Echequié 27:16

Rü yema Edóü̃cüã̱xgü rü cuxü̃tawa nayataxegü yerü namuxũchi ga curü yemaxü̃gü. Rü nümagü rü ngã̱xãẽruü̃gü ga granatemaxã rü naxchirugü ga idauxracharaü̃ ga ãmatüxü̃maxã rü naxpü ga línuchinaxca̱xmaxã rü ngã̱xãẽruü̃gü ga corálmaxã rü rubímaxã cuxü̃́ nanaxütanügü ga curü yemaxü̃gü.

Wenaxarü naxümatü ga Tupanaarü mugü 13:6

Rü ngẽxguma cuenexẽxü̃chi rüe̱xna cune rüe̱xna cuxacü rüe̱xna cuxma̱x i ngĩxü̃ cungechaxü̃cü rüe̱xna wüxi i cumücüxüchi cúãcü cuxü̃ naxucu̱xẽgu nax nüxü̃ quicua̱xüü̃xü̃ca̱x i togü i tupanagü i cuma tama nüxü̃ cucuáxü̃ rü cunatü tama nüxü̃ cuáxü̃ rü taxũtáma naga cuxĩnü.

Wenaxarü naxümatü ga Tupanaarü mugü 13:8

Rü taxũtáma namaxã quixãũxãchi rü taxũtáma icuyacu̱x i ngẽma chixexü̃ üxü̃ ¡rü noxtacüma yama̱x! Rü cuma tá nixĩ i cuxíra icunaxügüxü̃ nax cuyamáxü̃. Rü cuwena rü guxü̃ma i duü̃xü̃gü tá nixĩ i yama̱xgüxü̃.

Ãẽ̱xgacügü ga guxchaxü̃güarü mexẽxẽruü̃gü 8:33

Rü yexguma Yedeóü̃ yuxguwena, rü nümagü ga Iraétanüxü̃ rü wena Tupanana nixĩgachi. Rü naguxü̃raü̃xü̃ ga Baáchicüna̱xãxü̃ nicua̱xüü̃gü, rü Baá-beríxü̃ nayauxgü nax norü tupana yixĩxü̃ca̱x.

Yeremía 2:20

Rü nũxcümacürüwatama nixĩ ga choxna pixĩgachixü̃ rü tama chauga pexĩnüechaxü̃xü̃. Rü ñaperügügü: “Tama cuga taxĩnüechaü̃”, ñaperügügü. Pema rü pechauechitae ñoma wüxi i ngexü̃ i natena ngeãẽxü̃rüxü̃, yerü guxü̃ma ga ma̱xpǘnegüwa rü guxü̃ma ga naigü ga imeetaxü̃tüü̃wa nüxü̃ picua̱xüü̃gü ga yema tupananetachicüna̱xãgü.

Yeremía 32:23

Natürü yexguma torü o̱xigü ñaa naanewa ngugügu rü nayauxgüãgu, rü tama cuga naxĩnüe rü tama nagu naxĩ ga yema ucu̱xẽgü ga namaxã nüxü̃ quixuxü̃. Rü taxuxü̃ma naxügü ga yema namaxã nüxü̃ quixuxü̃. Rü ngẽmagagu toxca̱x ícunangu̱xẽxẽ i guxü̃ma i ngẽma guxchaxü̃gü i ñu̱xma nawa tangexmagüxü̃.